৫. দুতিযসেনাসনসিক্খাপদৰণ্ণনা

১১৬-৭. এত্তকমেৰ ৰুত্তমট্ঠকথাসু, তথাপি পদট্ঠাদযোপি লব্ভন্তি এৰ. অনুগণ্ঠিপদে ‘‘অঞ্ঞং অত্থরণাদি অকপ্পিযত্তা ন ৰুত্ত’’ন্তি ৰুত্তং. ‘‘মঞ্চং ৰা পীঠং ৰা ৰিহারে ৰা ৰিহারূপচারে ৰা’তি ইমিনাপি সংসন্দনত্থং ‘কিঞ্চাপি ৰুত্তো, অথ খো’তিআদি আরদ্ধ’’ন্তি চ ৰুত্তং. উপচারমত্তঞ্চেতং ‘‘রুক্খমূলে’’তি, তত্থ ৰত্তব্বং নত্থি.

১১৮. অনাপুচ্ছিত্ৰাপি গন্তুং ৰট্টতীতি অসতিযা গচ্ছতোপি অনাপত্তি, আপুচ্ছনং পন ৰত্তং সঞ্চিচ্চ অনাপুচ্ছতো ৰত্তভেদদুক্কটত্তা. পুগ্গলিকসেনাসনে সঙ্ঘিকসেয্যং, সঙ্ঘিকসেনাসনে ৰা পুগ্গলিকসেয্যং অত্থরিত্ৰা গচ্ছন্তস্স দুক্কটং যুত্তং ৰিয. কস্মা? ‘‘সেয্যামত্তমেৰ নস্সেয্যা’’তি ৰুত্তত্তা. ইধ পন ‘‘পলিবুদ্ধং পলিবুদ্ধো’’তি দুৰিধম্পি অত্থি.

দুতিযসেনাসনসিক্খাপদৰণ্ণনা নিট্ঠিতা.