১০. ভিক্খুনিক্খন্ধকং

মহাপজাপতিগোতমীৰত্থুকথা

৪০২. ভিক্খুনিক্খন্ধকে কস্মা পটিক্খিপতীতি চোদনং দস্সেত্ৰা তস্সা আভোগং দস্সেন্তো আহ ‘‘ননূ’’তিআদি. ‘‘কাম’’ন্তিআদিনা অভ্যূপগমপরিহারৰসেন ৰিস্সজ্জেতি. তত্থ কামংসদ্দো অনুগ্গহত্থো, পন সদ্দো গরহত্থো, পন তথাপি পটিক্খিপতীতি সম্বন্ধো. তন্তি মহাপজাপতিং গোতমিং. যাচিতেন হুত্ৰা অনুঞ্ঞাতন্তি যোজনা. অযন্তি পব্বজ্জা. ভদ্দকং কত্ৰাতি লদ্ধকং কত্ৰা, মনাপং কত্ৰাতি অত্থো.

৪০৩. কুম্ভথেনকেহীতি এত্থ কুম্ভে দীপং জালেত্ৰা তেনালোকেন থেনেন্তীতি কুম্ভথেনকাতি দস্সেন্তো আহ ‘‘কুম্ভে দীপং জালেত্ৰা’’তিআদি.

নাল়িমজ্ঝগতন্তি সস্সনাল়স্স মজ্ঝে গতং. গণ্ঠিন্তি ফল়ুং. ‘‘কণ্ড’’ন্তিপি পাঠো, দণ্ডন্তি অত্থো. যেনাতি পাণকেন. অযঞ্হি যংসদ্দো তংসদ্দানপেক্খোতি দট্ঠব্বো.

অন্তোরত্তভাৰোতি অন্তোলোহিতভাৰো. এতমত্থন্তি এতং ৰক্খমানং অত্থং. আল়িযাতি আৰরণায. অবদ্ধাযপীতি পিসদ্দো অনুগ্গহত্থো, বদ্ধায পন পগেৰাতি অত্থো. কিঞ্চীতি অপ্পমত্তকং. যন্তি উদকং. তম্পীতি উদকম্পি. পিসদ্দো অবদ্ধায ঠিতং কিঞ্চি উদকং অপেক্খতি. যে ইমে গরুধম্মা পঞ্ঞত্তাতি যোজনা. পটিকচ্চেৰাতি পগেৰ, পঠমমেৰাতি অত্থো. তেসূতি গরুধম্মেসু. অপঞ্ঞত্তেসু সন্তেসুপীতি যোজনা. পঠমং ৰুত্তন্তিআদি ৰুত্তং, ৰস্সসহস্সমেৰ ঠস্সতি ইতি ইমমত্থং দস্সেতীতি যোজনা. ‘‘ৰস্সসহস্স’’ন্তি চ এতং ৰচনং ৰুত্তন্তি সম্বন্ধো. ততোতি ৰস্সসহস্সতো. পরিযত্তিধম্মোপীতি পিসদ্দো পটিৰেধসদ্ধম্মং অপেক্খতি. দ্ৰীসু সদ্ধম্মেসু ঠিতেসু পটিপত্তিসদ্ধম্মো ঠিতোযেৰাতি কত্ৰা ন ৰুত্তং. তানিযেৰাতি পঞ্চৰস্সসহস্সানিযেৰ. পরিযত্তিযা সতি পটিৰেধো ন হোতীতি নাপি ৰত্তব্বোতি যোজনা. লিঙ্গন্তি সমণৰেসং, সমণাকারন্তি অত্থো.

ভিক্খুনীউপসম্পদানুজাননকথা

৪০৪. ইমায অনুপঞ্ঞত্তিযাতি মহাপজাপতিযা অট্ঠগরুধম্মপটিগ্গহণূপসম্পদং উপনিধায অযং পঞ্ঞত্তি অনুপঞ্ঞত্তি নাম, তায অনুপঞ্ঞত্তিযা উপসম্পাদেতুন্তি অত্থো. মহাপজাপতিযা সদ্ধিৰিহারিনিযো কত্ৰাতি মহাপজাপতিং উপজ্ঝং কত্ৰা পঞ্চসতা সাকিযানিযো তস্সা সদ্ধিৰিহারিনিযো কত্ৰাতি অত্থো. ইতীতি তস্মা অহেসুন্তি সম্বন্ধো. ইমিনা ওৰাদেনাতি ভগৰতো ইমিনা ওৰাদেন.

৪১০. এতিস্সাতি এতিস্সা ভিক্খুনিযা. তন্তি কম্মং. অঞ্ঞস্মিন্তি অঞ্ঞস্মিং কম্মে. অঞ্ঞন্তি রোপিতব্বকম্মতো অঞ্ঞং কম্মং.

৪১১. কদ্দমোদকেনাতি কদ্দমেন আলুল়িতেন উদকেনেৰ. কদ্দমাদীসুপীতি পীসদ্দো ‘‘যেন কেনচী’’তি এত্থ যোজেতব্বো. যেন কেনচিপীতি হি অত্থো. সন্নিপতিত্ৰাতি ভিক্খুনিসঙ্ঘেন সন্নিপতিত্ৰা. অপসাদনীযন্তি অপসাদেতব্বং কম্মং. এত্তাৰতাতি এত্তকেন সাৰনমত্তেন. অৰন্দিযোতি ন ৰন্দেতব্বো, ৰন্দিতুং ন অরহোতি অত্থো. ততোতি তিক্খত্তুং সাৰেতব্বতো. ন ৰন্দন্তীতি ভিক্খুনিযো ন ৰন্দন্তি. দিস্ৰাপীতি তং ভিক্খুং দিস্ৰাপি. তেন ভিক্খুনাতি অপসাদনীযং দস্সেন্তেন ভিক্খুনা, খমাপেতব্বন্তি সম্বন্ধো. ৰিহারেযেৰাতি ভিক্খূনং ৰিহারেযেৰ. তেন ভিক্খুনাতি উপসঙ্কমিতব্বেন ভিক্খুনা, ৰত্তব্বন্তি সম্বন্ধো. ততোতি ৰত্তব্বকালতো. সোতি অপসাদনীযং দস্সেন্তো ভিক্খু. এত্থাতি ভিক্খুনিক্খন্ধকে. কম্মৰিভঙ্গেতি পরিৰারাৰসানে কম্মানং ৰিভঙ্গট্ঠানে (পরি. অট্ঠ. ৪৯৫-৪৯৬).

ওভাসন্তীতি অৰ হীনেন ভাসন্তীতি দস্সেন্তো আহ ‘‘অসদ্ধম্মেন ওভাসন্তী’’তি. ‘‘ভিক্খুনীহি সদ্ধিং সম্পযোজেন্তী’’তি এত্থ কম্মকরণে দস্সেন্তো আহ ‘‘পুরিসে অসদ্ধম্মেনা’’তি. এত্থ ‘‘পুরিসে’’তি ইমিনা কম্মং দস্সেতি, ‘‘অসদ্ধম্মেনা’’তি ইমিনা করণং. ৰিহারপ্পৰেসনেতি ভিক্খূনং ৰিহারপ্পৰেসনে. ওৰাদং ঠপেতুন্তি এত্থ ওৰাদট্ঠপনাকারং দস্সেন্তো আহ ‘‘ন ভিক্খুনুপস্সয’’ন্তিআদি. ওৰাদত্থাযাতি ওৰাদপটিগ্গহণত্থায. মা করিত্থাতি মা করেয্যাথ.

৪১৬. গিহিদারিকাযোতি গিহিভূতা দারিকাযো বন্ধন্তি ৰিযাতি যোজনা. ঘনপট্টকেনাতি ঘনভূতেন পট্টেন নিযুত্তেন. একপরিযকন্তি এত্থ একৰারং কটিযং পরিক্খিপিত্ৰা কতং কাযবন্ধনং একপরিযকন্তি দস্সেন্তো আহ ‘‘একৰারং পরিক্খিপনক’’ন্তি. তত্থ পরিক্খিপনকন্তি কটিযং পরিক্খিপনারহং.

ৰিলীৰেনাতি এত্থ বহুত্থে একৰচনন্তি আহ ‘‘সণ্হেহি ৰিলীৰেহী’’তি. ‘‘কতপট্টেনা’’তি ইমিনা পাল়িযং ‘‘কতেনা’’তি পাঠসেসং দস্সেতি. সেতৰত্থপট্টেনাতি সেতৰত্থেন কতেন পট্টেন. কতৰেণিযাতি কতায ৰেণিযা. ইমিনা দুস্সেন কতা ৰেণি দুস্সৰেণীতি ৰচনত্থং দস্সেতি. এসেৰ নযো পুরিমপচ্ছিমপদেসুপি. চোল়কাসাৰন্তি চোল়মেৰ কসাৰেন রত্তত্তা চোল়কাসাৰং.

অট্ঠিল্লেনাতি অদ্দেন অট্ঠিনা. ‘‘গোজঙ্ঘট্ঠিকে’’তি ইমিনা অট্ঠিনো সম্বন্ধং দস্সেতি. হত্থং কোট্টাপেন্তীতি এত্থ হত্থং নাম অগ্গবাহমেৰাধিপ্পেতং, ন কপ্পরতো পট্ঠাযাতি দস্সেন্তো আহ ‘‘অগ্গবাহ’’ন্তি. পিট্ঠিহত্থন্তি হত্থপিট্ঠিং. পিট্ঠিপাদন্তি পাদপিট্ঠিং.

৪১৭. ৰুত্তনযানেৰাতি ছব্বগ্গিযানং মুখলিম্পনাদীসু (চূল়ৰ. অট্ঠ. ২৪৭) ৰুত্তনযানেৰ. অঙ্গদেসেতি সরীরপ্পদেসে. গণ্ডপ্পদেসেতি কপোলপ্পদেসে. সালোকে তিট্ঠন্তীতি এত্থ সংৰিজ্জতি আলোকো এত্থাতি সালোকন্তি কত্ৰা দ্ৰারং গহেতব্বং. তেন ৰুত্তং ‘‘দ্ৰারং ৰিৰরিত্ৰা’’তি. ৰুট্ঠাপেন্তীতি উপসম্পাদেন্তি. সূনং ঠপেন্তীতি এত্থ সূনাসদ্দো মংসপরিযাযোতি আহ ‘‘মংসং ৰিক্কিণন্তী’’তি. তেনাতি দাসেন. ইদং পদং ‘‘কারেন্তী’’তি পদে কারিতকম্মং. ‘‘হরিতকঞ্চেৰ পক্কঞ্চা’’তি ইমিনা হরিতকপক্কিকন্তি পদস্স দ্ৰন্দৰাক্যং দস্সেতি. তত্থ হরিতকন্তি হরিতমেৰ পণ্ণং. পক্কন্তি সেদিতং পণ্ণং.

৪১৮. কথিতাযেৰাতি চীৰরক্খন্ধকে কথিতাযেৰ.

৪১৯. পাল়িমুত্তকৰিনিচ্ছযোতি পাল়িযং ৰুত্তৰিনিচ্ছযতো মুত্তো ৰিনিচ্ছযো. পাল়িমুত্তকৰিনিচ্ছযং ৰিত্থারেন্তো আহ ‘‘সচে হী’’তিআদি. যো কোচি কালং করোন্তো ৰদতীতি সম্বন্ধো. মমচ্চযেনাতি মম অতিক্কমেন. অঞ্ঞস্সাতি ৰুত্তেহি উপজ্ঝাযাদীহি অঞ্ঞস্স. তেসন্তি উপজ্ঝাযাদীনং. ন হোতীতি পরিক্খারো ন হোতি. হীতি সচ্চং, যস্মা ৰা. অচ্চযদানন্তি অচ্চযেন হোতূতি দানং. ন রুহতীতি পঞ্চন্নং সহধম্মিকানং পব্বজিতস্স ৰা গহট্ঠস্স ৰা যস্স কস্সচি অচ্চযদানং তেসং ন রুহতি, সঙ্ঘস্সেৰ রুহতীতি অধিপ্পাযো. গিহীনং পন অচ্চযদানন্তি সম্বন্ধো. রুহতীতি গিহীনং পব্বজিতস্স ৰা গহট্ঠস্স ৰা যস্স কস্সচি অচ্চযদানং তেসং রুহতি, তেসংযেৰ সন্তকো হোতীতি অধিপ্পাযো.

৪২০. পুরাণমল্লীতি এত্থ মল্লস্স ভরিযা মল্লী, পুরাণে মল্লী পুরাণমল্লীতি দস্সেন্তো আহ ‘‘পুরাণে’’তিআদি. ‘‘গিহিকালে’’তি ইমিনা ‘‘পুরাণে’’তি এত্থ ণপচ্চযস্স সরূপং দস্সেতি. মল্লস্সাতি মুট্ঠিমল্লস্স. পুরিসব্যঞ্জনন্তি এত্থ ব্যঞ্জনসদ্দো নিমিত্তপরিযাযোতি আহ ‘‘পুরিসনিমিত্ত’’ন্তি. চিত্তন্তি রাগচিত্তং.

৪২১. যন্তি যং ৰত্থু, অগ্গন্তি পঠমভাগং. অসপ্পাযন্তি অত্তনো অসপ্পাযং.

হিয্যোতি অতীতানন্তরাহনি. অঞ্ঞস্মিন্তি ভিক্খুনীহি অঞ্ঞস্মিং. ‘‘ভিক্খুনীহী’’তি পদং ‘‘পটিগ্গাহাপেত্ৰা’’তি পদে কারিতকম্মং. হীতি সচ্চং, যস্মা ৰা.

৪২৬. ‘‘ভোজনকাল’’ন্তি ইমিনা ‘‘কালং ৰীতিনামেসু’’ন্তি এত্থ কালৰিসেসং দস্সেতি.

পুরেতি আদিম্হি. তাসন্তি অট্ঠন্নং ভিক্খুনীনং. অব্ভন্তরিমাতি অব্ভন্তরে পরিযাপন্না. অঞ্ঞাতি অট্ঠহি ভিক্খুনীহি অঞ্ঞা. নৰকতরা হোতীতি সম্বন্ধো. ‘‘ঠপেত্ৰা ভত্তগ্গ’’ন্তি ইমিনা অঞ্ঞত্থ সব্বত্থ যথাৰুড্ঢং ন পটিবাহিতব্বন্তি এত্থ অঞ্ঞসদ্দস্স অপাদানং দস্সেতি. অঞ্ঞস্মিন্তি এত্থ স্মিংৰচনেন ত্থপচ্চযস্স অত্থং দস্সেতি. ‘‘চতুপচ্চযভাজনীযট্ঠানে’’তি ইমিনা সরূপং দস্সেতি.

৪৩০. দূতেনপি উপসম্পাদেতুন্তি এত্থ কিং সব্বথা দূতেন উপসম্পদা ৰট্টতীতি আহ ‘‘দূতেন…পে… ৰট্টতী’’তি. যেন কেনচি অন্তরাযেনাতি সম্বন্ধো, অসতি অন্তরাযে ন ৰট্টতীতি অধিপ্পাযো. কম্মৰাচাপরিযোসানে উপসম্পন্নাৰ হোতীতি সম্বন্ধো. তাৰদেৰাতি উপসম্পন্নক্খণেযেৰ.

৪৩১. নৰকম্মম্পীতি পিসদ্দো উদোসিতউপস্সযে অপেক্খতি.

৪৩২. তস্সাতি তস্সা ইত্থিযা. যাৰ সো দারকো ৰিঞ্ঞুতং পাপুণাতীতি এত্থ কথং ৰিঞ্ঞুভাৰো গহেতব্বোতি আহ ‘‘যাৰ খাদিতু’’ন্তিআদি.

ঠপেত্ৰা সাগারন্তি এত্থ সকারো সহসদ্দকারিযো, অগারন্তি চ সেয্যাগারন্তি দস্সেন্তো আহ ‘‘সহাগারসেয্যমত্তং ঠপেত্ৰা’’তি. যথা অঞ্ঞস্মিং পুরিসে পটিপজ্জিতব্বং, এৰং তথাতি যোজনা. ‘‘অঞ্ঞস্মি’’ন্তি ইমিনা পাল়িযং অঞ্ঞে পুরিসেতি এত্থ স্মিংৰচনস্স সব্বনামতো একারাদেসো দস্সিতো, তংদস্সনেন চ কচ্চাযনে (কচ্চাযনে ১১০ সুত্তে) সব্বনামতো স্মিংৰচনস্স একারাদেসনিসেধনং অনিচ্চন্তি দস্সেতি.

৪৩৪. ‘‘যদেৰ সা ৰিব্ভন্তা’’তি ইমিনা দস্সেতীতি সম্বন্ধো. ‘‘যস্মা’’তি ইমিনা যদেৰাতি এত্থ যংসদ্দস্স কারণত্থং দস্সেতি. ওদাতানি ৰত্থানি নিৰত্থাতি সম্বন্ধো. ‘‘তস্মাযেৰা’’তি ইমিনা তদেৰাতি পদস্স কারণত্থমেৰ দস্সেতি. ‘‘ন সিক্খাপচ্চক্খানেনা’’তি ইমিনা এৰত্থফলং দস্সেতি. সা পুন উপসম্পদং ন লভতীতি সা ৰিব্ভন্তা ভিক্খুনী পুন উপসম্পদং ন লভতি.

পব্বজ্জম্পি ন লভতীতি তিত্থাযতনসঙ্কন্তা ভিক্খুনী পব্বজ্জম্পি ন লভতি, পগেৰ উপসম্পদং.

পাদে সম্বাহন্তাতি ভিক্খুনীনং পাদে সম্বাহন্তা. কেসেতি ভিক্খুনীনং কেসে. তত্রাতি ‘‘কুক্কুচ্চযন্তা ন সাদিযন্তী’’তি ৰচনে. একে আচরিযা ৰদন্তীতি সম্বন্ধো. সারত্তা হোন্তীতি যোজনা. এত্থাতি পুরিসানং অভিৰাদনাদীসু. ইদন্তি পুরিসানং অভিৰাদনাদি, ‘‘অনুঞ্ঞাত’’ন্তি পদে ৰুত্তকম্মং ‘‘ৰট্টতী’’তি পদে ৰুত্তকত্তা. অথ ৰা ওদিস্স অনুঞ্ঞাতং ইদং পুরিসানং অভিৰাদনাদি ৰট্টতীতি যোজনা. এৰঞ্হি সতি ‘‘ওদিস্স অনুঞ্ঞাত’’ন্তি পদং হেতুঅন্তোগধৰিসেসনং, ওদিস্স অনুঞ্ঞাতত্তা ৰট্টতীতি অধিপ্পাযো. তন্তি অট্ঠকথাসু ৰুত্তৰচনং. হীতি সচ্চং, যস্মা ৰা.

৪৩৫. পল্লঙ্কেন নিসীদন্তীতি এত্থ আসনপল্লঙ্কং পটিক্খিপন্তো আহ ‘‘পল্লঙ্কং আভুজিত্ৰা নিসীদন্তী’’তি. তত্থ আভুজিত্ৰাতি আবন্ধিত্ৰা. কূপোতি ৰচ্চকূপো. উপরীতি কূপতো উপরি. ‘‘সব্বদিসাসু পঞ্ঞাযতী’’তি ইমিনা পটিচ্ছন্নমেৰ অত্থি, ন উপরি ছন্নন্তি দস্সেতি.

৪৩৬. কুণ্ডকন্তি কণং. এত্থাতি ভিক্খুনিক্খন্ধকে.

ইতি ভিক্খুনিক্খন্ধকৰণ্ণনায যোজনা সমত্তা.