মহাসঙ্গামং

ৰোহরন্তেন জানিতব্বাদিৰণ্ণনা

৩৬৮-৭৪. মহাসঙ্গামে এতেনেৰ নযেন ৰেদিতব্বন্তি সম্বন্ধো. ৰত্থুসঙ্কমনাকারং দস্সেত্ৰা অৰজাননপটিজাননাকারং দস্সেন্তো আহ ‘‘যো পনা’’তিআদি. যো পন ৰদতীতি সম্বন্ধো. এসেৰাতি এসো এৰ, অৰজাননপটিজাননভিক্খূতি অত্থো.

৩৭৫. নীলাদিৰণ্ণাৰণ্ণৰসেনাতি নীলাদিৰণ্ণৰসেন চ আরোগ্যত্থাদিঅৰণ্ণৰসেন চ. সঞ্চরিত্তং যস্মা অনেন সিক্খাপদেন ধনং অনুপদীযতি, তস্মা ধনমনুপ্পদানন্তি ৰুচ্চতি. পুব্বপযোগোতি পুব্বে পযুজ্জিতব্বো.

অগতিঅগন্তব্বৰণ্ণনা

৩৭৯. বহুজনঅহিতায পটিপন্নো হোতীতি পাল়িং ৰিত্থারেন্তো আহ ‘‘ৰিনযধরেন হী’’তিআদি. তত্থ ৰিনযধরেনাতি অনুৰিজ্জকেন, ৰিনিচ্ছিতেতি সম্বন্ধো. ওৰাদূপজীৰিনিযোতি ভিক্খূনং ওৰাদং উপনিস্সায জীৰিনিযো. উপাসকাপীতি রতনত্তযং পটিস্সরণন্তি উপাসকাপি. দাযকাপীতি ভিক্খূনং পচ্চযদাযকাপি. তেসন্তি উপাসকাদীনং. তথেৰাতি যথা উপাসকাদযো দ্ৰিধা ভিজ্জন্তি, তথেৰ. ততোতি আরক্খদেৰতাহি পরন্তি সম্বন্ধো. তেনাতি দ্ৰিধাকারণেন.

৩৮২. গহননিস্সিতোতি এত্থ গহনসদ্দো দিট্ঠিপরিযাযোতি আহ ‘‘মিচ্ছাদিট্ঠিঅন্তগ্গাহিকদিট্ঠিসঙ্খাতং গহন’’ন্তি.

৩৯৩. তস্স অৰজানন্তোতি এত্থ ‘‘তস্সা’’তি পদং ‘‘ৰচন’’ন্তি পাঠসেসেন সম্বন্ধিতব্বন্তি আহ ‘‘তস্স ৰচন’’ন্তি. তস্সাতি নৰকস্স. তন্তি নৰকং.

৩৯৪. ‘‘যংঅত্থাযা’’তি এসো সদ্দো সমাসোতি আহ ‘‘যদত্থাযা’’তি. ‘‘তং অত্থ’’ন্তি এসো সদ্দো লিঙ্গৰিপল্লাসোতি আহ ‘‘সো অত্থো’’তি. অত্থসদ্দো হি পুল্লিঙ্গো, পাল়িযং ন পরিহাপেতব্বন্তি এত্থাপি লিঙ্গৰিপল্লাসো ৰেদিতব্বো. সব্বত্থাতি সব্বস্মিং মহাসঙ্গামে.

ইতি মহাসঙ্গামৰণ্ণনায যোজনা সমত্তা.