৯. পাতিমোক্খট্ঠপনক্খন্ধকং

১. পাতিমোক্খুদ্দেসযাচনকথা

৩৮৩. পাতিমোক্খট্ঠপনক্খন্ধকে নন্দিমুখিযা রত্তিযাতি এত্থ নন্দিযতি তুসিযতীতি নন্দি, ইকারন্তোযং নপুংসকলিঙ্গো. ‘‘নন্দিসেনো (জা. অট্ঠ. ৩.৪.১) নন্দিৰিসালো’’তিআদীসু ইকারন্তোযং পুল্লিঙ্গো হোতি, ইধ পন মুখং অপেক্খিত্ৰা ইকারন্তো নপুংসকলিঙ্গো হোতি. অরুণুট্ঠিতকালে ওদাতদিসামুখতায নন্দি মুখং এতিস্সং রত্তিযন্তি নন্দিমুখী, রত্তি, তায নন্দিমুখিযা রত্তিযা, তেন ৰুত্তং ‘‘অরুণুট্ঠিতকালেপি হি নন্দীমুখা ৰিয রত্তি খাযতী’’তি. অন্তোপূতিন্তি এত্থ কাযস্স অন্তো কুণপপূতিন্তি অত্থং পটিপক্খিপন্তো আহ ‘‘অত্তচিত্তসন্তানে’’তিআদি. ‘‘কিলেসৰস্সনৰসেনা’’তি ইমিনা উদকৰস্সনৰসেনাতি অত্থং পটিক্খিপতি. অৰস্সুতন্তি তিন্তং, কিলিন্নন্তি অত্থো. কসম্বুজাতন্তি এত্থ কসম্বূতি সঙ্কারো. সো হি সম্মুঞ্চনিযা কসিযমানে ৰিলেখিযমানে সম্বতি সদ্দং করোতীতি কসম্বু, তং ৰিয জাতন্তি কসম্বুজাতন্তি অত্থো দট্ঠব্বো. অট্ঠকথাযং পন অধিপ্পাযৰসেন ‘‘আকিলিট্ঠজাত’’ন্তি ৰুত্তং, অতিৰিয কিলিট্ঠজাতন্তি অত্থো. ‘‘আকিণ্ণদোসতায কিলিট্ঠজাত’’ন্তিপি পাঠো. ‘‘যাৰ বাহাগহণাপি নামা’’তি ইমিনা পাঠেন দস্সেতীতি সম্বন্ধো. হীতি পদপূরণমত্তং. তেনাতি মোঘপুরিসেন. ‘‘যাৰা’’তি নিপাতপযোগত্তা ‘‘বাহাগহণাপী’’তি এত্থ পঞ্চমীৰিভত্তি অৰধিঅত্থে হোতি. নাম-সদ্দো গরহত্থজোতকো, তস্স পযোগত্তা ‘‘আগমেস্সতী’’তি এত্থ অতীতত্থে অনাগতৰচনং (সদ্দনীতিসুত্তমালায ৮৯৩ সুত্তে). আগমেস্সতি নামাতি যোজনা. আগমেস্সতীতি ঈসং অধিৰাসেস্সতি. ‘‘আতো গমুঈসমধিৰাসনে’’তি হি ধাতুপাঠেসু (সদ্দনীতিধাতুমালাযং ১৮ মকারন্তধাতু) ৰুত্তং.

৩৮৪. ন আযতকেনেৰ পপাতোতি এত্থ দীঘেনেৰ পপাতোতি দস্সেন্তো আহ ‘‘ন পঠমমেৰ গম্ভীরো’’তি. আযতসদ্দো হি দীঘপরিযাযো. ‘‘ন আযতকেন গীতস্সরেন ধম্মো গাযিতব্বো’’তিআদীসু (চূল়ৰ. ২৪৯) ৰিয পপাতো দীঘেন তীরস্স আদিম্হি ন হোতীতি ৰুত্তং হোতি. পঠমমেৰাতি তীরস্স আদিম্হিযেৰ. ‘‘অনুপুব্বেন গম্ভীরো’’তি ইমিনা ‘‘ন পঠমমেৰ গম্ভীরো’’তি ৰচনস্স অধিপ্পাযত্থং দস্সেতি. ঠিতধম্মোতি তীরস্স অন্তোযেৰ ঠিতসভাৰো. ৰেলং নাতিৰত্ততীতি এত্থ ৰেলাসদ্দস্স তীরমরিযাদত্থেসু পৰত্তভাৰং দস্সেন্তো আহ ‘‘ওসক্কনকন্দরং মরিযাদৰেল’’ন্তি. তত্থ ‘‘ওসক্কনকন্দর’’ইতি পদেন তীরত্থং দস্সেতি, ‘‘মরিযাদ’’ ইতি পদেন মরিযাদত্থং. কেন উদকেন দরিতব্বোতি কন্দরো, উদকেন ওসক্কনো কন্দরো এত্থাতি ওসক্কনকন্দরং, তীরং. ওসক্কনকন্দরভূতঞ্চ মরিযাদভূতঞ্চ ৰেলং তীরং নাতিক্কমতীতি অত্থো. তীরং ৰাহেতীতি এত্থ ৰহধাতুযা পাপুণনত্থং দস্সেন্তো আহ ‘‘তীরং অপ্পেতী’’তি. তত্থ অপ্পেতীতি পাপুণাপেতি. ‘‘উস্সারেতী’’তি ইমিনা পাল়িযং ‘‘থলং উস্সারেতী’’তি পদেন ‘‘তীরং ৰাহেতী’’তি পদস্স অত্থং দস্সেতীতি অত্থো দস্সিতো. উস্সারেতীতি উদ্ধরিত্ৰা গমাপেতি. অঞ্ঞাপটিৰেধোতি এত্থ আজানাতি, আজানিত্থাতি ৰা অঞ্ঞং অরহত্তমগ্গো ৰা অরহত্তফলং ৰা, তস্স পটিৰিজ্ঝনং অঞ্ঞাপটিৰেধো, সুখুচ্চারণত্থং মজ্ঝে দীঘো, অঞ্ঞাপটিৰেধো নাম অরহত্তুপ্পত্তিযেৰ হোতি. তেন ৰুত্তং ‘‘অরহত্তুপ্পত্তী’’তি.

৩৮৫. ছন্নমতিৰস্সতীতি উদানপাল়িযা সন্ধাযভাসিতপাল়িভাৰং দস্সেন্তো আহ ‘‘আপত্তি’’ন্তিআদি. তত্থ ইদন্তি ‘‘ছন্নমতিৰস্সতী’’তি ৰচনং ৰুত্তন্তি সম্বন্ধো. এতন্তি নৰাপত্তিআপজ্জনং সন্ধাযাতি সম্বন্ধো.

৪. পাতিমোক্খসৰনারহকথা

৩৮৬. পুরে ৰা পচ্ছা ৰাতি ঞত্তিতো পুরে ৰা পচ্ছা ৰা. খেত্তেতি পাতিমোক্খট্ঠপনস্স খেত্তে. খেত্তং দস্সেন্তো আহ ‘‘তস্মা’’তিআদি. রেকারং ভণতীতি ছত্তিংসত্যক্খরেসু রে-কারং ঞত্তিট্ঠপনকো ভণতি. ইদন্তি পঞ্চতিংসত্যক্খরানং উচ্চারণট্ঠানং. ৰুত্তেতি ঞত্তিট্ঠপনকেন ৰুত্তে. ‘‘সুণাতু মে’’তি ৰচনে অনারদ্ধেযেৰাতি যোজনা.

৫. ধম্মিকাধম্মিকপাতিমোক্খট্ঠপনকথা

৩৮৭. তেন পুগ্গলেনাতি তেন চুদিতকেন পুগ্গলেন. সা ৰিপত্তীতি সীলৰিপত্তিআদিসঙ্খাতা সা ৰিপত্তি. সঞ্ঞাঅমূলিকৰসেনাতি ‘‘কতা’’ ইতি সঞ্ঞায অমূলিকৰসেন. কতঞ্চাতি একন্তেন কতঞ্চ. অকতঞ্চাতি একন্তেন অকতঞ্চ.

কোপেতুকামতায নেৰ আগচ্ছতীতি সম্বন্ধো. তেনাতি অনাগমনাদিকারণেন. আপজ্জতীতি পাতিমোক্খট্ঠপনকো আপজ্জতি. ইচ্চস্সাপীতি ইতি এৰং অস্স পাতিমোক্খট্ঠপনকস্সাপি. পচ্চাদিযতীতি পতি আদিযতি, ‘‘অকতং কম্মং, পুন কাতব্বং কম্ম’’ন্তিআদিনা পুন আদীযতি, পুন আরভতীতি অত্থো.

৬. ধম্মিকপাতিমোক্খট্ঠপনকথা

৩৮৮. মগ্গপটিপাদনাদীসূতি মগ্গস্মিং পটিপাদনাদীসু. আদিসদ্দেন থেয্যচিত্তেন অৰহারাদযো সঙ্গণ্হাতি. আকারাদিসঞ্ঞাতি আকারসঞ্ঞা লিঙ্গসঞ্ঞা নিমিত্তসঞ্ঞা. তন্তি পরিসঙ্কং সন্ধাযাতি সম্বন্ধো.

৭. অত্তাদানঅঙ্গকথা

৩৯৮. অত্তাদানং আদাতুকামেনাতি এত্থ কিং অত্তাদানন্তি আহ ‘‘সাসনং সোধেতুকামো’’তিআদি. ইমিনা পরং চোদেতুং অত্তনা আদাতব্বং অধিকরণং অত্তাদানন্তি ৰুচ্চতীতি দস্সেতি. অকালো ইমং অত্তাদানং আদাতুন্তি এত্থ অকালং দস্সেন্তো আহ ‘‘রাজভয’’ন্তিআদি. তত্থ ৰস্সারত্তোতি ৰস্সকালো. সো হি ৰস্সো অতিৰিয রঞ্জতি এত্থ কালেতি ৰস্সারত্তোতি ৰুচ্চতি. ৰস্সারত্তোপি অধিকরণৰূপসমত্থং লজ্জিপরিসায দূরতো আনযনস্স দুক্করত্তা অকালো নাম. ইতীতি অযং রাজভযাদিকালোতি অত্থো. ৰিপরীতোতি রাজভযাদীনং অভাৰকালো.

অভূতং ইদং অত্তাদানন্তি এত্থ অভূতসদ্দো অৰিজ্জমানপরিযাযোতি আহ ‘‘অসন্তমিদ’’ন্তি, ইদং অত্তাদানং অৰিজ্জমানন্তি অত্থো. মযা গহিতোতি সম্বন্ধো. সীলৰা পুগ্গলোতি যোজনা. যন্তি অত্তাদানং সংৰত্ততীতি সম্বন্ধো. ইদন্তি অত্তাদানং.

ন লভিস্সামি সন্দিট্ঠে, লভিস্সামি সন্দিট্ঠেতি এত্থ ‘‘ন লভিস্সামি, লভিস্সামী’’তি ইদং কিং সন্ধায ৰুত্তন্তি আহ ‘‘অপ্পেকদা হী’’তিআদি. তত্থ অপ্পেকদাতি অপি একদা. হিসদ্দো ৰিত্থারজোতকো. এৰরূপাতি সন্দিট্ঠসম্ভত্তসভাৰা. তন্তি উপত্থম্ভকভিক্খুলভনং সন্ধাযাতি সম্বন্ধো. ‘‘ন লভিস্সামী’’তি ইদং ৰচনং ৰুত্তন্তি সম্বন্ধো.

কোসম্বকানং ভণ্ডনাদি ভৰতি ৰিয ভণ্ডনাদি ভৰিস্সতীতি যোজনা. পচ্ছাপি অৰিপ্পটিসারকরং ভৰিস্সতীতি এত্থ কেসং অৰিপ্পটিসারকরং ভৰতি ৰিয পঞ্চঙ্গসম্পন্নাগতং অত্তাদানং আদিযতো পচ্ছাপি অৰিপ্পটিসারকরং ভৰতীতি আহ ‘‘সুভদ্দং ৰুড্ঢপব্বজিত’’ন্তিআদি. তত্থ পঞ্চসতিকসঙ্গীতিন্তি পঞ্চসতেহি মহাকস্সপাদীহি কত্তব্বং সঙ্গীতিং. মহাকস্সপত্থেরস্স পচ্ছা সমনুস্সরণকরং হোতি ইৰ হোতীতি যোজনা. এসেৰ নযো সেসেসুপি. সমনুস্সরণকরন্তি সম্মোদৰসেন পুনপ্পুনং অনুস্সরণস্স করং. ইমিনা ‘‘অৰিপ্পটিসারকর’’ন্তি পদস্স অত্থং দস্সেতি. পচ্ছাপীতি এত্থ পিসদ্দস্স অৰুত্তসম্পিণ্ডনত্থং দস্সেন্তো আহ ‘‘সাসনস্স চা’’তিআদি. তত্থ সাসনস্স চ সস্সিরিকতাযাতি সম্বন্ধো. ৰিগতউপক্কিলেসচন্দিমসূরিযানং ৰিয সাসনস্স চ সস্সিরিকতায সংৰত্ততীতি অধিপ্পাযো.

৮. চোদকেন পচ্চৰেক্খিতব্বধম্মকথা

৩৯৯. ‘‘অচ্ছিদ্দেন অপ্পটিমংসেনা’’তিআদীসু এৰমত্থো ৰেদিতব্বোতি যোজনা. ছিদ্দসপ্পটিমংসং পঠমং দস্সেত্ৰা ৰিপরীতৰসেন অচ্ছিদ্দঅপ্পটিমংসং দস্সেন্তো আহ ‘‘যেনা’’তিআদি. তত্থ যেন কতানীতি সম্বন্ধো. ছিজ্জতীতি ছিদ্দো, পটি পুনপ্পুনং মসিযতি আমসিযতীতি পটিমংসো, নিগ্গহিতাগমো, ভাৰপ্পধানোযং কম্মনিদ্দেসো. সহ পটিমংসেনাতি সপ্পটিমংসো, কাযসমাচারো. ৰিপরীতোতি ৰিপরিৰত্তৰসেন ইতো পৰত্তো, কাযসমাচারোতি অত্থো. অমূলকানুদ্ধংসনাদীহীতি আদিসদ্দেন দুট্ঠুল্লৰাচাদযো সঙ্গণ্হাতি.

মেত্তং নু খো মে চিত্তন্তি এত্থ অপ্পনাভাৰপ্পত্তং মেত্তচিত্তমেৰাধিপ্পেতন্তি দস্সেন্তো আহ ‘‘পলিবোধে ছিন্দিত্ৰা’’তিআদি. তত্থ পলিবোধেতি আৰাসপলিবোধাদিকে পলিবোধে. ‘‘ৰিক্খম্ভনৰসেন ৰিহতাঘাত’’ন্তি ইমিনা অপ্পনাভাৰপ্পত্তং মেত্তচিত্তমেৰ দস্সেতি. ইদং পনাৰুসো কত্থ ৰুত্তং ভগৰতাতি এত্থ ইদংসদ্দকিংসদ্দানং ৰিসযং দস্সেন্তো আহ ‘‘ইদং সিক্খাপদং কতরস্মিং নগরে’’তি.

৯. চোদকেন উপট্ঠাপেতব্বকথা

৪০০. ‘‘কালেন ৰক্খামী’’তিআদীসু চোদনায কালঅকালাদিং দস্সেন্তো আহ ‘‘একো এক’’ন্তিআদি. তত্থ একোতি এককো চোদকো. একন্তি এককং চুদিতকং. সঙ্ঘমজ্ঝ…পে… অসনসালাদীসু ৰা পরিৰারিতক্খণে ৰাতি যোজনা. তত্থ ‘‘সঙ্ঘমজ্ঝ…পে… অসনসালাদীসূ’’তি ইমিনা ঠানাভাৰং দস্সেতি, ‘‘উপট্ঠাকেহি পরিৰারিতক্খণে’’তি ইমিনা কালাভাৰং দস্সেতি. ইমেহি পদেহি ঠানম্পি কালেন সঙ্গহেত্ৰা ‘‘কালেন ৰক্খামী’’তি ৰুত্তন্তি দস্সেতি. তচ্ছেনাতি সচ্চেন. হম্ভোতি নিপাতো পচ্ছিমপদেসু পচ্চেকং যোজেতব্বো. হম্ভো মহল্লক, হম্ভো পরিসাৰচর, হম্ভো পংসুকূলিক, হম্ভো ধম্মকথিকাতি হি অত্থো. ইদন্তি কম্মং. কারণনিস্সিতন্তি মহল্লকভাৰকারণাদীসু নিস্সিতং. ‘‘ভন্তে’’তি নিপাতোপি পচ্চেকং যোজেতব্বো. এত্থ চ ‘‘হম্ভো’’তি নিপাতেন লোকৰোহারৰসেন অনাদরস্স পকাসকত্তা ফরুসেন ৰদতি নাম, ‘‘ভন্তে’’তি নিপাতেন সাদরস্স পকাসকত্তা সণ্হেন ৰদতি নাম. কারণনিস্সিতং কত্ৰাতি ইমস্মিং ৰীতিক্কমে অযং নাম দোসোতি কারণনিস্সিতং কত্ৰা. ‘‘মেত্তচিত্তং উপট্ঠপেত্ৰা’’তি ইমিনা মেত্তচিত্তোতি পদস্স ‘‘ৰক্খামী’’তি পদে কিরিযাৰিসেসনভাৰং দস্সেতি. নো দোসন্তরোতি এত্থ অন্তরসদ্দস্স চিত্তৰাচকভাৰং দস্সেন্তো আহ ‘‘ন দুট্ঠচিত্তো’’তি. ‘‘হুত্ৰা’’তি ইমিনা কিরিযাৰিসেসনভাৰং দস্সেতি.

১০. চোদকচুদিতকপটিসংযুত্তকথা

৪০১. অজ্ঝত্তন্তি এত্থ অত্তসদ্দস্স চিত্তৰাচকভাৰঞ্চ সত্তমীৰিভত্তিযাপি অমাদেসভাৰঞ্চ দস্সেন্তো আহ ‘‘অত্তনো চিত্তে’’তি. উপ্পাদেত্ৰাতি ইমিনা ‘‘মনসিকরিত্ৰা’’তি পদস্স অধিপ্পাযত্থং দস্সেতি. কারুঞ্ঞতাতি এত্থ দ্ৰীসু ণ্যপচ্চযতাপচ্চযেসু একস্সেৰ ভাৰৰাচকত্তা একো স্ৰত্থোতি দস্সেন্তো আহ ‘‘করুণভাৰো’’তি. তত্থ করুণস্স পুগ্গলস্স ভাৰো কারুঞ্ঞং, তদেৰ কারুঞ্ঞতা. অথ ৰা করুণো এৰ পুগ্গলো কারুঞ্ঞং, তস্স ভাৰো কারুঞ্ঞতাতি ৰচনত্থো কাতব্বো. ইমিনাতি ‘‘কারুঞ্ঞতা’’তি পদেন. করুণঞ্চাতি অপ্পনাপত্তং করুণঞ্চ. করুণাপুব্বভাগঞ্চাতি অপ্পনাপত্তায করুণায পুব্বভাগে পরিকম্মূপচারৰসেন পৰত্তং কামাৰচরকরুণঞ্চ. দ্ৰীহিপীতি ‘‘হিতেসিতা, অনুকম্পিতা’’তি দ্ৰীহিপি পদেহি. মেত্তঞ্চাতি অপ্পনাপত্তমেত্তঞ্চ. মেত্তাপুব্বভাগঞ্চাতি অপ্পনাপত্তায মেত্তায পুব্বভাগে পরিকম্মূপচারৰসেন পৰত্তং কামাৰচরমেত্তঞ্চ. সুদ্ধন্তেতি সুদ্ধে কোট্ঠাসে. পটিঞ্ঞং আরোপেত্ৰাতি চুদিতকং পটিঞ্ঞং আরোপেত্ৰা. যে এতেতি ‘‘কারুঞ্ঞতা’’তিআদিনা নযেন যে এতে পঞ্চ ধম্মা ৰুত্তাতি যোজনা. ইমিনা ইমে পঞ্চ ধম্মেতি এত্থ ইমসদ্দস্স অনিযমনিদ্দেসভাৰং দস্সেতি.

সচ্চে চ অকুপ্পে চাতি এত্থ সচ্চসদ্দস্স ৰিরতিসচ্চপরমত্থসচ্চানি পটিক্খিপন্তো আহ ‘‘ৰচীসচ্চে চা’’তি. ‘‘অকুপ্পনতাযা’’তি ইমিনা নকুপস্স ভাৰো অকুপ্পন্তি কত্ৰা ণ্যপচ্চযস্স ভাৰত্থং দস্সেতি. হীতি সচ্চং, ৰিত্থারো ৰা. ন পরো ঘট্টেতব্বোতি ন পরো কুজ্ঝাপেতব্বো. সব্বত্থাতি সব্বস্মিং পাতিমোক্খট্ঠপনক্খন্ধকে.

ইতি পাতিমোক্খট্ঠপনক্খন্ধকৰণ্ণনায যোজনা সমত্তা.