কথিনভেদং

কথিনঅত্থতাদিৰণ্ণনা

৪০৩. কথিনে খন্ধকেতি কথিনক্খন্ধকে. পুব্বেতি কথিনক্খন্ধকে.

৪০৪. পযোগস্সাতি এত্থ পযোগো নাম কোতি আহ ‘‘চীৰরধোৰনাদিনো’’তিআদি. এত্থ আদিসদ্দেন ৰিচারণছেদনবদ্ধনসিব্বনরজনকপ্পবিন্দুআদিযনানি ছ পুব্বকরণানি সঙ্গণ্হাতি. উদকাহরণাদিকো যো পযোগো করীযতীতি যোজনা. অনন্তরো নাম অতীতানন্তরঅনাগতানন্তরৰসেন দুৰিধো, ইধ অনাগতানন্তরোযেৰ অধিপ্পেতোতি আহ ‘‘অনাগতৰসেনা’’তি. উদকাহরণাদিপযোগে হি উপ্পন্নে পচ্ছা ধোৰনাদিপুব্বকরণস্স উপ্পত্তিতো তপ্পযোগস্স অনাগতৰসেনেৰ পচ্চযো. সমনন্তরপচ্চযেনাতি এত্থ সংসদ্দো সুট্ঠুঅত্থোতি আহ ‘‘সুট্ঠু অনন্তরপচ্চযেনা’’তি. ‘‘আসন্নতর’’ন্তি ইমিনা সুট্ঠুভাৰং দস্সেতি. ‘‘পযোগস্সা’’তি পদং ‘‘আধারভাৰ’’ন্তি পদে সামী, ‘‘পচ্চযা হোন্তী’’তি পদে সম্পদানং. ‘‘নিস্সয’’ন্তি পদং ‘‘আধারভাৰ’’ন্তি পদেন সংৰণ্ণেতি. ‘‘উপেতেনা’’তি ইমিনা উপসদ্দস্স উপগমনত্থং দস্সেতি, বলৰত্থং পটিক্খিপতি. পঠমন্তি পযোগতো, পযোগস্স ৰা তাৰ. ইমিনা পুরেজাতপচ্চযেনাতি এত্থ পুরেসদ্দো পঠমত্থোতি দস্সেতি. পচ্ছাতি পযোগতো, পযোগস্স ৰা পরং. অপুব্বং অচরিমন্তি একপহারেন. ইমিনা সহজাতসদ্দস্স অত্থং দস্সেতি.

এৰং পুচ্ছিত্ৰাতি সম্বন্ধো. যন্তি ধম্মজাতং. ইদানি আহাতি সম্বন্ধো. যস্সাতি পযোগাদিকস্স. তদেৰাতি ধম্মজাতমেৰ. তস্সাতি ‘‘পুব্বকরণং পযোগস্সা’’তিআদিৰচনস্স অত্থো এৰং ৰেদিতব্বোতি যোজনা. ‘‘পযোগস্স কতমে ধম্মা’’তিআদি যং ৰচনং ৰুত্তং, তত্থ ৰিস্সজ্জনং মযা ৰুচ্চতেতি যোজনা. ইমিনা পাল়িযং অজ্ঝাহরিত্ৰা যোজেতব্বভাৰং দস্সেতি. চতূহি পচ্চযেহি পচ্চযাকারং ৰিত্থারেন্তো আহ ‘‘পযোগস্স হী’’তিআদি. পযোগস্স পুব্বকরণং পচ্চযো হোতীতি সম্বন্ধো. উদ্দিট্ঠধম্মেসূতি ‘‘অনন্তরপচ্চযেন পচ্চযো’’তিআদিনা উদ্দিট্ঠেসু ধম্মেসু পুরেজাতপচ্চযো পনেসাতি সম্বন্ধো. অথ ৰা উদ্দিট্ঠধম্মেসূতি পুব্বকরণৰসেন উদ্দিট্ঠেসু ধোৰনাদিধম্মেসু একধম্মম্পীতি সম্বন্ধো. ন লভতীতি উদকাহরণাদিপযোগস্স পুব্বে ন লভতি. অযন্তি উদকাহরণাদিপযোগো. পচ্ছাজাতপচ্চযং পন লভতীতি উদকাহরণাদিপযোগো পচ্ছাজাতপচ্চযং লভতি. কস্মা লভতীতি আহ ‘‘পচ্ছা উপ্পজ্জনকস্স হী’’তিআদি. পচ্ছাতি পযোগস্স, পযোগতো ৰা পরং. হি যস্মা কযিরতি, তস্মা লভতীতি যোজনা. সহজাতপচ্চযং পন ন লভতীতি সম্বন্ধো. মাতিকাপলিবোধানিসংসসঙ্খাতেতি অট্ঠমাতিকাদ্ৰেপলিবোধপঞ্চানিসংসসঙ্খাতে. অঞ্ঞোতি পন্নরসহি ধম্মেহি অঞ্ঞো. পযোগাদীসূতিআদিসদ্দেন পুব্বকরণপচ্চুদ্ধারঅধিট্ঠানানি সঙ্গণ্হাতি. এতেনুপাযেনাতি এতেন যথাৰুত্তউপাযেন.

পুব্বকরণনিদানাদিৰিভাগৰণ্ণনা

৪০৬-৭. দ্ৰিক্খত্তুং পুচ্ছিতত্তা ‘‘পুচ্ছাদ্ৰয’’ন্তি ৰুত্তং. হেতুপচ্চযানং সরূপং দস্সেন্তো আহ ‘‘ছ চীৰরানী’’তি. কস্মা ৰেদিতব্বানীতি আহ ‘‘পুব্বপযোগাদীনঞ্হী’’তিআদি. হীতি যস্মা. তানিযেৰাতি ছ চীৰরানি এৰ. এৰসদ্দো পচ্ছাপি যোজেতব্বো, তানি এৰাতি অত্থো. হীতি সচ্চং, পুব্বকরণাদীনি ন অত্থীতি যোজনা.

৪০৮. ‘‘ইমায সঙ্ঘাটিযা’’তিআদিনা ৰচীভেদাকারং দস্সেতি. কথিনত্থারকেন যস্মা পচ্চুদ্ধারো চ অধিট্ঠানঞ্চ করীযতি, তস্মা কিরিযাতি ৰুচ্চতি. তেন ৰুত্তং ‘‘পচ্চুদ্ধারো চেৰ অধিট্ঠানঞ্চা’’তি.

৪১১. ৰত্থুৰিপন্নাদীনং সরূপং দস্সেন্তো আহ ‘‘অকপ্পিযদুস্সং হোতী’’তিআদি. ৰিনাসং, ৰিকারং ৰা পজ্জতীতি ৰিপন্নং, ৰত্থুমেৰ ৰিপন্নং ৰত্থুৰিপন্নং.

কথিনাদিজানিতব্বৰিভাগৰণ্ণনা

৪১২. তেসঞ্ঞেৰ ধম্মানন্তি এত্থ ধম্মানং সরূপং দস্সেন্তো আহ ‘‘যেসু রূপাদিধম্মেসূ’’তি. তত্থ রূপাদিধম্মেসূতি ৰণ্ণগন্ধাদীসু সুদ্ধট্ঠকরূপকলাপধম্মেসু. সতীতি সন্তেসু. তেসন্তি রূপাদীনং ধম্মানং. ‘‘সমোধান’’ন্তি ইমিনা সঙ্গহোতি পদস্স অত্থং দস্সেতি. ‘‘মিস্সীভাৰো’’তি ইমিনা সমৰাযোতি পদস্স অত্থং দস্সেতি. অৰযৰধম্মানং সং একভাৰস্স গহণং সঙ্গহো. অৰযৰধম্মানং সমং অযনং পৰত্তনং সমৰাযো. বহূসু ধম্মেসূতি বহূসু পরমত্থপঞ্ঞত্তিধম্মেসু. নামমত্তন্তি নামপঞ্ঞত্তিমত্তং. পুব্বেতি কথিনক্খন্ধকে.

‘‘কারণেহী’’তি ইমিনা আকারসদ্দো কারণত্থোতি দস্সেতি. যন্তি ৰচনং.

৪১৬. উপ্পজ্জন্তীতি কথিনুদ্ধারা উপ্পজ্জন্তি. কিন্তি কিং অত্থজাতং. সব্বেপি কথিনুদ্ধারাতি সম্বন্ধো. হীতি সচ্চং, যস্মা ৰা. এত্থাতি কথিনুদ্ধারেসু. পুরিমা দ্ৰেতি অন্তরুব্ভারসহুব্ভারৰসেন পুরিমা দ্ৰে. এতেসঞ্চাতি পুরিমানং দ্ৰিন্নঞ্চ. ইতরেতি অৰসেসা কথিনুদ্ধারা. তেসুপীতি ইতরেসু কথিনুদ্ধারেসু. সব্বত্থাতি সব্বস্মিং কথিনৰিনিচ্ছযে.

ইতি সমন্তপাসাদিকায ৰিনযসংৰণ্ণনায

পঞ্ঞত্তিৰগ্গৰণ্ণনায

যোজনা সমত্তা.