দুতিযগাথাসঙ্গণিকৰণ্ণনা

কাযিকাদিআপত্তিৰণ্ণনা

৪৭৪-৫. নিদানুদ্দেসং ৰিনা সেসুদ্দেসাভাৰা ‘‘সব্বপাতিমোক্খুদ্দেসানঞ্চ সঙ্গহো হোতী’’তি ৰুত্তং. ৰিনযে গরুকা ৰিনযগরুকা. ইদং পন দ্ৰীসু গাথাসু কিঞ্চাপি আগতং, অঞ্ঞেহি পন মিস্সেত্ৰা ৰুত্তভাৰা নানাকরণং পচ্চেতব্বং. নৰসু ঠানেসু কম্মং হোতীতি কম্মঞত্তি হোতি. ৰাচাতি ৰচীসম্ভৰা. অদ্ধানহীনো ঊনৰীসতিৰস্সো. ‘‘অপিচেত্থাতি কুরুন্দিৰাদো’’তি ৰুত্তং. ৰনপ্পতিন্তি এৰং অদিন্নাদানে আগতং ৰনপ্পতিং. ৰিস্সট্ঠিছড্ডনেতি সুক্কৰিস্সট্ঠিযং. দুক্কটা কতাতি দুক্কটং ৰুত্তং. আমকধঞ্ঞং ৰিঞ্ঞাপেত্ৰা ভুঞ্জন্তিযা পুব্বপযোগে দুক্কটং, অজ্ঝোহারে পাচিত্তিযং.

পাচিত্তিযৰণ্ণনা

৪৭৬. মহাসঙ্ঘিকা সামণেরেপি আপত্তিং দেসাপেন্তি কির, তেন ৰুত্তং ‘‘ন দেসাপেতব্বা’’তি, দণ্ডকম্মং পন তেসং কাতব্বং তথারূপে ওল়ারিকৰীতিক্কমে.

অৰন্দনীযপুগ্গলাদিৰণ্ণনা

৪৭৭. দসসতং আপত্তিযোতি সহস্সং আপত্তিযো. চম্পাযং ৰিনযৰত্থুস্মিন্তি চম্পেয্যক্খন্ধকে. অধম্মেন ৰগ্গন্তিআদীনি চত্তারি কম্মানিযেৰ ভগৰতা ৰুত্তানীতি অত্থো. ন কেৰলং আপত্তিযেৰ, অথ খো ছ সমথা…পে… সম্মুখাৰিনযেন সম্মন্তি, সমাযোগং গচ্ছন্তি সম্মুখাৰিনযেন সম্পযোগং গচ্ছন্তীতি অত্থো. ৰিনা সমথেহি সম্মতি, সমথভাৰং গচ্ছতি. পটিসেধত্থে সতি ৰিনা সমথেহীতি সমথেহি ৰিনাতি অত্থো.

সোল়সকম্মাদিৰণ্ণনা

৪৭৮. অসুত্তকন্তি সুত্তৰিরহিতং, উসুত্তং তত্র নত্থীতি অধিপ্পাযো.

দুতিযগাথাসঙ্গণিকৰণ্ণনা নিট্ঠিতা.