সেদমোচিকগাথা

(১) অৰিপ্পৰাসপঞ্হাৰণ্ণনা

৪৭৯. সেদমোচিকগাথাসূতি অধিপ্পাযত্থস্স গম্ভীরত্তা তং চিন্তেন্তানং ৰিনযধরানং কাযে সেদং মোচেতীতি সেদমোচিকা, সাযেৰ গাথা সেদমোচিকগাথা, তাসু. ‘‘অকপ্পিযসম্ভোগো ন লব্ভতী’’তি ইমিনা কপ্পিযসম্ভোগো লব্ভতীতি দস্সেতি. কপ্পিযসম্ভোগং দস্সেতুং ‘‘নহাপনভোজনাদী’’তি ৰুত্তং. অনাপত্তীতি মাতুভিক্খুনিযা অনাপত্তি. এসা পঞ্হাতি এত্থ পঞ্হসদ্দো সভাৰতিলিঙ্গোতি সদ্দসত্থেসু (সদ্দনীতিধাতুমালাযং ১৬ হকারন্তধাতু; অভিধানপ্পদীপিকাযং ১১৫ গাথাযং) ৰুত্তো, ইধ ইত্থিলিঙ্গৰসেন ৰুত্তো. ‘‘পণ্ডিতেহী’’তি ইমিনা কুসলস্স কারণং দস্সেতি, পণ্ডিতত্তা কুসলোতি অধিপ্পাযো. অস্সাতি পঞ্হায. এতন্তি ৰিস্সজ্জনং. অস্সাতি গাথায.

একাদস ৰিৰজ্জিযাতি অৰিভত্তিকনিদ্দেসো, একাদস ৰিৰজ্জিযেতি অত্থো. তেন ৰুত্তং ‘‘যে’’তিআদি. তেপীতি পিসদ্দো গাথাযং লুত্তনিদ্দিট্ঠগম্যমানভাৰং দস্সেতি.

অযন্তি ন্হাপিতপুব্বকো ভিক্খু. নিম্মিতবুদ্ধন্তি বুদ্ধেন নিম্মিতং বুদ্ধরূপং.

ৰিৰজ্জিযাতি এত্থ যকারো ত্ৰাপচ্চযস্স কারিযোতি আহ ‘‘ৰিৰজ্জেত্ৰা’’তি. অসীসকং যং তং কবন্ধং অত্থীতি যোজনা. অসীসকত্তা কেন সরীরেন জীৰিতং বন্ধতীতি কবন্ধো. যস্সাতি কবন্ধস্স.

হীতি সচ্চং. তেতি অভব্বপুগ্গলা.

ৰাচাতি এত্থ যকারলোপোতি আহ ‘‘ৰাচাযা’’তি. ইতি মেতি এৰং মম. এৰং ৰদমানে মম ৰচনন্তি যোজনা. অথৰা ইতিমেতি এৰং ইমে, এৰং ৰদমানে ইমে জনাতি যোজনা. সদ্দম্পীতি ইমিনা গিরসদ্দো সদ্দপরিযাযোতি দস্সেতি. হীতি সচ্চং. তুণ্হীভূতস্স নিসিন্নস্স তস্স ভিক্খুনোতি যোজনা. যদি মনোদ্ৰারে আপত্তি নাম নত্থি, এৰং সতি কস্মা আপজ্জেয্য ৰাচসিকন্তি ৰুত্তন্তি আহ ‘‘যস্মা পনা’’তিআদি. তেনাতি তস্মা. অস্সাতি ভিক্খুস্স.

সাতি ভিক্খুনী, আপজ্জতীতি সম্বন্ধো. ৰুত্তপ্পকারন্তি ‘‘গামন্তরপরিযাপন্ন’’ন্তি ৰুত্তপ্পকারং.

তাসূতি দ্ৰীসু ভিক্খুনীসু.

চতুরো জনাতি এত্থ চতুন্নং জনানং সরূপং দস্সেন্তো আহ ‘‘আচরিযো চ তযো চ অন্তেৰাসিকা’’তি. সাহত্থিকাতি সহত্থা অৰহরিতা. আণত্তিযাপীতি আণত্তেন অৰহরিতাপি. ইতরেসন্তি অন্তেৰাসিকানং, একেকো মাসকোতি সম্বন্ধো. এত্থাতি পরিৰারে সেদমোচিকগাথাযং.

(২) পারাজিকাদিপঞ্হাৰণ্ণনা

৪৮০. সন্থতপেয্যালঞ্চাতি পঠমপারাজিকৰিভঙ্গে (পারা. ৬৫) ৰুত্তং সন্থতপেয্যালঞ্চ.

লিঙ্গপরিৰত্তং সন্ধাযাতি সতি লিঙ্গে পরিৰত্তে পটিগ্গহণস্স ৰিজহনং সন্ধায ৰুত্তং.

যোতি ভিক্খু, পরিণামেতীতি সম্বন্ধো. অত্তনো অত্থাযাতি যোজনা.

অস্সাতি গাথায. কাকউহদন্তি কাকেহি করীসুস্সগ্গং. কদ্দমমক্খিতন্তি কদ্দমেন মক্খিতং. কাযগতানেৰ হুত্ৰাতি সম্বন্ধো.

হীতি ৰিত্থারো. অনরিযং তং ইত্থিং ৰা তং পুরিসং ৰা হনেয্যাতি যোজনা. লিঙ্গপরিৰত্তেন হেতুভূতেন ইত্থিভূতং, পুরিসভূতঞ্চাতি সম্বন্ধো. ইত্থিভূতন্তি চ ইত্থী হুত্ৰা ভূতং, ইত্থিভাৰং ৰা পত্তং.

মিগসিঙ্গতাপসসীহকুমারাদীনং তিরচ্ছানগতমাতাপিতরো ৰিযাতি যোজনা. মিগসিঙ্গতাপসোতি মিগসিঙ্গনামকো (জা. অট্ঠ. ৫.১৭.৯৬ আদযো) তাপসো. সীহকুমারোতি সীহবাহুকুমারো. আদিসদ্দেন ভূরিদত্তাদযো সঙ্গণ্হাতি.

কুরুন্দিযং আগতন্তি সম্বন্ধো.

‘‘সচ্চং ভণন্তোতি গাথাযা’’তি পদং ‘‘সচ্চং ভাসতো লহুকাপত্তি হোতী’’তি এত্থ ইতিসদ্দেন সম্বন্ধিতব্বং. ‘‘সচ্চং ভণন্তো’’তি গাথায ইতি অত্থোতি যোজনা.

(৩) পাচিত্তিযাদিপঞ্হাৰণ্ণনা

৪৮১. সলাকং দেন্তস্স অস্স ভিক্খুস্স ছেজ্জং হোতীতি যোজনা. ‘‘পারাজিকং হোতী’’তি ইমিনা হোতিছেজ্জন্তি পদস্স অত্থং দস্সেতি.

সুপ্পতিট্ঠিতনিগ্রোধসদিসং রুক্খমূলং, তমেৰ ৰা গহেতব্বং.

তিস্সিত্থিযোতি এত্থ ভুম্মত্থে উপযোগৰচনং, পচ্চত্তৰচনং ৰাতি আহ ‘‘তাসুপী’’তি. ‘‘যং তং মেথুনং নাম ত’’ন্তি ইমিনা ‘‘মেথুনং যং ত’’ন্তি পদানং সমানাধিকরণভাৰং দস্সেতি. ‘‘ন সেৰতী’’তি ইমিনা ন সেৰেতি এত্থ তিকারস্স একারাদেসভাৰং (জা. অট্ঠ. ৪.১১.৭৬ পুত্তো ৰা পিতরং যাচে ৰিয) দস্সেতি. তযো পুরিসেতি এত্থ ‘‘উপগন্ত্ৰা’’তি পদং অজ্ঝাহরিত্ৰা সম্বন্ধিতব্বন্তি দস্সেন্তো আহ‘‘তযো পুরিসেপি উপগন্ত্ৰা’’তি. ইমিনা তযো পুরিসেতি এত্থ উপযোগত্থে উপযোগৰচনন্তি দস্সেতি. পুরিমনযং গহেত্ৰা এত্থাপি ‘‘তীসু পুরিসেসূ’’তি ভুম্মত্থে উপযোগৰচনন্তি অত্থোপি যুজ্জতেৰ. ইমং নযং গহেত্ৰা পুরিমপদেপি তিস্সিত্থিযো উপগন্ত্ৰাতি উপযোগত্থে উপযোগৰচনন্তি অত্থোপি যুজ্জতেৰ. তস্মা তে দ্ৰে নযা অঞ্ঞমঞ্ঞোপদেসদাযকনযা নামাতি দট্ঠব্বং. ‘‘উভতোব্যঞ্জনসঙ্খাতে’’তি ইমিনা অনরিযসদ্দেন উভতোব্যঞ্জনোৰ ইধ গহেতব্বোতি দস্সেতি. ‘‘নাচরতী’’তি ইমিনা ন চাচরেতি এত্থাপি তিসদ্দস্স একারাদেসভাৰমেৰ দস্সেতি. মেথুনধম্মস্স পুব্বভাগং কাযসংসগ্গং আপজ্জিতুং ৰাযমন্তিযা তস্সা ভিক্খুনিযাতি যোজনা.

অস্সাতি গাথায, তিত্থিযো আরাধকো হোতীতি যোজনা. তত্থেৰাতি তিত্থিযৰত্তে এৰ. অস্সাতি তিত্থিযস্স. তমেৰাতি তিত্থিযৰত্তমেৰ.

সঙ্ঘাদিসেসন্তিআদিগাথা ৰুত্তাতি সম্বন্ধো. তন্তি অজ্ঝোহরণং.

আকাসগতং সামণেরন্তি সম্বন্ধো. সঙ্ঘেনপীতি পিসদ্দো ন কম্মারহেনেৰাতি দস্সেতি. ‘‘ন কাতব্ব’’ন্তি ইমিনা সঙ্ঘোপি কম্মারহোপি ভূমিগতোৰ ৰট্টতীতি দস্সেতি.

অস্সাতি গাথায ৰিনিচ্ছযোতি সম্বন্ধো.

‘‘ন দেতি, ন পটিগ্গণ্হাতী’’তি কিরিযাপদানং কত্তারং দস্সেন্তো আহ ‘‘নাপি উয্যোজিকা’’তিআদি. তস্সাতি অৰস্সুতপুরিসস্স. ‘‘কারণেনা’’তি ইমিনা তেনাতি পদস্স কারণত্থং দস্সেতি. এৰসদ্দো পন সম্ভৰৰসেন যোজিতো, ন অঞ্ঞেন কারণেনাতি অত্থো, অৰস্সুতস্স পুরিসস্সাতি সম্বন্ধো. গহণেতি উয্যোজিতায গহণে. তঞ্চ পরিভোগপচ্চযাতি এত্থ তসদ্দস্স ৰিসযং, পরিভোগস্স চ সম্বন্ধং দস্সেন্তো আহ ‘‘তঞ্চ পনা’’তিআদি. তত্থ ‘‘আপত্তি’’ন্তি ইমিনা তসদ্দস্স ৰিসযং দস্সেতি. ‘‘তস্সা উয্যোজিতাযা’’তি ইমিনা পরিভোগস্স সম্বন্ধং দস্সেতি. তস্সাতি উয্যোজিতায.

সত্তরসকেসু সঙ্ঘাদিসেসেসূতি সম্বন্ধো. ৰজ্জং ন ফুসতীতি পদস্স অত্থং দস্সেন্তো আহ ‘‘অঞ্ঞং নৰং আপত্তি’’ন্তি.

ইতি সেদমোচিকগাথাৰণ্ণনায যোজনা সমত্তা.