চোদনাকণ্ডং

অনুৰিজ্জককিচ্চৰণ্ণনা

৩৬০-১. ইদানি আরদ্ধন্তি সম্বন্ধো. একো ভিক্খু একেন মাতুগামেনাতি যোজনা. সোতি পস্সন্তো ভিক্খু. তন্তি নিক্খমন্তং পৰিসন্তং ৰা ভিক্খুং. ইতরোতি চুদিতকো. তস্সাতি চোদকস্স. ন উপেতীতি ন উপগচ্ছতি. ন পটিজানাতীতি ন পটিস্সৰং করোতি. এত্থাতি মাতুগামেন নিক্খমন্তপৰিসন্তট্ঠানে. যন্তি কম্মং. তেনাতি চোদকেন. তস্সাতি চোদকস্স ৰচনেনাতি সম্বন্ধো. ইতরোতি চুদিতকো. অসুদ্ধপরিসঙ্কিতোতি অসুদ্ধায অট্ঠানে উপ্পন্নায পরিসঙ্কায পরিসঙ্কিতো. তদত্থং দস্সেতি ‘‘অমূলকপরিসঙ্কিতো’’তি ইমিনা. তস্স পুগ্গলস্সাতি চুদিতকস্স পটিঞ্ঞাযাতি সম্বন্ধো. সব্বত্থাতি সব্বেসু অনুৰিজ্জককিচ্চেসু.

ইতি অনুৰিজ্জককিচ্চৰণ্ণনায যোজনা সমত্তা.

চোদকপুচ্ছাৰিস্সজ্জনা

৩৬২-৩. সচ্চে চ অকুপ্পে চাতি পধানং সম্বন্ধট্ঠানং দস্সেন্তো আহ ‘‘পতিট্ঠাতব্ব’’ন্তি. ‘‘য’’ন্তিআদিনা সচ্চে পতিট্ঠাতব্বভাৰং দস্সেতি. যন্তি কম্মং. ‘‘ন চা’’তিআদিনা অকুপ্পে পতিট্ঠাতব্বভাৰং দস্সেতি. ওতিণ্ণঞ্চাতি ৰিনিচ্ছযং ওতিণ্ণঞ্চ. ‘‘ৰচন’’ন্তি ইমিনা ওতিণ্ণানোতিণ্ণসরূপং দস্সেতি. তত্রাতি পুরিমৰচনাপেক্খং. ‘‘ওতিণ্ণানোতিণ্ণং জানিতব্ব’’ন্তি ৰচনেতি হি অত্থো. চোদকস্স পমাণন্তি ‘‘ধম্মো’’তি ৰা ‘‘অধম্মো’’তি ৰা ‘‘বালো’’তি ৰা ‘‘পণ্ডিতো’’তি ৰা চোদকস্স পমাণং. চুদিতকস্স পমাণন্তি ধম্মচুদিতকো নু খো, নোতি চুদিতকস্স পমাণং. অনুৰিজ্জকস্স পমাণন্তি সক্কা নু খো ৰিনিচ্ছিতুং, নোতি অনুৰিজ্জকস্স পমাণং. অনুৰিজ্জকো ৰত্তব্বোতি সম্বন্ধো. যেন ধম্মেনাতিআদীসু ধম্মাদীনং সরূপং দস্সেন্তো আহ ‘‘ধম্মোতি ভূতং ৰত্থূ’’তিআদি. এতেন ধম্মেন চ এতেন ৰিনযেন চ এতেন সত্থুসাসনেন চাতি যোজনা. তস্মা অনুৰিজ্জকেন ৰূপসমেতব্বন্তি সম্বন্ধো. এত্থাতি অনুৰিজ্জকস্স পটিপজ্জিতব্বট্ঠানে.

অৰঞ্ঞন্তি অৰজাননং. ইমেতি থেরা. ‘‘খতত্তা’’তি ইমিনা অত্তনাৰ অত্তা খঞ্ঞতীতি খতোতি ৰচনত্থং দস্সেতি. উপহনিযন্তীতি উপহতানি, উপহতানি ইন্দ্রিযানি অনেনাতি উপহতিন্দ্রিযো. ‘‘পঞ্ঞায অভাৰতো’’তি ইমিনা দুম্মেধোতি এত্থ দুসদ্দো অভাৰত্থো, মেধাসদ্দো পঞ্ঞাপরিযাযোতি দস্সেতি. নত্থি মেধা এতস্সাতি দুম্মেধোতি নিব্বচনং কাতব্বং. খতো…পে… দুম্মেধো সো অনুৰিজ্জকো উপগচ্ছতীতি যোজনা. তস্মাতি যস্মা উপগচ্ছতি, তস্মা ৰুত্তন্তি সম্বন্ধো. তস্সাতি পাঠস্স, গাথায ৰা. ৰিত্থারং দস্সেন্তো আহ ‘‘চুদিতকচোদকেসু হী’’তিআদি. উভোপেতেতি উভোপি এতে আমিসপুগ্গলনিস্সযে. ধম্মোতি সাসনধম্মো. ইতীতি অযমত্থো.

উপকণ্ণকং জপ্পতীতি এত্থ কণ্ণস্স সমীপং উপকণ্ণং, তদেৰ উপকণ্ণকন্তি দস্সেন্তো আহ ‘‘এৰং কথেহী’’তিআদি. ‘‘কণ্ণমূলে’’তি ইমিনা উপকণ্ণকন্তি এত্থ উপসদ্দস্স সমীপত্থং দস্সেতি. মন্তেতীতি কথেতি. ইমিনা জপ্পধাতুযা কথনত্থং দস্সেতি. জিম্হং পেক্খতীতি এত্থ জিম্হসদ্দো কুটিলৰাচকো, কুটিলং নাম অত্থতো ইধ দোসোতি আহ ‘‘দোসমেৰা’’তি.

কথানুসন্ধীতি চুদিতকঅনুৰিজ্জকানং কথায অনুসন্ধি. ৰিনিচ্ছযানুসন্ধীতি অনুৰিজ্জকেন কতস্স আপত্তানাপত্তিৰিনিচ্ছযস্স অনুসন্ধি. সব্বত্থাতি চোদনাকণ্ডে.

ইতি চোদনাকণ্ডৰণ্ণনায যোজনা সমত্তা.