৪. দুতিযঅনিচ্চসুত্তৰণ্ণনা

৪৬. পুব্বন্তং অতীতখন্ধকোট্ঠাসং. অনুগতাতি সস্সতাদীনি কপ্পেত্ৰা গহণৰসেন অনুগতা. অট্ঠারস দিট্ঠিযোতি চতস্সো সস্সতদিট্ঠিযো, চতস্সো একচ্চসস্সতদিট্ঠিযো, চতস্সো অন্তানন্তিকদিট্ঠিযো, চতস্সো অমরাৰিক্খেপদিট্ঠিযো, দ্ৰে অধিচ্চসমুপ্পন্নদিট্ঠিযোতি এৰং অট্ঠারস দিট্ঠিযো ন হোন্তি পচ্চযঘাতেন. অপরন্তন্তি অনাগতং খন্ধকোট্ঠাসং সস্সতাদিভাৰং কপ্পেত্ৰা গহণৰসেন অনুগতা. সোল়স সঞ্ঞীৰাদা, অট্ঠ অসঞ্ঞীৰাদা, অট্ঠ নেৰসঞ্ঞীনাসঞ্ঞীৰাদা, সত্ত উচ্ছেদৰাদা, পঞ্চ পরমদিট্ঠধম্মনিব্বানৰাদাতি এৰং চতুচত্তালীস দিট্ঠিযো ন হোন্তি পচ্চযঘাতেন. সস্সতদিট্ঠিথামসো চেৰ সীলব্বতদিট্ঠিপরামাসো চ ন হোতি পচ্চযঘাতেন. তেনাহ ‘‘এত্তাৰতা পঠমমগ্গো দস্সিতো’’তি অনৰসেসদিট্ঠিপহানকিত্তনতো. পহীনা ৰিক্খম্ভিতা. ইদং পনাতি ‘‘রূপস্মি’’ন্তিআদি.

দুতিযঅনিচ্চসুত্তৰণ্ণনা নিট্ঠিতা.