৭. সপ্পাণকৰগ্গো

১. সঞ্চিচ্চপাণসিক্খাপদৰণ্ণনা

৩৮২. সঞ্চিচ্চপাণসিক্খাপদং উত্তানত্থমেৰ.

২. সপ্পাণকসিক্খাপদৰণ্ণনা

৩৮৭. ‘‘পাণো অত্থী’’তি জানন্তোপি ‘‘মরিস্সন্তী’’তি অৰিচারেত্ৰা পিৰতিচে, অনাপত্তি.

জলে পক্খিপনং পুপ্ফং, জলপ্পৰেসনং ইদং;

এৰং উভিন্নং নানত্তং, ঞেয্যং ঞাণৰতা সদাতি.

সপ্পাণকসিক্খাপদৰণ্ণনা নিট্ঠিতা.

৩. উক্কোটনসিক্খাপদৰণ্ণনা

৩৯২. ততিযে দ্ৰাদস উক্কোটা ৰেদিতব্বা. তত্থ অকতং কম্মং, দুক্কটং কম্মং, পুন কাতব্বং কম্মন্তি অনুৰাদাধিকরণে লব্ভন্তি. অনিহটং, দুন্নিহটং, ন পুন হরিতব্বন্তি ৰিৰাদাধিকরণে লব্ভন্তি, অৰিনিচ্ছিতং, দুৰিনিচ্ছিতং, পুন ৰিনিচ্ছিতব্বন্তি আপত্তাধিকরণে লব্ভন্তি. অৰূপসন্তং, দুৰূপসন্তং, পুন ৰূপসমেতব্বন্তি কিচ্চাধিকরণে লব্ভন্তীতি অট্ঠকথানযো, পাল়িযং পনেত্থ মুখমত্তমেৰ দস্সিতং.

উক্কোটনসিক্খাপদৰণ্ণনা নিট্ঠিতা.

৪. দুট্ঠুল্লসিক্খাপদৰণ্ণনা

৩৯৯. ‘‘পারাজিকানীতি অত্থুদ্ধারৰসেন দস্সিতানী’’তি কথং ৰিঞ্ঞাযতীতি চে? পরিৰারপাল়িতো. ৰুত্তঞ্হি তত্থ ‘‘আপত্তাধিকরণপচ্চযা কতি আপত্তিযো আপজ্জতি. আপত্তাধিকরণপচ্চযা চতস্সো আপত্তিযো আপজ্জতি. ভিক্খুনী জানং পারাজিকং ধম্মং পটিচ্ছাদেতি, আপত্তি পারাজিকস্স. ৰেমতিকা পটিচ্ছাদেতি, আপত্তি থুল্লচ্চযস্স. ভিক্খু সঙ্ঘাদিসেসং পটিচ্ছাদেতি, আপত্তি পাচিত্তিযস্স. আচারৰিপত্তিং পটিচ্ছাদেতি, আপত্তি দুক্কটস্সা’’তি (পরি. ২৯০). পারাজিকং পটিচ্ছাদেন্তো ভিক্খু অনাপত্তি, নো আপত্তিং আপজ্জতি অৰুত্তত্তাতি চে? ন, সংকিলিট্ঠেন চিত্তেন পটিচ্ছাদনে ৰিনা আপত্তিযা অসম্ভৰতো. দুক্কটৰারে ৰত্তব্বাপি পারাজিকাপত্তিযো পঠমং অত্থুদ্ধারৰসেন সঙ্ঘাদিসেসেহি সহ ৰুত্তত্তা ন সক্কা পুন ৰত্তুন্তি ন ৰুত্তাতি ৰেদিতব্বা.

যাৰ কোটি ন ছিজ্জতীতি চেত্থ যো অন্তমসো পটিচ্ছাদনত্থং অঞ্ঞস্স আরোচেতু ৰা, মা ৰা, পটিচ্ছাদনচিত্তেনেৰ আপত্তিং আপন্নো. তস্স পুন অঞ্ঞস্স পটিচ্ছাদনত্থং অনারোচনেনেৰ ন কোটি ছিন্না হোতি, কিং পুন পটিনিৰত্তিত্ৰা ৰচনেন পযোজনন্তি ন অন্তিমস্স অনারোচনেন ছিন্না হোতি, অপ্পটিচ্ছাদনেন এৰ ছিন্না হোতি, ততো অপ্পটিচ্ছাদনত্থং অপুব্বস্স আরোচেতব্বং, ততো পট্ঠায কোটি ছিন্না হোতি, তদভাৰো পটিনিৰত্তিত্ৰা অপ্পটিচ্ছাদনত্থং আরোচেতব্বং, এৰম্পি কোটি ছিন্না হোতীতি এৰং নো পটিভাতীতি আচরিযো. ততিযেন দুতিযস্সাতি এত্থ ‘‘দুতিযো নাম পঠমো’’তি ৰদন্তানং ‘‘ৰত্থু পুগ্গলো ন ৰত্তব্বো’’তি ৰারিতত্তা ন সুন্দরং. অঞ্ঞস্স চতুত্থস্স আরোচনেপি ন সুন্দরং. কস্মা? পুব্বেৰ সুত্ৰা অঞ্ঞস্স অনারোচিতত্তা. ‘‘সুতেন অঞ্ঞস্স আরোচেতব্বং সিযা’’তি ৰদন্তি.

দুট্ঠুল্লসিক্খাপদৰণ্ণনা নিট্ঠিতা.

৫. ঊনৰীসতিৰস্সসিক্খাপদৰণ্ণনা

৪০৪. পুনপ্পুনং উপ্পজ্জনতো বহুধা. হাযনৰড্ঢনন্তি মাতুকুচ্ছিস্মিং চে দ্ৰাদসন্নং মাসানং ঊনতায হাযনং কতং. পসূতস্স ৰড্ঢনং কাতব্বং. মাতুকুচ্ছিস্মিং চে ৰড্ঢনং কতং. পসূতস্স হাযনং কাতব্বং. নিক্খমনীযপুণ্ণমাসী নাম সাৰণমাসস্স পুণ্ণমাসী. ‘‘পাটিপদদিৰসেতি দুতিযে উপগচ্ছতি দিৰসে’’তি লিখিতং. সো হি পসূতদিৰসতো পট্ঠায পরিপুণ্ণৰীসতিৰস্সো হোতি. অৰসেসানং দ্ৰিন্নং ৰস্সানং অধিকদিৰসানি হোন্তেৰ, তস্মা নিক্কঙ্খা হুত্ৰা উপসম্পাদেন্তি. তং সন্ধাযাতি গব্ভৰস্সঞ্চ পৰারেত্ৰা লদ্ধৰস্সঞ্চ অগণেত্ৰা জাতদিৰসতো পট্ঠায গণেত্ৰা একূনৰীসতিৰস্সং. একূনৰীসতিৰস্সোতি ‘‘গব্ভৰস্সং এৰ পহাযা’’তি লিখিতং, তং দুল্লিখিতং.

৪০৬. অঞ্ঞং উপসম্পাদেতীতি উপজ্ঝাযো ৰা আচরিযো ৰা হুত্ৰা উপসম্পাদেতি. ‘‘ওপপাতিকস্স সোল়সৰস্সুদ্দেসিকভাৰতো পুন চত্তারো ৰস্সে অতিক্কমিত্ৰা উপসম্পদা কাতব্বা’’তি আচরিযা ৰদন্তীতি কেচি.

ঊনৰীসতিৰস্সসিক্খাপদৰণ্ণনা নিট্ঠিতা.

৬. থেয্যসত্থসিক্খাপদৰণ্ণনা

৪০৯. থেয্যসত্থো চে সুদ্ধমাতুগামো দ্ৰে আপত্তিযো. অথ ভিক্খুনিযো, সমযো রক্খতি. থেয্যসত্থভাৰস্স ঠানং কত্ৰা রক্খণীযত্তা সহধম্মিকানং রক্খতিযেৰাতি একে. থেয্যভাৰে ন সহধম্মিকতা, তস্মা ন রক্খতি এৰাতি একে. অপারাজিকথেয্যভাৰে সতি সহধম্মিকভাৰোতি চে? ইতরস্মিং ইতরন্তি সমযো অনিস্সটো আপজ্জতি. ভিক্খু থেয্যসত্থো চে, যথাৰত্থুকমেৰ. থেয্যসত্থে থেয্যসত্থসঞ্ঞী সদ্ধিং সংৰিধাযাতি চ. ‘‘সদ্ধি’’ন্তি পদং কেসুচি নত্থি, তং অননুরূপং. তথা দুতিযেপি.

থেয্যসত্থসিক্খাপদৰণ্ণনা নিট্ঠিতা.

৭. সংৰিধানসিক্খাপদৰণ্ণনা

৪১২. ‘‘তেন খো পন সমযেন অঞ্ঞতরা ইত্থী’’তি চ পাঠো অত্থি, কেসুচি নত্থি. নত্থিভাৰো সুন্দরো ‘‘তেন খো সমযেনা’’তি অধিকারত্তাতি কেচি. ইধ একতোউপসম্পন্না, সিক্খমানা, সামণেরীতি ইমাপি তিস্সো সঙ্গহং গচ্ছন্তি. ইমাসং পন সমযো রক্খতি, অযমিমাসং, মাতুগামস্স চ ৰিসেসো.

৪১৪. অপিচেত্থ ‘‘ৰিঞ্ঞূ পটিবলা’’তি ৰচনতো অপ্পটিবলা অনাপত্তিৰত্থুকাতি একে, তং ন যুত্তং দুক্কটৰত্থুকত্তা. ‘‘ভিক্খু সংৰিদহতি, মাতুগামো ন সংৰিদহতি, আপত্তি দুক্কটস্সা’’তি হি ৰুত্তং. তথা হি উপপরিক্খিতব্বং.

সংৰিধানসিক্খাপদৰণ্ণনা নিট্ঠিতা.

৮. অরিট্ঠসিক্খাপদৰণ্ণনা

৪১৭. গহট্ঠস্সাপি ভিক্খুনীদূসককম্মং মোক্খন্তরাযিকমেৰ, তস্মা তস্স পব্বজ্জাপি পটিক্খিত্তা. ৰিপাকন্তরাযিকা অহেতুকত্তা. পুব্বে সঞ্চিচ্চ আপন্না সম্মুট্ঠা সুদ্ধসঞ্ঞিনো অন্তরাযিকা এৰ. সেসাতি জাতিকা. রসেনাতি ভাৰেন. অধিকুট্টনট্ঠেনাতি অধিকরণং কত্ৰা কুট্টনট্ঠেন ছিন্দনট্ঠেন. অসিসূনূপমা কুসলধম্মচ্ছেদনট্ঠেন. সত্তিসূলূপমা চিত্তৰিতুদনট্ঠেনাতি পোরাণা. অনাপত্তিপাল়িযং ‘‘আদিকম্মিকস্সা’’তি মুখারুল়্হৰসেন লিখিতং.

অরিট্ঠসিক্খাপদৰণ্ণনা নিট্ঠিতা.

৯. উক্খিত্তসম্ভোগসিক্খাপদৰণ্ণনা

৪২৫. ‘‘তং দিট্ঠিং অপ্পটিনিস্সট্ঠেনাতি ইমিনা লদ্ধিনানাসংৰাসকতং দীপেতী’’তি ৰুত্তং. তিচিত্তন্তি এত্থ ৰিপাকাব্যাকতচিত্তেন সহৰাসেয্যং কপ্পেয্যাতি এৰমত্থো দট্ঠব্বো. অঞ্ঞথা সচিত্তকত্তা সিক্খাপদস্স কিরিযাব্যাকতং সন্ধায ন যুজ্জতি.

উক্খিত্তসম্ভোগসিক্খাপদৰণ্ণনা নিট্ঠিতা.

১০. কণ্টকসিক্খাপদৰণ্ণনা

৪২৮. যত্থ তে ন পস্সামাতি তেতি তং. অথ ৰা তৰ রূপাদিং ন পস্সাম. অযং সমণুদ্দেসো পারাজিকো হোতি. ‘‘সচে তং দিট্ঠিং পটিনিস্সজ্জতি, সঙ্ঘস্স আরোচেত্ৰা সঙ্ঘানুমতিযা পব্বাজেতব্বো’’তি পোরাণগণ্ঠিপদে ৰুত্তং, তং ন যুত্তং, দণ্ডকম্মনাসনা হি ইধাধিপ্পেতা. যদি সো পারাজিকো, লিঙ্গনাসনা নাম সিযা. তে পটিসেৰতো নালং অন্তরাযাযাতি চ দিট্ঠি সত্থরি অসত্থাদিদিট্ঠি ন হোতি. সচে সা যস্স উপ্পজ্জতি, সো পারাজিকো হোতি, তস্মিম্পি এৰমেৰ পটিপজ্জিতব্বং সংৰরে অতিট্ঠন্তো লিঙ্গনাসনাযেৰ নাসেতব্বোতি আচরিযস্স তক্কো.

কণ্টকসিক্খাপদৰণ্ণনা নিট্ঠিতা.

সমত্তো ৰণ্ণনাক্কমেন সপ্পাণকৰগ্গো সত্তমো.