৭. ৰনরোপসুত্তৰণ্ণনা

৪৭. কেসন্তি সামিৰসেন ৰুত্তকসদ্দো ‘‘ধম্মট্ঠা সীলসম্পন্না’’তি এত্থ পচ্চত্তবহুৰচনৰসেন পরিণামেতব্বো. অত্থৰসেন হি ৰিভত্তিৰিপরিণামো. কে জনাতি এত্থ ৰা ৰুত্তকেসদ্দো সীহৰিলোকননযেন আনেত্ৰা যোজেতব্বোতি আহ ‘‘কে ধম্মট্ঠা, কে সীলসম্পন্না’’তি? পুচ্ছতীতি ইমিনা তত্থ কারণমাহ. ফলাদিসম্পত্তিযা আরমন্তি এত্থ সত্তাতি আরামো. আরামে রোপেন্তি নিপ্ফাদেন্তীতি আরামরোপা. ৰনীযতি ছাযাসম্পত্তিযা ভজীযতীতি ৰনং. তত্থ যং উপৰনলক্খণং ৰনং, তং আরামগ্গহণেনেৰ গহিতন্তি তপোৰনলক্খণং, তং দস্সেন্তো ‘‘সীমং পরিক্খিপিত্ৰা’’তিআদিমাহ. ৰিসমেতি উদকচিক্খল্লেন ৰিসমে পদেসে. পানীযং পিৰন্তি এত্থাতি পপা, তং পপং. উদকং পীযতি এত্থাতি ৰা পপা. তল়াকাদীতি আদি-সদ্দেন মাতিকং সঙ্গণ্হাতি.

ইমমত্থং সন্ধাযাতি ইমিনা কম্মপ্পথপ্পত্তং পটিক্খিপতি. অত্তনা কতঞ্হি পুঞ্ঞং অনুস্সরতো তং আরব্ভ বহুং পুঞ্ঞং পসৰতি, ন পন যথা কতং পুঞ্ঞং সযমেৰ পৰড্ঢতি. তস্মিং ধম্মে ঠিতত্তাতি তস্মিং আরামরোপনাদিধম্মে পতিট্ঠিতত্তা. তেনপি সীলেন সম্পন্নত্তাতি তেন যথাৰুত্তধম্মে কতসীলে ঠত্ৰা চিণ্ণেন তদঞ্ঞেনপি কাযৰাচসিকসংৰরলক্খণেন সীলেন সমন্নাগতত্তা. দস কুসলা ধম্মা পূরেন্তি দুচ্চরিতপরিৰজ্জনতো. সেসং ৰুত্তনযমেৰ.

ৰনরোপসুত্তৰণ্ণনা নিট্ঠিতা.