১. পঠমঅনিযতসিক্খাপদৰণ্ণনা

৪৪৪-৫. উদ্দেসন্তি উদ্দিসনং, আসাল়্হিনক্খত্তং নাম ৰস্সূপগমপূজা. সোতস্স রহোতি এত্থ রহো-ৰচনসামঞ্ঞতো ৰুত্তং দুট্ঠুল্লসামঞ্ঞতো দুট্ঠুল্লারোচনপ্পটিচ্ছাদনসিক্খাপদেসু পারাজিকৰচনং ৰিয. তস্মা ‘‘চক্খুস্স রহেনেৰ পন পরিচ্ছেদো কাতব্বো’’তি ৰুত্তং. কথং পঞ্ঞাযতীতি চে? ‘‘মাতুগামো নাম তদহুজাতাপি দারিকা’’তি ৰচনতো, ‘‘অলংকম্মনিযেতি সক্কা হোতি মেথুনং ধম্মং পটিসেৰিতু’’ন্তি ৰচনতো চ রহোনিসজ্জস্সাদো চেত্থ মেথুনসন্নিস্সিতকিলেসো, ন দুতিযে ৰিয দুট্ঠুল্লৰাচস্সাদকিলেসো, তস্মা চ পঞ্ঞাযতি ‘‘সোতস্স রহো নাধিপ্পেতো’’তি. কেচি পন ‘‘তঞ্চ লব্ভতীতি ৰচনস্স দস্সনত্থং ৰুত্তং, তেন দুতিযে ৰুত্তা ৰিঞ্ঞূ পটিবলা গহিতা হোতী’’তি ৰদন্তি. যেন ৰা সাতি এত্থ ৰা-সদ্দো ‘‘তেন সো ভিক্খু কারেতব্বো ৰা’’তি যোজেতব্বো, সো চ ৰিকপ্পত্থো, তস্মা কারেতব্বো ৰা পটিজানমানো, ন ৰা কারেতব্বো অপ্পটিজানমানোতি অত্থো. তেন ৰুত্তং অট্ঠকথাযং ‘‘পটিজানমানোৰ তেন সো ভিক্খু কারেতব্বো…পে… ন কারেতব্বো’’তি. তস্মা এৰ পাল়িযং তদত্থদ্ৰযদস্সনত্থং ‘‘সা চে এৰং ৰদেয্যা’’তিআদি ৰুত্তং. ‘‘সদ্ধেয্যৰচসা’’তি ইমিনা সোতাপন্না অত্থভঞ্জনকং ন ভণন্তি, সেসং ভণন্তীতি ৰাদীনং ৰাদো পটিসেধিতো হোতি. ‘‘দিট্ঠ’’ন্তি ৰুত্তত্তা ‘‘ওলোকেসী’’তি সুন্দরং. রক্খেয্যাসীতি মম ৰিসেসং কস্সচি নারোচেয্যাসীতি অধিপ্পাযো.

৪৪৬. ‘‘সা চে এৰং ৰদেয্য ‘অয্যস্স মযা সুতং নিসিন্নস্স মাতুগামং দুট্ঠুল্লাহি ৰাচাহি ওভাসেন্তস্সা’’’তি, ইদং কিমত্থমেত্থ ৰুত্তং, ন অধিপ্পেতঞ্হেতং ইধ সোতস্স রহো নাধিপ্পেতোতি কত্ৰাতি চে? অলংকম্মনিযট্ঠানে দুট্ঠুল্লৰাচাপি লব্ভতি, ন পন নালংকম্মনিযট্ঠানে মেথুনন্তি দস্সনত্থং ৰুত্তন্তি ৰেদিতব্বন্তি. যথা এতং, তথা ‘‘সা চে এৰং ৰদেয্য ‘অয্যস্স মযা সুতং মাতুগামস্স সন্তিকে অত্তকামপারিচরিযায ৰণ্ণং ভাসন্তস্সা’’’তি এতম্পি ইধ লব্ভতি, ন দুতিযে নালংকম্মনিযট্ঠানত্তাতি একে. কঙ্খাৰিতরণিযং (কঙ্খা. অট্ঠ. দুতিযানিযতসিক্খাপদৰণ্ণনা) ইধাপি দুতিযানিযতাধিকারে পারাজিকাপত্তিঞ্চ পরিহাপেত্ৰা দুট্ঠুল্লৰাচাপত্তিযা ৰুত্তত্তা পঠমানিযতে দুট্ঠুল্লৰাচাপত্তি ন ৰুত্তাতি চে? ‘‘সা চে’’তি তস্সা পাল়িযা পোত্থকা সোধেতব্বা. গণ্ঠিপদে চ ‘‘ইধ সিক্খাপদে মেথুনকাযসংসগ্গরহোনিসজ্জানমেৰাগতত্তা চক্খুস্সরহোৰ পমাণ’’ন্তি লিখিতং, দুতিযানিযতাধিকারে চ ‘‘অনন্ধো কাযসংসগ্গং পস্সতি, অবধিরো দুট্ঠুল্লং সুণাতি, কাযচিত্ততো কাযসংসগ্গো, ৰাচাচিত্ততো দুট্ঠুল্লং, উভযেহি উভয’’ন্তি চ লিখিতং. অট্ঠকথাযং ‘‘সমুট্ঠানাদীনি পঠমপারাজিকসদিসানেৰা’’তি ৰুত্তত্তাপি দুট্ঠুল্লৰাদো ন সুন্দরো ‘‘তদহুজাতা’’তি ৰুত্তত্তাতি.

পঠমঅনিযতসিক্খাপদৰণ্ণনা নিট্ঠিতা.