অপরদুতিযগাথাসঙ্গণিকং

(১) কাযিকাদিআপত্তিৰণ্ণনা

৪৭৪. ছ আপত্তিযো কাযিকাতি এত্থ ছ আপত্তিযো নাম কাতি আহ ‘‘অন্তরপেয্যালে’’তিআদি. অন্তরপেয্যালে ৰুত্তাতি সম্বন্ধো. ‘‘কাযদ্ৰারে সমুট্ঠিতত্তা’’তি ইমিনা কাযে সমুট্ঠন্তীতি কাযিকাতি ৰচনত্থং দস্সেতি. তস্মিংযেৰ অন্তরপেয্যালে ৰুত্তাতি সম্বন্ধো. ‘‘ৰজ্জপটিচ্ছাদিকাযা’’তিআদিনা ছাদেন্তস্স তিস্সোতি এত্থ তিণ্ণং সরূপং দস্সেতি. ‘‘ভিক্খুনিযা’’তিআদিনা পঞ্চ সংসগ্গপচ্চযাতি এত্থ পঞ্চন্নং সরূপং দস্সেতি.

‘‘একরত্ত’’ইতিআদিনা অরুণুগ্গে তিস্সোতি এত্থ তিণ্ণং সরূপং দস্সেতি. দ্ৰে যাৰততিযকাতি সংৰণ্ণেতব্বেন ‘‘একাদস যাৰততিযকা নামা’’তি সংৰণ্ণনায ৰিরুদ্ধভাৰং পটিক্খিপন্তো আহ ‘‘পঞ্ঞত্তিৰসেন পনা’’তিআদি. ‘‘ইমস্মিং সাসনে’’তি ইমিনা এত্থসদ্দস্স ৰিসযং দস্সেতি. একেন সব্বসঙ্গহোতি এত্থ একো নাম কো, সব্বানি নাম কানীতি আহ ‘‘যস্স সিযা’’তিআদি. ‘‘নিদানুদ্দেসেনা’’তি ইমিনা একস্স সরূপং দস্সেতি. ‘‘সিক্খাপদানঞ্চ পাতিমোক্খুদ্দেসানঞ্চা’’তি ইমেহি পদেহি সব্বসরূপং দস্সেতি. সঙ্গহ সদ্দেন কম্মছট্ঠীসমাসো.

‘‘ৰজ্জপটিচ্ছাদিকাযা’’তিআদিনা দ্ৰে দুট্ঠুল্লচ্ছাদনাতি এত্থ দ্ৰিন্নং সরূপং দস্সেতি.

‘‘ভিক্খু ভিক্খুনিযা’’তিআদিনা গামন্তরে চতস্সোতি এত্থ চতস্সন্নং সরূপং দস্সেতি. পুন ‘‘ভিক্খু ভিক্খুনিযা’’তিআদিনা চেতস্সা নদিপারপচ্চযাতি এত্থ চতস্সন্নমেৰ সরূপং দস্সেতি. ‘‘চীৰরদানে পাচিত্তিয’’ন্তি ইমিনা পাচিত্তিযভাৰেন সদিসত্তা সঙ্খ্যাৰিসেসো ন কাতব্বোতি দস্সেতি.

(২) দেসনাগামিনিযাদিৰণ্ণনা

৪৭৫. একেত্থাতি এত্থসদ্দো সাসনৰিসযো.

একসিক্খাপদম্পি নত্থীতি পিসদ্দো বহুসিক্খাপদানি পন পগেৰাতি চ আপত্তি পন পগেৰাতি চ আপত্তীপি নত্থীতি চ অত্থং দস্সেতি.

‘‘সকলেপি ৰিনযে’’তি ইমিনা দ্ৰেত্থাতি পাঠে এত্থসদ্দস্স ৰিসযং দস্সেতি. উভিন্নন্তি ভিক্খুভিক্খুনীনং. অঞ্ঞথা পন কিত্তকা পঠমাপত্তিকাতি আহ ‘‘ইতরথা পনা’’তিআদি. তত্থ ইতরথাতি পঞ্ঞত্তিতো অঞ্ঞেন পকারেন. কম্মঞ্চাতি কম্মঞত্তি চ. কম্মপাদিকা চাতি কম্মপাদঞত্তি চ. নৰসু ঠানেসূতি ওসারণাদীসু নৰসু ঠানেসু. দ্ৰীসূতি ঞত্তিদুতিয, ঞত্তিচতুত্থকম্মেসু.

ৰজ্জপটিচ্ছাদিকায পারাজিকং, উক্খিত্তানুৰত্তিকায পারাজিকং, অট্ঠৰত্থুকায পারাজিকন্তি ইতি ইমে তযোতি যোজনা. কারণভূতেনাতি হেতুভূতেন, ‘‘করণভূতেনা’’তিপি পাঠো, সাধকতমসত্তিভূতেনাতি অত্থো.

তেসন্তি অদ্ধানহীনাদীনং. এত্থাতি ‘‘তযো পুগ্গলা ন উপসম্পাদেতব্বা’’তি পাঠে, এতেসু অঙ্গহীনাদীসু ৰা. যোতি পুগ্গলো. অপরিপূরো ন যাচতীতি সম্বন্ধো. মাতুঘাতকাদযো করণদুক্কটকা চাতি যোজনা. তত্থাতি তেসু ঞত্তিকপ্পনাদীসু. ঞত্তিকপ্পনাতি ঞত্তিৰিধি. ৰিপ্পকতপচ্চত্তন্তি ৰিপ্পকতং পচ্চত্তং. অতীতকরণন্তি অতীতস্স করণং. ৰিত্থারেন্তো আহ ‘‘ৰত্থুসম্পন্নং হী’’তিআদি. তযো কম্মান সঙ্গহাতি এত্থ ছন্দভেদরক্খনত্থায নকারে নিগ্গহিতলোপো. নাসিতকাতি নাসেতব্বা পুগ্গলা, নাসিতব্বাতি নাসিতা, নাসিতা এৰ নাসিতকা. তিণ্ণং জনানন্তি তিণ্ণং উপসম্পদাপেক্খজনানং একূপজ্ঝাযেন নানাচরিযেন হুত্ৰাতি যোজনা. একানুস্সাৰনাতি একতো অনুস্সাৰনা.

পাদো নাম কহাপণস্স চতুত্থভাগো. মাসকো নাম পাদস্স পঞ্চমভাগো. পারাজিকন্তি ৰনপ্পতিং ছিন্দন্তস্স দুতিযপারাজিকং (পারা. ১১০). অনোদিস্সাতি ‘‘মনুস্সো মরতূ’’তিআদিনা ন উদ্দিসিত্ৰা. তেনাতি ৰিসেন.

ভিক্খুনোৰাদকৰগ্গস্মিন্তি সামঞ্ঞাধারো. দসসু সিক্খাপদেসূতি ৰিসেসাধারো. পঠমসিক্খাপদম্হিযেৰাতি দসসু সিক্খাপদেসু পঠমসিক্খাপদম্হিযেৰ. উপসম্পন্নায ভিক্খুনিযাতি সম্বন্ধো. ‘‘আপত্তি হোতী’’তি ইমিনা ‘‘চীৰরেনা’’তি পদস্স সম্বন্ধট্ঠানং দস্সেতি.

‘‘চতস্সো এৰা’’তি ইমিনা তত্তিকাতি এত্থ তসদ্দস্স ৰিসযং দস্সেতি. তা চতস্সো পরিমাণা যাসং আপত্তীনন্তি তত্তিকা. নিপন্নস্সাপি তত্তিকাতি এত্থাপি এসেৰ নযো. সাতি ভিক্খুনী.

(৩) পাচিত্তিযৰণ্ণনা

৪৭৬. পঞ্চ ভেসজ্জানীতি সব্বিআদীনি পঞ্চ ভেসজ্জানি. ইমং আপত্তিন্তি সম্বন্ধো. পচ্ছা আপন্নোতি যোজনা.

একং কবল়ন্তি একং আলোপং, তুম্হমূলেতি তুম্হং সন্তিকে.

যথাৰত্থুকন্তি ৰত্থুঅনুলোমং, আপত্তিযো দেসিতাৰ হোন্তীতি যোজনা.

কোকালিকাদীনন্তিআদিসদ্দেন কটমোদকতিস্সকাদযো (পারা. ৪১৭) সঙ্গণ্হাতি. পাপিকায দিট্ঠিযা অপ্পটিনিস্সগ্গে পাচিত্তিযঞ্চ চণ্ডকাল়িকায ভিক্খুনিযা পাচিত্তিযঞ্চাতি যোজনা. পযুত্তৰাচাপচ্চযাতি ৰিঞ্ঞত্তিনিমিত্তাদীহি পকারেন যুত্তায ৰাচায পচ্চযা. আপত্তি পারাজিকস্সাতি পারাজিকস্স আপজ্জনং. অথৰা পারাজিকস্সাতি অস্স ভিক্খুস্স পারাজিকা আপত্তি হোতীতি ৰা পারাজিকা আপত্তি অস্স ভৰতীতি ৰা যোজনা কাতব্বা. ইতীতি ইমা ছ আপত্তিযো আপজ্জতীতি যোজনা.

ভোজনং গহেত্ৰা অজ্ঝোহরমানাতি সম্বন্ধো. তথেৰাতি যথা খাদনে, তথেৰ মংসং লসুণং অজ্ঝোহরমানাতি যোজনা. ‘‘পণীতভোজনানী’’তি চ ‘‘অকপ্পিযমংস’’ন্তি চ পদানি ‘‘অজ্ঝোহরমানা’’তি পদেন সম্বন্ধিতব্বানি.

পঞ্চ ঠানানীতি পঞ্চ আপত্তিসঙ্খাতানি ঠানানি. তত্থাতি পঞ্চসু সহধম্মিকেসু. দ্ৰিন্নন্তি ভিক্খুভিক্খুনীনং. তেসন্তি সিক্খমানাদীনং. পঞ্চন্নমেৰাতি সহধম্মিকানংযেৰ. ৰিনিচ্ছযৰোহারোতি ৰিনিচ্ছযৰচনং. ইমিনা চত্তারি অধিকরণানি পটিক্খিপতি. অড্ডকম্মং নামাতি অভিযুঞ্জন্তানং কম্মং নাম.

‘‘সহধম্মিকান’’ন্তি ইমিনা পঞ্জন্নং ৰিনিচ্ছযোতি এত্থ পঞ্চসরূপং দস্সেতি. সোভণভাৰং ৰিত্থারেন্তো আহ ‘‘কতৰীতিক্কমো হী’’তিআদি. অব্ভুণ্হসীলোতি অভিনৰুপ্পন্নসীলো. অব্ভুণ্হসীলো নাম অত্থতো পাকতিকসীলোতি আহ ‘‘পাকতিকো’’তি, পকতিসীলেন নিযুত্তোতি অত্থো.

‘‘কাযদ্ৰারসম্ভৰা’’তি ইমিনা কাযিকাতি পদস্স তদ্ধিতভাৰং দস্সেতি. মুখং ওলোকেতব্বন্তি এত্থ ৰুত্তাতি সম্বন্ধো.

চতুন্নং দেসনায চাতি এত্থ ‘‘দেসনাযা’’তি পদং আদিপদলোপন্তি আহ ‘‘অচ্চযদেসনাযা’’তি. সাতি অচ্চযদেসনা. অভিনিলীযিত্ৰা ধনুনা মারেন্তীতি অভিমারা.

ছেজ্জং হোতীতি এত্থ ছেজ্জং নাম পারাজিকাপজ্জনমেৰাতি আহ ‘‘দেৰদত্তো ৰিয পারাজিকং আপজ্জতী’’তি. ইমা পন আপত্তিযোতি পারাজিকথুল্লচ্চযাপত্তিযো.

(৪) অৰন্দনীযপুগ্গলাদিৰণ্ণনা

৪৭৭. তেসন্তি দসন্নং পুগ্গলানং. ‘‘সদ্ধি’’ন্তি ইমিনা সামীচেনাতি এত্থ সহত্থে করণৰচনন্তি দস্সেতি. সামীচেনাতি চ সামীচিনা কত্তব্বং সামীচং কম্মং, তেন সামীচেন. দস চীৰরধারণাতি পদস্স সমাসভাৰং পটিক্খিপন্তো আহ ‘‘দস দিৰসানি অতিরেকচীৰরস্স ধারণা’’তি.

কতিসতন্তিআদীসু দ্ৰীসু গাথাপাদেসু চতূসু ৰিভত্যন্তপদেসু পুরিমং পুরিমেন, পচ্ছিমঞ্চ পচ্ছিমেন যথাক্কমং যোজেতব্বন্তি দস্সেন্তো আহ ‘‘কতিসতং আপত্তিযো রত্তিসতং ছাদযিত্ৰানা’’তি. পচ্ছিমগাথায পুব্বড্ঢেপি এসেৰ নযো. অযং হীতি অযং এৰ ৰক্খমানো. এত্থাতি গাথাযং. যোতি ভিক্খু, পটিচ্ছাদেতীতি সম্বন্ধো. ইতীতি অযং সঙ্খেপত্থো.

হেট্ঠা ৰুত্তেসু চতূসু চতুক্কেসু ধম্মেন সমগ্গং অপনেত্ৰা দ্ৰাদস কম্মদোসা ৰুত্তাতি দট্ঠব্বং. অধম্মেন ৰগ্গকম্মং, অধম্মেন সমগ্গকম্মন্তি যোজেতব্বং.

এত্থাতি ছসু কম্মেসু. এতদেৰাতি ধম্মেন সমগ্গকম্মমেৰ.

যং দেসিতাতি এত্থ যংসদ্দো ৰচনৰিপল্লাসোতি আহ ‘‘যানি দেসিতানী’’তি. ‘‘দেসিতানী’’তি ইমিনা দেসিতাতি এত্থ নিকারস্স আকারাদেসভাৰং দস্সেতি. ‘‘পরিযন্তপরিচ্ছেদভাৰরহিতত্তা’’তি ইমিনা নত্থি অন্তং পরিযন্তমেতস্সাতি অনন্তন্তি ৰচনত্থং দস্সেতি. তন্তি নিব্বানং, জিতন্তি সম্বন্ধো. কেন কং কিন্তি কত্ৰা জিতন্তি আহ ‘‘ভগৰতা কিলেসগণং অভিমদ্দিত্ৰা’’তি. কেন কং কিন্তি কত্ৰা কিং জিতং ৰিযাতি আহ ‘‘রঞ্ঞা সপত্তগণং অভিমদ্দিত্ৰা রজ্জং ৰিযা’’তি. তত্থ ‘‘রঞ্ঞা’’তি ইমিনা ‘‘কেনা’’তি পুচ্ছং ৰিস্সজ্জেসি. ‘‘সপত্তগণ’’ন্তি ইমিনা ‘‘ক’’ন্তি পুচ্ছং ৰিস্সজ্জেসি. ‘‘অভিমদ্দিত্ৰা’’তি ইমিনা ‘‘কিন্তি কত্ৰা’’তি পুচ্ছং ৰিস্সজ্জেসি. ‘‘রজ্জ’’ন্তি ইমিনা ‘‘কি’’ন্তি পুচ্ছং ৰিস্সজ্জেসি. সপত্তগণন্তি ৰেরিগণং. অযং পনেত্থ যোজনা – রঞ্ঞা সপত্তগণং অভিমদ্দিত্ৰা রজ্জং রাজভাৰং জিতং ৰিয, ভগৰতা কিলেসগণং অভিমদ্দিত্ৰা নিব্বানং জিতন্তি. স্ৰেৰাতি ভগৰা এৰ. ‘‘নিব্বিকারতাযা’’তি ইমিনা তাদিসদ্দো নিব্বিকারত্থৰাচকো অনিপ্ফন্নপাটিপদিকোতি দস্সেতি. ‘‘ৰিৰেকপঞ্চক’’ন্তি ইমিনা কাযচিত্তউপধিৰসেন ৰিৰেকত্তযম্পি গহেতব্বং ৰিৰেকভাৰেন সমানত্তা. তেন ভগৰতাতি সম্বন্ধো. ‘‘যানি সত্ত আপত্তিক্খন্ধানী’’তি ইমিনা একেত্থাতি এত্থ একসদ্দস্স ৰিসযং দস্সেতি. তত্থাতি সত্তসু আপত্তিক্খন্ধেসু. এত্থ পনাতি সমথেসু পন. হীতি সচ্চং. তস্সাতি সম্মুখাৰিনযস্স. অট্ঠকথাসূতি সব্বঅট্ঠকথাসু. মযং পনাতি সঙ্গহকারকা অম্হে পন, বুদ্ধঘোসনামকা মযং পনাতি অত্থো, রোচযামাতি সম্বন্ধো. কস্স কিমত্থং গহেত্ৰা রোচেসীতি আহ ‘‘ৰিনাতি নিপাতস্স পটিসেধনমত্থমত্ত’’ন্তি. ‘‘ৰিনাতি নিপাতস্সা’’তি পদং ‘‘অত্থমত্ত’’ন্তি পদে ৰাচকসম্বন্ধো. অত্তনো সাধ্যৰচনং বুদ্ধৰচনসঙ্খাতেন সাধকৰচনেন সাধেন্তো আহ ‘‘ৰুত্তম্পি চেত’’ন্তিআদি.

অট্ঠারস অট্ঠকানীতি অধম্মদিট্ঠিভেদ, ধম্মদিট্ঠিভেদ, ৰেমতিকভেদেসু তীসু একমেকং মূলং কত্ৰা তযো তযো মূলিং কত্ৰা নৰ হোন্তি, তেসু ধম্মদিট্ঠিভেদেসু ধম্মদিট্ঠিভেদং অপনেত্ৰা অট্ঠ হোন্তি, তানি অট্ঠারস ভেদকরৰত্থূসু যোজেত্ৰা অট্ঠারস অট্ঠকানি হোন্তীতি দট্ঠব্বং. ছঊনদিযড্ঢসতন্তি চতুচত্তালীসাধিকং সতন্তি ৰুত্তং হোতি.

একেকৰত্থুস্মিন্তি অট্ঠারসসু ভেদকরৰত্থূসু একেকস্মিং ৰত্থুস্মিং.

ইতি গাথাসঙ্গণিকৰণ্ণনায যোজনা সমত্তা.