১. রহোগতসুত্তৰণ্ণনা

২৫৯. যংকিঞ্চি ৰেদযিতন্তি ‘‘সুখং দুক্খং অদুক্খমসুখ’’ন্তি ৰুত্তং ৰেদযিতং দুক্খস্মিং অন্তোগধং, দুক্খন্তি ৰত্তব্বতং লভতি পরিযাযেনাতি অত্থো. তেনাহ ‘‘তং সব্বং দুক্খন্তি অত্থো’’তি. যা এসাতিআদীসু যো সঙ্খারানং অনিচ্চতাসঙ্খাতো হুত্ৰা অভাৰাকারো, যা খযসভাৰতা ৰিনস্সনসভাৰতা জরায মরণেন চাতি দ্ৰিধা ৰিপরিণামনসভাৰতা, এতং সন্ধায উদ্দিস্স সব্বং ৰেদযিতং দুক্খন্তি মযা ৰুত্তন্তি অযং সঙ্খেপত্থো. সাতি সঙ্খারানং অনিচ্চতা. ৰেদনানম্পি অনিচ্চতা এৰ সঙ্খারসভাৰত্তা. তাসং অনিচ্চতা চ নাম মরণং ভঙ্গোতি কত্ৰা ততো উত্তরি দুক্খং নাম নত্থীতি সব্বা ৰেদনা ‘‘দুক্খা’’তি ৰুত্তা, যথা ‘‘যদনিচ্চং তং দুক্খ’’ন্তি চ, ‘‘পঞ্চুপাদানক্খন্ধা দুক্খা’’তি চ ৰুত্তং. ইদং সুত্তপদং. চত্তারো আরুপ্পাতি চতস্সো অরূপসমাপত্তিযো. এত্থাতি চ এতস্মিং পটিপ্পস্সদ্ধিৰারে.

রহোগতসুত্তৰণ্ণনা নিট্ঠিতা.