পঠমগাথাসঙ্গণিকং

সত্তনগরেসু পঞ্ঞত্তসিক্খাপদৰণ্ণনা

৩৩৫. একংসন্তি এত্থ ভুম্মত্থে উপযোগৰচনন্তি আহ ‘‘একস্মিং অংসে’’তি. দসনখসমোধানসমুজ্জলন্তি দসন্নং নখানং সমূহেন সুট্ঠু উজ্জলং. এত্থ ‘‘সমুজ্জল’’ন্তি ইমিনা অঞ্জলিন্তি পদস্স আদরেন, অভিমুখং ৰা জলতি দিব্বতীতি অঞ্জলীতি অত্থং দস্সেতি. আসীসমানরূপোৰাতি এত্থ আসীসমানরূপো এৰাতি অত্থং পটিক্খিপন্তো আহ ‘‘পচ্চাসীসমানরূপো ৰিযা’’তি. এত্থ ‘‘ৰিযা’’তি ইমিনা ‘‘আসীসমানো ইৰা’’তি পদৰিভাগং কত্ৰা ইৰসদ্দো উপমত্থজোতকোতি দস্সেতি. কিস্সাতি এত্থ করণত্থে ছট্ঠীৰিভত্তি হোতীতি আহ ‘‘কেন কারণেনা’’তি. ইধাতি মম নিসিন্নট্ঠানং. ‘‘আগতো’’তি ইমিনা ইধমাগতোতি এত্থ মকারো পদসন্ধিকরমত্তোতি দস্সেতি. অস্সাতি উপালিস্স ৰিস্সজ্জেসীতি সম্বন্ধো. সব্বত্থাতি সব্বেসু পঞ্হেসু. ইতীতি এৰং.

তত্থাতি ৰিস্সজ্জনে. ভদ্দকো তে উম্মঙ্গোতি এত্থ উম্মঙ্গসদ্দো পঞ্হৰাচকোতি আহ ‘‘ভদ্দকা তে পঞ্হা’’তি. তত্থ তেতি তৰ. কস্মা পঞ্হা ‘‘উম্মঙ্গো’’তি ৰুচ্চতীতি আহ ‘‘পঞ্চা হী’’তিআদি. হি যস্মা উম্মঙ্গোতি ৰুচ্চতি, তস্মা পঞ্হা উম্মঙ্গো নামাতি যোজনা. ‘‘উম্মুজ্জিত্ৰা ঠিতত্তা’’তি ইমিনা উম্মুজ্জতীতি উম্মঙ্গোতি ৰচনত্থং দস্সেতি. মুজধাতু উকারস্স অকারো, অৰিজ্জন্ধকারসঙ্খাতা উদকতো উম্মুজ্জতীতি অত্থো. ‘‘তগ্ঘা’’তি নিপাতস্স তস্মা কারণাতি অত্থং দস্সেন্তো আহ ‘‘যস্মা’’তিআদি. ‘‘সম্পটিচ্ছনত্থে’’তি ইমিনা তগ্ঘসদ্দো সাধুঅত্থোতি দস্সেতি, তগ্ঘ সাধূতি অত্থো. তীণিযেৰাতি ‘‘সমাদহিত্ৰা ৰিসিব্বেন্তী’’তি একং, ‘‘সামিসেনা’’তি একং, ‘‘সসিত্থক’’ন্তি একন্তি ইমানি তীণিযেৰ.

চতুৰিপত্তিৰণ্ণনা

৩৩৬. যং তং পুচ্ছিম্হাতি এত্থ নিগ্গহিততো পরং অকারলোপোতি আহ ‘‘যং তং অপুচ্ছিম্হা’’তি. তত্থ যন্তি পঞ্হং. তন্তি তুৰং. ‘‘ত্ৰ’’ন্তিপি পাঠো, অযমেৰত্থো. তং তদেৰাতি তং তং এৰ পঞ্হং. অঞ্ঞথাতি অঞ্ঞং আকারং.

যে দুট্ঠুল্লা সা সীলৰিপত্তীতি এত্থ ননু সীলৰিপত্তিং পুচ্ছন্তো পঞ্হো নত্থি, কস্মা পন ‘‘সা সীলৰিপত্তী’’তি ৰিস্সজ্জনং ৰুত্তন্তি আহ ‘‘কিঞ্চাপী’’তিআদি. এতন্তি ‘‘যে দুট্ঠুল্লা সা সীলৰিপত্তী’’তি ৰচনং. তমেৰত্থং ৰিত্থারেন্তো আহ ‘‘চতূসু হী’’তিআদি. ৰত্ৰাতি সংখেপেন ৰত্ৰা.

তিস্সন্নং ৰিপত্তীনন্তি সীলৰিপত্তিতো অৰসেসানং তিস্সন্নং ৰিপত্তীনং. তত্থাতি ‘‘থুল্লচ্চয’’ন্তিআদিৰচনে.

‘‘অব্ভাচিক্খন্তী’’তি পদস্স কত্তারং দস্সেন্তো আহ ‘‘ৰদন্তা’’তি. ‘‘তথাহ’’ন্তিআদিনা ৰদনাকারং দস্সেতি.

‘‘অযং ছহী’’তি ইমিনা অযং সাতি এত্থ সাসদ্দো পদালঙ্কারোতি দস্সেতি. এত্তাৰতাতি এত্তকেন ‘‘থুল্লচ্চয’’ন্তিআদিৰচনমত্তেন. ৰিস্সজ্জিতং হোতীতি সম্বন্ধো.

ছেদনকাদিৰণ্ণনা

৩৩৭. কতি ছেদনকানীতিআদিপুচ্ছানং অনুসন্ধিপুচ্ছাভাৰং দস্সেন্তো আহ ‘‘যস্মা পনা’’তিআদি. পুচ্ছা হি অনুসন্ধিঅননুসন্ধিৰসেন দুৰিধা. তত্থ ৰিস্সজ্জনেন অনুসন্ধিৰসেন পুচ্ছা অনুসন্ধিপুচ্ছা নাম, ৰিস্সজ্জনমনপেক্খিত্ৰা যথাকামপুচ্ছা অননুসন্ধিপুচ্ছা নাম. তাসং ৰিত্থারো নেত্তিঅট্ঠকথাদীসু গহেতব্বো. ইধাপি ‘‘একাদস যাৰততিযকা’’তি ৰিস্সজ্জনেন অনুসন্ধানত্তা অনুসন্ধিপুচ্ছা নাম. যস্মা পন ৰিস্সজ্জিতোতি সম্বন্ধো. সঙ্খাৰসেনাতি একাদসা’’তি সঙ্খায সত্তিযা, আযত্তেন ৰা. সঙ্খানুসন্ধিৰসেনেৰাতি ‘‘কতী’’তি সঙ্খায অনুসন্ধিৰসেন এৰ. তেসন্তি পঞ্হানং. তত্থাতি ‘‘ছ ছেদনকানী’’তিআদিপাঠে. ইদমেৰাতি ইদং এৰ ৰচনং. অপুব্বন্তি পুব্বে ন ৰুত্তং, অপোরাণং নৰন্তি অত্থো. যং পনেতন্তি যং পন এতং ৰচনং. ‘‘সোল়সা’’তি ইমিনা সোদসাতি এত্থ দকারস্স ল়কারং কত্ৰা ‘‘সোল়সা’’তি পাঠোপি যুজ্জতীতি দস্সেতি. জানন্তি পঞ্ঞত্তাতি এত্থ ‘‘এৰং ৰত্ৰা’’তি পাঠসেসং অজ্ঝাহরিত্ৰা যোজেতব্বভাৰং দস্সেন্তো আহ ‘‘জান’’ন্তি এৰং ৰত্ৰা পঞ্ঞত্তা’’তি. তেতি ‘‘জান’’ন্তি পঞ্ঞত্তা সিক্খাপদাতি অত্থো. এৰন্তি ৰক্খমাননযেন. পৰিসেয্যাতীতি এত্থ ইতিসদ্দো পরিসমানত্থো. ইতি ৰেদিতব্বোতি যোজনা.

অসাধারণাদিৰণ্ণনা

৩৩৮. পুরিম পঞ্হন্তি ‘‘কতি ছেদনকানী’’তিআদিপঞ্হানং পুরে ৰুত্তং পঞ্হং. তত্থাতি ‘‘ৰীসং দ্ৰে সতানী’’তিআদিপাঠে. ‘‘দ্ৰেঅনিযতেহী’’তি পদস্স অসমাহারদিগুৰাক্যং দস্সেন্তো আহ ‘‘দ্ৰীহি অনিযতেহী’’তি. ‘‘সদ্ধি’’ন্তি ইমিনা সহাদিযোগে করণৰচনন্তি দস্সেতি.

গাথাযং ‘‘ধোৰনঞ্চ সিক্খাপদ’’ন্তিআদিনা যোজনা কাতব্বা. দ্ৰে লোমাতি দ্ৰে এল়কলোমসিক্খাপদানি.

‘‘সকলো’’তিআদিকায অড্ঢতেয্যগাথায যোজনা সুৰিঞ্ঞেয্যাৰ.

সঙ্ঘম্হা দস নিস্সরেতি এত্থ ‘‘সঙ্ঘম্হা নিস্সারীযতী’’তি (পাচি. ৬৮০, ৭৩০) এৰং ৰুত্তা দসাতি যোজনানযং দস্সেন্তো আহ ‘‘সঙ্ঘম্হা নিস্সারীযতী’’তিআদি. তত্থাতি ভিক্খুনিৰিভঙ্গে. তথাতি যথা খুদ্দকা, তথাতি অত্থো. ইতীতি এৰং.

তেসন্তি পারাজিকানং. কণ্হসপ্পাদযো দুরাসদা ৰিয দুরাসদা হোন্তীতি যোজনা. ‘‘দুরূপগমনাতি ইমিনা সদধাতুযা গত্যত্থং দস্সেতি. দুরাসজ্জনাতি দুক্খেন আসজ্জিতব্বা, আসজ্জিতুং ন সুকরাতি অত্থো. সমূপমাতি সমউপমা. সমূপমাকারং দস্সেন্তো আহ ‘‘যথা’’তিআদি.

সাধারণন্তি অট্ঠহি পারাজিকেহি সাধারণং. একেকস্স পারাজিকস্সাতি সম্বন্ধো. অৰিরূল়্হী ভৰন্তি তেতি এত্থ উপমানোপমেয্যানং পাকটভাৰং কত্ৰা যোজনানযং দস্সেন্তো আহ ‘‘যথা এতে’’তিআদি. অৰিরূল়্হিধম্মাতি অৰিরূল়্হীসভাৰা. পকতিসীলভাৰেনাতি পকতিযা সীলৰন্তভাৰেন, ‘‘পকতিসীলাভাৰেনা’’তিপি পাঠো, পকতিসীলস্স অভাৰেন, অভাৰহেতূতি অত্থো. এত্তাৰতাতি এত্তকেন ‘‘অট্ঠেৰ পারাজিকা’’তিআদিৰচনমত্তেন, দস্সিতং হোতীতি সম্বন্ধো. ৰিভত্তিযোতি পারাজিকাদিৰসেন ৰিভজিতব্বাতি ৰিভত্তিযোতি. তত্থাতি ‘‘তেৰীসতি সঙ্ঘাদিসেসা’’তিআদিপাঠে. সব্বসঙ্গাহিকৰচনন্তি সব্বেসং তিণ্ণং সমথানং, সব্বাসং ৰা আপত্তীনং সমথানং সঙ্গাহিকৰচনং. ‘‘দ্ৰীহি সমথেহী’’তি সম্মুখাৰিনযেন চ পটিঞ্ঞাতকরণেন চাতি দ্ৰীহি সমথেহি.

এতন্তি ‘‘দ্ৰে উপোসথা দ্ৰে পৰারণা’’তি ৰচনং. ৰিভজনানীতি ৰিভজিতব্বানং ৰিভজনকিরিযায অৰিনাভাৰতো ভাৰৰসেন ৰুত্তং, তস্মা ৰিভজিতব্বাতি ৰিভত্তিযোতি ৰচনত্থো কাতব্বো. অপরাপি ইমা ৰিভত্তিযো হোন্তীতি যোজনা. হেট্ঠা ৰুত্তস্স ‘‘ৰিভত্তিমত্তদস্সনেনেৰ চেতং ৰুত্তং, ন সমথেহি ৰূপসমনৰসেনা’’তি ৰচনস্স অত্থনযতো অঞ্ঞং অত্থনযং দস্সেন্তো আহ ‘‘অথৰা’’তিআদি, ‘‘ইমাপি ৰিভত্তিযো’’তি পদং ‘‘নিস্সাযা’’তি পদে অৰুত্তকম্মং. নিস্সায আপজ্জন্তীতি সম্বন্ধো. তাতি আপত্তিযো. ৰুত্তপ্পকারেহেৰাতি তীহি সমথেহীতি ৰুত্তপকারেহেৰ. তংমূলিকানন্তি তে এৰ উপোসথাদযো মূলমেতাসন্তি তংমূলিকা, তাসং. ইমিনা কারিযূপচারেন ৰুত্তনযং দস্সেতি. তা ৰিভত্তিযোতি উপোসথাদিৰিভত্তিযো.

পারাজিকাদিআপত্তিৰণ্ণনা

৩৩৯. এৰং ৰিস্সজ্জেত্ৰাতি সম্বন্ধো. যদিদং আপত্তিপারাজিকং নামাতি যোজনা. আপত্তিপারাজিকন্তি আপত্তিসঙ্খাতং পারাজিকং. ‘‘পরাজযমাপন্নো’’তি ইমিনা সাসনতো পুগ্গলং পরাজেতীতি পারাজিকন্তি ৰচনত্থং দস্সেতি. ণ্যপচ্চযো হেতুকত্ৰত্থৰাচকো, যকারস্স ককারো. চুতোতি চৰকো. পরদ্ধোতি ৰিরদ্ধো. ভট্ঠোতি পতিতো. নিরঙ্কতোতি সঙ্ঘম্হা অপসারিতো. অনীহতে তস্মিং পুগ্গলেতি তস্মিং পুগ্গলে সঙ্ঘম্হা নীহরিত্ৰা ন হরিতে, অনপনীতেতি অত্থো. ‘‘উপোসথপৰারণাদিভেদো’’তি ইমিনা সংৰাসসরূপং দস্সেতি. ব্যঞ্জনে আদরমকত্ৰা ‘‘এতং আপত্তী’’তি ৰুত্তং. অযং হীতি অযং এৰং ৰক্খমানো. এত্থাতি গাথাযং. তেন তস্মাতি এত্থ ‘‘তস্মা’’তি পদেন ‘‘তেনা’’তি পদস্স কারণত্থং দস্সেতি.

এত্থাতি দুতিযগাথাযং. আদিম্হি চেৰ ইচ্ছিতব্বোতি সম্বন্ধো. হীতি সচ্চং. এত্থাতি পরিৰাসদানাদীসু চতূসু কম্মেসু. ‘‘সঙ্ঘো’’তিআদিৰচনত্থো তিপদভিন্নাধিকরণবাহিরত্থসমাসো হোতি, চেৰসদ্দচসদ্দেহি আদিসেসপদানং উভযপদত্থপধানভাৰং দস্সেতি, ‘‘ইচ্ছিতব্বো’’তি পদং কারকানং কিরিযাপেক্খত্তা কিরিযত্থায পক্খিত্তং. অস্সাতি আপত্তিযা, ইমিনা অঞ্ঞপদং দস্সেতি. ইচ্ছিতব্বত্থে অপচ্চযং কত্ৰা তদ্ধিতন্তিপি ৰদন্তি. লহুকনযো পনেস. অযং পনেত্থ গরুকনযো – আদি চ সেসো চ আদিসেসা, সঙ্ঘো আদিসেসেসু অস্সা ইচ্ছিতব্বোতি সঙ্ঘাদিসেসোতি.

অনেকংসিকতং পদন্তি এত্থ পদন্তি সিক্খাপদং. অনেকংসেন কতং অনেকংসিকতন্তি দস্সেন্তো আহ ‘‘যস্মা ইদং সিক্খাপদং অনেকংসেন কত’’ন্তি. যস্মা কতং, তস্মা অনিযতোতি পৰুচ্চতীতি যোজনা. তত্থাতি অনিযতে. যত্থাতি সিক্খাপদে. সোপীতি সিক্খাপদধম্মোপি.

অচ্চযেসূতি দোসেসু. তে হি নিদ্দোসং অতিক্কম্ম অযন্তি গচ্ছন্তি পৰত্তন্তীতি অচ্চযাতি ৰুচ্চন্তি. তেনাতি অচ্চযেন. থূলোতি ওল়ারিকো. ‘‘থূলত্তা’’তি ইমিনা ‘‘তেনেত’’ন্তি এত্থ তেনসদ্দস্স কারণত্থং দস্সেতি. অচ্চযস্স থূলত্তাতি সম্বন্ধো. এতন্তি আপত্তিধম্মং. ইমায গাথায অঞ্ঞেসং লহুকাপত্তীনং থূলো অচ্চযো থুল্লচ্চযোতি ৰচনত্থং দস্সেতি. দ্ৰেভাৰে সতি সংযোগপরত্তা রস্সো হোতীতি দট্ঠব্বং.

‘‘নিস্সজ্জিত্ৰা দেসেতব্বতো’’তি ইমিনা নিস্সজ্জনং নিস্সগ্গো, আপত্তিদেসনতো পুব্বভাগে কত্তব্বস্স ৰিনযকম্মস্সেতমধিৰচনং, সো এতস্সত্থীতি নিস্সগ্গিযন্তি ৰচনত্থং দস্সেতি.

কুসলধম্মসদ্দেন কুসলচিত্তমেৰ গহেতব্বন্তি আহ ‘‘কুসলধম্মসঙ্খাতং কুসলচিত্ত’’ন্তি. ‘‘কুসলচিত্তং পাতেতী’’তি ইমিনা চিত্তং পাতেতীতি পাচিত্তিযন্তি ৰচনত্থং দস্সেতি. এত্থ ‘‘চিত্তপাতিয’’ন্তি ৰত্তব্বে পদৰিপরিযাযং কত্ৰা, তকারস্স চ লোপং কত্ৰা ‘‘পাচিত্তিয’’ন্তি ৰুত্তং. অচিন্তেয্যো হি পাল়িনযো. ণ্যপচ্চযো হেতুকত্ৰত্থৰাচকো. ননু ‘‘পাতেতি কুসলং ধম্ম’’ন্তি ইমিনাৰ ‘‘পাচিত্তিয’’ন্তি পদস্স নিব্বচনং সিদ্ধং, কস্মা পন ‘‘অপরজ্ঝতি চিত্তসম্মোহনট্ঠান’’ন্তি ৰুত্তন্তি আহ ‘‘যং পনা’’তিআদি. যস্মা হোতীতি সম্বন্ধো.

পাটিদেসনীযাসু নিব্বচনমেৰ অদস্সেত্ৰা কস্মা ‘‘ভিক্খু অঞ্ঞাতকো সন্তো’’তিআদি ৰুত্তন্তি আহ ‘‘ৰুত্তগারয্হভাৰকারণদস্সনত্থমেৰা’’তি. ‘‘পটিদেসেতব্বতো’’তি ইমিনা অঞ্ঞাপত্তিদেসনানযতো ‘‘গারয্হ’’ন্তিআদিনা পটি ৰিসুং ৰত্ৰা দেসেতব্বাতি পাটিদেসনীযাতি নিব্বচনং দস্সেতি.

দুক্কটন্তি এত্থ দুসদ্দো দুট্ঠুঅত্থো চ ৰিরূপত্থো চ হোতীতি দস্সেন্তো আহ ‘‘দুট্ঠু কতং, ৰিরূপং ৰা কত’’ন্তি. তন্তি কম্মং. তং পনেতন্তি দুক্কটং, খলিতন্তি সম্বন্ধো. অস্সাতি দুক্কটস্স. তস্সত্থো এৰং ৰেদিতব্বোতি যোজনা. হীতি ৰিত্থারো. যং পাপন্তি যোজনা. যদীতি অথ. যদিসদ্দো হি অথপরিযাযো. ইদম্পীতি ইদম্পি কম্মং, পাপন্তি সম্বন্ধো.

‘‘লপিত’’ন্তি ইমিনা দুরাভট্ঠন্তি এত্থ ভাসধাতুযা কথনত্থং দস্সেতি. যন্তি ৰচনং. কিঞ্চ ভিয্যোতি ততো অতিরেকং কথেতব্বৰচনং কিঞ্চাতি অত্থো. সংকিলিট্ঠঞ্চ যং পদন্তি এত্থ চকারো পিসদ্দত্থো ‘‘পদ’’ন্তি এত্থ যোজেতব্বো, যংসদ্দো কারণত্থোতি আহ ‘‘সংকিলিট্ঠং যস্মা তম্পি পদ’’ন্তি. তম্পি পদন্তি তম্পি ৰচনং. পদসদ্দো হি ৰচনৰাচকো. তম্পি ৰচনং যস্মা সংকিলিট্ঠং হোতীতি যোজনা. কথং সংকিলিট্ঠং হোতীতি যোজনা. ‘‘যস্মা’’তি পদেন যংসদ্দো কারণত্থোতি দস্সেতি. নন্তি পদং. ‘‘এতং ইতি ৰুচ্চতী’’তি সংৰণ্ণেতব্বপদং. ‘‘দুব্ভাসিতন্তি এতং ৰুচ্চতী’’তি সংৰণ্ণনাপদং. এতন্তি এতং পদং, এতং ৰচনন্তি অত্থো.

এত্থাতি সেখিযগাথায. ইদন্তি আপত্তীনং নিব্বচনদীপকং ৰচনং, ৰুত্তন্তি সম্বন্ধো. কস্স দীপনত্থং ৰুত্তন্তি আহ ‘‘সঙ্গহিতস্স অত্থস্স দীপনত্থ’’ন্তি.

তত্থাতি ‘‘ছন্নমতিৰস্সতী’’তিআদিৰচনে. গেহন্তি পকতিগেহং. ইদং পন গেহন্তি যোজনা. ৰিত্থারেন্তো আহ ‘‘মূলাপত্তিঞ্হী’’তিআদি. ‘‘অৰিৰট’’ন্তি ৰত্ৰা তস্সত্থং দস্সেতুং ৰুত্তং ‘‘সুচ্ছন্ন’’ন্তি. ৰিৰটন্তি অচ্ছন্নং. নাতিৰস্সনভাৰং ৰিত্থারেন্তো আহ ‘‘মূলাপত্তিঞ্হী’’তিআদি. ৰিৰরন্তো ভিক্খু নাপজ্জতীতি সম্বন্ধো. সুদ্ধন্তেতি সুদ্ধকোট্ঠাসে. ‘‘তস্মা’’তি চ ‘‘তেনা’’তি চ যেভুয্যেন অত্থতো একং, তস্মা ৰুত্তং ‘‘তেন কারণেনা’’তি. এৰঞ্চেতং ৰিৰটন্তি এৰং এতং ছন্নং চে ৰিৰটন্তি যোজনা.

পরিপাতিযমানানন্তি অভিভূযমানানং. ‘‘রুক্খাদিগহনং অরঞ্ঞ’’ন্তি ইমিনা পৰনন্তি পদস্স অরঞ্ঞপরিযাযতং দস্সেতি. গতিসদ্দস্স ভৰভেদাদিঅত্থং পটিক্খিপিত্ৰা পটিস্সরণত্থে হোতীতি দস্সেন্তো আহ ‘‘পটিস্সরণং হোতী’’তি. তন্তি পৰনং. তেতি মিগা. ‘‘অস্সসন্তী’’তি পদেন ‘‘পস্সসন্তী’’তি অত্থোপি গহেতব্বো অৰিনাভাৰতো, আনাপানং করোন্তীতি অত্থো. আকাসোতি অজটাকাসো. পক্খীনন্তি ৰিহঙ্গমানং. ‘‘সব্বেসং সঙ্খতধম্মান’’ন্তি ইমিনা ধম্মানন্তি এত্থ সঙ্খতধম্মোযেৰ গহেতব্বোতি দস্সেতি. ‘‘ৰিনাসোৰা’’তি ইমিনা ৰিভৰসদ্দো ৰিনাসৰাচকোতি দস্সেতি. তেসন্তি সব্বেসম্পি সঙ্খতধম্মানং. গতীতি পতিট্ঠা. কস্মা ৰিভৰো ধম্মানং গতি হোতীতি আহ ‘‘ন হী’’তিআদি. হীতি যস্মা. তেতি সব্বেপি সঙ্খতধম্মা. ৰিনাসন্তি ৰিভৰং. সুচিরম্পীতি অসীতিৰস্সাদিকালম্পি. নিব্বানং অরহতো গতীতি সংৰণ্ণেতব্বপদং. ‘‘খীণাসৰস্সা’’তি ইমিনা অরহতোতি পদস্স অত্থং দস্সেতি. ‘‘অনুপাদিসেসনিব্বানধাতূ’’তি ইমিনা ‘‘নিব্বান’’ন্তি পদস্স ইধ অধিপ্পেতনিব্বানং দস্সেতি. গাথায তে তে অত্থা সংগহেত্ৰা গণিযন্তি এত্থাতি গাথাসঙ্গণিকং.

ইতি পঠমগাথাসঙ্গণিকৰণ্ণনায যোজনা সমত্তা.