কথিনভেদৰণ্ণনা

কথিনঅত্থতাদিৰণ্ণনা

৪০৩-৪. কিন্তি কথং. অনাদিযদানং তাৰকালিকৰত্থু. ‘‘অনাগতৰসেন অনন্তরা হুত্ৰা’’তি উদকাহরণাদিপযোগস্স ধোৰনাদিপুব্বকরণস্স পচ্ছা উপ্পজ্জনতো, ধোৰনাদিকিরিযঞ্চ সন্ধায পযোগকরণতো ৰুত্তং. পুরেজাতপচ্চযে পনেস পযোগোতি অত্থো. একং ধম্মম্পি ন লভতি অত্তনো পুরেজাতস্স নত্থিতায.

কথিনাদিজানিতব্বৰিভাগৰণ্ণনা

৪১২. রূপাদিধম্মেসূতি ৰণ্ণগন্ধাদিঅট্ঠকেসু. ‘‘ৰস্সানস্স পচ্ছিমো মাসো’’তি (পারা. ২১৮) ৰুত্তত্তা পচ্ছিমে মাসে যস্মিং ৰা তস্মিং ৰা দিৰসে অত্থরিতুং ৰট্টতীতি সিদ্ধং.

৪১৫. ‘‘আদিচ্চবন্ধুনাতি ৰুত্তত্তা থেরৰচন’’ন্তি ৰদন্তি.

পলিবোধপঞ্হাব্যাকরণকথাৰণ্ণনা

৪১৫-৬. সন্নিট্ঠানন্তিকো কথং বহিসীমায উদ্ধরীযতি? ভিক্খু অকতচীৰরং সমাদায পক্কমতি ‘‘ন পচ্চেস্স’’ন্তি, তস্স বহিসীমাগতস্স এৰং হোতি ‘‘নেৰিমং চীৰরং কারেস্স’’ন্তি, এৰমেতস্স বহিসীমাগতস্স উদ্ধরীযতি. কথং অন্তোসীমায? অকতচীৰরং সমাদায পক্কমতি ‘‘ন পচ্চেস্স’’ন্তি, ততো তত্থ ফাসুৰিহারং অলভন্তো তমেৰ ৰিহারং আগচ্ছতি, তস্স চীৰরপলিবোধোযেৰ ঠিতো, সো চ ‘‘নেৰিমং চীৰরং কারেস্স’’ন্তি চিত্তে উপ্পন্নে ছিজ্জতি, তস্মা ‘‘অন্তোসীমায উদ্ধরীযতী’’তি ৰুত্তং. সন্নিট্ঠানন্তিকং দুৰিধং ‘‘ন পচ্চেস্স’’ন্তি আৰাসপলিবোধং ছিন্দিত্ৰা ততো পুনপি তমেৰ ৰিহারং আগন্ত্ৰা ‘‘নেৰিমং চীৰরং কারেস্স’’ন্তি সন্নিট্ঠানং করোতি, বহিসীমায ঠত্ৰা ‘‘নেৰিমং চীৰরং কারেস্সং ন পচ্চেস্স’’ন্তি চিত্তুপ্পাদেন সন্নিট্ঠানন্তিকং হোতি. গাথাযম্পি ‘‘দ্ৰে পলিবোধা অপুব্বং অচরিম’’ন্তি ইদং ইমমেৰ সন্ধায. ‘‘আসাৰচ্ছেদিকো কথং অন্তোসীমায? আসীসিতেন ‘তুম্হে ৰিহারমেৰ পত্থেথ, অহং পহিণিস্সামী’তি ৰুত্তো পুব্বে ‘ন পচ্চেস্স’ন্তি আৰাসপলিবোধং ছিন্দিত্ৰা গতো পুন তং ৰিহারং গন্ত্ৰা তেন ‘নাহং সক্কোমি দাতু’ন্তি পহিতো হোতী’’তি লিখিতং. ‘‘অত্থারে হি সতি উদ্ধারো নামা’’তি অত্থারং ৰিনা উদ্ধারং ন লভন্তি, তস্মা ৰুত্তং. পুরিমা দ্ৰেতি ‘‘দ্ৰে কথিনুদ্ধারা একুপ্পাদা একনিরোধা’’তি ৰুত্তাধিকারে পঠমং ৰুত্তা অন্তরব্ভারসহুব্ভারা. ন পক্কমনন্তিকাদযো দ্ৰে. একতো নিরুজ্ঝন্তীতি উদ্ধারভাৰং পাপুণন্তীতি অত্থো.

কথিনভেদৰণ্ণনা নিট্ঠিতা.

পঞ্ঞত্তিৰগ্গৰণ্ণনা নিট্ঠিতা.