পরিৰারৰগ্গযোজনা

চূল়ৰগ্গখন্ধকস্সেৰং, কত্ৰান যোজনানযং;

অধুনা পরিৰারস্স, করিস্সং যোজনানযং.

সোল়সমহাৰারো

পঞ্ঞত্তিৰারযোজনা

এৰং দ্ৰাৰীসতিখন্ধকানং সংৰণ্ণনং কত্ৰা ইদানি ‘‘পরিৰারো’’তি সঙ্গহমারূল়্হস্স ৰিনযস্স সংৰণ্ণনং করোন্তো অযমাচরিযো পঠমং তাৰ অনুসন্ধিদস্সনমুখেন পটিঞ্ঞং কাতুকামো আহ ‘‘ৰিসুদ্ধপরিৰারস্সা’’তিআদি. তত্থ ৰিসুদ্ধপরিৰারস্সাতি ৰিসুদ্ধায চতুপরিসায পরিৰারিতস্স, অথৰা ৰিসুদ্ধেন চতুপরিসসঙ্খাতেন পরিৰারেন সমন্নাগতস্স ভগৰতোতি সম্বন্ধো. পরিৰারে হি ৰিসুদ্ধে তেন পরিৰারিতো, তংপরিৰারিতো ৰা ভগৰাপি ৰিসুদ্ধোযেৰ নাম হোতি. ইমিনা সংৰণ্ণিযমানস্স ‘‘পরিৰারো’’তি সঙ্গহমারূল়্হস্স দেসেতব্বধম্মস্স অনুরূপেন দেসকভূতস্স ভগৰতো থোমনং কতং হোতি. ধম্মক্খন্ধসরীরস্সাতি সীলাদিধম্মক্খন্ধসঙ্খাতেন সরীরেন সমন্নাগতস্স, ইমিনা সংৰণ্ণিতানং খন্ধকানমনুরূপেন ভগৰতো থোমনং কতং হোতি. পকতি হেসাচরিযানং যদিদং দেসেতব্বধম্মানুরূপেন দেসকস্স থোমনা (সারত্থ. টী. ১.গন্থারম্ভকথা; ৰিসুদ্ধি. মহাটী. ১.১). অনন্তরাতি অনন্তরে কালে.

যোতি ৰিনযো. পুব্বাগতন্তি পুব্বে ৰুত্তেসু ৰিভঙ্গখন্ধকেসু আগতং. নযন্তি সদ্দঅত্থৰিনিচ্ছযনযসঙ্খাতং সব্বং নযং. হিত্ৰাতি চজিত্ৰা. অনুত্তানত্থৰণ্ণনন্তি অনুত্তানানং পদানমত্থৰণ্ণনং. অযং পনেত্থ যোজনা – ৰিসুদ্ধপরিৰারস্স ধম্মক্খন্ধসরীরস্স ভগৰতো সাসনে খন্ধকানমনন্তরা ‘‘পরিৰারো’’তি যো ৰিনযো সঙ্গহং সমারূল়্হো, তস্স ৰিনযস্স পুব্বাগতং নযং হিত্ৰা ইদানি অনুত্তানত্থৰণ্ণনং করিস্সামীতি.

১. তত্থ তত্থাতি ‘‘তস্স অনুত্তানত্থৰণ্ণনং করিস্সামী’’তি যো পরিৰারসঙ্খাতো ৰিনযো সংৰণ্ণেতব্বভাৰেন ৰুত্তো, তত্থ. সঙ্খেপত্থোতি সমাসত্থো. যং তেনাতি এত্থ তসদ্দস্স অনিযমনিদ্দেসভাৰং দস্সেন্তো আহ ‘‘যো সো’’তি. তত্থ যোতি অনিযম নিদ্দেসো, তস্স ‘‘তেনা’’তি নিযমনং দট্ঠব্বং. সোতি পদালঙ্কারো. দ্ৰীসু হি সব্বনামেসু যেভুয্যেন পুব্বমেৰ পধানং, পচ্ছিমং পন ৰচনালঙ্কারং. যো সো ভগৰা পঞ্ঞপেসীতি সম্বন্ধো. চিরট্ঠিতিকত্থন্তি চিরং পঞ্চৰস্সসহস্সকালং ঠিতিকত্থায, ‘‘যাচিতো’’তি চ ‘‘পঞ্ঞপেসী’’তি চ সম্বন্ধো. ধম্মসেনাপতিনা যাচিতোতি সম্বন্ধো. যাচিতো হুত্ৰা পঞ্ঞপেসীতি যোজনা. তেন ভগৰতা পঞ্ঞত্তন্তি সম্বন্ধো. ‘‘জানতা পস্সতা’’তি দ্ৰিন্নং পদানং কম্মমেৰ দস্সেন্তো আহ ‘‘তস্স তস্সা’’তিআদি. তত্থ ‘‘পঞ্ঞত্তিকাল’’ন্তি ইমিনা ‘‘জানতা’’তি পদস্স কম্মং দস্সেতি, ‘‘দস অত্থৰসে’’তি ইমিনা ‘‘পস্সতা’’তি পদস্স কম্মং.

এৰং কম্মদস্সনেন যোজনানযং দস্সেত্ৰা ইদানি করণদস্সনেন অপরম্পি যোজনানযং দস্সেন্তো আহ ‘‘অপিচা’’তিআদি. ‘‘পুব্বেনিৰাসাদীহী’’তিআদিসদ্দেন দিব্বচক্খুস্স ৰিসুং গহেতব্বত্তা ইদ্ধিৰিধদিব্বসোতপরচিত্তৰিজাননানি গহেতব্বানি. ইমেহি পদেহি ‘‘জানতা, পস্সতা’’তি দ্ৰিন্নং পদানং পঞ্চন্নং লোকিযঅভিঞ্ঞানমেৰ করণভাৰং দস্সেতি. তীহি ৰিজ্জাহীতি পুব্বেনিৰাসদিব্বচক্খুআসৰক্খযঞাণসঙ্খাতাহি তীহি ৰিজ্জাহি. ছহি ৰা পন অভিঞ্ঞাহীতি সহ আসৰক্খযঞাণেন পঞ্চলোকিযাভিঞ্ঞাসঙ্খাতাহি ছহি অভিঞ্ঞাহি. সব্বত্থাতি সব্বেসু তীসু কালেসু, পঞ্চসুপি ঞেয্যধম্মেসু. সমন্তচক্খুনাতি অনাৰরণসব্বঞ্ঞুতঞ্ঞাণসঙ্খাতেন সমন্তচক্খুনা. পঞ্ঞাযাতি সব্বঞ্ঞুতপঞ্ঞায. তিরোকুট্টাদীতি আদিসদ্দেন তিরোপব্বতাদযো সঙ্গণ্হাতি. মংসচক্খুনাতি পসাদচক্খুনা. পটিৰেধপঞ্ঞাযাতি মগ্গপঞ্ঞায. দেসনাপঞ্ঞাযাতি সব্বঞ্ঞুতপঞ্ঞায. সব্বঞ্ঞুতপঞ্ঞাযেৰ হি অত্থতো দেসনাপঞ্ঞা নাম. তেন ৰুত্তং ‘‘তস্সা পঞ্ঞায তেজসা. অভিধম্মকথামগ্গং, দেৰানং সম্পৰত্তযীতি (ধ. স. অট্ঠ. গন্থারম্ভকথা ৫). ইমেহি পদেহি অৰত্থাৰসেন ৰিসুং ৰিসুং দ্ৰিন্নং পদানং করণসম্ভৰং দস্সেতি. অরহতাতি অরীনং অরানঞ্চ হতত্তা, পচ্চযাদীনঞ্চ অরহত্তা অরহতা. সম্মাসম্বুদ্ধেনাতি সম্মা সামঞ্চ সব্বধম্মানং বুদ্ধত্তা সম্মাসম্বুদ্ধেন, তেন ভগৰতাতি সম্বন্ধো. কেনাভতন্তি তং পঠমং পারাজিকং কেন আভতং, ইতি সঙ্খেপত্থোতি যোজনা.

২. পুচ্ছাৰিসজ্জনে পন এৰমত্থো ৰেদিতব্বোতি যোজনা. যং তেন…পে… পারাজিকন্তি ইদং পদং পচ্চুদ্ধরণমত্তমেৰাতি সম্বন্ধো. পতিউদ্ধরণমত্তমেৰ, ন অত্থদস্সনন্তি অত্থো. এত্থাতি এতেসু পদেসু. একা পঞ্ঞত্তীতি একা পঠমপঞ্ঞত্তি. অনুপঞ্ঞত্তিযোতি পচ্ছা ঠপিতা পঞ্ঞত্তিযো.

এত্তাৰতাতি এত্তকেন ‘‘একা পঞ্ঞত্তি, দ্ৰে অনুপঞ্ঞত্তিযো’’তি ৰচনমত্তেন ৰিস্সজ্জিতা হোন্তীতি সম্বন্ধো. ততিযং পুচ্ছন্তি সম্বন্ধো. কস্মা অনুপ্পন্নপঞ্ঞত্তি তস্মিং নত্থীতি আহ ‘‘অযং হী’’তিআদি. তত্থ হি যস্মা অঞ্ঞত্র নত্থি, তস্মা নত্থীতি যোজনা. ‘‘অনুপ্পন্নে দোসে পঞ্ঞত্তা’’তি ইমিনা অনুপ্পন্নে দোসে পঞ্ঞপেতব্বাতি অনুপ্পন্নপঞ্ঞত্তীতি ৰচনত্থং দস্সেতি. সাতি অনুপ্পন্নপঞ্ঞত্তি. তস্মাতি যস্মা অঞ্ঞত্র নত্থি, তস্মা. সব্বত্থপঞ্ঞত্তীতি এত্থ সব্বস্মিং পদেসে পঞ্ঞত্তি সব্বত্থপঞ্ঞত্তীতি অলুত্তসমাসং দস্সেন্তো আহ ‘‘মজ্ঝিমদেসে চেৰা’’তিআদি. ‘‘মজ্ঝিমদেসে চেৰ পচ্চন্তিমজনপদেসু চা’’তি ইমিনা ‘‘সব্বত্থা’’তি পদস্স সরূপং দস্সেতি. পদেসপঞ্ঞত্তিং অপনেত্ৰা সব্বত্থপঞ্ঞত্তিং পারিসেসনযেন দস্সেন্তো আহ ‘‘ৰিনযধরপঞ্চমেনা’’তিআদি. তত্থ ৰিনযধরপঞ্চমেনাতি অনুস্সাৰনাচরিযপঞ্চমেন. এত্থেৰাতি মজ্ঝিমদেসেযেৰ. এতেহীতি চতূহি সিক্খাপদেহি. সেসানীতি চতূহি সিক্খাপদেহি সেসানি.

সাধারণপঞ্ঞত্তীতি এত্থ সাধারণা নাম ভিক্খুভিক্খুনীনমেৰাতি আহ ‘‘ভিক্খূনঞ্চেৰ ভিক্খুনীনঞ্চা’’তি. ইদং পনাতি পঠমপারাজিকং পন, পঞ্ঞত্তন্তি সম্বন্ধো. ৰিনীতকথামত্তমেৰাতি ৰিনীতৰত্থুপকাসকং কথামত্তমেৰ. তাসন্তি ভিক্খুনীনং. ব্যঞ্জনমত্তমেৰাতি ‘‘সাধারণা’’তি চ ‘‘উভতো’’তি চ ব্যঞ্জনমত্তমেৰ. এত্থাতি সাধারণপঞ্ঞত্তিউভতোপঞ্ঞত্তিপদে.

‘‘নিদানে অনুপৰিট্ঠ’’ন্তি ইমিনা ‘‘নিদানোগধ’’ন্তি পদস্স সত্তমীসমাসঞ্চ ওগধসদ্দস্স অনুপৰিট্ঠত্থঞ্চ দস্সেতি. ওগাল়্হো হুত্ৰা ধরতি তিট্ঠতীতি ওগধং. ননু নিদানোগধে সতি ‘‘পঠমেন উদ্দেসেনা’’তি ৰত্তব্বং, কস্মা ‘‘দুতিযেন উদ্দেসেনা’’তি ৰুত্তন্তি আহ ‘‘নিদানোগধ’’ন্তি. নিদানপরিযাপন্নম্পি সমানন্তি নিদানপরিযাপন্নং সমানম্পীতি যোজনা. পিসদ্দো গরহত্থো, পগেৰ দুতিযে উদ্দেসে পরিযাপন্নেতি দস্সেতি. ‘‘সীলৰিপত্তিআদীন’’ন্তি ৰচনং ৰিত্থারেন্তো আহ ‘‘পঠমা হী’’তিআদি.

দ্ৰঙ্গিকেনাতি কাযচিত্তসঙ্খাতেন দ্ৰঙ্গিকেন. ননু ‘‘একেন সমুট্ঠানেনা’’তি ৰুত্তত্তা ‘‘কাযতোযেৰা’’তি ৰত্তব্বং, অথ কস্মা ‘‘কাযতো চ চিত্ততো চ সমুট্ঠাতী’’তি ৰুত্তন্তি আহ ‘‘এত্থ হী’’তিআদি. এত্থাতি ‘‘একেন সমুট্ঠানেনা’’তি ৰচনে. চিত্তন্তি সেৰনচিত্তং. আপন্নোসীতি ত্ৰং আপন্নো অসীতি যোজনা. আম আপন্নোম্হীতি আম অহং আপন্নো অম্হীতি যোজনা. তাৰদেৰাতি তস্মিং পটিজানক্খণেযেৰ. তং পুগ্গলন্তি পারাজিকমাপন্নং তং পুগ্গলং. তপ্পচ্চযাতি তস্স পারাজিকমাপন্নস্স কারণা. ‘‘ন কতমেন সমথেন সম্মতী’’তি যং পন ৰচনং ৰুত্তন্তি যোজনা. তন্তি ৰচনং, ৰুত্তন্তি সম্বন্ধো.

ৰুত্তমাতিকা পঞ্ঞত্তীতি ৰুত্তমাতিকাসঙ্খাতা পঞ্ঞত্তি ৰিনযো নামাতি যোজনা. মাতিকা হি যস্মা পঞ্ঞপীযতি সঙ্খেপেন ঠপীযতি, পকারং জানাপেতি ৰা, তস্মা পঞ্ঞত্তীতি ৰুচ্চতি. ‘‘পদভাজনং ৰুচ্চতী’’তি ইমিনা ৰিত্থারেন ভাজিযতি এতাযাতি ৰিভত্তীতি দস্সেতি. ৰীতিক্কমোতি কাযৰাচাৰীতিক্কমো. সো হি ন সংৰরতি কাযৰাচং ন পিদহতীতি অসংৰরোতি ৰুচ্চতি. যেসং ৰত্ততীতি এত্থ ৰত্ততিকিরিযায কত্তারং দস্সেন্তো আহ ‘‘ৰিনযপিটকঞ্চ অট্ঠকথা চা’’তি. পগুণাতি ৰাচুগ্গতা. তেতি তে পুগ্গলা, ধারেন্তীতি সম্বন্ধো. হীতি সচ্চং, যস্মা ৰা. এতস্সাতি পঠমপারাজিকস্স. কেনাভতন্তি এত্থ ভরধাতুযা ধারণপোসনত্থেসু (পাণিনী ১০৮ ধাতুপাঠে) ধারণত্থং দস্সেন্তো আহ ‘‘কেন আনীত’’ন্তি. ‘‘পরম্পরায আনীত’’ন্তি ইমিনা পরম্পরাভতন্তি পদস্স ততিযাসমাসং দস্সেতি. অথৰা ‘‘কেনাভত’’ন্তি পুচ্ছায অনুরূপং যকারলোপৰসেন ৰাক্যন্তি দস্সেতি.

৩. উপালি দাসকো চেৰাতিআদিকা গাথাযো কিমত্থং কেহি ঠপিতাতি আহ ‘‘ইদানী’’তিআদি. তন্তি পরং পরং. তত্থাতি তাসু গাথাসু. যন্তি ৰচনং. ইমিনা নযেনাতি পঠমপারাজিকস্স পুচ্ছাৰিসজ্জনে ৰুত্তেন ইমিনা নযেন.

ইতি মহাৰিভঙ্গে পঞ্ঞত্তিৰারৰণ্ণনায যোজনা সমত্তা.

কতাপত্তিৰারাদিৰণ্ণনা

১৫৭. ইতোতি পঞ্ঞত্তিৰারতো, পরং ৰুত্তা সত্ত ৰারা উত্তানত্থা এৰাতি যোজনা. কতাপত্তিৰারোতি ‘‘কতাপত্তী’’তি পদেন লক্খিতো ৰারো. এসেৰ নযো সেসেসুপি. তদনন্তরোতি তেসং সত্তন্নং ৰারানং অনন্তরে ৰুত্তো. সমুচ্চযৰারোতি সং একতো আপত্তিৰিপত্তিআদযো উচিযন্তি সম্পিণ্ডিযন্তি এত্থাতি সমুচ্চযো, সোযেৰ ৰারো সমুচ্চযৰারো.

১৮৮. ততোতি তেহি অট্ঠহি ৰারেহি, পরং ৰুত্তাতি সম্বন্ধো. পচ্চযৰসেন ৰুত্তো একো পঞ্ঞত্তিৰারোতি যোজনা. পচ্চযৰসেনাতি পচ্চযসদ্দস্স ৰসেন. তস্সাতি পচ্চযস্স. তেপীতি অট্ঠ ৰারাপি. ইতীতিআদি নিগমনং. ততোতি মহাৰিভঙ্গতো, পরং আগতাতি সম্বন্ধো. এৰং ইমে দ্ৰত্তিংস ৰারাতি যোজনা. হীতি সচ্চং, যস্মা ৰা. এত্থাতি দ্ৰত্তিংসৰারেসু.

সমুট্ঠানসীসৰণ্ণনা

২৫৭. তদনন্তরাযাতি তেসং দ্ৰত্তিংসৰারানং অনন্তরং ৰুত্তায সমুট্ঠানকথায এৰমত্থো ৰেদিতব্বোতি যোজনা. অনত্তা ইতি নিচ্ছিতাতি অনত্তাত্ৰেৰ ৰিনিচ্ছিতা. ইমিনা অনত্তা ইতি নিচ্ছযাতি এত্থ চিধাতুযা ৰিনিচ্ছযত্থং দস্সেতি. ‘‘অনিচ্চাকারাদীহী’’তি ইমিনা সভাগধম্মানন্তি এত্থ অনিচ্চাকারাদীহি সমানো ভাগো এতেসন্তি সভাগা, তেযেৰ ধম্মা সভাগধম্মাতি ৰচনত্থং দস্সেতি. নামমত্তম্পীতি অনিচ্চাদিনামমত্তম্পি. পিসদ্দেন পগেৰ নামিকো অনিচ্চাদিসভাৰোতি দস্সেতি. ন পঞ্ঞাযতীতি ন খাযতি. ইমিনা ন নাযতীতি এত্থ ঞাধাতুযা খাযনত্থং দস্সেতি. দুক্খহানিন্তি এত্থ দুক্খং জহাতীতি দুক্খহানীতি দস্সেন্তো আহ ‘‘দুক্খঘাতন’’ন্তি. দুক্খং হনতীতি দুক্খঘাতনো, সদ্ধম্মো, তং. ‘‘খন্ধকা যা চ মাতিকা’’তি ৰত্তব্বে সুখুচ্চারণত্থায রস্সৰসেন পাঠো অত্থীতি আহ ‘‘খন্ধকা য চ মাতিকা’’তি. সমুট্ঠানং নিযতোকতন্তি (সং. নি. ১.২১৬) এত্থ ‘‘সমুট্ঠানং নিযতকত’’ন্তি ৰত্তব্বে ‘‘পরোসহস্স’’ন্তিআদীসু ৰিয ওকারাগমৰসেন ‘‘সমুট্ঠাননিযতোকত’’ন্তি ৰুত্তন্তি আহ ‘‘সমুট্ঠানং নিযতকত’’ন্তি. এতেনাতি ‘‘সমুট্ঠানং নিযতোকত’’ন্তি পাঠেন. পচ্চেতব্বোতি পতি এতব্বো, পটিমুখং ঞাতব্বোতি অত্থো. অঞ্ঞেহীতি তীহি সিক্খাপদেহি অঞ্ঞেহি সিক্খাপদেহি.

তত্থাতি সম্ভেদনিদানৰচনেসু. সম্ভেদৰচনেন পচ্চেতব্বন্তি সম্বন্ধো. হীতি সচ্চং. তানি তীণি সিক্খাপদানি ঠপেত্ৰাতি সম্বন্ধো. পঞ্ঞত্তিদেসসঙ্খাতন্তি পঞ্ঞত্তিট্ঠানভূতদেসসঙ্খাতং. ‘‘ইমানি তীণী’’তি ইমিনা ‘‘দিস্সন্তী’’তি কিরিযায কত্তারং দস্সেতি. ‘‘পঞ্ঞাযন্তী’’তি ইমিনা দিসধাতুযা খাযনত্থং দস্সেতি. তত্থাতি সমুট্ঠাননিযমসম্ভেদনিদানসঙ্খাতেসু তীসু, নিদ্ধারণে ভুম্মং. ইতরং পনাতি সমুট্ঠাননিযমসম্ভেদেহি অঞ্ঞং পন.

আল়ৰীতি আল়ৰিযং. সক্কেসু ভগ্গেসু চাতি এত্থ জনপদনামত্তা বহুৰচনৰসেন ৰুত্তং.

দ্ৰীসু ৰিভঙ্গেসু পঞ্ঞত্তং যং সিক্খাপদং উদ্দিসন্তীতি যোজনা. ‘‘ৰিভঙ্গেসূ’’তি ইমিনা ৰিভঙ্গেতি এত্থ সুকারলোপোতি দস্সেতি. তস্সাতি সিক্খাপদস্স. যথাঞাযন্তি যুত্তিযা অনুরূপং. তন্তি সমুট্ঠানং. মে সুণাথাতি মম সন্তিকা সুণাথ. ইতীতি অযমত্থো.

কথিনন্তি পঠমকথিনসমুট্ঠানং. অননুঞ্ঞাতায সদ্ধিন্তি অননুঞ্ঞাতসমুট্ঠানেন সদ্ধিং. সদিসা ইধ দিস্সরেতি এত্থ ইধসদ্দো অত্থপকরণৰসেন উভতোৰিভঙ্গৰিসযোতি আহ ‘‘ইধ উভতোৰিভঙ্গে’’তি. ‘‘সদিসানী’’তি ইমিনা সদিসাতি এত্থ নিকারস্সাকারাদেসো দস্সিতো. ‘‘দিস্সন্তী’’তি ইমিনা দিস্সরেতি এত্থ অন্তিসদ্দস্স রেকারো (নিরুত্তিদীপনিযং ৫৭০ সুতে) দস্সিতো.

সমুট্ঠানসীসো

পঠমপারাজিকসমুট্ঠানৰণ্ণনা

২৫৮. কিমত্থং ‘‘মেথুনং সুক্কসংসগ্গো’’তিআদিৰচনং ৰুত্তন্তি আহ ‘‘ইদানী’’তিআদি. তত্থ তত্থাতি ‘‘মেথুনং সুক্কসংসগ্গো’’তিআদিৰচনে. সমুট্ঠানসীসন্তি সমুট্ঠানানং, সমুট্ঠানেসু ৰা সীসং. সেসানীতি পঠমপারাজিকতো সেসানি পঞ্চসত্ততি সিক্খাপদানি. তেনাতি পঠমপারাজিকেন. ‘‘সুক্কসংসগ্গো’’তিআদিৰচনং সংৰণ্ণেন্তো আহ ‘‘তত্থা’’তিআদি. তত্থ তত্থাতি ‘‘সুক্কসংসগ্গো’’তিআদিৰচনে.

খুদ্দকৰণ্ণনাৰসানেতি খুদ্দকট্ঠকথায অৰসানে.

লিঙ্গৰিপরিযাযোতি লিঙ্গৰিপল্লাসো. কাযমানসিকা কতাতি এত্থ কাযমানসেসু পৰত্তা কাযমানসিকাতি ৰুত্তে সমুট্ঠানাতি আহ ‘‘কাযচিত্তসমুট্ঠানা কতা’’তি.

দুতিযপারাজিকসমুট্ঠানৰণ্ণনা

২৫৯. ইদং সমুট্ঠানং একং সমুট্ঠানসীসন্তি সম্বন্ধো. ‘‘অদিন্নাদান’’ন্তি ইমিনা অদিন্নন্তি এত্থ সমুদাযনামে একদেসৰোহারোতি দস্সেতি. সেসানীতি দুতিযপারাজিকতো সেসানি একূনসত্ততি সিক্খাপদানি. তেনাতি দুতিযপারাজিকেন. তত্থাতি ‘‘ৰিগ্গহুত্তরী’’তিআদিৰচনে. ৰিগ্গহুত্তরীতিআদিপদানং ব্যঞ্জনে আদরমকত্ৰা অত্থমেৰ দস্সেতুং ৰুত্তং ‘‘মনুস্সৰিগ্গহউত্তরিমনুস্সধম্মসিক্খাপদানী’’তি. অনিযতা দুতিযিকাতি আপত্তিং অপেক্খিত্ৰা পাল়িযং ইত্থিলিঙ্গৰসেন ৰুত্তং, অট্ঠকথাযং পন সিক্খাপদং অপেক্খিত্ৰা নপুংসকলিঙ্গৰসেন দুতিযন্তি ৰুত্তং.

সমুট্ঠানা তিকা কতাতি এত্থ ‘‘তিকসমুট্ঠানা’’তি ৰত্তব্বে পদৰিপরিযাযৰসেন ককারস্স দীঘৰসেন সমুট্ঠানা তিকাতি ৰুত্তন্তি দস্সেন্তো আহ ‘‘তিকসমুট্ঠানা কতা’’তি.

সঞ্চরিত্তসমুট্ঠানৰণ্ণনা

২৬০. ‘‘সঞ্চরী’’তি ইদং তাৰ সঞ্চরিত্তং নাম একসমুট্ঠানসীসং, সেসানি তেন সদিসানি.

ৰিভঙ্গে আগতেন ‘‘রিঞ্চন্তী’’তি (পারা. ৫৭৬) পদেন এল়কলোমধোৰাপনসিক্খাপদং উপলক্খিত্ৰা ৰুত্তন্তি আহ ‘‘ৰিভঙ্গে রিঞ্চন্তি উদ্দেসন্তি আগত’’ন্তি.

‘‘যাৰ দ্ৰারকোসা অগ্গল়ট্ঠপনায’’ ইতি (পাচি. ১৩৫-১৩৬) চ ‘‘অঞ্ঞাতিকায ভিক্খুনিযা চীৰরং দদেয্য’’ইতি (পাচি. ১৬৯) চ ‘‘চীৰরং সিব্বেয্য’’ইতি (পাচি. ১৭৬-১৭৭) চ ৰুত্তসিক্খাপদত্তযন্তি যোজনা.

‘‘সমণচীৰরেন চা’’তি এৰং ৰচনং ৰুত্তন্তি সম্বন্ধো. ‘‘সমণচীৰরং দদেয্যা’’তি ইদং (পাচি. ৯১৭) ৰচনং সন্ধাযাতি সম্বন্ধো.

সমনুভাসনাসমুট্ঠানৰণ্ণনা

২৬১. ভেদন্তি ইদং সমনুভাসনং নাম একং সমুট্ঠানসীসং, সেসানি তেন সদিসানি.

কথিনসমুট্ঠানৰণ্ণনা

২৬২. উব্ভতন্তি ইদং কথিনসমুট্ঠানং নাম একং সমুট্ঠানসীসং, সেসানি তেন সদিসানি.

আৰসথেন সদ্ধিন্তি আৰসথসদ্দেন সদ্ধিং.

এল়কলোমসমুট্ঠানৰণ্ণনা

২৬৩. ‘‘এল়কলোমা’’তি ইদং এল়কলোমসমুট্ঠানং নাম একং সমুট্ঠানসীসং. ইতোতি যথাৰুত্ততো. পাল়িন্তি মাতিকাপাল়িং. ৰিরজ্ঝিত্ৰাতি পুব্বাপরতো ৰিরাধেত্ৰা. যথাতি যেনাকারেন. পনসদ্দো অনুগ্গহত্থো. কিঞ্চাপি লিখন্তি, পন তথাপীতি যোজনা. এৰন্তি তথাকারেন. অত্থানুক্কমোতি অত্থস্স অনুক্কমো.

‘‘অভিক্খুকাৰা সেন চা’’তি এতং ৰচনং ৰুত্তন্তি সম্বন্ধো. ‘‘অভিক্খুকে আৰাসে ৰস্সং ৰসেয্যা’’তি (পাচি. ১০৪৭) ইদং ৰচনং সন্ধাযাতি সম্বন্ধো. ‘‘ভিক্খুনী’’তিআদিনা ৰুত্তানীতি সম্বন্ধো. আদিসদ্দেন ‘‘সিক্খমানা চ সামণেরী গিহিনিযা’’তি পাঠং সঙ্গণ্হাতি.

পদসোধম্মসমুট্ঠানৰণ্ণনা

২৬৪. পদন্তি ইদং পদসোধম্মসমুট্ঠানং নাম একং সমুট্ঠানসীসং, সেসানি তেন সদিসানি. ‘‘তথা অত্থঙ্গতেন চা’’তি এতং ৰচনং ৰুত্তন্তি সম্বন্ধো. ‘‘অত্থঙ্গতে সূরিযে ওৰদেয্যা’’তি (পাচি. ১৫৪-১৫৫) ইদং ৰচনং সন্ধাযাতি সম্বন্ধো. অনোকাসো চ…পে… সন্ধায ৰুত্তন্তি (পাচি. ১২১৯-১২২১) এত্থাপি এসেৰ নযো.

অদ্ধানসমুট্ঠানৰণ্ণনা

২৬৫. অদ্ধানন্তি ইদং অদ্ধানসমুট্ঠানং নাম একং সমুট্ঠানসীসং, সেসানি তেন সদিসানি.

থেয্যসত্থসমুট্ঠানৰণ্ণনা

২৬৬. থেয্যসত্থন্তি ইদং থেয্যসত্থসমুট্ঠানং নাম একং সমুট্ঠানসীসং, সেসানি তেন সদিসানি. ‘‘ব্যূহেন সত্তমা’’তি ইদং ৰচনং ৰুত্তন্তি যোজনা. তদনন্তরমেৰাতি তস্স সিক্খাপদস্স অনন্তরমেৰ, ‘‘আগত’’ইতি সম্বন্ধো.

ধম্মদেসনাসমুট্ঠানৰণ্ণনা

২৬৭. ধম্মদেসনাসমুট্ঠানে সমুট্ঠানসীসং নত্থি, সব্বানি একদস সিক্খাপদানি সম্পিণ্ডেত্ৰা ধম্মদেসনাসমুট্ঠানানীতি ৰুত্তানি. এৰন্তিআদি নিগমনং. তেসন্তি তেসং সিক্খাপদানং. সম্ভিন্নসমুট্ঠানন্তি সংসগ্গসমুট্ঠানং. তিৰিধন্তি ভূতারোচনচোরিৰুট্ঠাপনঅননুঞ্ঞাতসমুট্ঠানৰসেন তিপ্পকারং. তন্তি নিযতসমুট্ঠানং, হোতীতি সম্বন্ধো. পুন তন্তি নিযতসমুট্ঠানং, দস্সেতুন্তি সম্বন্ধো. পুন তন্তি ৰচনং. নেত্তিধম্মানুলোমিকন্তি এত্থ কাযৰাচং নেতি ৰিনেতীতি নেত্তি, কাযৰাচং নেতি ৰিনেতি এত্থ, এতাযাতি ৰা নেত্তি. ধম্মোতি পাল়ি. সা হি যস্মা অত্থং ধারেতি, তস্মা ধম্মোতি ৰুচ্চতি. নেত্তিযেৰ ধম্মো নেত্তিধম্মো, তস্স অনুলোমিকং নেত্তিধম্মানুলোমিকং. তেন ৰুত্তং ‘‘ৰিনযপাল়িধম্মস্স অনুলোম’’ন্তি.

ইতি সমুট্ঠানসীসৰণ্ণনায যোজনা সমত্তা.

অন্তরপেয্যাল কতিপুচ্ছাৰারৰণ্ণনা

২৭১. ইদানি ৰুত্তোতি সম্বন্ধো. ‘‘ইদানী’’তি পদেন সম্বন্ধত্তা ৰুত্তোতি এত্থ তপচ্চযো পচ্চুপ্পন্নকালিকোতি দট্ঠব্বো.

তত্থাতি মাতিকাযং, পুচ্ছাসু ৰা. আগতাপত্তিপুচ্ছাতি আগতাপত্তিযা পুচ্ছা. হীতি ৰিসেসজোতকো, হি ৰিসেসং ৰক্খামীতি অত্থো. এত্থাতি ‘‘কতি আপত্তিক্খন্ধা’’তি দুতিযপদে. ‘‘রাসিৰসেনা’’তি ইমিনা খন্ধসদ্দস্স রাসত্থং দস্সেতি. ৰিনীতৰত্থূনীতি এত্থ ৰিনীতসদ্দো ৰিনযপরিযাযোতি আহ ‘‘ৰিনযপুচ্ছা’’তি. ননু ৰিনীতৰিনযসদ্দানং সদ্দতো নানত্তা অত্থতোপি নানং, কস্মা পন ‘‘ৰিনযপুচ্ছা’’তি ৰুত্তন্তি আহ ‘‘ৰিনীতং…পে… এক’’ন্তি. ইদন্তি পদত্তযং. অত্থতো একন্তি অত্থতোযেৰ একং, ন সদ্দতো. ৰিনীতৰত্থূনীতি আপত্তিৰিনযকারণত্তা ৰিনীতৰত্থূনি. যেসূতি অগারৰেসু. সতীতি সন্তেসু. এত্থ চ যেসু সতি আপত্তিযো ন হোন্তি, অসতি হোন্তীতি ৰাক্যম্পি অৰুত্তসিদ্ধিনযেন গহেতব্বং. যেসূতি গারৰেসু. তেতি অগারৰগারৰে. যস্মা পন নত্থীতি সম্বন্ধো. ৰিপত্তিভাৰপুচ্ছাতি ৰিপত্তিভাৰস্স পুচ্ছা. পুচ্ছিযতি ইমাযাতি পুচ্ছা. ৰিৰাদমূলানি অনুৰাদমূলানীতি ইমা পুচ্ছাযো মূলপুচ্ছাতি সম্বন্ধো. পোত্থকেসু ‘‘ইমানী’’তি নিকারেন সহ পাঠো অত্থি, সো অপাঠোযেৰ. মূলপুচ্ছাতি পুচ্ছিযন্তি ইমাহীতি পুচ্ছা, মূলানং পুচ্ছা মূলপুচ্ছা. ‘‘অধিকরণ’’ন্তিআদীসু ‘‘ৰুত্তং’’ ইতি সম্বন্ধো. তেসংযেৰাতি অধিকরণানংযেৰ. অযমেত্থ মাতিকা.

নিদ্দেসে মাতিকাযাতি পাতিমোক্খে. ৰিভঙ্গেতি পদভাজনিযং, আগতৰসেন ৰুত্তাতি যোজনা. অযমেত্থ নিদ্দেসো.

পটিনিদ্দেসে আরতীতিআদিপদানং ৰচনত্থং দস্সেন্তো আহ ‘‘আরকা’’তিআদি. তত্থ ‘‘আরকা’’তি ইমিনা আরতীতি এত্থ আউপসগ্গস্স অত্থং দস্সেতি. এতেহীতি আপত্তিক্খন্ধেহি, আরকাতি সম্বন্ধো. ‘‘রমতী’’তি ইমিনা তিপচ্চযো কত্ৰত্থে হোতীতি দস্সেতি. রতীতি রমনং. ইমিনা তিপচ্চযো ভাৰত্থেপি হোতীতি দস্সেতি. ৰিনাতি এতেহি আপত্তিক্খন্ধেহি ৰিনা. ইমিনা ৰিরতীতি এত্থ ৰিত্যূপসগ্গস্স অত্থং দস্সেতি. পচ্চেকন্তি পতি একং, পটিসদ্দো ৰিচ্ছত্থজোতকো, ৰিসুং ৰিসুন্তি অত্থো. ইমিনা পটিৰিরতীতি এত্থ পটিত্যূপসগ্গস্স অত্থং দস্সেতি. ৰিরতি পটিৰিরতীতি এত্থাপি তিপচ্চযো ভাৰত্থেপি ৰেদিতব্বো. ৰেরন্তি অনত্থকরত্তা ৰিরমিতব্বন্তি ৰিরং, তদেৰ ৰেরং, রাগাদিঅকুসলধম্মা. তে হি ৰেরহেতুত্তা ৰেরন্তি ৰুচ্চন্তি. এতাযাতি ৰিরতিযা. ইমিনা অকিরিযাতি এত্থ রিরিযপচ্চযো করণত্থে হোতীতি দস্সেতি. যং আপত্তিক্খন্ধকরণন্তি যোজনা. তস্সাতি আপত্তিক্খন্ধকরণস্স. পটিপক্খতোতি ৰিরুদ্ধভাৰতো. ইমিনা অকরণন্তি এত্থ অকারো ৰিরুদ্ধত্থোতি দস্সেতি. আপত্তিক্খন্ধঅজ্ঝাপত্তিযাতি আপত্তিক্খন্ধানং অতিক্কমিত্ৰা আপজ্জনস্স. ‘‘ৰেলনতো’’তি ইমিনা ৰেলতীতি ৰেলা, ৰেলনং ৰা ৰেলাতি ৰচনত্থে দস্সেতি. নিয্যানন্তি মগ্গং. মগ্গো হি নিব্বানং আরম্মণকরণৰসেন যাতি গচ্ছতীতি নিয্যানন্তি ৰুচ্চতি. ‘‘বন্ধতী’’তি ইমিনা সিধাতুযা বন্ধনত্থং দস্সেতি. ‘‘নিৰারেতী’’তি ইমিনা বন্ধধাতুযা অধিপ্পাযত্থং. এতন্তি ‘‘সেতূ’’তি নামং. তং সেতুন্তি আপত্তিক্খন্ধসঙ্খাতং তং সেতুং. এত্থ কেসুচি পোত্থকেসু ‘‘সো সেতূ’’তি চ ‘‘এতায পঞ্ঞত্তিযা’’তি চ পাঠো অত্থি, সো অপাঠোযেৰ.

বুদ্ধে অগারৰাদীসু এৰং ৰিনিচ্ছযো ৰেদিতব্বোতি যোজনা. যোতি যো কোচি, ন গচ্ছতীতিআদীসু সম্বন্ধো. ধরমানেতি তিট্ঠমানে, সংৰিজ্জমানেতি অত্থো. উপট্ঠানন্তি উপট্ঠানট্ঠানং, উপট্ঠানত্থং ৰা. এতস্সাতি যস্স কস্সচি গহট্ঠস্স ৰা পব্বজিতস্স ৰা. ধম্মস্সৰনন্তি ধম্মস্সৰনট্ঠানং, ধম্মস্সৰনত্থং ৰা. ধম্মস্সৰনগ্গন্তি ধম্মস্সৰনং গণ্হন্তি এত্থাতি ধম্মস্সৰনগ্গো, ধম্মসৰনমণ্ডপো. অথ ৰা ধম্মস্সৰনং গণ্হাতীতি ধম্মস্সৰনগ্গো, ধম্মস্সৰনট্ঠানে সমাগমজনো, তং ধম্মস্সৰনগ্গং. চিত্তীকারন্তি অপচাযনাকারং. ৰিক্খিত্তো ৰা অনাদরো ৰা হুত্ৰা নিসীদতীতি যোজনা. কাযপাগব্বিযন্তি ভুসং গরতি অঞ্ঞে পীল়েতি অনেনাতি পগব্বো, অতিমানো, ওট্ঠজো ততিযক্খরো. পগব্বস্স ভাৰো পাগব্বিযং, কাযেন পাগব্বিযং কাযপাগব্বিযং (ৰজির. টী. পরিৰার ২৭১; সারত্থ. টী. পরিৰার ৩.২৭১; ৰি. ৰি. টী. পরিৰার ২.২৭১ সং. নি. অট্ঠ. ২.২.১৪৬; অ. নি. অট্ঠ. ৩.৬.৮২-৮৪; সু. নি. অট্ঠ. ১.১৪৪), কাযানাচারং. তিস্সো সিক্খাতি অধিসীলসিক্খাদিকা তিস্সো সিক্খা. পমজ্জনং পমাদো, সতিৰিপ্পৰাসোতি আহ ‘‘পমাদে চ সতিৰিপ্পৰাসে’’তি. আমিসপটিসন্ধারন্তি আমিসেন অত্তনো, পরেসঞ্চ অন্তরস্স পটিসন্দহনং আমিসপটিসন্ধারো, তথা ধম্মপটিসন্ধারো.

২৭২. সত্থরিপি অগারৰোতিআদীনং অত্থোতি সম্বন্ধো. ‘‘অনীচৰুত্তী’’তিআদিনা অপ্পতিস্সোতি পদস্স অধিপ্পাযত্থং দস্সেতি, সদ্দত্থো পনেৰং ৰেদিতব্বো, পটিমুখং আদরেন সত্থুৰচনং অসুণন্তো অপ্পতিস্সো নামাতি. অজ্ঝত্তং ৰাতি এত্থ নিযকজ্ঝত্তাদীসু চতূসু নিযকজ্ঝত্তভাৰঞ্চ সত্তমীৰিভত্তিযা অমাদেসভাৰঞ্চ দস্সেন্তো আহ ‘‘অত্তনো সন্তানে ৰা’’তি. ‘‘অত্তনো পক্খে ৰা’’তি ইমিনা অত্তনো চিত্তসন্তানেতি অত্থং পটিক্খিপতি. তত্র তুম্হেতি এত্থ তসদ্দস্স ৰিসযং দস্সেন্তো আহ ‘‘তস্মিং অজ্ঝত্তবহিদ্ধাভেদে’’তি. সপরসন্তানেতি অত্তপরসন্তানে. পহানাযাতি এত্থ হাধাতুযা করণঞ্চ আযসদ্দস্স তদত্থভাৰঞ্চ দস্সেন্তো আহ ‘‘মেত্তাভাৰনাদীহি নযেহি পহানত্থ’’ন্তি. মেত্তাভাৰনাদীহীতিআদিসদ্দেন করুণাভাৰনাদিং সঙ্গণ্হাতি. তন্তি ৰিৰাদমূলং. ‘‘অপ্পৰত্তিভাৰাযা’’তি ইমিনা অনৰস্সৰাযাতি এত্থ অৰপুব্ব সুধাতুযা পৰত্তনত্থং দস্সেতি.

সন্দিট্ঠিপরামাসীতি এত্থ সস্স অত্তনো ইদং সং, সং দিট্ঠিং পরতো আমসতীতি সন্দিট্ঠিপরামাসীতি দস্সেন্তো আহ ‘‘সকমেৰ দিট্ঠিং পরামসতী’’তি. ‘‘য’’ন্তিআদিনা পরামসনাকারং দস্সেতি. আধানগ্গাহীতি এত্থ আভুসো ঠিযতে আধানন্তি ৰচনত্থেন আধানসদ্দো দল়্হপরিযাযোতি আহ ‘‘দল়্হগ্গাহী’’তি. দল়্হং গণ্হাতীতি দল়্হগ্গাহী.

২৭৩. অনুৰাদমূলনিদ্দেসো কিঞ্চাপি সমানোতি যোজনা. অথ খোতি তথা সমানোপি, অযমেত্থ ৰিসেসোতি সম্বন্ধো. ৰিৰদন্তানং পুগ্গলানন্তি যোজনা. তথা ৰিৰদন্তাতি তেনাকারেন ৰিৰদন্তা, অনুৰদন্তীতি সম্বন্ধো. ‘‘অসুকং নাম ৰিপত্তিং আপন্নো’’তি ৰুত্তমেৰত্থং আপত্তিযা সল্লক্খেত্ৰা দস্সেন্তো আহ ‘‘পারাজিকং আপন্নোসী’’তিআদি. এত্থাতি অনুৰাদমূলে. ৰিসেসোতি ৰিৰাদমূলতো ৰিসেসো. ৰিৰদন্তানং কোধূপনাহাদীনি ৰিৰাদমূলানি, অনুৰদন্তানং অনুৰাদমূলানীতি ৰুত্তং হোতি.

২৭৪. মেত্তং কাযকম্মং নামাতি এত্থ মেত্তা এতস্সত্থীতি মেত্তং, কাযকম্মং, মেত্তচিত্তসহগতং কাযকম্মন্তি ৰুত্তং হোতি. তেন ৰুত্তং ‘‘মেত্তচিত্তেন কতং কাযকম্ম’’ন্তি. সম্মুখপরম্মুখানং ৰিত্থারং দস্সেন্তো আহ ‘‘তত্থা’’তিআদি. তত্থ তত্থাতি তেসু সম্মুখপরম্মুখেসু. কাযকম্মং নামাতি মেত্তং কাযকম্মং নাম. থেরানং দানইতি সম্বন্ধো. উভযেহিপীতি নৰকত্থেরেহিপি. তেসূতি নৰকত্থেরেসু. অৰমঞ্ঞন্তি অৰমানং. অত্তনো দুন্নিক্খিত্তানং পটিসামনং ৰিয পটিসামনন্তি যোজনা. ‘‘মেত্তাকাযকম্মসঙ্খাতো’’তি ইমিনা অযম্পি ধম্মোতি এত্থ ধম্মসরূপং দস্সেতি. পিসদ্দো উপরি ৰক্খমানে ধম্মে অপেক্খতি. ‘‘সরিতব্বো’’তি ইমিনা অনীযসদ্দো কম্মৰাচকোতি দস্সেতি. সতিজনকোতি সব্রহ্মচারীনং সতিজনকো. তস্স পদস্স অধিপ্পাযং দস্সেন্তো আহ ‘‘যো ন’’ন্তিআদি. তত্থ যোতি পুগ্গলো. নন্তি মেত্তং কাযকম্মং. তং পুগ্গলং অনুস্সরন্তীতি সম্বন্ধো. যেসন্তি সব্রহ্মচারীনং. তেতি সব্রহ্মচারিনো. পসন্নচিত্তা হুত্ৰাতি সম্বন্ধো. ‘‘পিযং করোতী’’তি ইমিনা পিযকরণোতি পদস্স পিযং করোতীতি পিযকরণোতি ৰচনত্থং দস্সেতি. এসেৰ নযো গরুকরণোতি এত্থাপি. ‘‘সঙ্গহেতব্বভাৰাযা’’তি ইমিনা সঙ্গহাযাতি পদস্স ভাৰপ্পধানকম্মনিদ্দেসভাৰং দস্সেতি. সঙ্গহেতব্বোতি সঙ্গহো, তদত্থায. তেহীতি সব্রহ্মচারীহি. ‘‘সমগ্গভাৰাযা’’তি ইমিনা সমগ্গস্স ভাৰো সামগ্গীতি ৰচনত্থং দস্সেতি.

পগ্গয্হ ৰচনন্তি পগ্গহেত্ৰা ৰচনং. ৰিহারেতি আধারে ভুম্মং, থেরে অসন্তেতি যোজনা. তন্তি থেরং কদা আগমিস্সতি নুখোতি যোজনা. মমাযনৰচনন্তি মমাযনাকারেন পৰত্তং ৰচনং. মেত্তাসিনেহসিনিদ্ধানীতি মেত্তাসঙ্খাতেন সিনেহেন সিনেহিতানি. নযনানীতি চক্খূনি. ‘‘অপ্পাবাধো’’তি ইমিনা অরোগোতি পদস্সেৰ অত্থং দস্সেতি. নিচ্চাবাধেন ৰা অরোগো, আগন্তুকাবাধেন অপ্পাবাধো, অজ্ঝত্তাবাধেন ৰা অরোগো, বহিদ্ধাবাধেন অপ্পাবাধো, কাযাবাধেন ৰা অরোগো, চিত্তাবাধেন অপ্পাবাধো. সমন্নাহরণন্তি পুনপ্পুনং মনসিকরণং.

ন পুগ্গলং পটিৰিভজিত্ৰা ভুঞ্জতীতি যোজনা. তদত্থং ৰিত্থারেন্তো আহ ‘‘যো হী’’তিআদি. তত্থ যোতি পুগ্গলো, ভুঞ্জতীতি সম্বন্ধো. ‘‘এত্তকং…পে… ভুঞ্জিস্সামী’’তি ইমিনা আমিসপটিৰিভত্তভোগিভাৰং দস্সেতি. ‘‘এত্তকং ৰা অসুকস্স চ…পে… ভুঞ্জিস্সামী’’তি ইমিনা পুগ্গলপটিৰিভত্তভোগিভাৰং দস্সেতি. অযন্তি পুগ্গলো. আভতন্তি গামাদিতো আনীতং. অদাতুম্পীতি পিসদ্দেন দাতুম্পি ৰট্টতীতি দস্সেতি. দানঞ্হি নাম ন কস্সচি ৰারিতং. সব্বেসন্তি দুস্সীলসীলৰন্তানং. ৰুত্তন্তি অট্ঠকথাযং (দী. নি. অট্ঠ. ২.১৪১; ম. নি. অট্ঠ. ২.৪৯২; অ. নি. অট্ঠ. ৩.৬.১১) ৰুত্তং. ৰিচেয্যাতি ৰিচিনিত্ৰা. দাতুম্পীতি পিসদ্দেন অৰিচিনিত্ৰা সামঞ্ঞতো দাতুম্পি ৰট্টতীতি সম্পিণ্ডেতি. ননু এৰং সতি পুগ্গলৰিভাগো কতো নাম হোতি, কস্মা ৰিচেয্য দাতুং ৰট্টতীতি আহ ‘‘ন হী’’তিআদি. হীতি যস্মা. এতেতি গিলানাদযো. ইদং পদং ৰিচিনিত্ৰাতি পদে কম্মং, ‘‘দেন্তেনা’’তি পদে সম্পদানং. হীতি সচ্চং. ইতি অযন্তি ইতি মনসিকত্ৰা অযং সারণীযধম্মপূরকো.

অখণ্ডানীতিআদীসু পঠমং তাৰ খণ্ডছিদ্দসবলকম্মাসানি দস্সেত্ৰা তেসং পটিপক্খৰসেন অখণ্ডাদীনি দস্সেন্তো আহ ‘‘যস্সা’’তিআদি. তত্থ যস্সাতি ভিক্খুস্স, সিক্খাপদং ভিন্নন্তি সম্বন্ধো. সত্তসু আপত্তিক্খন্ধেসূতি আধারে ভুম্মং, সিক্খাপদন্তি সম্বন্ধো. আপত্তিঞ্হি পটিচ্চ সিক্খাপদস্স পঞ্ঞত্তত্তা আপত্তি তস্স ৰিসযো হোতি. আদিম্হি ৰা অন্তে ৰাতি সিক্খাপদানং আদিম্হি ৰা অন্তে ৰা. ৰাসদ্দো অনিযমৰিকপ্পত্থো. সিক্খাপদে ভিন্নে আপত্তিসম্ভৰতো ৰুত্তং ‘‘সিক্খাপদং ভিন্ন’’ন্তি. খণ্ডং নামাতি ছিন্নং নাম. ৰেমজ্ঝেতি সিক্খাপদানং ৰেমজ্ঝে. ভিন্নন্তি সিক্খাপদং ভিন্নং. ছিদ্দং নামাতি ৰিৰরং নাম. দ্ৰে তীণি সিক্খাপদানীতি সম্বন্ধো. সবলং নামাতি চিত্রং নাম. ভিন্নানীতি সিক্খাপদানি ভিন্নানি. কম্মাসং নামাতি ৰিচিত্রং নাম. এত্থ চ একস্মিং ঠানে একেন ৰিসভাগৰণ্ণেন চিত্রং সবলং নাম, নানাঠানে নানাৰণ্ণেন ৰিচিত্রং কম্মাসং নামাতি অযমেতেসং ৰিসেসো. খণ্ডাদীনং ৰিপরিৰত্তনৰসেন অখণ্ডাদীনি দস্সেন্তো আহ ‘‘যস্স পনা’’তিআদি. অভিন্নানিসীলানীতি অভিন্নানি সিক্খাপদসীলানি. তানি পনাতি সীলানি পন. ‘‘এতানী’’তি পদং পদালঙ্কারমত্তং. ভুজিস্সভাৰকরণতোতি তণ্হাদাসব্যতো মোচেত্ৰা ভুজিস্সকরণভাৰতো. ইমিনা ‘‘ভুজিস্সভাৰকরণানী’’তি ৰত্তব্বে উত্তরপদলোপৰসেন এৰং ৰুত্তন্তি দস্সেতি. ভুজিস্সানীতি ৰুচ্চন্তীতি সম্বন্ধো. ৰিঞ্ঞূহীতি বুদ্ধাদীহি সপ্পুরিসেহি. উপচারসমাধিং অপ্পনাসমাধিং ৰাতি এত্থ ৰাসদ্দো সমুচ্চযত্থো. উপচারসমাধিঞ্চ অপ্পনাসমাধিং চাতি হি অত্থো. ‘‘সংৰত্তযন্তী’’তি ইমিনা সমাধিসংৰত্তনিকানীতি এত্থ অনীযসদ্দো বহুলং কত্তুৰাচকোতি দস্সেতি. সীলসামঞ্ঞগতোতি এত্থ সমানস্স ভাৰো সামঞ্ঞং, তং গতোতি সামঞ্ঞগতো, সীলেন সামঞ্ঞগতো সীলসামঞ্ঞগতো, হুত্ৰা ৰিহরতীতি যোজনা. তেন ৰুত্তং ‘‘সমানভাৰূপগতসীলো ৰিহরতী’’তি.

যাযং দিট্ঠীতি এত্থ ‘‘দিট্ঠী’’তি সামঞ্ঞগতস্সাপি সদ্দস্স ‘‘অরিযা’’তি সদ্দন্তরসন্নিধানেন ৰিসেসৰিসযত্তা সম্মাদিট্ঠীতি আহ ‘‘মগ্গসম্পযুত্তা সম্মাদিট্ঠী’’তি. ‘‘মগ্গসম্পযুত্তা’’তি ইমিনা লোকিযসম্মাদিট্ঠিং পটিক্খিপতি. নিদ্দোসাতি ৰিসুদ্ধত্তা, উত্তমত্তা ৰা নিদ্দোসা. ইমিনা অরিযসদ্দো নিদ্দোসত্থৰাচকো অনিপ্ফন্নপাটিপদিকোতি দস্সেতি. নিয্যাতীতি নিব্বানং যাতি. ইমিনা অনীযসদ্দো বহুলং কত্তুৰাচকোতি দস্সেতি. যো তথাকারী হোতি, তক্করস্সাতি যোজনা. তথাকারীতি তায মগ্গসম্পযুত্তায সম্মাদিট্ঠিযা কারী হোতি. ইমিনা তায সম্মাদিট্ঠিযা করোতীতি তক্করোতি ৰচনত্থং দস্সেতি. দুক্খক্খযাযাতি এত্থ খীযনং খযো, দুক্খস্স খযো দুক্খক্খযো, তদত্থাযাতি দস্সেন্তো আহ ‘‘সব্বদুক্খস্স খযত্থ’’ন্তি. সেসন্তি ৰুত্তৰচনতো সেসং ৰচনং.

ইতি কতিপুচ্ছাৰারৰণ্ণনায যোজনা সমত্তা.

খন্ধকপুচ্ছাৰারো

পুচ্ছাৰিস্সজ্জনাৰণ্ণনা

৩২০. উপসম্পদক্খন্ধকন্তি মহাখন্ধকং. ‘‘নিদানেন চ নিদ্দেসেন চ সদ্ধি’’ন্তি ইমিনা সহ নিদানেনাতি সনিদানং, সহ নিদ্দেসেনাতি সনিদ্দেসন্তি ৰচনত্থং দস্সেতি. এত্থ নিদানেনাতি সিক্খাপদপঞ্ঞত্তিদেসসঙ্খাতেন নিদানেন. নিদ্দেসেনাতি পুগ্গলাদিনিদ্দেসেন. তত্থাতি উপসম্পদক্খন্ধকে. সমুক্কট্ঠপদানন্তি এত্থ সমুক্কট্ঠসদ্দো উত্তমপরিযাযোতি আহ ‘‘উত্তমানী’’তি. পদানীতি ‘‘ন ভিক্খৰে ঊনৰীসতিৰস্সো পুগ্গলো উপসম্পাদেতব্বো’’তি (পাচি. ৪০২-৪০৩; মহাৰ. ১২৪) আদিনা নযেন ৰুত্তানি পদানি. ইমেহি পদেহি ‘‘সমুক্কট্ঠানি পদানি সমুক্কট্ঠপদানী’’তি ৰচনত্থং দস্সেতি. ইতীতি অযমত্থো. কস্মা পনেত্থ ‘‘সমুক্কট্ঠপদানং কতি আপত্তিযো’’তি পদানমেৰ সামিৰসেন নিদ্দেসো কতো, ননু আপত্তিযো নাম পুগ্গলানঞ্ঞেৰ হোন্তীতি আহ ‘‘যেন যেন হী’’তিআদি. হীতি যস্মা. যেন যেন পদেন পঞ্ঞত্তাতি সম্বন্ধো. সা সাতি আপত্তি. দ্ৰে আপত্তিযোতি এত্থ দ্ৰিন্নং আপত্তীনং সরূপং দস্সেন্তো আহ ‘‘পাচিত্তিযং, দুক্কট’’ন্তি.

নস্সন্তেতেতি নস্সন্তু এতে. ৰিনস্সন্তেতেতি ৰিনস্সন্তু এতে ভিক্খূতি অত্থো. তেহীতি ভিক্খূহি. ৰদতোতি ৰদন্তানং. সেসেসু উপোসথকরণেসূতি সম্বন্ধো. ‘‘দুক্কটাপত্তিযেৰা’’তি ইমিনা একা আপত্তীতি এত্থ অত্থপকরণাদিৰসেন দুক্কটাপত্তিযেৰাতি দস্সেতি.

পৰারণক্খন্ধকেপীতি পিসদ্দো উপোসথক্খন্ধকং অপেক্খতি.

চম্মসংযুত্তেপীতি চম্মেন সংযুত্তং কত্ৰা দেসিতে খন্ধকেপি, চম্মক্খন্ধকেপীতি অত্থো. পিসদ্দো পৰারণক্খন্ধকং অপেক্খতি. ভেসজ্জক্খন্ধকেপীতি পিসদ্দো চম্মক্খন্ধকং অপেক্খতি. সমন্তাতি অঙ্গজাতস্স সমন্ততো.

তত্থাতি কথিনক্খন্ধকে. চীৰরসংযুত্তেতি চীৰরক্খন্ধকে.

চম্পেয্যকেতি চম্পেয্যক্খন্ধকে. সমুচ্চযক্খন্ধকেসুপীতি পিসদ্দো চম্পেয্যক্খন্ধকং অপেক্খতি.

সমথক্খন্ধকে ইমা দ্ৰে আপত্তিযো হোন্তীতি যোজনা. এসেৰ নযো সেসেসুপি. খুদ্দকৰত্থুকেতি খুদ্দকৰত্থুক্খন্ধকে. গরুভণ্ডৰিস্সজ্জনেতি গরুভণ্ডস্স ৰিস্সজ্জনে.

সঙ্ঘভেদেতি সঙ্ঘভেদক্খন্ধকে. ‘‘সমাচারং পুচ্ছিস্সন্তি ৰুত্তে ৰত্তক্খন্ধকে’’তি ইমিনা সমাচারসদ্দেন ৰত্তক্খন্ধকং গহেতব্বন্তি দস্সেতি. সাতি দুক্কটাপত্তি. ‘‘তথা’’তি পদেন ‘‘একা দুক্কটাপত্তিযেৰা’’তি পদং অতিদিসতি. ‘‘পাতিমোক্খট্ঠপনে’’তি ইমিনা পাল়িযং ঠপনং পুচ্ছিস্সন্তি এত্থ ‘‘পাতিমোক্খ’’ন্তিআদিপদস্স লোপং দস্সেতি. পঞ্চসতিকসত্তসতিকেসূতি পঞ্চসতিকক্খন্ধকসত্তসতিকক্খন্ধকেসু. আরোপিতোতি এত্থ রুপধাতুযা দ্ৰিকম্মিকত্তা, ন্যাদিগণত্তা চ ‘‘ধম্মো’’তি পধানকম্মমেৰ ৰুত্তং, ন ‘‘সঙ্গহ’’ন্তি অপধানকম্মং. তেন ৰুত্তং ‘‘ধম্মো সঙ্গহ’’ন্তি. তত্থাতি পঞ্চসতিকসত্তসতিকেসু.

ইতি খন্ধকপুচ্ছাৰণ্ণনায যোজনা সমত্তা.

একুত্তরিকনযো

একুত্তরিকনযো এককৰারৰণ্ণনা

৩২১. এৰং খন্ধকপুচ্ছায ৰণ্ণনং কত্ৰা ইদানি একুত্তরিকনযস্স তং করোন্তো আহ ‘‘আপত্তি…পে… নযে’’তি. তত্থ একুত্তরিকনযে এৰং ৰিনিচ্ছযো ৰেদিতব্বোতি যোজনা. ‘‘ছ আপত্তিসমুট্ঠানানী’’তি ইমিনা সমুট্ঠানানি আপত্তিং করোন্তীতি অত্থেন আপত্তিকরা নামাতি দস্সেতি. এতেসন্তি ছন্নং আপত্তিসমুট্ঠানানং. হীতি যস্মা, আপজ্জতীতি সম্বন্ধো. সিক্খাপদে চাতি মাতিকাসিক্খাপদে চ. লহুকা আপত্তীতি এত্থ অপ্পসাৰজ্জত্তা ন লহুকা নাম হোতি, লহুকেন পন ৰিনযকম্মেনাতি আহ ‘‘লহুকেন ৰিনযকম্মেন ৰিসুজ্ঝনতো’’তি. পঞ্চৰিধাতি থুল্লচ্চযাদিৰসেন পঞ্চপকারা. কেনচীতি লহুকেন ৰা গরুকেন ৰা কেনচি আকারেন. সংৰিজ্জতি গিহিভাৰতো অৰসেসো সমণভাৰো এতিস্সাতি সাৰসেসা, পটিপক্খৰসেন অনৰসেসা. দ্ৰে আপত্তিক্খন্ধাতি পারাজিকসঙ্ঘাদিসেসৰসেন দ্ৰে আপত্তিক্খন্ধা.

‘‘করোন্তী’’তি ইমিনা অন্তরাযিকাতি এত্থ ণিকপচ্চযস্স অত্থং দস্সেতি. অন্তরাযিকা আপত্তিযো সব্বথা অন্তরাযিকা হোন্তীতি আহ ‘‘অন্তরাযিকং আপন্নস্সাপী’’তিআদি. দেসেত্ৰা সুদ্ধিপত্তস্সাতি সম্বন্ধো. লোকৰজ্জাতি লোকেহি ৰজ্জেতব্বা. পণ্ণত্তিৰজ্জাতি ভগৰতো পণ্ণত্তিযা ৰজ্জেতব্বা. যন্তি যং আপত্তিং আপজ্জতীতি সম্বন্ধো. করোন্তোতি কিরিযমানতো. এত্থ হি মানসদ্দস্স অন্তাদেসো. ইমিনা করণং কিরিযন্তি ভাৰত্থং দস্সেতি. আপজ্জতীতি পুগ্গলো আপজ্জতি. সা আপত্তি কিরিযতো সমুট্ঠিতা নামাতি যোজনা. কা আপত্তি ৰিযাতি আহ ‘‘পারাজিকাপত্তি ৰিযা’’তি. এসেৰ নযো অনন্তরৰাক্যেসুপি.

পুব্বাপত্তীতি এত্থ পুব্বসদ্দো পঠমত্থোতি আহ ‘‘পঠমং আপন্নাপত্তী’’তি. ‘‘আপন্না’’তি পদেন মজ্ঝেলোপং দস্সেতি. পচ্ছা আপন্নাপত্তীতি ৰত্তভেদদুক্কটাপত্তি. মূলৰিসুদ্ধিযাতি মূলে কাযচি আপত্তিযা অমিস্সত্তা ৰিসুদ্ধিযা আপত্তিযা. কুরুন্দিযং ৰুত্তন্তি সম্বন্ধো. ইদম্পীতি কুরুন্দিযং ৰুত্তৰচনম্পি. পিসদ্দেন পুরিমং মহাঅট্ঠকথাৰচনং অপেক্খতি. একেন পরিযাযেনাতি একেন কারণেন.

যাতি আপত্তি, দেসিতা হোতীতি সম্বন্ধো. অযং দেসিতা গণনূপিকা নামাতি যোজনা. যা দেসিতা হোতি, অযং অগণনূপিকা নামাতি যোজনা. সউস্সাহেনেৰাতি পুনপি আপজ্জিস্সামীতি সহ উস্সাহেনেৰ. হীতি সচ্চং, যস্মা ৰা. ‘‘গণনং ন উপেতী’’তি ইমিনা গণনং ন উপগচ্ছতীতি অগণনূপিকাতি ৰচনত্থং দস্সেতি. অট্ঠমে ৰত্থুস্মিং পূরণেতি সম্বন্ধো. ইদং পাল়িযং অট্ঠৰত্থুকপূরণৰসেন ভিক্খুনীনং আগতত্তা ভিক্খুনিযো সন্ধায ৰুত্তং. ভিক্খূনম্পি দুতিযপারাজিকট্ঠানে লব্ভতিযেৰ.

থুল্লৰজ্জাতি এত্থ থুল্লং ৰজ্জং এতিস্সাতি থুল্লৰজ্জাতি দস্সেন্তো আহ ‘‘থুল্লদোসে পঞ্ঞত্তা’’তি. যা চ ধম্মিকস্স পটিস্সৰস্স অসচ্চাপনে আপত্তি অত্থি, সা চ গিহিপটিসংযুত্তাতি যোজনা. পঞ্চানন্তরিযকম্মাপত্তীতি পঞ্চহি আনন্তরিযকম্মেহি আপন্না পারাজিকাপত্তি. সুদিন্নত্থেরাদীতি আদিসদ্দেন ধনিযত্থেরাদযো সঙ্গণ্হাতি. আদিকম্মিকোতি আদিকম্মং করোন্তো, তস্মিং নিযুত্তো ৰা. মক্কটিসমণাদীতি আদিসদ্দেন ৰজ্জিপুত্তকাদযো সঙ্গণ্হাতি. যো কদাচি করহচি আপত্তিং আপজ্জতি, সো অধিচ্চাপত্তিকো নামাতি যোজনা. পরতোপি এসেৰ নযো.

‘‘চোদেতী’’তি ইমিনা চোদেতীতি চোদকোতি ৰচনত্থং দস্সেতি. ‘‘চোদিতো’’তি ইমিনা চোদিতব্বোতি চুদিতো, সোযেৰ চুদিতকোতি ৰচনত্থং দস্সেতি. পঞ্চদসসূতি পাতিমোক্খট্ঠপনক্খন্ধকে ৰুত্তেসু পঞ্চদসধম্মেসু. তেনাতি অধম্মচোদকেন, চোদিতোতি সম্বন্ধো. পাতিমোক্খট্ঠপনক্খন্ধকে (চূল়ৰ. ৪০১) ৰুত্তে সচ্চে চ অকুপ্পে চ অতিট্ঠন্তোপি অধম্মচুদিতকোযেৰ নাম, সো পন ধম্মচোদকেন চোদিতেযেৰ কুপ্পন্তো অধম্মচুদিতকো নাম, অধম্মচোদকেন চোদিতে পন কুপ্পন্তোপি অধম্মচুদিতকো নাম ন হোতি, তস্মা ইধ ন ৰুত্তো. ‘‘সমন্নাগতো’’তি ইমিনা নিযতা এতস্স সন্তীতি নিযতোতি ৰচনত্থং দস্সেতি.

আপজ্জিতুং ভব্বাতি ভব্বাপত্তিকা. কেনচি কম্মেন অকতোপি অনুক্খিত্তকোযেৰ নাম, সো পন উক্খিত্তকোতি সঙ্কাভাৰতো ইধ ন ৰুত্তো. অযন্তি তজ্জনীযাদিকম্মকতো ভিক্খু. হীতি যস্মা, ন কোপেতীতি সম্বন্ধো. লিঙ্গদণ্ডকম্মসংৰাসনাসনাহীতি লিঙ্গনাসনেন চ দণ্ডকম্মনাসনেন চ সংৰাসনাসনেন চ. যেনাতি ভিক্খুনা. সোতি নানাসংৰাসকো. দ্ৰিন্নং নানাসংৰাসকানং ৰিসেসো হেট্ঠা (পাচি. অট্ঠ. ৪২৮) ৰুত্তোযেৰ. ঠপনং জানিতব্বন্তি এত্থ কিং ঠপনং নামাতি আহ ‘‘পাতিমোক্খট্ঠপন’’ন্তি.

ইতি এককৰারৰণ্ণনায যোজনা সমত্তা.

একুত্তরিকনযো দুকৰারৰণ্ণনা

৩২২. দুকেসু অচিত্তকা আপত্তীতি সম্বন্ধো. ভূতারোচনাপত্তীতি পাচিত্তিযাপত্তি. অভূতারোচনাপত্তীতি পারাজিকথুল্লচ্চযাপত্তি. পদসোধম্মাদিকাতিআদিসদ্দেন উত্তরিছপঞ্চৰাচা সঙ্গহিতা. মঞ্চপীঠাদীনন্তিআদিসদ্দেন ভিসিআদযো সঙ্গণ্হাতি. অনাপুচ্ছাগমনাদীসূতি আদিসদ্দেন অনুদ্ধরিত্ৰা গমনং সঙ্গণ্হাতি. সপুগ্গলোতি সো অত্তসঙ্খাতো পুগ্গলো সপুগ্গলো. পরপুগ্গলোতি পরো পুগ্গলো পরপুগ্গলো. গরুকন্তি সঙ্ঘাদিসেসং. লহুকন্তি পাচিত্তিযং. পুন গরুকন্তি পারাজিকং. পুন লহুকন্তি পাচিত্তিযমেৰ.

অঙ্গুলিমত্তম্পীতি পিসদ্দেন কেসগ্গমত্তম্পীতি অত্থং সম্পিণ্ডেতি. তন্তি মঞ্চপীঠং. গমিযো আপজ্জতি নামাতি সম্বন্ধো.

‘‘আদিযন্তো আপজ্জতি নামা’’তিআদিনা অত্থাপত্তি আদিযন্তো আপজ্জতীতি পাল়িযং আদিযন্তো হুত্ৰা আপজ্জতি আপত্তি অত্থীতি যোজনানযং দস্সেতি. এৰঞ্হি সতি ‘‘আপজ্জতী’’তি আখ্যাতপদং ‘‘অত্থী’’তি কিরিযন্তরং অপেক্খিত্ৰা কত্তা হোতীতি দট্ঠব্বং. অথ ৰা আদিযন্তো পুগ্গলো যং আপত্তিং আপজ্জতি, সা আপত্তি অত্থীতি যোজনা. এসেৰ নযো অঞ্ঞেসুপি. মূগব্বতাদীনীতি আদিসদ্দেন গোৰতকুক্কুরৰতাদীনি সঙ্গণ্হাতি. পারিৰাসিকাদযো আপজ্জন্তীতি সম্বন্ধো. তজ্জনীযাদিকম্মকতা ৰা পুগ্গলাতি যোজনা. অসমাদিযন্তা আপজ্জন্তীতি অসমাদিযন্তা হুত্ৰা আপজ্জন্তি. তেতি পুগ্গলে. করোন্তো আপজ্জতি নামাতি করোন্তো হুত্ৰা আপজ্জতি নামাতি যোজনা. এৰং দেন্তো আপজ্জতি নামাতিআদীসুপি.

একরত্তছারত্তসত্তাহদসাহমাসাতিক্কমেসূতি ‘‘একরত্তম্পি তিচীৰরেন ৰিপ্পৰসেয্যা’’তি (পারা. ৪৭৫-৪৭৬) চ ‘‘ছারত্তপরমং তেন ভিক্খুনা তেন চীৰরেন ৰিপ্পৰসিতব্ব’’ন্তি (পারা. ৬৫৩) চ ‘‘সত্তাহপরমং সন্নিধিকারকং পরিভুঞ্জিতব্ব’’ন্তি (পারা. ৬২২-৬২৩) চ ‘‘দসাহপরমং অতিরেকচীৰরং ধারেতব্ব’’ন্তি (পারা. ৪৬২-৪৬৩) চ ‘‘মাসপরমং নিক্খিপিতব্ব’’ন্তি (পারা. ৪৯৯-৫০০) চ ৰুত্তকালাতিক্কমেসু.

ইমং পন আপত্তিং আপজ্জতি নামাতি সম্বন্ধো.

যস্মিং পক্খে নিসিন্নোতি যস্মিং পক্খে সযং নিসিন্নো. তেসন্তি অত্তনো পক্খে নিসিন্নানং, নানাসংৰাসকন্তি সম্বন্ধো. যেসন্তি সকপক্খে নিসিন্নানং. কম্মং কোপেতীতি নানাসংৰাসকত্তা কম্মং কোপেতি. ইতরেসন্তি পরপক্খে নিসিন্নানং. হত্থপাসং অনাগতত্তা কম্মং কোপেতীতি যোজনা. ‘‘এসেৰ নযো’’তি ৰুত্তৰচনং ৰিত্থারেন্তো আহ ‘‘যেসং হী’’তিআদি. যেসন্তি সকপক্খে ৰা পরপক্খে ৰা নিসিন্নানং যেসং ভিক্খূনং. সোতি ভিক্খু. আপজ্জিতব্বতোতি আপজ্জিতব্বভাৰতো. ইমিনা পুগ্গলেন ছহি সমুট্ঠানেহি আপজ্জিতব্বাতি আপত্তিযোতি ৰচনত্থং দস্সেতি. কম্মেন ৰা সলাকগ্গাহেন ৰাতি এত্থ উদ্দেসো কম্মে লক্খণহারনযেন সঙ্গহং গচ্ছতি, ৰোহারানুস্সাৰনা সলাকগ্গাহেতি দস্সেন্তো আহ ‘‘উদ্দেসো চেৰ…পে… এক’’ন্তি. পুব্বভাগাতি সঙ্ঘভেদস্স পুব্বভাগে পৰত্তা. পমাণন্তি সঙ্ঘভেদস্স কারণং.

অদ্ধানহীনো নামাতি এত্থ অদ্ধানসদ্দো কালপরিযাযোতি আহ ‘‘ঊনৰীসতিৰস্সো’’তি. থেয্যসংৰাসকাদযোতিআদিসদ্দেন তিত্থিযপক্কন্তকভিক্খুনীদূসকপঞ্চানন্তরিযা সঙ্গহেতব্বা. অট্ঠ অভব্বপুগ্গলা করণদুক্কটকা নাম হোন্তীতি যোজনা. এত্থ কত্তব্বন্তি করণং, কম্মং, দুট্ঠু কত্তব্বন্তি দুক্কটং, কম্মমেৰ. করণং দুক্কটমেতস্সাতি করণদুক্কটকো. ৰিসেসনপরনিপাতো ‘‘অগ্যাহিতো’’তিআদীসু ৰিয. তদেৰত্থং দস্সেন্তো আহ ‘‘দুক্কটকিরিযা’’তিআদি. নো চ যাচতীতি এত্থ যাচধাতুযা পধানকম্মং দস্সেন্তো আহ ‘‘উপসম্পদ’’ন্তি, ‘‘সঙ্ঘ’’ন্তি অপধানকম্মমানেতব্বং. তেপিটকোতি তিপিটকং ৰাচুগ্গতৰসেন ধারকো. আণাযপীতি পিসদ্দো ‘‘মতেনপী’’তি অত্থং সম্পিণ্ডেতি. যাচন্তস্সেৰাতি নিস্সযং আচরিযং যাচন্তস্সেৰ. যং ৰত্থুং অজ্ঝাচরন্তো আপত্তিং আপজ্জতি, তং ৰত্থু সাতিসারং নামাতি যোজনা.

উপঘাতিকাতি এত্থ উপহনন্তীতি উপঘাতা, তেযেৰ উপঘাতিকাতি দস্সেন্তো আহ ‘‘উপঘাতা’’তি. তত্থাতি দ্ৰীসু উপঘাতিকেসু. দ্ৰে ৰেনযিকাতি এত্থ ৰিনযেন সিদ্ধা ৰেনযিকাতি দস্সেন্তো আহ ‘‘ৰিনযসিদ্ধা’’তি. ‘‘দ্ৰে অত্থা’’তি ইমিনা ণিকসদ্দস্স সরূপং দস্সেতি. পঞ্ঞত্তানুলোমং নাম দট্ঠব্বন্তি সম্বন্ধো. পচ্চযঘাতোতি পচ্চযস্স ঘাতো. ইমিনা সেতুঘাতোতি এত্থ সেতুসদ্দো পচ্চযৰাচকোতি দস্সেতি. চিত্তস্সাপীতি পিসদ্দো পগেৰ কাযৰাচানন্তি দস্সেতি. ইতিপীতি পিসদ্দো দুতিযত্থসম্পিণ্ডনো. ‘‘পমাণেনা’’তি ইমিনা মত্তকারিতাতি এত্থ মত্তসদ্দো পমাণত্থোতি দস্সেতি. ‘‘করণ’’ন্তি ইমিনা কারিতাতি তদ্ধিতভাৰং কিতভাৰেন দস্সেতি সভাগত্তা. কাযদ্ৰারিকন্তি কাযদ্ৰারে পৰত্তং আপত্তিং. ইমিনা আপজ্জতীতি পদস্স কম্মং দস্সেতি. কাযেনেৰ ৰুট্ঠাতীতি কাযসামগ্গিযা দানত্তা কাযেনেৰ ৰুট্ঠাতি. সীসমক্খনাদীতি আদিসদ্দেন পাদমক্খনাদিং সঙ্গণ্হাতি.

তন্তি ভারং. ‘‘নিত্থরিতুং ৰীরিযং আরভতী’’তি ইমিনা ৰহনাকারং দস্সেতি. থেরো সমানোতি যোজনা. নৰহনাকারং দস্সেন্তো আহ ‘‘অনুজানামী’’তিআদি. ‘‘কুক্কুচ্চাযিত্ৰা করোতী’’তি ইমিনা কুক্কুচ্চসদ্দস্স নামধাতুং দস্সেতি. ‘‘দিৰা চ রত্তো চা’’তি ইমিনা অভিণ্হং আসৰৰড্ঢনং দস্সেতি. তত্থ তত্থাতি তেসু তেসু ৰিভঙ্গক্খন্ধকেসু.

ইতি দুকৰারৰণ্ণনায যোজনা সমত্তা.

একুত্তরিকনযো তিকৰারৰণ্ণনা

৩২৩. তিকেসু ভগৰতি তিট্ঠন্তে যং আপত্তিং আপজ্জতি, সা আপত্তি অত্থীতি যোজনা. সব্বত্থাতি সব্বেসু পদেসু. ৰিত্থারং দস্সেন্তো আহ ‘‘তত্থা’’তিআদি. তত্থ তত্থাতি তিকেসু, ৰিত্থারো এৰং ৰেদিতব্বোতি যোজনা. লোহিতুপ্পাদাপত্তীতি অনুলোমপারাজিকাপত্তি. ‘‘আৰুসোৰাদেনা’’তি ‘‘আৰুসো’’তি ৰোহারেন. ৰোতি তুম্হেহি.

কালেতি পুরেভত্তকালে. ৰিকালেতি পচ্ছাভত্তকালে. অৰসেসং আপত্তিন্তি সম্বন্ধো. দসৰস্সোম্হীতি অহং দসৰস্সো অম্হি. নৰোতি পঞ্চৰস্সঅপরিপুণ্ণো. মজ্ঝিমোতি পঞ্চৰস্সতো পট্ঠায যাৰ দসৰস্সঅপরিপুণ্ণো. কুসলচিত্তো আপজ্জতীতি কুসলচিত্তো হুত্ৰা আপজ্জতি. অব্যাকতচিত্তোতি সুপন্তস্স ভৰঙ্গচিত্তং সন্ধায ৰুত্তং. যন্তি আপত্তিং. সব্বন্তি আপত্তিং, আপজ্জতীতি সম্বন্ধো. দুক্খৰেদনাসমঙ্গী হুত্ৰা আপজ্জতীতি যোজনা. যন্তি আপত্তিং.

তযো পটিক্খেপাতি এত্থ পটিক্খেপস্স সামিকং দস্সেন্তো আহ ‘‘বুদ্ধস্স ভগৰতো’’তি. কিলেসসল্লেখনকপটিপত্তিযাতি কিলেসং সল্লিখতি তনুং করোতীতি কিলেসসল্লেখনকা, সাযেৰ পটিপত্তি কিলেসসল্লেখনকপটিপত্তি, তায.

পরিসং উপট্ঠাপেন্তো বালোতি সম্বন্ধো. পরিসং উপট্ঠাপেন্তো পণ্ডিতো চাতি সম্বন্ধো. অৰসেসং আপত্তিন্তি যোজনা. কাল়েতি কাল়পক্খে. জুণ্হেতি জুণ্হপক্খে.

কত্তিকপুণ্ণমাসিযাতি পচ্ছিমকত্তিকপুণ্ণমাসিযা. কুরুন্দিযং ৰুত্তন্তি সম্বন্ধো. সুৰুত্তকারণং দস্সেন্তো আহ ‘‘চাতুমাস’’ন্তিআদি. হীতি যস্মা, পরিযেসন্তো চ নিৰাসেন্তো চ ভিক্খূতি যোজনা.

ৰত্থুন্তি মেথুনধম্মাদিৰত্থুং.

পটিচ্ছাদেতি এতাযাতি পটিচ্ছাদীতি করণত্থোপি যুজ্জতি. ৰিত্থারং দস্সেন্তো আহ ‘‘দ্ৰারং পিদহিত্ৰা’’তিআদি. এতদেৰাতি পরিকম্মমেৰ. উভযত্থাতি উভযেসু জন্তাঘরপটিচ্ছাদিউদকপটিচ্ছাদীসু. সব্বন্তি অখিলং পরিকম্মাদিং. নিয্যন্তীতি নিলীযিত্ৰা যন্তি. ইমিনা ৰহন্তীতি এত্থ ৰহধাতু গত্যত্থোতি দস্সেতি. অব্ভমহিকাধূমরজরাহুৰিমুত্তন্তি অব্ভেন চ মহিকায চ ধূমেন চ রজেন চ রাহুনা চ ৰিমুত্তং. তেসূতি অব্ভাদীসু. তথাতি যথা চন্দমণ্ডলং ৰিরোচতি, তথা সূরিযমণ্ডলং.

করণীযেন হুত্ৰাতি সম্বন্ধো.

কপ্পেন্তোতি করোন্তো. আগন্তুকো আপজ্জতীতি সম্বন্ধো. অনজ্ঝিট্ঠোতি অনজ্ঝেসিতো হুত্ৰাতি সম্বন্ধো. তিণৰত্থারকসমথে কাযেন ৰুট্ঠাতি কাযসামগ্গিযা দানত্তা.

আগাল়্হায চেতেয্যাতি আগাল়্হসদ্দো দল়্হপরিযাযোতি আহ ‘‘দল়্হভাৰাযা’’তি. আ ভুসো গাহিযতে আগাল়্হো, গাল়্হো বাল়্হো দল়্হোতি অত্থতো একং. চেতেয্যাতি পকপ্পেয্য. ন পূরযতোতি ন পূরযন্তস্স. অলজ্জী চ হোতি বালো চ অপকতত্তো চাতি এত্থ বালমত্তঅপকতত্তমত্তেন কম্মং ন কাতব্বং, আপত্তিৰসেনেৰ পন কাতব্বন্তি দস্সেন্তো আহ ‘‘বালো’’তিআদি. তত্থ বালো ন জানাতীতি সম্বন্ধো. অযন্তি বালো. এত্তাৰতাতি এত্তকেন অজাননমত্তেন. বালভাৰমূলকং আপত্তিন্তি সম্বন্ধো. দ্ৰে আপত্তিক্খন্ধেতি পারাজিকসঙ্ঘাদিসেসৰসেন দ্ৰে আপত্তিরাসযো. তেসন্তি তিণ্ণং পুগ্গলানং, কাতব্বন্তি সম্বন্ধো.

কাযিকো দৰো নামাতি কাযিকো পরিহাসো নাম. মুখালম্বরকরণাদিভেদোতি মুখেন আলম্বরনামকতূরিযকিচ্চস্স করণাদিভেদো. দ্ৰীহিপি দ্ৰারেহীতি কাযৰচীৰসেন দ্ৰীহিপি দ্ৰারেহি. কাযদ্ৰারে পঞ্ঞত্তসিক্খাপদৰীতিক্কমোতি কাযদ্ৰারে পঞ্ঞত্তস্স কাযসংসগ্গাদিসিক্খাপদস্স ৰীতিক্কমো. ৰচীদ্ৰারে পঞ্ঞত্তসিক্খাপদৰীতিক্কমোতি ৰচীদ্ৰারে পঞ্ঞত্তস্স দুট্ঠুল্লৰাচাদিসিক্খাপদস্স ৰীতিক্কমো. কাযিকেন উপঘাতিকেনাতি এত্থ উপঘাতিকং নাম অসিক্খনন্তি আহ ‘‘অসিক্খনেনা’’তি. কস্মা অসিক্খনং উপঘাতং নামাতি আহ ‘‘যো হী’’তিআদি. তত্থ যোতি পুগ্গলো. তন্তি কাযদ্ৰারে পঞ্ঞত্তসিক্খাপদং. নন্তি এৰমেৰ. হি যস্মা উপঘাতেতীতি সম্বন্ধো. ৰেজ্জকম্মেন সমন্নাগতোতি সম্বন্ধো. সাসনউগ্গহণআরোচনাদিনা ৰাচসিকেন মিচ্ছাজীৰেনাতি যোজনা.

‘‘মা ভণ্ডনং করী’’তি ইমিনা ‘‘মা’’তি পটিসেধস্স ‘‘করী’’তি পাঠসেসেন সম্বন্ধিতব্বভাৰং দস্সেতি. ন ৰোহরিতব্বন্তি এত্থ ৰিপুব্বঅৰপুব্ব-হরধাতু কথনত্থোতি আহ ‘‘ন কিঞ্চি ৰত্তব্ব’’ন্তি. হীতি সচ্চং. বীজনগ্গাহাদিকেতি আদিসদ্দেন ধম্মজ্ঝেসনাদিং সঙ্গণ্হাতি. ওকাসকম্মং কারেন্তস্সাতি এত্থ ‘‘ওকাস’’ন্তি চ ‘‘ওকাসকম্ম’’ন্তি চ সদিসন্তি আহ ‘‘ওকাসং কারেন্তস্সা’’তি. ন আদাতব্বন্তি ন গণ্হিতব্বং. তমেৰত্থং দস্সেন্তো আহ ‘‘যত্থ গহেত্ৰা’’তিআদি.

যন্তি ৰিনযং. সোতি ভিক্খু. সোতি ৰিনযো. তস্সাতি ভিক্খুস্স. ইদন্তি কম্মং. অঞ্ঞং পুচ্ছাতি মযা অঞ্ঞং ভিক্খুং পুচ্ছাহীতি যোজনা. ইতীতি এৰং. সোতি তীহঙ্গেহি সমন্নাগতো ভিক্খু. অস্সাতি তীহঙ্গেহি সমন্নাগতস্স. ন সাকচ্ছিতব্বোতি ন সহ কথেতব্বো.

‘‘লদ্ধি’’ন্তি ইমিনা ইদমপ্পহাযাতি এত্থ ইদংসদ্দস্স ৰিসযং দস্সেতি. ‘‘অৰিজহিত্ৰা’’তি ইমিনা হাধাতু ত্ৰাপচ্চযোতি দস্সেতি. সুদ্ধং ব্রহ্মচারিন্তি এত্থ সব্বথা কিলেসসুদ্ধো খীণাসৰোৰ গহেতব্বোতি আহ ‘‘খীণাসৰং ভিক্খু’’ন্তি. ‘‘পাতব্যভাৰ’’ন্তি ইমিনা পাতব্যতন্তি এত্থ তাপচ্চযো ভাৰত্থে হোতীতি দস্সেতি. ‘‘পটিসেৰন’’ন্তি ইমিনা পাতব্যসদ্দো যথাকামপরিভুঞ্জনত্থোতি দস্সেতি. গতিৰিসোধনন্তি দুগ্গতিতো সুগতিযা ৰিসুজ্ঝনং. ‘‘অকুসলানি চেৰ মূলানি চা’’তি ইমিনা অকুসলসদ্দস্স চ মূলসদ্দস্স চ তুল্যাধিকরণভাৰং দস্সেতি. তস্মা অকুসলসঙ্খাতানি মূলানি অকুসলমূলানীতি তুল্যাধিকরণসমাসো কাতব্বো. দুচ্চরিতানীতি এত্থ দুসদ্দস্স দুট্ঠুৰিরূপত্থভাৰং দস্সেন্তো আহ ‘‘দুট্ঠু চরিতানি, ৰিরূপানি ৰা চরিতানী’’তি. ৰিরূপানীতি ৰিকারসভাৰানি. ‘‘করণভূতেনা’’তি ইমিনা ‘‘কত্তুভূতেনা’’তি অত্থং পটিক্খিপতি. তত্থ তত্থাতি তস্মিং তস্মিং খন্ধকে.

ইতি তিকৰারৰণ্ণনায যোজনা সমত্তা.

একুত্তরিকনযো চতুক্কৰারৰণ্ণনা

৩২৪. চতুক্কেসু এৰং ৰিনিচ্ছযো ৰেদিতব্বোতি যোজনা. তিণৰত্থারকসমথট্ঠানন্তি তিণৰত্থারকসমথেন অধিকরণৰূপসমিতট্ঠানং. পরস্স কম্মৰাচাযাতি পরস্স করণভূতায কম্মৰাচায. ততোতি চতুক্কতো. পরেসূতি অঞ্ঞেসু চতুক্কেসু এৰমত্থো ৰেদিতব্বোতি যোজনা. তমেৰাতি কাযদ্ৰারিকমেৰ. পুন তমেৰাতি ৰচীদ্ৰারিকমেৰ. আপজ্জিতব্বাপত্তিঞ্চ সহাগারসেয্যাপত্তিঞ্চাতি যোজনা. জগ্গন্তোতি জাগরন্তো.

অচিত্তকো আপজ্জতি নামাতি ‘‘অচিত্তকো ভিক্খু আপজ্জতি নামা’’তি ৰা ‘‘অচিত্তকো হুত্ৰা আপজ্জতি নামা’’তি ৰা যোজনা কাতব্বা. সভাগন্তি ৰত্থুসভাগং. তঞ্চাতি অঞ্ঞতরং তঞ্চ আপত্তিং. ইতীতি এৰং.

কম্মেনাতি সমনুভাসনকম্মেন. কম্মেন ৰুট্ঠাতীতি কম্মেন এৰ ৰুট্ঠাতি.

সোতি গিহিপরিক্খারো, আহটো হোতীতি সম্বন্ধো. অৰাপুরণন্তি কুঞ্চিকং. অন্তোতি ভণ্ডাগারস্স অন্তো.

সম্মুখা ৰুট্ঠাতীতি সম্মুখা এৰ ৰুট্ঠাতি.

সযিতায এৰ ভিক্খুনিযাতি যোজনা. ইদন্তি সহাগারসেয্যাপত্তিং, পটিচ্চাতি সম্বন্ধো. এতন্তি ‘‘লিঙ্গপাতুভাৰেনা’’তি ৰচনং, ৰুত্তন্তি সম্বন্ধো. উভিন্নম্পীতি ভিক্খুভিক্খুনীনম্পি. লিঙ্গপটিলাভেনাতি ইত্থিলিঙ্গপটিলাভেন. পঠমন্তি আদিকপ্পকালে. ‘‘পঠমং উপ্পন্নৰসেনা’’তি ইমিনা পুরে উপ্পন্নং পুরিমন্তি ৰচনত্থং দস্সেতি. ‘‘সেট্ঠভাৰেনা’’তি ইমিনা পুরভাৰেন সেট্ঠভাৰেন উপ্পন্নং পুরিমন্তি ৰচনত্থং দস্সেতি. ‘‘পুরিসলিঙ্গ’’ন্তি ইমিনা ইমপচ্চযস্স সরূপং দস্সেতি. পুরিসকুত্তপুরিসাকারাদীতি আদিসদ্দেন পুরিসনিমিত্তাদযো সঙ্গণ্হাতি. যানি ছচত্তালীস সিক্খাপদানীতি যোজনা. ইমিনা ৰুত্তনযানুসারেন দুতিযচতুক্কেপি অত্থো ৰেদিতব্বো. তেহীতি তিংসাধিকেহি সতসিক্খাপদেহি.

মহাপদেসাতি ৰিনযে (মহাৰ. ৩০৫) আগতা মহাপদেসা. কস্মা মহাপদেসা ‘‘সামুক্কংসা’’তি ৰুচ্চন্তীতি আহ ‘‘তে হী’’তিআদি. তত্থ তেতি চত্তারো মহাপদেসা, ৰুচ্চন্তীতি সম্বন্ধো. ‘‘সয’’ন্তি ইমিনা সামুক্কংসাতি এত্থ সংসদ্দস্স সযমত্থং দস্সেতি. ‘‘উক্খিপিত্ৰা’’তি ইমিনা উক্কংসসদ্দো উক্খিপনত্থোতি দস্সেতি. ‘‘ঠপিতত্তা’’তি ইমিনা সযং উক্কংসিত্ৰা ঠপিতা সামুক্কংসাতি ৰচনত্থং দস্সেতি. ‘‘অজ্ঝোহরণীযপরিভোগা’’তি ইমিনা বাহিরপরিভোগং নিৰত্তেতি. উদকং পনাতি কেনচি অসংসগ্গং পসন্নোদকং পন. কালেতি সপ্পদট্ঠকালে. ‘‘পঞ্চ ৰা দস ৰা সীলানী’’তি ইমিনা পঞ্চ ৰা দস ৰা সীলানি উপাসকসীলন্তি দস্সেতি.

তত্থ চাতি ৰিহারে চ. উভোপীতি আগন্তুকাৰাসিকৰসেন উভোপি. অসাধারণন্তি দ্ৰীহি অসাধারণং. আপত্তিন্তি ভিক্খুনীহিযেৰ সাধারণং আপত্তিং. গমিযচতুক্কেপীতি পিসদ্দো আগন্তুকচতুক্কং অপেক্খতি. ৰত্থুনানত্ততাৰাতি মেথুনাদিৰত্থুনানত্ততা এৰ. হীতি সচ্চং, যস্মা ৰা. সাতি আপত্তি. তথাতি যথা কাযসংসগ্গে, তথা লসুণখাদনেতি যোজনা. এত্থাতি ৰত্থুনানত্ততাদিচতুক্কে. চত্তারি পারাজিকানীতি ভিক্খুপাতিমোক্খে আগতানি. ৰিসুং আপজ্জন্তেসুপি এসেৰ নযোতি সম্বন্ধো.

পুরিমচতুক্কেতি ৰত্থুনানত্ততাদিচতুক্কে. যো পঠমো পঞ্হোতি যোজনা. ইধাতি ৰত্থুসভাগতাদিচতুক্কে. যো চাতি যো চ পঞ্হো. তত্থাতি ৰত্থুনানত্ততাদিচতুক্কে. ততিযচতুত্থেসু পঞ্হেসূতি সম্বন্ধো.

‘‘সদ্ধিৰিহারিকস্সা’’তি পদং ‘‘কত্তব্ব’’ইতি পদে সম্পদানং.

গরুকন্তি পারাজিকং. লহুকন্তি থুল্লচ্চযং ৰা দুক্কটং ৰা.

অট্ঠন্নং ভিক্খুনীনং পটিপাটিযা নিসীদিতব্বতো ৰুত্তং ‘‘নৰমভিক্খুনিতো’’তি. পচ্চুট্ঠানারহাতি পটিমুখং উপট্ঠাতুং অরহা. অৰিসেসেন চাতি ‘‘ভিক্খূ’’তি ৰা ‘‘ভিক্খুনী’’তি ৰা ৰিসেস, মকত্ৰা সামঞ্ঞেন চ. ‘‘আসনারহচতুক্কস্সা’’তি পদং ‘‘পঠমপদ’’ন্তি পদে অৰযৰিসম্বন্ধো.

অসাধারণন্তি ভিক্খূহি অসাধারণং. ৰিকালে কপ্পতীতি তদহুৰিকালে কপ্পতি. কালাতীতন্তি কালযামসত্তহাতীতং. যাৰকালিকাদিত্তযঞ্চ অকপ্পিযমংসঞ্চ উগ্গহিতকঞ্চ অপটিগ্গহিতকঞ্চাতি যোজনা.

গুণঙ্গুণূপাহনঞ্চ ধুৰন্হানঞ্চ চম্মত্থরণঞ্চ গুণঙ্গুণূপাহনধুৰন্হানচম্মত্থরণানি. ইমানি চত্তারীতি পঞ্চৰগ্গেন গণেন উপসম্পদদানাদীনি. ইধাতি পচ্চন্তিমেসু জনপদেসু. ইধাতি মজ্ঝিমেসু. ইদন্তি চতুব্বিধং ৰত্থু. দীপেতুম্পীতি দীপনম্পি. তুংপচ্চযো হি কত্ৰত্থজোতকো. এসেৰ নযো দীপেতুং পনাতি এত্থাপি. সেসং অনুঞ্ঞাতকন্তি সম্বন্ধো. উভযত্থপীতি পচ্চন্তিমমজ্ঝিমৰসেন উভযত্থাপি.

ছন্দপারিসুদ্ধিঅক্খানং একং কত্ৰা ‘‘চত্তারো’’তি ৰুত্তং. চত্তারো পুব্বকিচ্চাতি লিঙ্গৰিপল্লাসো, ‘‘চত্তারি পুব্বকিচ্চানী’’তি হি অত্থো. এৰং ৰুত্তানি ইমানি চত্তারীতি সম্বন্ধো. এৰং আগতা সম্মুতিযোতি সম্বন্ধো. সব্বত্থাতি সব্বেসু চতুক্কেসু.

ইতি চতুক্কৰারৰণ্ণনায যোজনা সমত্তা.

একুত্তরিকনযো পঞ্চকৰারৰণ্ণনা

৩২৫. পঞ্চকেসু ‘‘পঞ্চ পুগ্গলা নিযতা’’তি এতং আনন্তরিযানমেৰ গহণন্তি যোজনা. পঞ্চ ছেদন কা আপত্তিযো নাম ৰেদিতব্বাতি সম্বন্ধো. যা ৰিকপ্পনা ৰুত্তাতি যোজনা. উস্সঙ্কিতোতি উট্ঠহিত্ৰা সঙ্কিতো. পরিসঙ্কিতোতি পুনপ্পুনং সঙ্কিতো. অকুপ্পো অরহত্তফলসঙ্খাতো ধম্মো ইমস্সাতি অকুপ্পধম্মো, খীণাসৰো. খীণাসৰো সমানোপি উস্সঙ্কিতো চেৰ পরিসঙ্কিতো চাতি যোজনা. পরিহরিতব্বাতি অপনেতব্বা. হীতি সচ্চং, যস্মা ৰা. এতেসূতি অগোচরেসু. থূপচীৰরন্তি এত্থ থূপং পরিক্খিপিত্ৰা কতং চীৰরং থূপচীৰরন্তি দস্সেন্তো আহ ‘‘ৰম্মিক’’ন্তিআদি. ৰম্মিকো হি থূপযতি উদ্ধং আরোহতীতি থূপোতি ৰুচ্চতি. ন্হানট্ঠানেতি সব্বেসং ন্হানট্ঠানে. তঞ্হি উদকেন কাযং অভিসিঞ্চতি এত্থাতি অভিসেকন্তি ৰুচ্চতি. অভিসেকে ছড্ডিতং আভিসেকিকং, চীৰরং. তেন ৰুত্তং ‘‘ছড্ডিতচীৰর’’ন্তি. ভতপটিযাভতন্তি এত্থ ভরধাতুযা পোসনত্থং পটিক্খিপিত্ৰা ধারণত্থং দস্সেন্তো আহ ‘‘সুসানং নেত্ৰা পুন আনীতক’’ন্তি. তত্থ ‘‘সুসান’’ন্তি ইমিনা কম্মং দস্সেতি, ‘‘পুনা’’তি ইমিনা পটিসদ্দস্স অত্থং দস্সেতি. ইমেহি পদেহি সুসানং ভতং হুত্ৰা গেহং পটিআভরিতব্বন্তি ভতপটিযাভতন্তি ৰচনত্থং দস্সেতি, যকারো পদসন্ধিকরো. পাল়িযং, অট্ঠকথাযঞ্চ পোত্থকেসু ‘‘গতপটিযাগত’’ন্তি কণ্ঠজততিযক্খরেন পাঠো অত্থি, সো অসুন্দরো.

কাযো পঠমং, ৰাচা দুতিযং, কাযৰাচা ততিযং, ইদং সন্ধায ‘‘ততিযেনা’’তি ৰুত্তং. তত্থেৰাতি অন্তরপেয্যালে এৰ.

অদিন্নন্তি এত্থ অকারস্স নকারিযভাৰঞ্চ তপচ্চযস্স কম্মৰাচকভাৰঞ্চ দস্সেন্তো আহ ‘‘অঞ্ঞেন ন দিন্ন’’ন্তি. তত্থ ‘‘অঞ্ঞেনা’’তি ইমিনা তপচ্চযস্স কম্মৰাচকভাৰং দস্সেতি, নকারেন অকারস্স কারিযং দস্সেতি. কেন কারণেন অৰিদিতন্তি আহ ‘‘পটিগ্গণ্হামীতি চেতনায অভাৰেনা’’তি. অৰিদিতন্তি অপাকটং. নটসমজ্জাদিদানন্তি নটসমজ্জাদীনং সব্বেসং দানং. উসভৰিস্সজ্জনন্তি উসভস্স ৰিস্সজ্জনং. ইদং উপলক্খণৰসেন ৰুত্তং. সব্বাসম্পি পন মনুস্সামনুস্সানং ইত্থীনং মেথুনরতিৰসেন পুরিসানং দানম্পি গহেতব্বং. ইত্থিদানন্তি এত্থাপি যাসং কাসঞ্চি ইত্থীনং যেসং কেসঞ্চি পুরিসানং দানং গহেতব্বং. পটিভানচিত্তকম্মদানন্তি মেথুনসেৰনপটিভানচিত্তকম্মদানং. লোকস্সাতি লোকেন. কথেতুকম্যতাতি কথেতুকামতা. ‘‘ন সুপ্পটিৰিনোদযা’’তি ইমিনা দুক্খেন পটিৰিনোদেতব্বাতি দুপ্পটিৰিনোদযা, পটিৰিনোদেতুং ন সুকরাতি দস্সেতি. উপাযেনাতি যুত্তিযা.

ফুস্সদেৰত্থেরো অট্ঠাসি কিরাতি সম্বন্ধো. একংসন্তি ভুম্মত্থে চেতং উপযোগৰচনং. একস্মিং অংসেতি হি অত্থো. বুদ্ধারম্মণন্তি বুদ্ধগুণারম্মণং. মারোতি দেৰপুত্তমারো, গতোতি সম্বন্ধো. গোমযন্তি গোমীল়্হং. জরগ্গৰোতি জরগোণো. তাদিসমেৰাতি গোমযৰিপ্পকিরণসভাৰমেৰ. ৰিপ্পকারন্তি ৰিসেসপকারেন করণং. ৰঙ্কপাদন্তি কুটিলপাদং. পরিকসন্তোতি পরিচ্ছেদং কত্ৰা ৰিলেখন্তো. ৰিগচ্ছপুরিসোতি ৰিকারং, ৰিরূপং ৰা গতপুরিসো. ‘‘ৰিভচ্ছপুরিসো’’তিপি পাঠো, ৰিসেসেন সোভণং ভক্খপুরিসোতি অত্থো. অযমেৰ পাঠো অভিধানাদীসু (অভিধানপ্পদীপিকাযং ১০২ গাথাযং) দিস্সতি. সমন্তাতি কটঅন্ধকারৰিহারস্স সমন্ততো. মারো সিযা নু খোতি যোজনা. ন অসক্খিং ইতি আহাতি যোজনা. দিট্ঠপুব্বোতি পুব্বে দিট্ঠো. মহানুভাৰোতি দেৰিদ্ধিযা মহানুভাৰো. ইঙ্ঘাতি উয্যোজনত্থে নিপাতো, উয্যোজেমীতি অত্থো. অত্তভাৰন্তি তৰ অত্তভাৰং. তাদিসং রূপন্তি বুদ্ধস্স ভগৰতো অত্তভাৰসদিসং রূপং. তংসরিক্খকন্তি তেন রূপেন সদিসং. পতিরূপমেৰ সদিসট্ঠেন পতিরূপকং, ন একংসসদিসং রূপং কিঞ্চি সদিসরূপন্তি অত্থো. সকত্তভাৰন্তি সস্স এসো সকো, সোযেৰ অত্তভাৰো সকত্তভাৰো, তং. অযন্তি মারো. কথন্তি কেন কারণেন ভগৰা ন সোভতি নু খো, সোভতিযেৰাতি অত্থো. তদেৰ সমত্থেতুং ৰুত্তং ‘‘সব্বসো ৰীতরাগদোসমোহো’’তি. ৰঞ্চিতোম্হীতি অহং ৰঞ্চিতো অম্হি. কিং অত্থীতি কিং নাম অত্থি, মম ৰঞ্চনচিত্তং নত্থীতি অধিপ্পাযো. দহরভিক্খু পটিলভতীতিআদিনা সম্বন্ধিতব্বং.

দহরভিক্খু অট্ঠাসীতি সম্বন্ধো. সঙ্কারছড্ডনিং পচ্ছিন্তি সম্বন্ধো. সঙ্কারং ছড্ডেতি ইমাযাতি সঙ্কারছড্ডনী. তিস্সদত্তত্থেরো নাম পুচ্ছীতি সম্বন্ধো. নাৰাতোতি পোততো. পঞ্হাসহস্সন্তি সমথৰিপস্সনাকম্মট্ঠানেসু পুচ্ছাসহস্সং. পুচ্ছীতি দহরং পুচ্ছি. পরিচ্ছিন্দীতি তস্মিং দিৰসে কাতব্বৰত্তং নিট্ঠপেসীতি অত্থো. যোনকৰিসযতোতি যোনকলোকতো. অট্ঠ কপ্পে অনুস্সরীতি চেতিযঙ্গণং দিস্ৰা চিত্তস্স পসীদনতো পুব্বেনিৰাসঞাণেন অট্ঠ কপ্পে অনুস্সরি.

একো ভিক্খু গতোতি সম্বন্ধো. দেৰতা পুপ্ফহত্থা অট্ঠংসূতি মনুস্সৰেসং গহেত্ৰা অট্ঠংসু. তেন ৰুত্তং ‘‘কতরগামৰাসিকাত্থা’’তি. তুম্হে কতরস্মিং গামে ৰসনসীলা অত্থ ভৰথাতি যোজনা. ইধেৰাতি ইমস্মিংযেৰ ঠানে. ঠিতাম্হাতি মযং ঠিতা অম্হাতি যোজনা.

অযং কথাতি অযং ৰক্খমানকথা. কিং অমচ্চপুত্তো পাসাদিকো নু খোতি যোজনা. নেতি অমচ্চপুত্তঅভযত্থেরে. ঞাতকা অগমংসূতি সম্বন্ধো. থেরমাতাপি পহিণীতি সম্বন্ধো. পিসদ্দেন ঞাতকে অপেক্খতি. পহিণাকারং দস্সেন্তো আহ ‘‘পুত্তো মে’’তিআদি. অমচ্চপুত্তো আরূল়্হোতি সম্বন্ধো. অভযত্থেরো আহাতি সম্বন্ধো. তেনাতি অমচ্চপুত্তেন. যুগগ্গাহন্তি যুগস্স গাহং. ‘‘মহল্লকত্থেরস্স সম্মট্ঠট্ঠানে কচৰরং ছড্ডেত্ৰা’’তি ৰচনং আৰি করোন্তো আহ ‘‘অতীতত্তভাৰে কিরা’’তিআদি. অমচ্চপুত্তো ছড্ডেসীতি সম্বন্ধো.

তন্তি সম্মজ্জনৰত্তং. তত্রাতি ‘‘সত্থুসাসনং কতং হোতী’’তিৰচনে. আযস্মা সারিপুত্তো নিসীদি কিরাতি সম্বন্ধো. ভগৰা পচ্চাগঞ্ছীতি সম্বন্ধো. পাদানীতি পাদস্স অক্কমনট্ঠানানি, পাদচেতিযানীতি অত্থো. থেরো নিসীদীতি সম্বন্ধো. জণ্ণুকেহি পতিট্ঠায ‘‘পাদচেতিযং ৰন্দিত্ৰা’’তি পাঠসেসো অজ্ঝাহরিতব্বো. মে নিসিন্নভাৰং মে সত্থা অঞ্ঞাসি ৰতাতি যোজনা. মেসদ্দো হি পুব্বপরাপেক্খো. চোদনন্তি দোসারোপনং. কারেস্সামীতি দসবলং কারেস্সামি. ভগৰা আহাতি সম্বন্ধো. গতোসীতি ত্ৰং গতো অসি, ৰিচরন্তস্স তুয্হং ন পতিরূপন্তি যোজনা. ততোতি চোদনকালতো.

এত্তকো ৰিনিচ্ছযো উপলব্ভতীতি সম্বন্ধো. ভাসপরিযন্তন্তি ৰচনপরিচ্ছেদং. অযন্তি কথা. এত্তকং ৰচনন্তি সম্বন্ধো. গয্হূপগন্তি গহেতব্বভাৰং উপগমনং, গণ্হিতুং খমনীযন্তি অত্থো. তানীতি দ্ৰে মূলানি. পুন তানীতি সমুদযভূতানি ছ আপত্তিসমুট্ঠানানি. ৰত্থুন্তি মেথুনাদিৰত্থুং. ইতিপীতি পিসদ্দো পঠমনযং অপেক্খতি. এত্থ পঠমনযে মূলেন সমুদযস্স পাযতো অভেদো হোতি, পচ্ছিমনযে পন সব্বথা ভেদো হোতি. তস্মা পচ্ছিমনযোযেৰ যুত্ততরোতি দট্ঠব্বো. ‘‘ৰূপসম্মতী’’তি ইমিনা ‘‘নিরুজ্ঝতী’’তি পদস্স সমুচ্ছেদনিরোধং দস্সেতি. ৰুট্ঠানেনাতি পরিৰাসাদিৰিনযকম্মেন.

তেত্তিংসমূলানং সরূপং দস্সেন্তো আহ ‘‘ৰিৰাদাধিকরণস্স দ্ৰাদস মূলানী’’তিআদি. একং মূলন্তি সম্বন্ধো. তানীতি তেত্তিংস মূলানি. পরতোতি পরস্মিং. ‘‘অট্ঠারস ভেদকরৰত্থূনী’’তিআদিনা অধিকরণানং সমুট্ঠানং দস্সেতি. চত্তারি সঙ্ঘকিচ্চানি নিস্সায উপ্পজ্জতীতি যোজনা. ইদন্তি ৰত্থু. সত্তন্নং নিদানন্তি সত্তন্নং আপত্তিক্খন্ধানং পঞ্ঞত্তিট্ঠানসঙ্খাতং নিদানং. এত্থাতি ঠানে. পঞ্ঞত্তিং ন জানাতীতি এত্থ ‘‘অনুপঞ্ঞত্তিং ন জানাতী’’তি ৰক্খমানত্তা পঠমপঞ্ঞত্তি গহেতব্বাতি আহ ‘‘পঠমপঞ্ঞত্তিং ন জানাতী’’তি. অনুপঞ্ঞত্তীতি এত্থ অনুসদ্দো নউপচ্ছিন্নত্থোতি আহ ‘‘পুনপ্পুনং পঞ্ঞত্তিং ন জানাতী’’তি. পচ্ছাত্থোপি যুজ্জতেৰ পঠমপঞ্ঞত্তিতো পচ্ছা পঞ্ঞত্তত্তা. অনুসন্ধিৰচনপথন্তি এত্থ অনুসন্ধীনং ৰসেন ৰচনপথন্তি দস্সেন্তো আহ ‘‘কথানুসন্ধিৰিনিচ্ছযানুসন্ধিৰসেন ৰত্থু’’ন্তি. ঞত্তিকিচ্চন্তি ঞত্তিযা কিচ্চং. ইমিনা ঞত্তিযাতি এত্থ সাম্যত্থে সামিৰচনং. করধাতুসম্বন্ধে করণৰচনম্পি যুজ্জতেৰ. করণন্তি এত্থ চ যুপচ্চযস্স কম্মত্থভাৰঞ্চ দস্সেতি. ন কেৰলং ঞত্তিকম্মে এৰ ঞত্তিকিচ্চং ন জানাতি, অথ খো ঞত্তিদুতিযঞত্তিচতুত্থকম্মেসুপি ন জানাতীতি দস্সেন্তো আহ ‘‘ঞত্তিদুতিযঞত্তিচতুত্থকম্মেসূ’’তিআদি. পুব্বে ঠপেতব্বাতি ঞত্তি নাম কম্মৰাচায পুব্বে ঠপেতব্বাতি ন জানাতি. ইমিনা নপুব্বকুসলভাৰং দস্সেতি. ‘‘পচ্ছা’’তি ইমিনা নঅপরকুসলভাৰং দস্সেতি. পিসদ্দেন পঠমনযং অপেক্খতি. ‘‘কালং ন জানাতী’’তি ইমিনা অকালঞ্ঞূতি পদস্স ৰিগ্গহৰাক্যং দস্সেতি. কালং দস্সেন্তো আহ ‘‘অনজ্ঝিট্ঠো’’তিআদি.

‘‘ধুতঙ্গে আনিসংসং অজানিত্ৰা’’তি ইমিনা মন্দমোমূহানং ফলং দস্সেতি. পাপিচ্ছোতি এত্থ পাপিচ্ছো নাম পচ্চযলাভস্স পত্থনাতি আহ ‘‘পচ্চযলাভং পত্থযমানো’’তি. কাযৰিৰেকো চ চিত্তৰিৰেকো চ উপধিৰিৰেকো চ কাযচিত্তউপধিৰিৰেকং, সমাহারদ্ৰন্দো, পুব্বপদেসু উত্তরপদলোপো. এতস্সাতি আরঞ্ঞিকস্স. ইমিনা ইমায অত্থো ইদমত্থো, সো এতস্সত্থীতি ইদমত্থীতি ৰচনত্থং দস্সেতি. অপ্পিচ্ছঞ্ঞেৰাতিআদীসু এৰসদ্দানং ছড্ডেতব্বত্থং দস্সেন্তো আহ ‘‘ন অঞ্ঞং কিঞ্চি লোকামিস’’ন্তি.

নৰৰিধন্তি দিৰসৰসেন তিৰিধং, তথা কত্তব্বাকারৰসেন, তথা কারকৰসেনাতি নৰৰিধং উপোসথং.

কাযদুচ্চরিতাদি যস্মা ন পসাদং সংৰত্তেতি, ন পসাদায ৰা সংৰত্ততি, তস্মা অপাসাদিকন্তি ৰুচ্চতি. তেন ৰুত্তং ‘‘অপাসাদিকন্তি কাযদুচ্চরিতাদি অকুসল’’ন্তি. ৰেলং অতিক্কম্মাতি ভোজনাদিকালং অতিক্কমিত্ৰা. ইমিনা অতিৰেলন্তি এত্থ অতিসদ্দস্স অতিক্কমনত্থঞ্চ ‘‘অতিৰেল’’ন্তি পদস্স ‘‘ৰিহরতো’’তি পদে কিরিযৰিসেসনভাৰঞ্চ দস্সেতি. অপ্পং কালন্তি যোজনা. অৰতরণং ওতারোতি দস্সেন্তো আহ ‘‘ওতরণ’’ন্তি. সব্বত্থাতি সব্বেসু পঞ্চকেসু.