৫. অচেলকৰগ্গো

১. অচেলকসিক্খাপদৰণ্ণনা

২৬৯. ৰিঘাসাদানং অন্তরা পূৰলাভেন অঞ্ঞতরা পরিব্বাজিকা পৰিসিত্ৰা ঠিতা. দাপেতীতি অনুপসম্পন্নেন.

অচেলকসিক্খাপদৰণ্ণনা নিট্ঠিতা.

২. উয্যোজনসিক্খাপদৰণ্ণনা

২৭৬. ৰিজহন্তস্সাতি অনাদরত্থে সামিৰচনং. উয্যোজকস্স ৰিজহন্তস্স সতো আপত্তি দুক্কটস্সাতিপি অত্থো. ইধ অনুপসম্পন্নো নাম সামণেরোৰাধিপ্পেতো.

উয্যোজনসিক্খাপদৰণ্ণনা নিট্ঠিতা.

৩. সভোজনসিক্খাপদৰণ্ণনা

২৮০. সভোজনেতি এত্থ পঠমৰিকপ্পো ‘‘ইত্থী চ পুরিসো চা’’তি ইমিনা ততিযপদেন যুজ্জতি, দুতিযৰিকপ্পো পঠমেহি দ্ৰীহি. কুলেতি ঘরে. অনুপৰিসিত্ৰা নিসীদনচিত্তেন সচিত্তকং.

সভোজনসিক্খাপদৰণ্ণনা নিট্ঠিতা.

৪. রহোপটিচ্ছন্নসিক্খাপদৰণ্ণনা

২৮৪. ইধ পঞ্চমং উপনন্দস্স চতুত্থং হোতি, তস্মা ভিক্খুনিৰগ্গস্স দসমট্ঠকথাযং উপরি উপনন্দস্স ‘‘ততিযসিক্খাপদেনা’’তি ন পাঠো, ‘‘চতুত্থেনা’’তি পাঠোতি ৰেদিতব্বো.

রহোপটিচ্ছন্নসিক্খাপদৰণ্ণনা নিট্ঠিতা.

৫. রহোনিসজ্জসিক্খাপদৰণ্ণনা

২৮৯. রহোনিসজ্জসিক্খাপদং উত্তানত্থমেৰ.

৬. চারিত্তসিক্খাপদৰণ্ণনা

২৯৪. সভত্তোতি নিমন্তনভত্তোতি পোরাণা.

পুরেভত্তঞ্চ পিণ্ডায, চরিত্ৰা যদি ভুঞ্জতি;

সিযা পরম্পরাপত্তি, পচ্ছাভত্তং ন সা সিযা.

পচ্ছাভত্তঞ্চ গমিকো, পুব্বগেহং যদি গচ্ছে;

একে আপত্তিযেৰাতি, অনাপত্তীতি একচ্চে.

কুলন্তরস্সোক্কমনে, আপত্তিমতযো হি তে;

সমানভত্তপচ্চাসা, ইতি আহু ইধাপরে.

মতা গণিকভত্তেন, সমেন্তি নং নিমন্তনে;

ৰিস্সজ্জনং সমানন্তি, একে সম্মুখতাপরে.

সন্নিট্ঠানত্থিকেহেৰ, ৰিচারেতব্বভেদতো;

ৰিঞ্ঞূ চারিত্তমিচ্চেৰ, সিক্খাপদমিদং ৰিদূতি.

চারিত্তসিক্খাপদৰণ্ণনা নিট্ঠিতা.

৭. মহানামসিক্খাপদৰণ্ণনা

৩১০. কালন্তি সো. যস্মা সঙ্ঘপৰারণাযমেৰাযং ৰিধি, তস্মা ‘‘ঞাতকানং পৰারিতান’’ন্তি ৰুত্তং. ‘‘ইমিনা হি তযা পৰারিতম্হ, অম্হাকঞ্চ ইমিনা চ ইমিনা চ অত্থো’’তি যথাভূতং আচিক্খিত্ৰা ৰিঞ্ঞাপেতুং গিলানোৰ লভতি. যং পন ৰুত্তং পণীতভোজনসিক্খাপদে ‘‘মহানামসিক্খাপদেন কারেতব্বো’’তি, তং সঙ্ঘৰসেন পৰারিতং, ভেসজ্জত্থায সপ্পিআদিভেসজ্জপঞ্চকং ৰিঞ্ঞাপেতি চে, ‘‘ন ভেসজ্জেন করণীযেন ভেসজ্জং ৰিঞ্ঞাপেতী’তি ৰচনেন পাচিত্তিযন্তি অত্থো’’তি (পাচি. ৩০৯) লিখিতং.

মহানামসিক্খাপদৰণ্ণনা নিট্ঠিতা.

৮. উয্যুত্তসেনাসিক্খাপদৰণ্ণনা

৩১১-৫. মং দিট্ঠেনাতি মযা দিট্ঠেন, মম দস্সনেন ৰা. একম্পি সরহত্থং পুরিসন্তি অঙ্গপরিযাপন্নং.

উয্যুত্তসেনাসিক্খাপদৰণ্ণনা নিট্ঠিতা.

৯. সেনাৰাসসিক্খাপদৰণ্ণনা

৩১৯. নৰমে সেনাপরিক্খেপেন ৰা পরিক্খেপারহট্ঠানেন ৰা সঞ্চরণট্ঠানপরিযন্তেন ৰা পরিচ্ছিন্দিতব্বা.

সেনাৰাসসিক্খাপদৰণ্ণনা নিট্ঠিতা.

১০. উয্যোধিকসিক্খাপদৰণ্ণনা

৩২৪. দসমে একমেকং দস্সনায গচ্ছতি, আপত্তি দুক্কটস্স. যত্থ ঠিতো পস্সতি, আপত্তি পাচিত্তিযস্সাতিআদি. অট্ঠমে পন একমেকং দস্সনায গচ্ছতি, আপত্তি দুক্কটস্স. যত্থ ঠিতো পস্সতি, আপত্তি দুক্কটস্সাতি পাল়ি. কস্মা? অঙ্গপ্পমাণাভেদেপি অনীকৰিসেসতো. দসমে পন অট্ঠমঙ্গস্স দস্সনেন দুক্কটং সিযাতি.

উয্যোধিকসিক্খাপদৰণ্ণনা নিট্ঠিতা.

সমত্তো ৰণ্ণনাক্কমেন অচেলকৰগ্গো পঞ্চমো.