১১. পঞ্চসতিকক্খন্ধকং

১. খুদ্দানুখুদ্দকসিক্খাপদকথা

৪৪১. পঞ্চসতিকক্খন্ধকে ‘‘চত্তারি…পে… খুদ্দকানী’’তি এৰমাদি ৰুত্তন্তি সম্বন্ধো. পরিযাযেনাতি কারণেন. ধূমকালিকন্তি এত্থ ধূমস্স কালো ধূমকালো, ধূমস্স উট্ঠিতকালোতি অত্থো. সো এতস্সত্থীতি ধূমকালিকং, সিক্খাপদপঞ্ঞত্তং. ইতি ইমমত্থং দস্সেন্তো আহ ‘‘যাৰা’’তিআদি.

৪৪৩. ইদন্তি ‘‘কতমানি পন ভন্তে খুদ্দানুখুদ্দকানি সিক্খাপদানী’’তি অপুচ্ছনং. ‘‘তযা’’তি ইমিনা ইদং তেতি এত্থ তেসদ্দস্স ‘‘তুয্হং, তৰা’’তি অত্থে পটিক্খিপতি. আপত্তিন্তি দুক্কটাপত্তিং. হীতি সচ্চং, যস্মা ৰা. তেতি থেরা. ‘‘সঙ্ঘো…পে… ন সমুচ্ছিন্দতী’’তি এতং ৰচনং অনুস্সাৰিতন্তি যোজনা. ‘‘দেসেহি তং আৰুসো দুক্কট’’ন্তি ইদম্পি চ ৰুত্তন্তি সম্বন্ধো. থেরো পনাতি আনন্দত্থেরো পন আহাতি সম্বন্ধো. তত্থাতি অপুচ্ছনে. যথাতি যেনাকারেন. চতূসু ঠানেসূতি ‘‘ভগৰতো ৰস্সিকসাটিকং অক্কমিত্ৰা সিব্বেসী’’তিআদীসু চতূসু ঠানেসু. এত্থাতি পঞ্চসতিকক্খন্ধকে.

ইতি পঞ্চসতিকক্খন্ধকৰণ্ণনায যোজনা সমত্তা.