১১. একাদসমাদিসিক্খাপদৰণ্ণনা

১২১৪. উপচারং সন্ধায কথিতন্তি ‘‘দ্ৰাদসহত্থং উপচারো’’তি লিখিতং.

১২২১. সুত্তন্তে ওকাসং কারাপেত্ৰা ৰিনযং ৰা অভিধম্মং ৰা পুচ্ছতীতি এত্থ চ তীণি পিটকানি অত্তনো অত্তনো নামেন ৰুত্তানীতি কত্ৰা অভিধম্মো বুদ্ধেন ভাসিতো এৰাতি দীপিতং হোতি.

১২২৪-৫. থনো চ উদরো চ থনুদরা. ‘‘সংকচ্চিকায পমাণং তিরিযং দিযড্ঢহত্থা’’তি পোরাণগণ্ঠিপদে ৰুত্তং. ‘‘অপরিক্খিত্তস্স গামস্স উপচারং ওক্কমন্তিযা’’তি বহূসু পোত্থকেসু, সঙ্ঘাদিসেসকণ্ডে ৰিয ‘‘উপচারং অতিক্কমন্তিযা’’তি পাঠো অপ্পকেসু, সোৰ পাঠো. অট্ঠকথাযং ‘‘পরিক্খেপং অতিক্কমন্তিযাতি একেন পাদেন অতিক্কন্তে দুক্কটং, দুতিযেন পাচিত্তিযং. উপচারেপি এসেৰ নযো’’তি ৰচনম্পি ‘‘উপচারং অতিক্কমন্তিযা’’তি পাঠোতি দীপেতীতি নো তক্কোতি আচরিযো.

একাদসমাদিসিক্খাপদৰণ্ণনা নিট্ঠিতা.

ছত্তুপাহনৰগ্গৰণ্ণনা নিট্ঠিতা.

নিগমনৰণ্ণনা

গিরগ্গসমজ্জাদীনি ‘‘অচিত্তকানি লোকৰজ্জানী’’তি ৰুত্তত্তা ‘‘নচ্চ’’ন্তি ৰা ‘‘গন্ধো’’তি ৰা অজানিত্ৰাপি দস্সনেন, ৰিলিম্পনেন ৰা আপজ্জনতো ৰত্থুঅজাননচিত্তেন অচিত্তকানি. ‘‘নচ্চ’’ন্তি ৰা ‘‘গন্ধো’’তি ৰা জানিত্ৰা পস্সন্তিযা, ৰিলিম্পন্তিযা চ অকুসলত্তা এৰ লোকৰজ্জানি. চোরিৰুট্ঠাপনাদীনি ‘‘চোরী’’তিআদিনা ৰত্থুং জানিত্ৰা করণে এৰ আপত্তিসব্ভাৰতো সচিত্তকানি. উপসম্পদাদীনং একন্তেন অকুসলচিত্তেনেৰ অকত্তব্বত্তা পণ্ণত্তিৰজ্জানি. ‘‘ইধ সচিত্তকাচিত্তকতা পণ্ণত্তিজাননাজাননতায অগ্গহেত্ৰা ৰত্থুজাননাজাননতায গহেতব্বা’’তি লিখিতং. অনুগণ্ঠিপদে পন ‘‘গিরগ্গসমজ্জাদীনি ‘অচিত্তকানি লোকৰজ্জানী’তি ৰুত্তত্তা ‘নচ্চ’ন্তি ৰা ‘সঙ্ঘাণী’তি ৰা ‘গন্ধো’তি ৰা তস্স নামৰসেন অজানিত্ৰা মাযাকারস্স মাযানি সীসট্ঠিআদীনি পটিসঙ্খায পস্সন্তিযা, অক্খমালাদিঅত্থায সঙ্ঘাণিং কটিযা বন্ধন্তিযা, ‘সেদগন্ধং অপনেত্ৰা বুদ্ধপূজং করিস্সামী’তি উপ্পন্নেন চিত্তেন গন্ধং ৰিলিম্পেত্ৰা নহাযন্তিযা চ আপত্তিসব্ভাৰতো নামেন সদ্ধিং নামৰসেন ৰা ৰত্থুস্স অজাননচিত্তেন অচিত্তকানি নাম. ন অন্ধকারে ‘কটিসুত্তমিদ’ন্তি সঞ্ঞায সঙ্ঘাণিং গহেত্ৰা কটিযং ধারণকালে, মত্তিকাসঞ্ঞায চ গন্ধং গহেত্ৰা ৰিলিম্পনকালে আপত্তিসব্ভাৰতো ‘অচিত্তকানী’তি ৰত্তব্বানি. তস্মিং কালে অনাপত্তি, তেনেৰ সঙ্ঘাণিযা অসঙ্ঘাণিসঞ্ঞাৰারেপি ‘আপত্তি পাচিত্তিযস্সা’তি পাল়ি ন ৰুত্তা. যথা ‘খেত্তআবাধপচ্চযা, কটিসুত্তকং ধারেতী’তি ৰচনতো ৰিনাপি অকুসলেন সঙ্ঘাণিআদীনি সক্কা ধারেতুন্তি সিদ্ধং, এৰং আবাধপচ্চযা ৰিনাপি অকুসলেন ন সক্কা সুরং পাতুন্তি সিদ্ধং ‘অনাপত্তি আবাধপচ্চযা মজ্জং পিৰতী’তি পাল়িযা অভাৰতো. অকুসলেন ৰিনা মধুপুণ্ণমুট্ঠিযং পক্খিত্তমজ্জস্স অজ্ঝোহরণকালাদীসু সুরাপানাপত্তিং আপজ্জতীতি চ সিদ্ধং ‘মজ্জে অমজ্জসঞ্ঞী পিৰতি, আপত্তি পাচিত্তিযস্সা’তি (পাচি. ৩২৮) ৰুত্তত্তা. কিংবহুনা, কামভোগসঞ্ঞায সদ্ধিং ‘সঙ্ঘাণী’তি চ ‘গন্ধো’তি চ জানিত্ৰা ৰিনা অনাপত্তিকারণেন ধারেন্তিযা একন্তাকুসলত্তা লোকৰজ্জানি নাম ৰুচ্চন্তি. ইমিনা উপাযেন সেসেসুপি নযো নেতব্বো. এত্থ সুরাপানাধিকারে উপতিস্সত্থেরৰাদো’’তি ৰুত্তং. অসংকচ্চিকসিক্খাপদে ‘‘অপরিক্খিত্তস্স গামস্স উপচারং ওক্কমন্তিযাতি পাঠো’’তি চ ‘‘পণীতভোজনৰিঞ্ঞত্তি, অচেলকসিক্খাপদং, নিমন্তিতস্স চারিত্তাপজ্জনং, দুট্ঠুল্লপ্পটিচ্ছাদনং, ঊনৰীসতিৰস্সুপসম্পদং, মাতুগামেন সদ্ধিং সংৰিধায অদ্ধানগমনং, রাজন্তেপুরপ্পৰেসনং, সন্তং ভিক্খুং অনাপুচ্ছা ৰিকালে গামপ্পৰেসনং, নিসীদনং, ৰস্সিকসাটিকন্তি পাঠো’’তি চ ৰুত্তং.

নিগমনৰণ্ণনা নিট্ঠিতা.

পাচিত্তিযকণ্ডৰণ্ণনা নিট্ঠিতা.

উভতোৰিভঙ্গট্ঠকথাৰণ্ণনা নিট্ঠিতা.

নমো তস্স ভগৰতো অরহতো সম্মাসম্বুদ্ধস্স