নমো তস্স ভগৰতো অরহতো সম্মাসম্বুদ্ধস্স

খুদ্দসিক্খা-মূলসিক্খা

খুদ্দসিক্খা

গন্থারম্ভকথা

(ক)

আদিতো উপসম্পন্ন-সিক্খিতব্বং সমাতিকং;

খুদ্দসিক্খং পৰক্খামি, ৰন্দিত্ৰা রতনত্তযং.

তত্রাযং মাতিকা –

(খ)

পারাজিকা চ চত্তারো, গরুকা নৰ চীৰরং;

রজনানি চ পত্তো চ, থালকা চ পৰারণা.

(গ)

কালিকা চ পটিগ্গাহো, মংসেসু চ অকপ্পিযং;

নিস্সগ্গিযানি পাচিত্তি, সমণকপ্প ভূমিযো.

(ঘ)

উপজ্ঝাচরিযৰত্তানি, ৰচ্চপ্পস্সাৰঠানিকং;

আপুচ্ছকরণং নগ্গো, ন্হানকপ্পো অৰন্দিযো.

(ঙ)

চম্মং উপাহনা চেৰ, অনোলোকিযমঞ্জনী;

অকপ্পিযসযনানি, সমানাসনিকোপি চ.

(চ)

অসংৰাসিকো চ কম্মং, মিচ্ছাজীৰৰিৰজ্জনা;

ৰত্তং ৰিকপ্পনা চেৰ, নিস্সযো কাযবন্ধনং.

(ছ)

পথৰী চ পরিক্খারো, ভেসজ্জুগ্গহদূসনং;

ৰস্সূপনাযিকা চেৰাৰেভঙ্গিযং পকিণ্ণকং.

(জ)

দেসনা ছন্দদানাদি, উপোসথপ্পৰারণা;

সংৰরো সুদ্ধি সন্তোসো, চতুরক্খা ৰিপস্সনাতি.

১. পারাজিকনিদ্দেসো

পারাজিকা চ চত্তারোতি –

১. মগ্গত্তযে অনিক্খিত্তসিক্খো সন্থতসন্থতে;

অল্লোকাসে নিমিত্তং সং, তিলমত্তম্পি সন্থতং.

২. অসন্থতমুপাদিণ্ণং, পৰেসন্তো চুতোথ ৰা;

পৰেসনট্ঠিতুদ্ধারপৰিট্ঠক্খণসাদকো.

৩. আদিযেয্য হরেয্যাৰহরেয্য ইরিযাপথং;

কোপেয্য ঠানা চাৰেয্য, সঙ্কেতং ৰীতিনামযে.

৪. অদিন্নং থেয্যচিত্তেন, ভৰে পারাজিকোথ ৰা;

থেয্যাবলকুসচ্ছন্নপরিকপ্পাৰহারকো;

ভণ্ডকালগ্ঘদেসেহি, পরিভোগেত্থ নিচ্ছযো.

৫. মনুস্সৰিগ্গহং চিচ্চ, জীৰিতা ৰা ৰিযোজযে;

সত্থহারকং ৰাস্স মরণচেতনো উপনিক্খিপে.

৬. গাহেয্য মরণূপাযং, ৰদেয্য মরণে গুণং;

চুতো পযোগা সাহত্থিনিস্সগ্গাণত্তিথাৰরা.

৭. ইদ্ধিৰিজ্জামযা কালৰত্থাৰুধিরিযাপথা;

ক্রিযাৰিসেসো ওকাসো, ছ আণত্তিনিযামকা.

৮. ঝানাদিভেদ নোসন্তমত্তনত্তুপনাযিকং;

কত্ৰা কোট্ঠাসমেকেকং, পচ্চুপ্পন্নভৰস্সিতং.

৯. অঞ্ঞাপদেসরহিতং, দীপেন্তোনধিমানিকো;

কাযেন ৰাচা ৰিঞ্ঞত্তি-পথে ঞাতে চুতো ভৰে.

১০. পারাজিকেতে চত্তারো, অসংৰাসা যথা পুরে;

অভব্বা ভিক্খুভাৰায, সীসচ্ছিন্নোৰ জীৰিতুং.

১১. পরিযাযো চ আণত্তি, ততিযে দুতিযে পন;

আণত্তিযেৰ সেসেসু, দ্ৰযমেতং ন লব্ভতি.

১২. সেৰেতুকামতাচিত্তং, মগ্গে মগ্গপ্পৰেসনং;

ইমং মেথুনধম্মস্স, আহু অঙ্গদ্ৰযং বুধা.

১৩. মনুস্সসং তথাসঞ্ঞী, থেয্যচিত্তঞ্চ ৰত্থুনো;

গরুতা অৰহারো চ, অদিন্নাদানহেতুযো.

১৪. পাণো মানুস্সকো পাণ-সঞ্ঞিতা ঘাতচেতনা;

পযোগো তেন মরণং, পঞ্চেতে ৰধহেতুযো.

১৫. অসন্ততা অত্তনি পাপমিচ্ছতা-

যারোচনা তস্স মনুস্সজাতিতা;

নাঞ্ঞাপদেসো চ তদেৰ জাননং,

পঞ্চেত্থ অঙ্গানি অসন্তদীপনে.

১৬. অসাধারণা চত্তারো, ভিক্খুনীনমভব্বকা;

একাদস চ ৰিব্ভন্তা, ভিক্খুনী মুদুপিট্ঠিকো.

১৭. লম্বী মুখেন গণ্হন্তো, অঙ্গজাতং পরস্স চ;

তত্থেৰাভিনিসীদন্তো, চত্তারো অনুলোমিকা.

১৮. মগ্গে মগ্গপ্পৰেসনা, মেথুনস্স ইধাগতা;

চত্তারোতি চতুব্বীস, সমোধানা পরাজিকাতি.

২. সঙ্ঘাদিসেসনিদ্দেসো

গরুকা নৰাতি –

১৯. মোচেতুকামতা সুক্ক-স্সুপক্কম্ম ৰিমোচযং;

অঞ্ঞত্র সুপিনন্তেন, সমণো গরুকং ফুসে.

২০. ইত্থিসঞ্ঞী মনুস্সিত্থিং, কাযসংসগ্গরাগৰা;

সম্ফুসন্তো উপক্কম্ম, সমণো গরুকং ফুসে.

২১. তথা সুণন্তিং ৰিঞ্ঞুঞ্চ, মগ্গং ৰারব্ভ মেথুনং;

দুট্ঠুল্লৰাচারাগেন, ওভাসেত্ৰা গরুং ফুসে.

২২. ৰত্ৰাত্তকামুপট্ঠান-ৰণ্ণং মেথুনরাগিনো;

ৰাচা মেথুনযুত্তেন, গরুং মেথুনযাচনে.

২৩. পটিগ্গহেত্ৰা সন্দেসং, ইত্থিযা পুরিসস্স ৰা;

ৰীমংসিত্ৰা হরং পচ্চা, সমণো গরুকং ফুসে.

২৪. সংযাচিতপরিক্খারং, কত্ৰাদেসিতৰত্থুকং;

কুটিং পমাণাতিক্কন্তং, অত্তুদ্দেসং গরুং ফুসে.

২৫. মহল্লকং ৰিহারং ৰা, কত্ৰাদেসিতৰত্থুকং;

অত্তনো ৰসনত্থায, সমণো গরুকং ফুসে.

২৬. অমূলকেন চোদেন্তো, চোদাপেন্তোৰ ৰত্থুনা;

অন্তিমেন চ চাৰেতুং, সুণমানং গরুং ফুসে.

২৭. অঞ্ঞস্স কিরিযং দিস্ৰা, তেন লেসেন চোদযং;

ৰত্থুনা অন্তিমেনাঞ্ঞং, চাৰেতুং গরুকং ফুসে.

২৮. ছাদেতি জানমাপন্নং, পরিৰসেয্য তাৰতা;

চরেয্য সঙ্ঘে মানত্তং, পরিৰুত্থো ছ রত্তিযো.

চিণ্ণমানত্তমব্ভেয্য, তং সঙ্ঘো ৰীসতীগণো.

২৯. আপত্তিনুক্খিত্তমনন্তরায

পহুত্ততাযো তথসঞ্ঞিতা চ;

ছাদেতুকামো অথ ছাদনাতি,

ছন্না দসঙ্গেহ্যরুণুগ্গমম্হীতি.

৩. চীৰরনিদ্দেসো

চীৰরন্তি –

৩০. খোমকোসেয্যকপ্পাস-সাণভঙ্গানি কম্বলং;

কপ্পিযানি ছল়েতানি, সানুলোমানি জাতিতো.

৩১. দুকূলঞ্চেৰ পট্টুণ্ণ-পটং সোমারচীনজং;

ইদ্ধিজং দেৰদিন্নঞ্চ, তস্স তস্সানুলোমিকং.

৩২. তিচীৰরং পরিক্খার-চোল়ং ৰস্সিকসাটিকং;

অধিট্ঠে ন ৰিকপ্পেয্য, মুখপুঞ্ছননিসীদনং.

৩৩. পচ্চত্থরণকং কণ্ডু-চ্ছাদিমেত্থ তিচীৰরং;

ন ৰসেয্য ৰিনেকাহং, চাতুমাসং নিসীদনং.

৩৪. ‘‘ইমং সঙ্ঘাটিংধিট্ঠামি’’, সঙ্ঘাটিমিচ্চধিট্ঠযে;

অহত্থপাসমেতন্তি, সেসেসুপি অযং নযো.

৩৫. অধিট্ঠহন্তো সঙ্ঘাটি-প্পভুতিং পুব্বচীৰরং;

পচ্চুদ্ধরিত্ৰাধিট্ঠেয্য, পত্তাধিট্ঠহনে তথা.

৩৬. এতং ইমং ৰ সঙ্ঘাটিং, সংসে পচ্চুদ্ধরামিতি;

এৰং সব্বানি নামেন, ৰত্ৰা পচ্চুদ্ধরে ৰিদূ.

৩৭. সঙ্ঘাটি পচ্ছিমন্তেন, দীঘসো মুট্ঠিপঞ্চকো;

উত্তমন্তেন সুগত-চীৰরূনাপি ৰট্টতি.

৩৮. মুট্ঠিত্তিকঞ্চ তিরিযং, তথা একংসিকস্সপি;

অন্তরৰাসকো চাপি, দীঘসো মুট্ঠিপঞ্চকো;

অড্ঢতেয্যো দ্ৰিহত্থো ৰা, তিরিযন্তেন ৰট্টতি.

৩৯. নিসীদনস্স দীঘেন, ৰিদত্থি দ্ৰে ৰিসালতো;

দিযড্ঢং দসা ৰিদত্থি, সুগতস্স ৰিদত্থিযা.

৪০. কণ্ডুপ্পটিচ্ছাদিকস্স, তিরিযং দ্ৰে ৰিদত্থিযো;

দীঘন্ততো চতস্সোৰ, সুগতস্স ৰিদত্থিযা.

৪১. ৰস্সিকসাটিকাযাপি, দীঘসো ছ ৰিদত্থিযো;

তিরিযং অড্ঢতেয্যাৰ, সুগতস্স ৰিদত্থিযা.

৪২. এত্থ ছেদনপাচিত্তি, করোন্তস্স তদুত্তরি;

পচ্চত্থরণ মুখচোল়া, আকঙ্খিতপ্পমাণিকা.

৪৩. পরিক্খারচোল়ে গণনা, পমাণং ৰা ন দীপিতং;

তথা ৰত্ৰা অধিট্ঠেয্য, থৰিকাদিং ৰিকপ্পিযং.

৪৪. অহতাহতকপ্পানং, সঙ্ঘাটি দিগুণা সিযা;

একচ্চিযোত্তরাসঙ্গো, তথা অন্তরৰাসকো.

৪৫. উতুদ্ধটান দুস্সানং, সঙ্ঘাটি চ চতুগ্গুণা;

ভৰেয্যুং দিগুণা সেসা, পংসুকূলে যথারুচি.

৪৬. তীসু দ্ৰে ৰাপি একং ৰা, ছিন্দিতব্বং পহোতি যং;

সব্বেসু অপ্পহোন্তেসু, অন্ৰাধিমাদিযেয্য ৰা;

অচ্ছিন্নঞ্চ অনাদিণ্ণং, ন ধারেয্য তিচীৰরং.

৪৭. গামে নিৰেসনে উদ্দো-সিতপাসাদহম্মিযে;

নাৰাট্টমাল়আরামে, সত্থখেত্তখলে দুমে.

৪৮. অজ্ঝোকাসে ৰিহারে ৰা, নিক্খিপিত্ৰা তিচীৰরং;

ভিক্খুসম্মুতিযাঞ্ঞত্র, ৰিপ্পৰত্থুং ন ৰট্টতি.

৪৯. রোগৰস্সানপরিযন্তা, কণ্ডুচ্ছাদিকসাটিকা;

ততো পরং ৰিকপ্পেয্য, সেসা অপরিযন্তিকা.

৫০. পচ্চত্থরণ পরিক্খার-মুখপুঞ্ছনচোল়কং;

দসং প্যরত্তনাদিণ্ণকপ্পং লব্ভং নিসীদনং.

৫১. অদসং রজিতংযেৰ, সেসচীৰরপঞ্চকং;

কপ্পতাদিণ্ণকপ্পংৰ, সদসংৰ নিসীদনং.

৫২. অনধিট্ঠিতনিস্সট্ঠং, কপ্পেত্ৰা পরিভুঞ্জযে;

হত্থদীঘং ততোপড্ঢ-ৰিত্থারঞ্চ ৰিকপ্পিযং.

৫৩. তিচীৰরস্স ভিক্খুস্স, সব্বমেতং পকাসিতং;

পরিক্খারচোল়িযো সব্বং, তথা ৰত্ৰা অধিট্ঠতি.

৫৪. অচ্ছেদৰিস্সজ্জনগাহৰিব্ভমা,