উপালিপঞ্চকং

অনিস্সিতৰগ্গৰণ্ণনা

৪১৭. উপালিপঞ্হেসু ‘‘কতি হি নু খো ভন্তে’’তি পুচ্ছায সম্বন্ধো নত্থীতি কস্সচি মঞ্ঞনং নিৰারেন্তো আহ ‘‘অয সম্বন্ধো’’তি. থেরোতি উপালিত্থেরো, পুচ্ছীতি সম্বন্ধো. ইমেসন্তি পঞ্চকানং তন্তিন্তি সম্বন্ধো. কেসং অত্থায তন্তিং ঠপেস্সামীতি আহ ‘‘নিস্সায ৰসনকারীনং অত্থাযা’’তি. ৰসনকারীনং ভিক্খূনন্তি সম্বন্ধো. তেসন্তি পঞ্হানং.

আপন্নো কম্মকতোতি এত্থ ‘‘আপন্নো’’তি পদং ‘‘কম্মকতো’’তি পদস্স কারণদস্সনন্তি আহ ‘‘আপত্তিং আপন্নো, তপ্পচ্চযাৰ সঙ্ঘেন কম্মং কতং হোতী’’তি. তপ্পচ্চযাৰাতি তংআপত্তিআপন্নসঙ্খাতা কারণা এৰ.

নপ্পটিপ্পস্সম্ভনৰগ্গৰণ্ণনা

৪২০. অযন্তি কম্মকতো ভিক্খু, ন ৰত্ততীতি সম্বন্ধো. অনুলোমৰত্তেতি কতকম্মস্স অনুলোমে ৰত্তে. অস্সাতি ভিক্খুস্স. সরজ্জুকোতি সহ কম্মসঙ্খাতায রজ্জুযাতি সরজ্জুকো.

৪২১. সমগ্গেহি ভিক্খূহীতি সম্বন্ধো. হীতি সচ্চং. অচ্চযং দেসাপেত্ৰাতি অঞ্ঞমঞ্ঞং দোসং দেসাপেত্ৰা. তিণৰত্থারকসমথং ৰাতি ৰাসদ্দো অত্থন্তরৰিকপ্পো. তত্র চেতি এত্থ তসদ্দো কম্মৰিসযো, চেসদ্দো সচেপরিযাযোতি আহ ‘‘সচে তাদিসে কম্মে’’তি. দিট্ঠাৰিকম্মম্পি কত্ৰাতি দিট্ঠাৰিকম্মং কত্ৰাপীতি যোজনা. পিসদ্দেন অকত্ৰাপীতি সম্পিণ্ডেতি. যত্র পনাতি কম্মে পন. তত্থাতি কম্মে. পক্কমিতব্বন্তি সঙ্গামাৰচরেন পক্কমিতব্বং.

৪২২. উস্সিতমন্তীতি এত্থ উস্সিতং মন্তী উস্সিতমন্তীতি দস্সেন্তো আহ ‘‘লোভ…পে… ভাসিতা’’তি. তত্থ ‘‘লোভদোস মোহমানুস্সন্নং ৰাচ’’ন্তি ইমিনা উস্সিতপদস্স অত্থং দস্সেতি. ‘‘ভাসিতা’’তি ইমিনা ‘‘মন্তী’’তি পদস্স অত্থং দস্সেতি. নিস্সিতজপ্পীতি এত্থ অঞ্ঞনিস্সিতং জপ্পমেতস্সাতি নিস্সিতজপ্পীতি দস্সেন্তো আহ ‘‘অত্তনো’’তিআদি. এত্থ জপ্পন্তি ৰচনং. জপ্প ৰচনেতি হি ধাতুপাঠেসু ৰুত্তং. উস্সদযুত্তন্তি লোভাদিউস্সদযুত্তং, ৰচনন্তি সম্বন্ধো. এৰমঞ্ঞন্তি এৰং অত্তনা অঞ্ঞং. কথানুসন্ধিৰচনেতি চোদকচুদিতকানং কথায অনুসন্ধিৰচনে. এত্থ ‘‘ৰচনে’’তি ইমিনা ‘‘ভাসানুসন্ধী’’তি এত্থ ভাসসদ্দো ৰচনপরিযাযোতি দস্সেতি.

উস্সারেতীতি উদ্ধং গমাপেতি. ইমিনা উস্সাদেতি উপরি গমাপেতীতি উস্সাদেতাতি ৰচনত্থং দস্সেতি. এত্থ হি দকাররকারা সদিসত্থা. তে হি দ্ৰে অক্খরা কদাচি কত্থচি সদিসত্থা হোন্তি. অৰসারেতীতি হীনভাৰং গমাপেতি. ইমিনা অৰসাদেতি অধোভাৰং গমাপেতীতি অৰসাদেতাতি ৰচনত্থং দস্সেতি. ‘‘অপসাদেতা’’তিপি পাঠো, উপসগ্গমত্তমেৰ নানং. সম্ফঞ্চ বহুং ভাসতীতি এত্থ সম্ফসদ্দো নিরত্থককথাৰচনোতি আহ ‘‘নিরত্থককথ’’ন্তি. নিরত্থককথা হি যস্মা সং হিতসুখং ফলতি ৰিনাসেতি, তস্মা সম্ফন্তি ৰুচ্চতি. ফা ধাতূতি চ ফলধাতূতি চ ধাতুপাঠেসু (সদ্দনীতিধাতুমালাযং ১৬ লকারন্তধাতু) ৰুত্তং.

ভারে অনারোপিতেতি ‘‘তৰ ভারো’’তি সঙ্ঘেন ভারে অনারোপিতে. অজ্ঝোত্থরিত্ৰাতি অভিভৰিত্ৰা. ইমিনা পসয্হ পৰত্তাতি এত্থ পসয্হসদ্দস্স অভিভৰনত্থং দস্সেতি. অনধিকারেতি অনধিপচ্চট্ঠানে. ‘‘কথেতা’’তি ইমিনা ৰতুধাতুযা কথনত্থং দস্সেতি. অনোকাসকম্মং কারেত্ৰাতি এত্থ নকারস্স অযুত্তযোগভাৰতো যুত্তট্ঠানং দস্সেন্তো আহ ‘‘ওকাসকম্মং অকারেত্ৰা’’তি. যস্সাতি যা অস্স. অস্স ভিক্খুনো অত্তনো যা দিট্ঠি অত্থীতি যোজনা, অথৰা অত্তনো যা দিট্ঠি ভৰেয্যাতি যোজনা. তন্তি দিট্ঠিং. ‘‘কথেতা’’তি ইমিনা ব্যাকতাতি এত্থ ৰি আ পুব্বকরধাতুযা কথনত্থং দস্সেতি.

ৰোহারৰগ্গৰণ্ণনা

৪২৪. ‘‘নেৰ দেসনায ন ৰুট্ঠানেনা’’তি ইদং পারাজিকাপত্তিং সন্ধায ৰুত্তং. দোসানুরূপন্তি ৰত্থুসঙ্খাতস্স দোসস্স অনুরূপং.

পযোগং ন জানাতীতি এত্থ সচে পযোগো মূলেন ৰিসদিসো হুত্ৰা ভিন্নো হোতি, এৰং সতি মূলপযোগন্তি ন ৰত্তব্বন্তি আহ ‘‘অধিকরণানং হী’’তিআদি. হীতি সচ্চং, যস্মা ৰা. মূলমেৰ পযোগা নাম হোন্তি, ন অঞ্ঞন্তি অধিপ্পাযো.

কাতব্বন্তি ন জানাতীতি কাতব্বং ইতি কম্মস্স করণং ন জানাতীতি যোজনা. ৰত্থূতি ভণ্ডনকলহাদিৰত্থু, নিযস্সাদীনং ৰত্থূতি সম্বন্ধো. চতুন্নন্তি তজ্জনীযনিযস্সপব্বাজনীযপটিসারণীযৰসেন চতুন্নং. যাচতীতি সঙ্ঘং কম্মস্স ৰূপসমং যাচতি.

ৰত্থুন্তি এত্থ আপত্তিক্খন্ধানমেৰ ৰত্থুন্তি আহ ‘‘সত্তন্নং আপত্তিক্খন্ধান’’ন্তি. পদেসপঞ্ঞত্তিসব্বত্থপঞ্ঞত্তিসাধারণপঞ্ঞত্তিঅসাধারণপঞ্ঞত্তিএকতোপঞ্ঞ- ত্তিউভতোপঞ্ঞত্তিৰসেন ছন্নং পঞ্ঞত্তীনং পঞ্ঞত্তিযং পৰিট্ঠত্তা ৰুত্তং ‘‘তিৰিধং পঞ্ঞত্তি’’ন্তি. ‘‘হেট্ঠুপরিযং কত্ৰা পদং যোজেতী’’তি ইমিনা পদপচ্চাভট্ঠন্তি এত্থ পদানং হেট্ঠুপরিযৰসেন পটিনিৰত্তিত্ৰা আভস্সনং গল়নং চুতং পদপচ্চাভট্ঠন্তি অত্থং দস্সেতি.

ৰিনযেতি এত্থ ন কেৰলং পাল়িযংযেৰ, অথ খো অট্ঠকথাযম্পীতি আহ ‘‘ৰিনযপাল়িযঞ্চেৰ অট্ঠকথাযঞ্চা’’তি.

ঞত্তিং ন জানাতীতি এত্থ ঞত্তিভেদং দস্সেন্তো আহ ‘‘সঙ্খেপতো’’তিআদি. তত্থাতি দুৰিধাসু ঞত্তীসু. কম্মঞত্তীতি অনুস্সাৰনকম্মস্স ঠানে ঠিতা ঞত্তি. অনুস্সাৰনকম্মং নত্থি, সযমেৰ অনুস্সাৰনকম্মট্ঠানে ঠিতাতি অত্থো. কম্মপাদঞত্তীতি অনুস্সাৰনকম্মস্স পাদভূতা মূলভূতা ঞত্তি. নৰসু ঠানেসূতি ওসারণাদীসু নৰসু ঠানেসূ. দ্ৰীসু ঠানেসূতি ঞত্তিদুতিযঞত্তিচতুত্থৰসেন দ্ৰীসু ঠানেসু, কম্মপাদঞত্তিযা করণং ন জানাতীতি সম্বন্ধো. য্ৰাযং চতুব্বিধো সমথোতি যোজনা. তন্তি চতুব্বিধং সমথং. ঞত্তিযাতি সাম্যত্থে সামিৰচনং. যং অধিকরণং ৰূপসমতীতি সম্বন্ধো. তস্সাতি অধিকরণস্স. তং ৰূপসমং ন জানাতীতি সম্বন্ধো.

সুত্তং ন জানাতীতি এত্থ সুত্তসদ্দস্স কদাচি কত্থচি মাতিকাযঞ্চ সুত্তন্তপিটকে চ পৰত্তনতো ইধ উভতোৰিভঙ্গেতি আহ ‘‘উভতোৰিভঙ্গ’’ন্তি. ৰিনযং ন জানাতীতি এত্থ ৰিনযসদ্দস্স সকলে ৰিনযপিটকে ৰত্তমানস্সাপি সুত্তন্তি এত্থ উভতোৰিভঙ্গস্স গহিতত্তা ইধ খন্ধকপরিৰারাৰ গহেতব্বাতি আহ ‘‘খন্ধকপরিৰারং ন জানাতী’’তি.

ৰিনযং ন জানাতীতি এত্থ ৰিনযপিটকস্স গহেতব্বত্তা ৰুত্তং ‘‘ঠপেত্ৰা ৰিনযপিটক’’ন্তি. সুত্তন্তিকে চত্তারো মহাপদেসেতি (দী. নি. ২.১৮৭ আদযো; অ. নি. ৪.১৮০) বুদ্ধাপদেসসঙ্ঘাপদেসসম্বহুলত্থেরাপদেসএকত্থেরা পদেসৰসেন চত্তারো মহাপদেসে. এত্থাতি পঞ্চকে. যন্তি ৰচনং. সব্বত্থাতি সব্বেসু পঞ্চকেসু.

ইতি

অনিস্সিতৰগ্গ-নপ্পটিপ্পস্সম্ভনৰগ্গ-ৰোহারৰগ্গৰণ্ণনায

যোজনা সমত্তা.

দিট্ঠাৰিকম্মৰগ্গৰণ্ণনা

৪২৫. দিট্ঠাৰিকম্মৰগ্গে দিট্ঠাৰিকম্মাতি এত্থ আৰি করীযতে আৰিকম্মং, দিট্ঠীনং আৰিকম্মং দিট্ঠাৰিকম্মন্তি দস্সেন্তো আহ ‘‘দিট্ঠীনং আৰিকম্মানী’’তি. ‘‘লদ্ধিপকাসনান’’ন্তি ইমিনা দিট্ঠিসদ্দো লদ্ধিপরিযাযো, আৰিকম্মসদ্দো পকাসনপরিযাযোতি দস্সেতি. এতন্তি ‘‘দিট্ঠাৰিকম্মা’’তি নামং. অদেসনাগামিনী নাম অত্থতো গরুকন্তি আহ ‘‘গরুকাপত্তিযা’’তি. লহুকাযপীতি পিসদ্দো গরহত্থো. লহুকাযপি দেসিতায দিট্ঠাৰিকম্মং অধম্মিকং হোতি, পগেৰ গরুকাযাতি অত্থো.

যথা …পে… হোতীতি যথা আৰিকতে চতূহি পঞ্চহি একীভূতেহি আৰিকতা হোতীতি যোজনা. চতূহি পঞ্চহীতি অন্তিমপরিচ্ছেদদস্সনং. ততো অতিরেকেহিপি একতো দেসেতুং ন ৰট্টতি, দেসিতা চ আপত্তি ন ৰুট্ঠাতি, দেসনাপচ্চযা দুক্কটঞ্চ হোতি. ‘‘চতূহি পঞ্চহী’’তি অন্তিমপরিচ্ছেদস্স দস্সিতত্তা দ্ৰীহি তীহি পন একতো দেসেতুং ৰট্টতীতি দট্ঠব্বং. মনোমানসেনাতি এত্থ মনোসদ্দেন মানসসদ্দস্স রাগঅরহত্তেসুপি পৰত্তনতো তদত্থে পটিক্খিপিত্ৰা চিত্তে এৰ ৰত্ততীতি দস্সেতি. তেন ৰুত্তং ‘‘মনসঙ্খাতেন মানসেনা’’তি. ইমিনা মনভূতং মানসং মনোমানসন্তি ৰচনত্থং দস্সেতি.

সমানসংৰাসকস্সাপীতি পিসদ্দো সমানসংৰাসকস্সপি নানাসীমায ঠিতস্স সন্তিকে আৰিকম্মং অধম্মিকং হোতি, পগেৰ নানাসংৰাসকস্সাতি দস্সেতি. মাল়কসীমাযাতি খণ্ডসীমায অঙ্গণে. অৰিপ্পৰাসসীমাযাতি মহাসীমায, ঠিতস্সাপি সন্তিকেতি সম্বন্ধো. পিসদ্দেন ‘‘খণ্ডসীমায ঠিতস্সপী’’তি অত্থং সম্পিণ্ডেতি.

৪৩০. ন পরিযত্তন্তি ন সমত্থং. ইমিনা নালন্তি এত্থ অলংসদ্দো পরিযত্তত্থোৰ, নারহভূসনৰারণত্থোতি দস্সেতি. ইধাপীতি পঞ্চকেপি. পিসদ্দেন পুরিমপঞ্চকং অপেক্খতি. ‘‘সাসনতো’’তি ইমিনা চুধাতুযা অপাদানং দস্সেতি. ‘‘কামো’’তি ইমিনা অধিপ্পাযসদ্দো কামপরিযাযোতি দস্সেতি.

৪৩২. মন্দত্তা মোমূহত্তাতি এত্থ ত্তপচ্চযস্স ভাৰত্থে, পঞ্চমীৰিভত্তিযা চ কারণত্থে পৰত্তভাৰং দস্সেন্তো আহ ‘‘মন্দভাৰেন মোমূহভাৰেনা’’তি. পরিভৰাতি এত্থ পরিভৰকামাতি অত্থং দস্সেন্তো আহ ‘‘পরিভৰং আরোপেতুকামো হুত্ৰা’’তি. অঞ্ঞব্যাকরণেসুপীতি অরহত্তব্যাকরণেসুপি. সব্বত্থাতি দিট্ঠাৰিকম্মৰগ্গে. যন্তি ৰচনং.

ইতি দিট্ঠাৰিকম্মৰগ্গৰণ্ণনায যোজনা সমত্তা.

মুসাৰাদৰগ্গৰণ্ণনা

৪৪৪. ধম্মপধানং ধম্মাধিট্ঠানং সন্ধায ‘‘পারাজিকং গচ্ছতীতি পারাজিকগামী’’তি সুদ্ধকত্তুৰসেন ৰুত্তং, পুগ্গলপধানং পুগ্গলাধিট্ঠানং সন্ধায ‘‘পারাজিকং গচ্ছতি অনেন, গমাপেতীতি ৰা পারাজিকগামী’’তি করণহেতুকত্তুৰসেনপি ৰত্তব্বং. ৰিত্থারং দস্সন্তো আহ ‘‘তত্থা’’তিআদি. তত্থ তত্থাতি ‘‘মুসাৰাদো পারাজিকগামী’’তিআদিপাঠে, এৰং ৰিত্থারো ৰেদিতব্বোতি সম্বন্ধো. তেসু ‘‘মুসাৰাদো পারাজিকগামী’’তিআদীসু ৰা, নিদ্ধারণে ভুম্মং.

অদস্সনেনাতি এত্থ কস্স অদস্সনেনাতি আহ ‘‘ৰিনযধরস্সা’’তি. ৰিত্থারং দস্সেন্তো আহ ‘‘কপ্পিযাকপ্পিযেসু হী’’তিআদি. তন্তি ৰিনযধরং. অস্সৰনেনাতি এত্থ কেসং ৰচনং অস্সৰনেনাতি আহ ‘‘একৰিহারেপী’’তিআদি. একৰিহারেপীতি ৰিনযধরেন একৰিহারেপি. পিসদ্দেন নানাৰিহারে পন পগেৰাতি দস্সেতি. উপট্ঠানন্তি উপট্ঠানত্থং, উপট্ঠানট্ঠানং ৰা. ৰুচ্চমানং অঞ্ঞেসং ৰচনং অসুণন্তো হুত্ৰা ৰাতি যোজনা. পসুত্তকতাতি এত্থ যকারলোপোতি আহ ‘‘পসুত্তকতাযা’’তি. পসুত্তকভাৰেনপীতি পিসদ্দো অঞ্ঞম্পি অদস্সনাদিকারণং সম্পিণ্ডেতি. তথাসঞ্ঞীতি এত্থ তথাসদ্দো কোৰিসযোতি আহ ‘‘অকপ্পিযে…পে… আপজ্জন্তো’’তি. একরত্তাতিক্কমাদিৰসেনাতি আদিসদ্দেন ছারত্তাতিক্কমাদিং সঙ্গণ্হাতি. সব্বত্থাতি মুসাৰাদৰগ্গে.

ইতি মুসাৰাদৰগ্গৰণ্ণনায যোজনা সমত্তা.

ভিক্খুনোৰাদৰগ্গৰণ্ণনা

৪৫০. ভিক্খুনিৰগ্গে অলাভাযাতি এত্থ লভধাতুযা কম্মং, সম্পদানৰচনস্স চ তদত্থং দস্সেন্তো আহ ‘‘চতুন্নং পচ্চযানং অলাভত্থাযা’’তি. ‘‘ৰাযমতী’’তি ইমিনা পরিসক্কতীতি এত্থ সক্কধাতুযা সমত্থত্থং পটিক্খিপিত্ৰা ৰাযমত্থং দস্সেতি. কলিসাসনন্তি পাপপরাজযআণং. নীহরণত্থাযাতি নিদ্ধরিত্ৰা অপনযনত্থায.

৪৫১. ‘‘কম্ম’’ন্তি সামঞ্ঞতো ৰুত্তত্তা ‘‘সত্তন্নং কম্মানং অঞ্ঞতর’’ন্তি.

৪৫৪. ন সাকচ্ছাতব্বোতি এত্থ কো নাম কথামগ্গো ন সাকচ্ছাতব্বো, ননু ৰিনযোযেৰাতি আহ ‘‘কপ্পিযা…পে… কথামগ্গো’’তি. ‘‘ন কথেতব্বো’’তি ইমিনা কচ্ছসদ্দস্স কথধাতুযা নিপ্ফন্নভাৰং দীপেতি. কস্মা পন পঠমপঞ্চকে ‘‘ন অসেক্খেনা’’তি পটিক্খিপিত্ৰা দুতিযপঞ্চকে ‘‘অসেক্খেনা’’তিআদি ৰুত্তন্তি আহ ‘‘যস্মা পনা’’তিআদি. ইতরো পুথুজ্জনো ন কথেতীতি যোজনা.

ন অত্থপটিসম্ভিদাপত্তোতি এত্থ অত্থো নাম অট্ঠকথাযেৰাধিপ্পেতাতি আহ ‘‘অট্ঠকথাযা’’তি. ‘‘পভেদগতঞাণপ্পত্তো’’তি ইমিনা অত্থাদীসু পতি ৰিসুং সম্ভিজ্জতীতি পটিসম্ভিদা, পঞ্ঞা, তং পত্তোতি পটিসম্ভিদাপত্তো. অত্থে পটিসম্ভিদাপত্তো অত্থপটিসম্ভিদাপত্তোতি দস্সেতি. ‘‘পাল়িধম্মে’’তি ইমিনা ধম্মপটিসম্ভিদাপত্তোতি এত্থ ধম্মসরূপং দস্সেতি. ৰোহারনিরুত্তিযন্তি পঞ্ঞত্তিনিরুত্তিযং. ইমিনা নিরুত্তিপটিসম্ভিদাপত্তোতি এত্থ নিরুত্তিসরূপং দস্সেতি. পটিভানপটিসম্ভিদাপত্তোতি এত্থ পটিভানং নাম হেট্ঠিমঞাণত্তযমেৰাতি আহ ‘‘অত্থপটিসম্ভিদাদীনি ঞাণানী’’তি, তেসূতি ঞাণেসু, যং যং ৰিমুত্তং যথাৰিমুত্তং, চিত্তং. পচ্চৰেক্খিতাতি পুনপ্পুনং ওলোকিতা. সব্বত্থাতি ভিক্খুনিৰগ্গে.

ইতি ভিক্খুনোৰাদৰগ্গৰণ্ণনায যোজনা সমত্তা.

উব্বাহিকৰগ্গৰণ্ণনা

৪৫৫. উব্বাহিকৰগ্গে অত্থকুসলোতিআদিপদানং ভেদনিস্সিতসমাসং দস্সেন্তো আহ ‘‘অট্ঠকথাকুসলো’’তিআদি. আচরিযমুখতোতি আচরিযৰদনতো, আচরিযসম্মুখে ৰা, সিথিলধনিতাদীতি আদিসদ্দেন দীঘরস্সাদীনি (পরি. অট্ঠ. ৪৮৫; ৰি. সঙ্গ. অট্ঠ. ২৫২) সঙ্গণ্হাতি. অক্খরপরিচ্ছেদেতি এত্তকো সিথিলো, এত্তকো ধনিতোতিআদিনা অক্খরপরিচ্ছেদে. ইমিনা ব্যঞ্জনকুসলোতি এত্থ ব্যঞ্জনসদ্দো অক্খরপরিযাযোতি দস্সেতি. ন পুব্বাপরকুসলোতি এত্থ পুব্বাপরো নাম পুরিমানং চতুন্নঞ্চেৰ কথায চ পুব্বাপরোতি আহ ‘‘অত্থপুব্বাপরে’’তিআদি.

কোধনোতিআদীনি ৰুত্তানীতি সম্বন্ধো. যস্মা ন সক্কোতীতি যোজনা. পসারেতাতি এত্থ সরধাতু উপসগ্গৰসেন ৰেচিত্তৰাচকোতি আহ ‘‘মোহেতা’’তি.

ইতি উব্বাহিকৰগ্গৰণ্ণনায যোজনা সমত্তা.

অধিকরণৰূপসমৰগ্গৰণ্ণনা

৪৫৭. অধিকরণৰূপসমৰগ্গে সঙ্ঘগরু নাম কোতি আহ ‘‘ধম্মঞ্চ…পে… সঙ্ঘগরু নাম হোতী’’তি. তানীতি চীৰরাদীনি.

৪৫৮. পঞ্চহুপালি আকারেহীতি এত্থ আকারসদ্দো কারণত্থোতি আহ ‘‘পঞ্চহি কারণেহী’’তি. কম্মেনাতিআদীসু কম্মাদীনং সরূপং দস্সেন্তো আহ ‘‘অপলোকনাদীসূ’’তিআদি. উপপত্তীহীতি যুত্তীহি. ময্হং উচ্চাকুলা পব্বজিতভাৰঞ্চ বহুস্সুতভাৰঞ্চ তুম্হে জানাথাতি যোজনা. মাদিসো নাম…পে… তুম্হাকং যুত্তং ননূতি যোজনা. কণ্ণমূলেতি কণ্ণসমীপে. অনুস্সাৰনেনাতি অনুসমীপে সাৰাপনেন. তেসন্তি ভিক্খূনং. অনিৰত্তিধম্মেতি অনিৰত্তনসভাৰে. সলাকগ্গাহেনাতি অত্তনো সলাকায গাহাপনেন.

এত্থাতি কম্মাদীসু. পমাণন্তি সঙ্ঘভেদস্স কারণং. পুব্বভাগাতি সঙ্ঘভেদতো পুব্বভাগে পৰত্তা. পুব্বভাগভাৰং আৰিকরোন্তো আহ ‘‘অট্ঠারসৰত্থুদীপনৰসেন হী’’তিআদি. ৰোহরন্তেপীতি যোজনা. তত্থাতি ৰোহারে. কদা পন সঙ্ঘো ভিন্নোতি আহ ‘‘যদা পনা’’তিআদি. যদা পন করোতীতি সম্বন্ধো. কম্মন্তি উপোসথকম্মতো অঞ্ঞং কম্মং গহেতব্বং. উদ্দেসন্তি উপোসথকম্মং. ইতীতি এৰং. সঙ্ঘভেদকক্খন্ধকৰণ্ণনাযং ‘‘এৰং…পে… পকাসযিস্সামা’’তি (চূল়ৰ. অট্ঠ. ৩৫১) যং ৰচনং অৰোচুম্হাতি যোজনা. তস্স ৰচনস্সাতি পাঠং অজ্ঝাহরিত্ৰা ‘‘স্ৰাযং অত্থো’’তি পদেন সম্বন্ধিতব্বো.

পঞ্ঞত্তেতন্তি এত্থ নিগ্গহিতলোপসন্ধীতি আহ ‘‘পঞ্ঞত্তং এত’’ন্তি. ক্ৰাতি কিস্মিং খন্ধকে. তত্রাতি ৰত্তক্খন্ধকে. এত্তাৰতাতি এত্তকেন আগন্তুকৰত্তাদিঅকরণমত্তেন. অনুপুব্বেনাতি অনুক্কমেন. যথারত্তন্তি এত্থ যথাসদ্দো অনুরূপত্থৰাচকো, রত্তিসদ্দেন রত্তিপ্পমাণং গহেতব্বন্তি দস্সেন্তো আহ ‘‘রত্তিপরিমাণানুরূপ’’ন্তি. ইমিনা রত্তিযা অনুরূপং যথারত্তন্তি নিব্বচনং দস্সেতি. ‘‘রত্তিপরিমাণানুরূপ’’ন্তি ৰুত্তে রত্তিপরিমাণস্স অতিক্কন্তত্তা অত্থতো থেরোতি আহ ‘‘যথাথেরন্তি অত্থো’’তি. ৰৰত্থানন্তি পরিচ্ছেদো. সো হি ৰিসুং অৰহিতো হুত্ৰা তিট্ঠতীতি ৰৰত্থানন্তি ৰুচ্চতি. কম্মাকম্মানীতি এত্থ কম্মং অকম্মানীতি পদৰিভাগং কত্ৰা অকারো ৰুদ্ধত্থোতি আহ ‘‘খুদ্দকানি চেৰ মহন্তানি চ কম্মানী’’তি. সতি চ অকম্মস্স মহন্তভাৰে কম্মং নাম খুদ্দকন্তি অত্থতো সিদ্ধং হোতি. তেন ৰুত্তং ‘‘খুদ্দকানি চেৰা’’তি. অকারস্স অপ্পত্থং গহেত্ৰা ‘‘মহন্তানি চেৰ খুদ্দকানি চ কম্মানী’’তি অত্থোপি যুজ্জতেৰ. সো পন ইধ ন গহিতো, অঞ্ঞত্থ পন দিস্সতি. ‘‘উচ্চাৰচানি কম্মানী’’তি হি ৰাক্যৰসেন ৰুত্তট্ঠানে উচ্চসদ্দেন মহন্তত্থং দস্সেতি, অৰচসদ্দেন খুদ্দকত্থং দস্সেতি. তস্মা মহন্তখুদ্দকানি কম্মানীতি অত্থো ৰেদিতব্বো. সতি চ অকম্মস্স খুদ্দকভাৰে কম্মং নাম মহন্তন্তি অত্থতোপি সিদ্ধন্তি দট্ঠব্বং.

সঙ্ঘভেদৰগ্গদ্ৰযৰণ্ণনা

৪৫৯. সঙ্ঘভেদৰগ্গদ্ৰযে এতেতি সভাৰা. তেতি অধম্মাদযো. ইতীতি এৰং. যং কম্মন্তি যোজনা. দিট্ঠিং ৰিনিধাযাতি সম্বন্ধো. একস্মিং পঞ্চকে অযং অত্থযোজনা কাতব্বাতি সম্বন্ধো. এত্থাপীতি ইমস্মিং পঞ্চকেপি. পিসদ্দেন হেট্ঠা ৰুত্তং পঞ্চকং অপেক্খতি. সব্বত্থাতি সব্বেসু পঞ্চকেসু. হীতি সচ্চং. পুব্বে অৰুত্তনযং যং ৰচনমত্থি, তং ৰচনং এত্থ পঞ্চকেসু ন অত্থীতি যোজনা.

আৰাসিকৰগ্গৰণ্ণনা

৪৬১. আৰাসিকৰগ্গে ‘‘হরিত্ৰা’’তি ইমিনা যথাভতন্তি এত্থ ভরধাতুযা হরণত্থঞ্চ কিরিযাৰিসেসনভাৰঞ্চ দস্সেতি. ‘‘ঠপিতো’’তি ইমিনা নিক্খিত্তোতি এত্থ খিপধাতুযা ঠপনত্থং দস্সেতি.

৪৬২. পরিণামেতীতি পরিণতংপাপেতি. ‘‘নিযামেতি কথেতী’’তি ইমিনা অধিপ্পাযত্থং দস্সেতি, এত্থাতি আৰাসিকৰগ্গে.

কথিনত্থারৰগ্গৰণ্ণনা

৪৬৭. কথিনত্থারৰগ্গে ওতমসিকোতি এত্থ অৰতমং গতো ওতমসিকোতি দস্সেন্তো আহ ‘‘অন্ধকারগতো’’তি. অন্ধকারসদ্দেন তমসদ্দো অন্ধকারপরিযাযোতি দস্সেতি. তন্তি ওতমসিকং. অসমন্নাহরন্তোতি তং অসমন্নাহরন্তো, কস্মা অসমন্নাহরন্তোতি আহ ‘‘কিচ্চযপসুতত্তা ৰন্দন’’ন্তি. একতোতি কোপেন সদ্ধিং. ৰেরী ৰিসভাগপুগ্গলো একতো আকোধেন ৰত্তনট্ঠেন একাৰত্তোতি ৰুচ্চতি. পহরেয্যাতি ৰন্দন্তং পহরেয্য. ‘‘অঞ্ঞং চিন্তযমানো’’তি ইমিনা অঞ্ঞস্মিং আরম্মণে চিত্তং ৰিদহতি ঠপেতীতি অঞ্ঞৰিহিতোতি দস্সেতি.

সঙ্ঘতো উদ্ধরিত্ৰা খিপিতব্বো অপনেতব্বোতি উক্খিত্তো, সোযেৰ উক্খিত্তকো. তেহীতি চতূহি. অৰন্দিযেসু পন্নরসপুগ্গলেসূতি সম্বন্ধো. অন্তরা ৰুত্তকারণেন চাতি অন্তরে ৰুত্তেন ‘‘তঞ্হি ৰন্দন্তস্স মঞ্চপাদাদীসুপি নলাটং পটিহঞ্ঞেয্যা’’তিআদিনা কারণেন চ. ইতোতি পন্নরসপুগ্গলম্হা. ইতীতি এৰং. সচে উদ্দেসাচরিযো চ ওৰাদাচরিযো চ নৰকো হোতি, ন ৰন্দনীযো. সব্বত্থাতি কথিনত্থারৰগ্গে.

ইতি কথিনত্থারৰগ্গৰণ্ণনায যোজনা সমত্তা.

নিট্ঠিতা চ উপালিপঞ্চকৰণ্ণনায যোজনা.

আপত্তিসমুট্ঠানৰণ্ণনা

৪৭০. ‘‘অচিত্তকো আপজ্জতী’’তিআদীসু এৰমত্থো ৰেদিতব্বোতি যোজনা. অচিত্তকো আপজ্জতীতি অচিত্তকো হুত্ৰা আপজ্জতি. এসেৰ নযো অচিত্তকো ৰুট্ঠাতীতি এত্থাপি. যংকিঞ্চি আপত্তিন্তি সম্বন্ধো. ইতরং আপত্তিন্তি যোজনা. ধম্মদানং করোমীতি ‘‘সব্বদানং ধম্মদানং জিনাতী’’তি (ধ. প. ৩৫৪) চ ‘‘অমতংদদো চ সো হোতি, যো ধম্মমনুসাসতী’’তি (সং. নি. ১.৪২) চ ভগৰতা ৰুত্তৰচনং সুত্ৰা ধম্মদানং করোমি. দোমনস্সিকোতি দোমনস্সেন যুত্তো, দোমনস্সৰন্তো ৰা. এত্থাতি অব্যাকতমূলে.

৪৭৩. যস্স যস্সাতি সিক্খাপদস্স. তং সব্বন্তি সব্বং তংতংসমুট্ঠানসিক্খাপদং.