৮. জেতৰনসুত্তৰণ্ণনা

৪৮. এসিতগুণত্তা এসিযমানগুণত্তা চ ইসী, অসেক্খা সেক্খকল্যাণপুথুজ্জনা চ. ইসীনং সঙ্ঘো ইসিসঙ্ঘো. ইসিসঙ্ঘেন নিসেৰিতং. তেনাহ ‘‘ভিক্খুসঙ্ঘনিসেৰিত’’ন্তি.

তং কারেন্তস্স গন্ধকুটিপাসাদকূটাগারাদিৰসেন সিনিদ্ধসন্দচ্ছাযরুক্খলতাৰসেন ভূমিভাগসম্পত্তিযা চ অনঞ্ঞসাধারণং অতিরমণীযং তং জেতৰনং চিত্তং তোসেতি, তথা অরিযানং নিৰাসভাৰেনপীতি আহ ‘‘এৰং পঠমগাথায জেতৰনস্স ৰণ্ণং কথেত্ৰা’’তি. তেনাহ ভগৰা – ‘‘যত্থ অরহন্তো ৰিহরন্তি, তং ভূমিরামণেয্যক’’ন্তি (ধ. প. ৯৮; থেরগা. ৯৯১). অপচযগামিচেতনা সত্তানং ৰিসুদ্ধিং আৰহতি কম্মক্খযায সংৰত্তনতোতি আহ ‘‘কম্মন্তি মগ্গচেতনা’’তি. চতুন্নং অরিযসচ্চানং ৰিদিতকরণট্ঠেন কিলেসানং ৰিজ্ঝনট্ঠেন চ ৰিজ্জা. মগ্গপঞ্ঞা সম্মাদিট্ঠীতি আহ ‘‘ৰিজ্জাতি মগ্গপঞ্ঞা’’তি. সমাধিপক্খিকা ধম্মা সম্মাৰাযামসতিসমাধযো. যথা হি ৰিজ্জাপি ৰিজ্জাভাগিযা, এৰং সমাধিপি সমাধিপক্খিকো. সীলং এতস্স অত্থীতি সীলন্তি আহ ‘‘সীলে পতিট্ঠিতস্স জীৰিতং উত্তম’’ন্তি. দিট্ঠিসঙ্কপ্পাতি সম্মাদিট্ঠিসঙ্কপ্পা. তত্থ সম্মাসঙ্কপ্পস্স সম্মাদিট্ঠিযা উপকারভাৰেন ৰিজ্জাভাৰো ৰুত্তো. তথা হি সো পঞ্ঞাক্খন্ধসঙ্গহিতোতি ৰুচ্চতি. যথা চ সম্মাসঙ্কপ্পাদযো পঞ্ঞাক্খন্ধসঙ্গহিতা, এৰং ৰাযামসতিযো সমাধিক্খন্ধসঙ্গহিতাতি আহ ‘‘ৰাযামসতিসমাধযো’’তি. ধম্মোতি হি ইধ সমাধি অধিপ্পেতো ‘‘এৰংধম্মা তে ভগৰন্তো অহেসু’’ন্তিআদীসু (দী. নি. ২.১৩; ম. নি. ৩.১৯৭; সং. নি. ৫.৩৭৮) ৰিয. ৰাচাকম্মন্তাজীৰাতি সম্মাৰাচাকম্মন্তাজীৰা. মগ্গপরিযাপন্না এৰ হেতে সঙ্গহিতা. তেনাহ ‘‘এতেন অট্ঠঙ্গিকমগ্গেনা’’তি.

উপাযেন ৰিধিনা অরিযমগ্গো ভাৰেতব্বো. তেনাহ ‘‘সমাধিপক্খিযধম্ম’’ন্তি. সম্মাসমাধিপক্খিযং ৰিপস্সনাধম্মঞ্চেৰ মগ্গধম্মঞ্চ. ‘‘অরিযং ৰো, ভিক্খৰে, সম্মাসমাধিং দেসেস্সামি সউপনিসং সপরিক্খার’’ন্তি (ম. নি. ৩.১৩৬) হি ৰচনতো সম্মাদিট্ঠিআদযো মগ্গধম্মা সম্মাসমাধিপরিক্খারা. ৰিচিনেয্যাতি ৰীমংসেয্য, ভাৰেয্যাতি অত্থো. তত্থাতি হেতুম্হি ভুম্মৰচনং. অরিযমগ্গহেতুকা হি সত্তানং ৰিসুদ্ধি. তেনাহ ‘‘তস্মিং অরিযমগ্গে ৰিসুজ্ঝতী’’তি. পঞ্চক্খন্ধধম্মং ৰিচিনেয্যাতি পচ্চুপ্পন্নে পঞ্চক্খন্ধে ৰিপস্সেয্য. তেসু ৰিপস্সিযমানেসু ৰিপস্সনায উক্কংসগতায যদগ্গেন দুক্খসচ্চং পরিঞ্ঞাপটিৰেধেন পটিৰিজ্ঝীযতি, তদগ্গেন সমুদযসচ্চং পহানপটিৰেধেন পটিৰিজ্ঝীযতি, নিরোধসচ্চং সচ্ছিকিরিযাপটিৰেধেন, মগ্গসচ্চং ভাৰনাপটিৰেধেন পটিৰিজ্ঝীযতীতি এৰং তেসু চতূসু সচ্চেসু ৰিসুজ্ঝতীতি ইমস্মিং পক্খে নিমিত্তত্থে এৰ ভুম্মং, তেসু সচ্চেসু পটিৰিজ্ঝিযমানেসূতি অত্থো.

অৰধারণৰচনন্তি ৰৰত্থাপনৰচনং, অৰধারণন্তি অত্থো. ‘‘সারিপুত্তোৰা’’তি চ অৰধারণং সাৰকেসু সারিপুত্তোৰ সেয্যোতি ইমমত্থং দীপেতি তস্সেৰুক্কংসভাৰতো. কিলেসউপসমেনাতি ইমিনা মহাথেরস্স তাদিসো কিলেসৰূপসমোতি দস্সেতি. তস্স সাৰকৰিসযে পঞ্ঞায পারমিপ্পত্তি অহোসি. যদি এৰং ‘‘যোপি পারঙ্গতো ভিক্খু, এতাৰপরমো সিযা’’তি ইদং তেসং বুদ্ধানং ঞাণৰিসযে পঞ্ঞাপারমিপ্পত্তানং ৰসেনেৰ ৰুত্তন্তি দট্ঠব্বং. অৰধারণম্পি ৰিমুত্তিযা নানত্তা তীহি ৰিমুত্তীহি পারঙ্গতে সন্ধাযেতং ৰুত্তং. তেনাহ – ‘‘পারং গতোতি নিব্বানং গতো’’তিআদি. ন থেরেন উত্তরিতরো নাম অত্থি লব্ভতি, লব্ভতি চে, এৰমেৰ লব্ভেয্যাতি অধিপ্পাযো.

জেতৰনসুত্তৰণ্ণনা নিট্ঠিতা.