সোল়সমহাৰারৰণ্ণনা

পঞ্ঞত্তিৰারৰণ্ণনা

১-২. সীলসমাধিপঞ্ঞাৰিমুত্তিৰিমুত্তিঞাণদস্সনসঙ্খাতস্স ধম্মক্খন্ধসরীরস্স সাসনেতি অত্থো. পরিৰারোতি সঙ্গহং যো সমারুল়্হো, তস্স পরিৰারস্স. ৰিনযভূতা পঞ্ঞত্তি ৰিনযপঞ্ঞত্তি. ‘‘পঞ্ঞত্তিকালং জানতা’’তি দুকনযৰসেন ৰত্ৰা পুন সুত্তন্তনযেন ৰত্তুং ‘‘অপিচ পুব্বেনিৰাসাদীহী’’তি ৰুত্তং. তত্থ পস্সনং নাম দস্সনত্তা দিব্বচক্খুনা যোজিতং পটিৰেধঞাণদস্সনং. দেসনাপঞ্ঞায পস্সতাতি আসযানুসযাদিকে. পুচ্ছাযাতি সত্তমী. পুনপি এত্থাতি পুচ্ছাৰিস্সজ্জনে. মিচ্ছাদিট্ঠীতি নত্থিকদিট্ঠি অন্তগ্গাহিকদিট্ঠি. ‘‘আজীৰহেতু পঞ্ঞত্তানী’’তি ৰচনতো ইমানি ছ সিক্খাপদানি ঠপেত্ৰা সেসা আচারৰিপত্তি নামাতি ৰেদিতব্বং. কাযেন পন আপত্তিং আপজ্জতীতি এত্থ ‘‘পুব্বভাগে সেৰনচিত্তমঙ্গং কত্ৰা কাযদ্ৰারসঙ্খাতং ৰিঞ্ঞত্তিং জনযিত্ৰা পৰত্তচিত্তুপ্পাদসঙ্খাতং আপত্তিং আপজ্জতি, কিঞ্চাপি চিত্তেন সমুট্ঠাপিতা ৰিঞ্ঞত্তি, তথাপি চিত্তেন অধিপ্পেতস্স অত্থস্স ৰিঞ্ঞত্তিযা সাধিতত্তা ‘কাযদ্ৰারেন আপজ্জতী’তি ৰুত্ত’’ন্তি ইমমত্থং সন্ধায ৰুত্তং, ন ভণ্ডনাদিত্তযৰূপসমং. আপাণকোটিকন্তি জীৰিতপরিযন্তং কত্ৰা. পোরাণকেহি মহাথেরেহীতি সীহল়দীপে মহাথেরেহি পোত্থকং আরোপিতকালে ঠপিতাতি অত্থো. ‘‘চতুত্থসঙ্গীতিসদিসা পোত্থকারুল়্হসঙ্গীতি অহোসী’’তি ৰুত্তং.

মহাৰিভঙ্গে পঞ্ঞত্তিৰারৰণ্ণনা নিট্ঠিতা.

কতাপত্তিৰারাদিৰণ্ণনা

১৬৬. কতাপত্তিৰারে ‘‘সঙ্ঘিকং মঞ্চং ৰা’’তিআদি অজ্ঝোকাসত্তা ৰিহারব্ভন্তরেপি আপজ্জনতো লেড্ডুপাতাতিক্কমৰসেন ৰুত্তং. দুতিযে সেয্যং সন্থরিত্ৰাতি অব্ভন্তরে সন্থরিতভাৰতো ৰিহারতো বহিগমনেপি তংদিৰসানাগমে আপজ্জনতো ‘‘পরিক্খেপং অতিক্কামেতী’’তি ৰুত্তং.

১৭১. সঞ্চিচ্চ পাণং জীৰিতা ৰোরোপেন্তো চতস্সো আপত্তিযোতি এত্থ কিঞ্চাপি তস্মিং সিক্খাপদে তিরচ্ছানগতপাণোৰ অধিপ্পেতো, অথ খো পাণোতি ৰোহারসামঞ্ঞতো অত্থুদ্ধারৰসেন ‘‘চতস্সো’’তি ৰুত্তং. এস নযো অঞ্ঞেসুপি এৰরূপেসু ঠানেসু.

১৭৩. ৰিকালে গামপ্পৰেসনে ‘‘পঠমং পাদং পরিক্খেপং অতিক্কামেতি, আপত্তি দুক্কটস্সা’তি ৰুত্তত্তা উপচারে নাপজ্জতি, পরিক্খেপং অতিক্কমিত্ৰাৰ আপজ্জতীতি সিদ্ধমেৰা’’তি ৰদন্তি.

১৯৩. পচ্চযৰারে পুরিমৰারতো ৰিসেসো অত্থিযেৰ, ‘‘মেথুনং ধম্মং পটিসেৰন্তো কতি আপত্তিযো আপজ্জতী’’তি ৰুত্তে জতুমট্ঠকস্সোকাসো ন জাতো, ইধ পন ‘‘মেথুনং ধম্মং পটিসেৰনপচ্চযা’’তি ৰুত্তে পুগ্গলনিদ্দেসাভাৰা জতুমট্ঠকঞ্চ পৰিট্ঠং, এৰং ৰিসেসো অত্থি. তথা এৰরূপেসু ঠানেসু.

মহাৰিভঙ্গে চ ভিক্খুনিৰিভঙ্গে সোল়সমহাৰারৰণ্ণনা নিট্ঠিতা.