৯. চোদকেন উপট্ঠাপেতব্বকথা

৪০০. ‘‘কালেন ৰক্খামী’’তিআদীসু চোদনায কালঅকালাদিং দস্সেন্তো আহ ‘‘একো এক’’ন্তিআদি. তত্থ একোতি এককো চোদকো. একন্তি এককং চুদিতকং. সঙ্ঘমজ্ঝ…পে… অসনসালাদীসু ৰা পরিৰারিতক্খণে ৰাতি যোজনা. তত্থ ‘‘সঙ্ঘমজ্ঝ…পে… অসনসালাদীসূ’’তি ইমিনা ঠানাভাৰং দস্সেতি, ‘‘উপট্ঠাকেহি পরিৰারিতক্খণে’’তি ইমিনা কালাভাৰং দস্সেতি. ইমেহি পদেহি ঠানম্পি কালেন সঙ্গহেত্ৰা ‘‘কালেন ৰক্খামী’’তি ৰুত্তন্তি দস্সেতি. তচ্ছেনাতি সচ্চেন. হম্ভোতি নিপাতো পচ্ছিমপদেসু পচ্চেকং যোজেতব্বো. হম্ভো মহল্লক, হম্ভো পরিসাৰচর, হম্ভো পংসুকূলিক, হম্ভো ধম্মকথিকাতি হি অত্থো. ইদন্তি কম্মং. কারণনিস্সিতন্তি মহল্লকভাৰকারণাদীসু নিস্সিতং. ‘‘ভন্তে’’তি নিপাতোপি পচ্চেকং যোজেতব্বো. এত্থ চ ‘‘হম্ভো’’তি নিপাতেন লোকৰোহারৰসেন অনাদরস্স পকাসকত্তা ফরুসেন ৰদতি নাম, ‘‘ভন্তে’’তি নিপাতেন সাদরস্স পকাসকত্তা সণ্হেন ৰদতি নাম. কারণনিস্সিতং কত্ৰাতি ইমস্মিং ৰীতিক্কমে অযং নাম দোসোতি কারণনিস্সিতং কত্ৰা. ‘‘মেত্তচিত্তং উপট্ঠপেত্ৰা’’তি ইমিনা মেত্তচিত্তোতি পদস্স ‘‘ৰক্খামী’’তি পদে কিরিযাৰিসেসনভাৰং দস্সেতি. নো দোসন্তরোতি এত্থ অন্তরসদ্দস্স চিত্তৰাচকভাৰং দস্সেন্তো আহ ‘‘ন দুট্ঠচিত্তো’’তি. ‘‘হুত্ৰা’’তি ইমিনা কিরিযাৰিসেসনভাৰং দস্সেতি.