৩. দ্ৰেভাগসিক্খাপদৰণ্ণনা

৫৫২. ‘‘ধারযিত্ৰা দ্ৰে তুলা আদাতব্বা’’তি ৰচনতো যথা তুলাধারণায কাল়কা অধিকা ন হোন্তি, তথা কাল়কানং দ্ৰে ভাৰা গহেতব্বা উক্কট্ঠপরিচ্ছেদেন. কথং পঞ্ঞাযতীতি? সুদ্ধকাল়কপটিসেধননিদানেন. ততিযং ওদাতানং চতুত্থং গোচরিযানন্তি হেট্ঠিমপরিচ্ছেদো. মাতিকাট্ঠকথাযং পন ‘‘একস্সপি কাল়কলোমস্স অতিরেকভাৰে নিস্সগ্গিয’’ন্তি (কঙ্খা. অট্ঠ. দ্ৰেভাগসিক্খাপদৰণ্ণনা) ৰুত্তং, তং তুলাধারণায কিঞ্চাপি ন সমেতি, অচিত্তকত্তা পন সিক্খাপদস্স পুব্বে তুলায ধারযিত্ৰা ঠপিতেসু একম্পি লোমং তত্থ পতেয্য নিস্সগ্গিযন্তি অধিপ্পাযোতি নো তক্কো. অঞ্ঞথা দ্ৰে তুলা নাদাতব্বা, ঊনকতরা আদাতব্বা সিযুং. ন হি লোমং গণেত্ৰা তুলাধারণা করীযতি. অথ গণেত্ৰাৰ কাতব্বং. কিং তুলাধারণায পযোজনন্তি কেচি. ‘‘গোচরিযওদাতেসু একমেৰ দিগুণং কত্ৰা গহেতুং ৰট্টতী’’তি ৰদন্তি, অট্ঠকথাযং অৰিচারিতত্তা ৰীমংসিতব্বং.

দ্ৰেভাগসিক্খাপদৰণ্ণনা নিট্ঠিতা.