৮. চীৰরক্খন্ধকৰণ্ণনা

জীৰকৰত্থুকথাৰণ্ণনা

৩২৬. রাজগহকোতি রাজগহৰাসী.

৩২৮. অমোহজাতিকত্তা ন চিরস্সেৰ ৰিঞ্ঞুতং পাপুণি. অহং তে পিতা, কেনট্ঠেন? যস্মা ত্ৰং মযা পোসাপিতো.

৩২৯. ‘‘সক্কে ৰিস্সট্ঠমত্তে’’তি পাঠো, অট্ঠমসিক্খাপদে ৰিস্সট্ঠমত্তোৰ.

পজ্জোতরাজৰত্থুকথাৰণ্ণনা

৩৩৪. ভুঞ্জিতুং নিসিন্নস্সাতি এত্থ ‘‘ধম্মপদে ‘বহিনগরে দিস্ৰা’তি ৰুত্তং, তস্মা দ্ৰীসু দিৰসেসু দিন্নং তেন তেসু একেকং গহেত্ৰা দ্ৰীসু অট্ঠকথাসু ৰুত্তন্তি যুজ্জতী’’তি ৰদন্তি.

সমত্তিংসৰিরেচনকথাৰণ্ণনা

৩৩৬. কবল়ে কবল়েতি এত্থ কিঞ্চাপি গুল়াদীসু পক্খিত্তং, তং পন ভগৰাৰ পরিভুঞ্জি, তস্মা নত্থি দোসো.

ৰরযাচনকথাৰণ্ণনা

৩৩৭. মহাপিট্ঠিযকোজৰং নাম অতিরেকচতুরঙ্গুলপুপ্ফং কির.

কম্বলানুজাননাদিকথাৰণ্ণনা

৩৪০. উপচারেতি সুসানস্স উপচারে. বহিপি ৰট্টতীতি একে. কতিককরণং দস্সেত্ৰা ‘‘ময্হং সন্তকং তৰ চ মম চ হোতূতি ৰত্ৰা ইতরেন চ তথাৰুত্তে ৰট্টতী’’তি সমানপরিক্খারৰিধিং ৰদন্তি.

৩৪২. ‘‘খণ্ডসীমাযপি সম্মন্নিতুং ৰট্টতীতি ৰুত্তত্তা সেসকম্মানিপি তত্থ নিসীদিত্ৰা কাতুং ৰট্টতী’’তি ৰুত্তং. ‘‘এৰং সন্তে চোরিকায কতসদিসং হোতি, তস্মা ন ৰট্টতী’’তি দীপৰাসিনো ৰদন্তি কির. ‘‘চোরিকায গহিতত্তা ন পাপুণাতীতি সেনাসনক্খন্ধকে আগতসুত্তঞ্চ সাধক’’ন্তি ৰদন্তি, তস্মা তেসং মতেন ইদং আৰেণিকলক্খণন্তি ৰেদিতব্বং.

ভণ্ডাগারসম্মুতিআদিকথাৰণ্ণনা

৩৪৩. ‘‘ইদং পন ভণ্ডাগারন্তি আৰেণিকলক্খণ’’ন্তি ৰুত্তং.

চীৰররজনকথাৰণ্ণনা

৩৪৪. গোমযে আপত্তি নত্থি, ৰিরূপত্তাৰারিতং. ‘‘কুঙ্কুমপুপ্ফং ন ৰট্টতী’’তি ৰদন্তি. ‘‘অল্লিকাযা’’তিপি পাঠো অত্থি.

নিসীদনাদিঅনুজাননকথাৰণ্ণনা

৩৫৩. অট্ঠানমেতন্তি এত্থ রূপকণ্ডে ‘‘চতুসমুট্ঠানিক’’ন্তি ৰুত্তত্তা কম্মসমুট্ঠানং রাগচিত্তাভাৰা ন মুচ্চতীতি ৰা রাগপচ্চযে সতি কম্মসমুট্ঠানং হোতীতি ৰা ৰিচারেত্ৰা গহেতব্বং কথাৰত্থুনা চ.

৩৬২. অগ্গল়গুত্তিযেৰ পমাণন্তি ইমেহি চতূহি নিক্খেপকারণেহি ঠপেন্তেন অগ্গল়গুত্তিৰিহারেযেৰ ঠপেতুং ৰট্টতীতি অধিপ্পাযো.

সঙ্ঘিকচীৰরুপ্পাদকথাৰণ্ণনা

৩৬৩. নো চে অত্থতং হোতি ‘‘একং চীৰরমাস’’ন্তি ন ৰত্তব্বং. কস্মা? ‘‘অনুজানামি, ভিক্খৰে, তস্সেৰ তানি চীৰরানি যাৰ চীৰরমাসা’’তি ৰচনস্স অভাৰতো, তস্মা অনত্থতকথিনস্স অননুঞ্ঞাতন্তি চে? ন, হেট্ঠা অনুঞ্ঞাতত্তা, ততো লীনত্থদীপনত্থমিধ তথা ৰুত্তত্তা চ. হেট্ঠা হি ‘‘অকালচীৰরং নাম অনত্থতে কথিনে একাদসমাসে উপ্পন্নং, অত্থতে কথিনে সত্তমাসে উপ্পন্নং, কালেপি আদিস্স দিন্নং, এতং অকালচীৰরং নামা’’তি (পারা. ৫০০) ৰচনতো অনত্থতকথিনানং একচীৰরমাসে উপ্পন্নং, তেসংযেৰ হোতীতি সিদ্ধং, তস্মা ইধ তং অৰত্ৰা একোপি তযো গণপূরকে লভিত্ৰা কথিনং অত্থরিতুং লভতীতি ইমং লীনত্থং পকাসেতুং ‘‘যাৰ কথিনস্স উব্ভারাযা’’তি ৰুত্তং. ইতরথা অযমত্থো ন ঞাযতি. ‘‘জানিতব্বো চ ৰিনযধরেহীতি তথা ৰুত্তোতি অপরে’’তি ৰুত্তং. অত্থতং হোতি, পঞ্চ মাসে সব্বং তস্সেৰ ভিক্খুনো হোতীতি সম্বন্ধো. অচ্চন্তসংযোগৰসেন উপযোগৰচনং. ‘‘ইধ ৰস্সংৰুত্থসঙ্ঘস্সা’’তি নিযমিতত্তা ‘‘ৰস্সাৰাসিকং দেমা’’তি এত্থ চ ‘‘ইধা’’তি অধিকারত্তা তস্মিং ৰুত্তে লভতি. ‘‘পিট্ঠিসমযে উপ্পন্নত্তাতি চীৰরকালস্সাসন্নত্তা চ অনত্থতকথিনানম্পি ৰুত্থৰস্সানঞ্চ অনুঞ্ঞাতট্ঠানত্তা এৰ ৰুত্ত’’ন্তি অঞ্ঞতরস্মিং গণ্ঠিপদে লিখিতং. কেচি পন ‘‘যং পন ইদং ‘ইধ ৰস্সংৰুত্থসঙ্ঘস্সা’তিআদিং কত্ৰা যাৰ ‘অনাগতৰস্সে’তি পদং, তাৰ পুচ্ছিত্ৰা ‘কস্মা? পিট্ঠিসমযে উপ্পন্নত্তা’তি ইদং পরতো ‘তত্র সম্মুখীভূতানং সব্বেসং পাপুণাতী’তি ইমস্স পরিযোসানে ‘কস্মা? পিট্ঠিসমযে উপ্পন্নত্তা’তি লিখিতব্বং. কস্মাতি চে? পরতো ‘চীৰরমাসতো পট্ঠায যাৰ হেমন্তস্সা’তি ৰুত্তেন নিব্বিসেসত্তা, তস্মা এৰ একচ্চেসু পণ্ডিতন্তি ৰদন্তী’’তি ৰদন্তি. ইধ পন ইধ-সদ্দেন ৰিসেসিতং, তত্থ নত্থি, তস্মা অঞ্ঞমঞ্ঞৰিরোধো নত্থীতি গহেতব্বং. ‘‘ময্হিমানি চীৰরানি পাপুণন্তী’’তি ৰচনমেৰাধিট্ঠানং, ইদমেত্থ উক্কট্ঠৰসেন ৰুত্তং. ‘‘ময্হিমানি চীৰরানী’তি ৰুত্তেপি অধিট্ঠিতমেৰ হোতী’’তি ৰুত্তং. ‘‘ময্হিমানী’তি ৰুত্তে তস্স চীৰরানি নাম নত্থি, তস্মা ‘চীৰরানি পাপুণন্তী’তি ৰত্তব্বমেৰা’’তি ৰদন্তি. দুগ্গহিতানীতি সঙ্ঘিকানেৰ হোন্তি. ‘‘গহিতমেৰ নামা’তি ইমস্স ইদং পত্তন্তি কিঞ্চাপি ন ৰিদিতং, তে পন ভাগা তেসং অত্থতো পত্তাযেৰাতি অধিপ্পাযো’’তি লিখিতং. ‘‘একস্মিং অপতিতে পুন আগতা লভন্তী’’তি ৰুত্তং.

উপনন্দসক্যপুত্তৰত্থুকথাৰণ্ণনা

৩৬৪. ‘‘ন, ভিক্খৰে, অঞ্ঞত্র ৰস্সংৰুত্থেনা’’তি চীৰরসমযং উপাদায পটিক্খেপো কতো.একস্মিং ৰিহারে ‘‘রাজৰিহারে ৰিয নানাপরিৰেণেসু ৰা ইধ ৰা ৰুত্থা লভতূ’’তি ৰত্ৰা দিন্নং. ‘‘সত্তাহৰারেন অরুণমেৰ উট্ঠাপেতীতি এতং ৰচনমত্তমেৰ একৰিহারে সত্তাহকিচ্চাভাৰা’’তি চ লিখিতং.

মতসন্তককথাৰণ্ণনা

৩৬৯. ভিক্খুস্সাতি ভিক্খুস্মিং কালংকতে. তত্থ ‘‘পত্তচীৰরে’’তি পধানপরিক্খারদস্সনমুখেন সব্বপরিক্খারনিদস্সনন্তি ৰেদিতব্বং. অধম্মেন উপ্পন্নঞ্চেতং হোতি, সঙ্ঘস্স কপ্পিযমেৰ মতত্তাতি একে. নোতি তক্কো পত্তচতুক্কে সব্বথা অকপ্পিযপত্তনযৰিরোধতো. অধম্মেন উপ্পন্নসেনাসনে চ ৰসতো অনাপত্তি. অঞ্ঞতরস্মিং আৰাসে দ্ৰে ভিক্খূ ৰসন্তি, তত্থ চেকো কালংকতো, ইতরো তস্স পরিক্খারং অপাপেত্ৰা তং থেয্যচিত্তেন গণ্হাতি, সঙ্ঘসন্তকং গহিতং হোতি, ভণ্ডগ্ঘেন কারেতব্বো. অনাৰাসে গণ্হাতি, ন কারেতব্বো অস্সামিকস্স গহিতত্তা. মরণসমযে ৰত্তুং অসহন্তো চে চিত্তেনেৰ দেতি, পুঞ্ঞং পসৰতি, সঙ্ঘোৰ তস্স সামী. পরো ৰা অৰিস্সাসিকো সযমেৰ গণ্হাতি, গহণং ন রুহতি, থেয্যচিত্তেন চে, ভণ্ডগ্ঘেন কারেতব্বো. তস্স চ আৰাসগতস্স কো সামী. ‘‘সঙ্ঘো সামী’’তি ৰচনতো সঙ্ঘেন বলক্কারেন সো ৰারেতব্বোতি একে. জীৰমানকালে গহিতত্তা ন সঙ্ঘো সামীতি একে. সামিকো চে সযং পস্সিত্ৰা অচ্ছিন্দিতুং লভতি, সঙ্ঘোপি লভতি সামিঠানে ঠিতত্তাতি ইতরে, ৰিচারেত্ৰা গহেতব্বং.

মতকস্স হিরঞ্ঞাদিঅকপ্পিযভণ্ডং হোতি. উগ্গহিতঞ্চেতং হোতি, উগ্গহিতে ৰুত্তনযেন পটিপজ্জিতব্বং. ধম্মেন উপ্পন্নং চে, কপ্পিযকারকো আচিক্খিতব্বো. দাসো চে গহিতো হোতি, ন সঙ্ঘো সামী, আরামিকো চে, সঙ্ঘো সামী. গাৰীমহিংসীআদযো হোন্তি, আৰাসগতানং সঙ্ঘো সামী, অনাৰাসগতানং ন সঙ্ঘো সামী. সঙ্ঘো চে আৰাসং আনেত্ৰা অত্তনো সন্তকং কত্ৰা পচ্ছা সমীপে বহিসীমায ঠপেতি, কারকসঙ্ঘো সামী, তথা আরামিকে. মতকস্স পরিক্খারো নিক্খেপৰসেন ঠপিতো হোতি, এসোৰ সামী. মহগ্ঘো চে হোতি, সেসস্স সঙ্ঘো সামী. ‘‘কেনচি গিলানুপট্ঠাকেনা’’তি ৰত্তব্বক্কমো এতেন দস্সিতো. পুন উপট্ঠাকানং বহুভাৰে সতি সব্বেসং দাতব্বকম্মং দস্সেন্তেন ভগৰতা কম্মৰাচাযং ‘‘গিলানুপট্ঠাকান’’ন্তি ৰুত্তং. সামণেরৰারে ‘‘চীৰর’’ন্তি পাঠো. ‘‘ইমং তুয্হং দেমি দদামি দজ্জামি ওণোজেমি পরিচ্চজামি ৰিস্সজ্জামি নিস্সজ্জামী’তি ৰা ‘ইত্থন্নামস্স দেমি…পে… নিস্সজ্জামী’তি ৰা ৰদতি, ‘সম্মুখা ৰা পরম্মুখা ৰা ৰুত্তে দিন্নংযেৰ হোতী’তি দানলক্খণস্স চ ‘তুয্হং গণ্হাহী’তি ৰুত্তে ‘ময্হং গণ্হামী’তি ৰদতি, ‘সুদিন্নং সুগ্গহিতঞ্চা’তি (পারা. অট্ঠ. ২.৪৬৯) গহণলক্খণস্স চ ৰুত্তত্তা ‘মম সন্তকং তৰ চ মম চ হোতূ’তি এৰমাদিৰচনেন সমানপরিক্খারং কাতুং ৰট্টতীতি আচরিযা’’তি লিখিতং.

অনুগণ্ঠিপদে পন অতীৰ পপঞ্চং কত্ৰা পুন ‘‘ইদমেত্থ আচরিযানং সন্নিট্ঠানং – সচেসম্বহুলা, দ্ৰে ৰা সমানপরিক্খারং কত্তুকামা হোন্তি, তে সব্বে অত্তনো সন্তকং ৰত্তমানং উপ্পজ্জনকেন সদ্ধিং পেসলস্স একস্স পরিচ্চজন্তি, সো পুন তেসমেৰ পরিচ্চজতি, এত্তাৰতা তে সমানপরিক্খারিকা হোন্তীতি. ইদং সমানপরিক্খারলক্খণং পাল়িআদীসু ৰুত্তলক্খণেযেৰ পতনতো অচলপ্পত্তং হোতি, তথাপি পোরাণৰিধিং অজ্ঝোত্থরিত্ৰা ৰত্তনতো পটিসেধেতব্বো, আচরিযানং মতানুসারেন কাতব্বং কাতুকামেনাতি অপরে’’তি ৰুত্তং, ‘‘ৰস্সংৰুত্থসামণেরো পঞ্চসু সিক্খাপদেসু একং অতিক্কমিত্ৰা পুন গহিতো লাভং ন লভতি, অন্তিমৰত্থুং অজ্ঝাপন্নো নাম হোতী’’তি ৰদন্তি.

ৰস্সংৰুত্থানংঅনুপ্পন্নচীৰরকথাৰণ্ণনা

৩৭৫. উপ্পন্নে চীৰরে অভাজিতে পক্কমতীতি এত্থ ‘‘সঙ্ঘেন তত্রুপ্পাদতো একেকস্স ভিক্খুনো এত্তকং ৰস্সাৰাসিকং দাতুং সঙ্ঘস্স রুচ্চতী’’তি সাৰিতেপি ৰিব্ভমতি, ততো ন লভতি, পুন পব্বজিত্ৰা উপসম্পজ্জিত্ৰা চীৰরভাজনং সম্ভাৰেন্তোপি ন লভতিযেৰ পুব্বপকতিতো ভট্ঠত্তা. অথ পাপিতে ৰিব্ভমতি, লভতী’’তি চ ৰুত্তং.

সঙ্ঘেভিন্নেচীৰরুপ্পাদকথাৰণ্ণনা

৩৭৬. পরসমুদ্দেতি জম্বুদীপে.

অট্ঠচীৰরমাতিকাকথাৰণ্ণনা

৩৭৯. যস্মা অপরিক্খিত্তস্স পরিক্খেপারহট্ঠানং দুব্বিজানং, তস্মা ‘‘অপিচা’’তিআদি ৰুত্তং. তত্থ ধুৰসন্নিপাতট্ঠানম্পি পরিযন্তগতমেৰ গহেতব্বং. ‘‘মহাপচ্চরিযং পন ভিক্খূসুপি…পে… পাপুণাতীতি ‘উপচারসীমায দেমা’তি এৰং দিন্নমেৰ সন্ধাযা’’তি লিখিতং. ‘‘সমানসংৰাসকসীমাযা’’তি ৰুত্তে খণ্ডসীমাদীসু ঠিতানং ন পাপুণাতি তাসং ৰিসুং সমানসংৰাসকসীমত্তা. সমানসংৰাসকঅৰিপ্পৰাসসীমানং ইদং নানত্তং – ‘‘অৰিপ্পৰাসসীমায দম্মী’’তি দিন্নং গামট্ঠানং ন পাপুণাতি. কস্মা? ‘‘ঠপেত্ৰা গামঞ্চ গামূপচারঞ্চা’’তি ৰুত্তত্তা. ‘‘সমানসংৰাসকসীমাযা’’তি দিন্নং পন যস্মিং ঠানে অৰিপ্পৰাসসীমা অত্থি, তত্থ ঠিতানং, ইতরত্র ঠিতানঞ্চ পাপুণাতি. ‘‘খণ্ডসীমাযং ঠত্ৰা ‘সীমট্ঠকসঙ্ঘস্স দম্মী’তি ৰুত্তে উপচারসীমায এৰ পরিচ্ছিন্দিত্ৰা দাতব্ব’’ন্তি ৰুত্তং. ‘‘অৰিপ্পৰাসসীমায দেমা’’তি খণ্ডসীমাযং ঠত্ৰা দিন্নে তত্থেৰ পাপুণাতীতি কেচি. যোজনসতম্পি পূরেত্ৰা নিসীদন্তীতি এত্থ ৰিহারূপচারে হত্থপাসেন, বহিগামাদীসু দ্ৰাদসহত্থেন উপচারোতি একে. ‘‘ইমস্মিং ৰিহারে সঙ্ঘস্সা’’তি ৰুত্তে একাবদ্ধা হুত্ৰাপি পরিক্খেপপরিক্খেপারহট্ঠানং অতিক্কমিত্ৰা ঠিতানং ন পাপুণাতীতি একে. ‘‘ভিক্খুনিৰিহারতো বহি যত্থ কত্থচি ঠত্ৰা ‘সঙ্ঘস্সা’তি ৰুত্তে ভিক্খুসঙ্ঘোৰ সামী’’তি ৰদন্তি. একোপি গন্ত্ৰাতি এত্থ সব্বেসং ৰা পাপেত্ৰা গন্তব্বং, আনেত্ৰা ৰা পাপেতব্বং, ইতরথা গতস্স ন পাপুণাতি. সমানলাভকতিকা মূলাৰাসে সতি সিযা, মূলাৰাসৰিনাসেন কতিকাপি ৰিনস্সতি. সমানলাভৰচনং সতি দ্ৰীসু, বহূসু ৰা যুজ্জতি. তেনেৰ একস্মিং অৰসিট্ঠে যুজ্জতীতি নো মতি.

‘‘তাৰকালিককালেন, মূলচ্ছেদৰসেন ৰা;

অঞ্ঞেসং কম্মং অঞ্ঞস্স, সিযা নাৰাসসঙ্গমো’’তি. –

আচরিযো.

সব্বত্থ দিন্নমেৰাতি ‘‘সমানভাগোৰ হোতী’’তি ৰদন্তি. ‘‘একমেকং অম্হাকং পাপুণাতীতি চে ৰদতি, ৰট্টতী’’তি ৰদন্তি ৰিভাগস্স কতত্তা. ‘‘ভিক্খুসঙ্ঘস্স চীৰরে দিন্নে পংসুকূলিকানং ন ৰট্টতী’’তি ৰদন্তি. ‘‘উভতোসঙ্ঘস্সা’’তি ৰুত্তে ‘‘ভিক্খুসঙ্ঘস্সা’’তি অৰুত্তত্তা ভিক্খুনিসঙ্ঘেন মিস্সিতত্তা, তত্থ অপরিযাপন্নত্তা চ পুগ্গলো ৰিসুং লভতি. এৰং সন্তে ‘‘ভিক্খুসঙ্ঘস্স চ ভিক্খুনিসঙ্ঘস্স চ দম্মী’’তি ৰুত্তেপি ‘‘উভতোসঙ্ঘস্স দিন্নমেৰ হোতী’’তি ইমিনা ৰিরুজ্ঝতীতি চে? ন ৰিরুজ্ঝতি, তং দ্ৰিন্নং সঙ্ঘানং দিন্নভাৰমেৰ দীপেতি, ন উভতোসঙ্ঘপঞ্ঞত্তিং, তস্মা এৰ ‘‘ভিক্খুসঙ্ঘস্স চ ভিক্খুনিসঙ্ঘস্স চ তুয্হঞ্চা’’তি ৰারো ন ৰুত্তো. অথ ৰা অট্ঠকথাৰচনমেৰ পমাণং, ন ৰিচারণাতি একে. যস্মা একো অদ্ধানাদিযকো ৰিয দুৰিধো ন হোতি, তস্মা উভতোসঙ্ঘগ্গহণেন একো ভিক্খু ন গহিতোতি. ‘‘সব্বাৰাসস্স চ চেতিযস্স চ ধম্মস্স চা’তি ৰুত্তে সব্বৰিহারেসু চেতিযধম্মানং একেকস্স ভিক্খুনো ভাগো দাতব্বো’’তি ৰদন্তি. ‘‘ভিক্খুসঙ্ঘস্স চ চেতিযস্স চা’’তি ৰুত্তে ন ৰিরুজ্ঝতীতি চে? ন, তত্থ ‘‘ভিক্খুসঙ্ঘস্সা’’তি ৰুত্তত্তা, ইধ ৰিহারেন ঘটিতত্তা চ তম্হি তম্হি ৰিহারে একভাগং লভিতব্বমেৰাতি পরিহরন্তি. অত্তনো পাপেত্ৰাতি ৰিকালে অপরিভোগত্তা সকলোপি ৰট্টেয্যাতি চে? ‘‘ভিক্খুসঙ্ঘস্স হরা’’তি ৰুত্তত্তা, তেন ‘‘হরামী’’তি গহিতত্তা চ ন ৰট্টতি. পচ্ছিমৰস্সংৰুত্থানম্পীতি এত্থ অপি-সদ্দো অৰধারণত্থো, পচ্ছিমৰস্সংৰুত্থানমেৰাতি অত্থো, ইতরথা সমুচ্চযত্থে গহিতে ‘‘লক্খণঞ্ঞূ ৰদন্তী’’তি ৰচনং নিরত্থকং সিযা. কস্মাতি আরভিত্ৰা পপঞ্চং করোন্তি. কিং তেন, পরতো ‘‘চীৰরমাসতো পট্ঠায…পে… অতীতৰস্সংৰুত্থানমেৰ পাপুণাতী’’তি ইমিনা সিদ্ধত্তা ন ৰিচারিতং, তেন ৰুত্তং ‘‘লক্খণঞ্ঞূ’’তি অচলৰসেন. সচে পন বহিউপচারসীমায ঠিতো…পে… সম্পত্তানং সব্বেসং পাপুণাতীতি যত্থ কত্থচি ৰুত্থৰস্সানন্তি অধিপ্পাযো ‘‘যত্থ কত্থচি ৰুত্থৰস্সানং সব্বেসং সম্পত্তানং পাপুণাতী’’তি (কঙ্খা. অট্ঠ. অকালচীৰরসিক্খাপদৰণ্ণনা) কঙ্খাৰিতরণিযং ৰুত্তত্তা. গিম্হানং পঠমদিৰসতো পট্ঠায ৰুত্তে পন যস্মা অনন্তরাতীতং হেমন্তং এৰ ৰুত্থা নাম হোন্তি, ন ৰস্সং, তস্মা ‘‘মাতিকা আরোপেতব্বা’’তি ৰুত্তং. যে ৰা থেরেহি পেসিতা, তেসং পাপুণাতীতি কির অত্থো.

চীৰরক্খন্ধকৰণ্ণনা নিট্ঠিতা.