৪. অগারসুত্তৰণ্ণনা

২৬২. পুরত্থিমাতি ৰিভত্তিলোপেন নিদ্দেসো, নিস্সক্কে ৰা এতং পচ্চত্তৰচনং. পঠমজ্ঝানাদিৰসেনাতি পঠমদুতিযজ্ঝানৰসেন. অনুস্সতিৰসেনাতি নিদস্সনমত্তং অঞ্ঞস্সপি উপচারজ্ঝানগ্গহিতস্স সৰিতক্কচারস্স নিরামিসস্স সুখস্স লব্ভনতো. তস্সপি ৰা পঠমজ্ঝানাদীতি এত্থ আদি-সদ্দেন সঙ্গহো দট্ঠব্বো. কামহেতু দুক্খপ্পত্তানং দুক্খৰেদনা কামামিসেন সামিসা ৰেদনা. অনুত্তরৰিমোক্খা নাম অরহত্তফলং. ‘‘কুদাস্সু নামাহং তদাযতনং উপসম্পজ্জ ৰিহরিস্সামী’’তি এৰং পিহং উপট্ঠাপযতো তস্মিং অনিজ্ঝমানে পিহপ্পচ্চযা উপ্পন্নদোমনস্সৰেদনা. নেক্খম্মনিস্সিতা উপেক্খাৰেদনা নিরামিসা অদুক্খমসুখা নাম. সৰিসেসং পন দস্সেতুং ‘‘চতুত্থজ্ঝানৰসেন উপ্পন্না অদুক্খমসুখৰেদনা’’তি ৰুত্তং.

অগারসুত্তৰণ্ণনা নিট্ঠিতা.