৬. অচ্ছরাসুত্তৰণ্ণনা

৪৬. ‘‘অচ্ছরাগণসঙ্ঘুট্ঠ’’ন্তি গাথা দেৰপুত্তেন যেনাধিপ্পাযেন গাযিতা, সো অনুপুব্বিকথায ৰিনা ন পঞ্ঞাযতীতি তং আগমনতো পট্ঠায কথেন্তো ‘‘অযং কির দেৰপুত্তো’’তিআদিমাহ. তত্থ সাসনেতি ইমস্সেৰ সত্থুসাসনে. কম্মাকম্মন্তি কম্মৰিনিচ্ছযং. অত্থপুরেক্খারতায অপ্পকিচ্চতায চ সল্লহুকৰুত্তিকো. সযনস্স কোট্ঠাসোতি দিৰসং পুরিমযামঞ্চ ভাৰনানুযোগৰসেন কিলন্তকাযস্স সমস্সাসনত্থং সেয্যায উপগমনভাগো অনুঞ্ঞাতো.

অব্ভন্তরেতি কুচ্ছিযং ভত্তস্স পরিত্ততায সত্থকৰাতাতি তিক্খভাৰেন সত্থকা ৰিয কন্তনকা ৰাতা. ধুরস্মিংযেৰাতি কিলেসমারেন যুদ্ধে এৰ. ৰিমুত্তাযতনসীসে ঠত্ৰা ধম্মং দেসেন্তো ৰা. উপনিস্সযমন্দতায অপরিপক্কঞাণতায আসৰক্খযং অপ্পত্তো কালং কত্ৰাতি যোজনা. উপরি ঠিতন্তি পরিক্খারভাৰেন দিব্বদুস্সূপরি ঠিতং. তথেৰ অট্ঠাসীতি তাহি তথা ৰুত্তেপি যথা ততো পুব্বে, তথেৰ অট্ঠাসি. সুৰণ্ণপট্টন্তি নিব্বুদ্ধে পটিজিনিত্ৰা লদ্ধব্বসুৰণ্ণপট্টং. ৰীতিক্কমস্স অকতত্তা অসম্ভিন্নেনেৰ সীলেন. যস্মা তস্মিং সত্থু সন্তিকং আগচ্ছন্তে তাপি তেন সদ্ধিং আগমংসু তস্মা ‘‘অচ্ছরাসঙ্ঘপরিৰুতো’’তি ৰুত্তং.

সঙ্ঘোসিতন্তি সঙ্গম্ম ঘোসিতং, তত্থ তত্থ অচ্ছরানং গীতসদ্দৰসেন ঘোসিতং. পিসাচগণং কত্ৰা ৰদতি অচ্ছন্দরাগতায. নিযামচিত্ততাযাতি সম্মত্তনিযামে নিন্নচিত্ততায. গরুভাৰেনাতি তাসং ৰসে অৰত্তনতো গরুট্ঠানভাৰেন. যাত্রাতি নিব্বানং পতি যাত্রা. তং পন ৰট্টতো নিগ্গমনং হোতীতি আহ ‘‘কথং নিগ্গমনং ভৰিস্সতী’’তি.

অতিসল্লেখতেৰাতি অতিৰিয কিলেসানং সল্লেখিতৰুত্তিকো. অকতাভিনিৰেসস্সাতি ভাৰনমননুযুত্তস্স অনারদ্ধৰিপস্সকস্স. কারকস্সাতি সুগতোৰাদকারকস্স সম্মাপটিপজ্জতো. সুঞ্ঞতাৰিপস্সনন্তি সুঞ্ঞতাদীপনং ৰিপস্সনং দুচ্চরিততণ্হায দূরীকরণেন একৰিহারিতায. একো মগ্গো অস্সাতি লোকুত্তরমগ্গো এৰ অস্স অনাগতো, পুব্বভাগমগ্গো পন কতপরিচযোতি অত্থো.

কাযৰঙ্কাদীনন্তি কাযদুচ্চরিতাদীনং অভাৰতো সমুচ্ছিন্দনেন অনুপলব্ভনতো. নত্থি এত্থ ভযং, অস্মিং ৰা অধিগতে পুগ্গলস্স নত্থি ভযন্তি অভযং নাম. সংসারকন্তারং অতিক্কমিত্ৰা নিব্বানসঙ্খাতং খেমং অমতট্ঠানং গমনে সুগতসারথিনা সুসজ্জিতযানভাৰতো রথো অকূজনোতি অট্ঠঙ্গিকো মগ্গোৰ অধিপ্পেতো. ধম্মতো অনপেততায অপরাপরুপ্পত্তিযা চ ধম্মচক্কেহি.

ওত্তপ্পম্পি গহিতমেৰ অৰিনাভাৰা. অপালম্বোতি অৰস্সযো. পরিৰারোতি পরিক্খারো অভিসঙ্খরণতো. মগ্গস্স করণট্ঠানে ধম্মো তপ্পরিযাপন্না সম্মাদিট্ঠি. অনিচ্চাদিৰসেনাতি অনিচ্চানুপস্সনাদিৰসেন. সোধিতেসু ৰজ্ঝমানেসু. ভূমিলদ্ধৰট্টন্তি ভূমিলদ্ধসঙ্খাতং ৰট্টং. তত্থ ৰিপস্সনায পৰত্তিট্ঠানভাৰতো পঞ্চক্খন্ধা ভূমি নাম, ৰট্টমযকম্মভাৰতো তত্থ উপ্পজ্জনারহং কিলেসজাতং ভূমিলদ্ধৰট্টং. পরিজানমানাতি পরিচ্ছিন্দনৰসেন সমতিক্কমৰসেন জানমানা পটিৰিজ্ঝন্তী.

কস্মা দেৰপুত্তো সোতাপত্তিফলেযেৰ পতিট্ঠাসি, ননু চ সা দেসনা ভগৰতা চতুমগ্গপ্পধানভাৰেন পৰত্তিতাতি আহ ‘‘যথা হী’’তিআদি.

অচ্ছরাসুত্তৰণ্ণনা নিট্ঠিতা.