৭. সঙ্ঘভেদকক্খন্ধকং

ছসক্যপব্বজ্জাকথা

৩৩০. সঙ্ঘভেদকক্খন্ধকে অভিঞ্ঞাতা অভিঞ্ঞাতাতি এত্থ অভিপুব্বো ঞাতসদ্দো পাকটত্থোতি আহ ‘‘পাকটা পাকটা’’তি. কাল়ুদাযিপ্পভূতযোতি কাল়ুদাযিআদযো. পরিৰারেহি সদ্ধিং দস দূতা চ অঞ্ঞে চ বহূ জনা সক্যকুমারা নামাতি যোজনা. অম্হেসূতি সক্যকুলসঙ্খাতেসু অম্হেসু, নিদ্ধারণে ভুম্মং. ইমিনা পাঠসেসং দস্সেতি. ‘‘কুলতো’’তি ইমিনা ‘‘কুলা’’তি এত্থ নিস্সক্কত্থে নিস্সক্কৰচনন্তি দস্সেতি. ঘরাৰাসত্থন্তি এত্থ ঘরে আৰসন্তানং মনুস্সানং কিচ্চন্তি দস্সেন্তো আহ ‘‘ঘরাৰাসে য’’ন্তিআদি. তত্থ যন্তি যংকিঞ্চি. উদকং নিন্নেতব্বন্তি এত্থ উদকং নীহরিত্ৰা নেতব্বং অপনেতব্বন্তি দস্সেন্তো আহ ‘‘যথা উদকং সব্বট্ঠানেসু সুসং হোতী’’তি. সুসন্তি সুক্খং. তিণানীতি সস্সদূসকানি তিণানি. ‘‘উদ্ধরিতব্বানী’’তি ইমিনা নিদ্ধাপেতব্বন্তি এত্থ ধুধাতুযা পপ্ফোটনধংসনত্থে দস্সেতি. ভুসাতি সস্সনাল়দণ্ডা, তেহি মিস্সা পলালা ভুসিকা. ওফুণাপেতব্বন্তি এত্থ ফুণধাতুযা অৰকিরণত্থং দস্সেন্তো আহ ‘‘অপনেতব্ব’’ন্তি. ত্ৰঞ্ঞেৰ ঘরাৰাসত্থেন উপজানাতি এত্থ ঘরাৰাসত্থেনাতি উপযোগত্থে করণৰচনং. উপজানাতি উপত্যূপসগ্গো ধাত্ৰত্থানুৰত্তকো, হিৰিভত্তি চ লোপো হোতি, তেন ৰুত্তং ‘‘ত্ৰঞ্ঞেৰ ঘরাৰাসত্থং জানাহী’’তি. অহন্তি ভদ্দিযকুমারনামকো অহং. তযাতি অনুরুদ্ধকুমারনামকেন তযা. ‘‘সদ্ধিং পব্বজিস্সামী’’তি ইমিনা পাঠসেসং দস্সেতি. সেসন্তি ‘‘সদ্ধিং পব্বজিস্সামী’’তি ৰচনং.

৩৩১. নিপ্পাতিতাতি এত্থ নিক্খমিত্ৰা গমাপিতাতি দস্সেন্তো আহ ‘‘নিক্খামিতা’’তি. মানস্সিনোতি এত্থ মানং সযন্তি নিস্সযন্তীতি মানস্সিনোতি দস্সেন্তো আহ ‘‘মানস্সযিনো’’তি.

৩৩২. যস্সন্তরতো ন সন্তি কোপাতি এত্থ অন্তরসদ্দো চিত্তৰাচকো, তোপচ্চযো চ সত্তম্যত্থৰাচকোতি দস্সেন্তো আহ ‘‘যস্স চিত্তে’’তি. কস্মা কোপা ন সন্তীতি আহ ‘‘ততিযমগ্গেন সমূহতত্তা’’তি. অনাগামিমগ্গেন দোসস্স সমূহতত্তা যস্স খীণাসৰস্স চিত্তে কোপা ন সন্তীতি অধিপ্পাযো. ইতি ভৰাভৰতঞ্চ ৰীতিৰত্তোতি এত্থ অত্থং দস্সেন্তো আহ ‘‘যস্মা পনা’’তিআদি. তত্থ যস্মা পন ৰুচ্চতি, তস্মা এৰমত্থো দট্ঠব্বোতি যোজনা. ৰিভৰোতি পাপং ৰুচ্চতীতি সম্বন্ধো. ননু পাল়িযং ‘‘ৰিভৰো’’তি নত্থি, ‘‘অভৰো’’তি এৰ অত্থি, অথ কস্মা ‘‘ৰিভৰোতি অভৰো’’তি ৰুত্তন্তি আহ ‘‘ৰিভৰোতি চ অভৰোতি চ অত্থতো একমেৰা’’তি. ইমিনা সদ্দতোযেৰ নানন্তি দস্সেতি. যা এসা ভৰাভৰতা ৰুচ্চতীতি সম্বন্ধো. ‘‘অনেকপ্পকারা’’তি ইমিনা ইতিসদ্দস্স পকারত্থং দস্সেতি. চতূহিপি মগ্গেহি ৰীতিৰত্তোতি সম্বন্ধো. তস্সাতি খীণাসৰস্স.

৩৩৩. অহিমেখলিকাতি মেখলা ৰিয মেখলিকা, অহিমেৰ মেখলিকা অহিমেখলিকা. তমেৰত্থং দস্সেন্তো আহ ‘‘অহিং কটিযং বন্ধিত্ৰা’’তি.

৩৩৪. সম্মন্নতীতি এত্থ ‘‘সম্মানেতী’’তি চুরাদিগণিকধাতুৰসেন ৰত্তব্বে দিৰাদিগণিকধাতুৰসেন ৰুত্তন্তি দস্সেন্তো আহ ‘‘সম্মানেতী’’তি. অচিন্তেয্যো হি পাল়িনযো. সম্মানেতীতি সম্মানং করোতি. যন্তি কম্মং. সোতি সত্থা. ইমিনা যং তুমোতি এত্থ তুমোতি রুল়্হীসদ্দো ইধ ‘‘সো’’তি সব্বনামসদ্দেন সদিসত্থোতি দস্সেতি.

পকাসনীযকম্মাদিকথা

৩৩৬. ‘‘খেল়সদিসা’’তি ইমিনা মিচ্ছাজীৰেন উপ্পন্নপচ্চযানং সদিসূপচারেন খেল়ভাৰং দস্সেতি. তস্মা খেল়া ৰিযাতি খেল়ো, মিচ্ছাজীৰপচ্চযা, খেল়ে অসতি ভক্খতি অজ্ঝোহরতীতি খেল়াসকোতি ৰচনত্থো কাতব্বো. এতরহি পাল়িযং, অট্ঠকথাযঞ্চ ‘‘খেল়াপকস্সা’’তি ওট্ঠজেন পঠমক্খরেন পাঠো অত্থি.

৩৪০. পত্থদ্ধেনাতি এত্থ ভূসো থদ্ধো পত্থদ্ধো, বাল়্হথদ্ধোতি অত্থো. তেন ৰুত্তং ‘‘নিচ্চলেনা’’তি. পোত্থকরূপসদিসেনাতি এত্থ পোত্থকরূপং নাম ৰত্থদন্তাদিমযং, তেন সদিসো পোত্থকরূপসদিসো, তেন.

৩৪২. রাজঞাতকা নামাতি এত্থ রঞ্ঞা জানিযন্তি ‘‘অম্হাকং গরূ’’তি রাজঞাতা, তেযেৰ রাজঞাতকাতি অত্থো দট্ঠব্বো. তদত্থং অধিপ্পাযেন দস্সেন্তো আহ ‘‘রাজা অম্হে জানাতী’’তিআদি. পহট্ঠকণ্ণৰালোতি পহট্ঠো কণ্ণো চ ৰালো চ এতস্সাতি পহট্ঠকণ্ণৰালো. বন্ধনিচ্চলেতি রজ্জুৰল্লীহি বন্ধো ৰিয নিচ্চলে, পহট্ঠকণ্ণৰালেতি সম্বন্ধো. ‘‘কত্ৰা’’তি ইমিনা ‘‘অভিধাৰী’’তি পদে কিরিযাৰিসেসনভাৰং দস্সেতি.

দুক্খঞ্হি কুঞ্জর নাগমাসদোতি এত্থ কুঞ্জরসদ্দস্স আমন্তনপদভাৰং আৰিকরোন্তো আহ ‘‘ভো কুঞ্জরা’’তি. নাগসদ্দস্স অহিনাগহত্থিনাগেসু পৰত্তনতো ৰুত্তং ‘‘বুদ্ধনাগ’’ন্তি. আসদোতি পদস্স আকোধেন সদনং উপগমনং আসদোতি দস্সেন্তো আহ ‘‘ৰধকচিত্তেন উপগমনং নামা’’তি. দুক্খন্তি এতরহি চ আযতিঞ্চ দুক্খকারণং. দুক্খং হীতি হিসদ্দো পদপূরণমত্তং, অথ ৰা দুক্খমেৰাতি অত্থো. ‘‘বুদ্ধনাগং ঘাতকস্সা’’তি ইমিনা নাগং হনতীতি নাগহতোতি ৰচনত্থং দস্সেতি.

পটিকুটিযোৰ ওসক্কীতি এত্থ তথাগতস্স পটিমুখং কুটেন গমনমেতস্সাতি পটিকুটিযো, পটিকুটিযো এৰ হুত্ৰা ওসক্কীতি দস্সেন্তো আহ ‘‘তথাগতাভিমুখোযেৰ পিট্ঠিমেহি পাদেহি ওসক্কী’’তি. ‘‘ন জানাতী’’তি ইমিনা লক্খ দস্সনঙ্কেসূতি ধাতুপাঠেসু (পাণিনী ১৫৩৯ সদ্দনীতিধাতুমালাযং ১৮ দকারন্তধাতু) ৰুত্তেসু অত্থেসু ইধ দস্সনত্থোতি দস্সেতি. ন লক্খিতব্বোতি অঞ্ঞেহি সপ্পুরিসেহি ন লক্খিতব্বোতি অত্থো. এত্থ ণ্যপচ্চযো কত্তুকম্মেসু হোতি, যকারস্স ককারং কত্ৰা অলক্খিকোতি ৰুত্তং.

৩৪৩. ‘‘ভুঞ্জিতব্বভোজন’’ন্তি ইমিনা তিকভোজনন্তি এত্থ যুপচ্চযস্স কম্মত্থভাৰং দস্সেতি. তন্তি তিকভোজনং. যথাধম্মোতি ‘‘গণভোজনে পাচিত্তিয’’ন্তি (পাচি. ২০৯) ৰুত্তায মাতিকাৰিভঙ্গপাল়িযা অনুরূপং. পঞ্চৰত্থুযাচনকথাতি পঞ্চ ৰত্থূনি যাচনস্স কথা. আযুকপ্পন্তি অৰীচিমহানিরযে আযুকপ্পং সন্ধায ৰুত্তং. অৰীচিমহানিরযে আযুকপ্পো নাম একো অন্তরকপ্পোতি জিনালঙ্কারটীকাদীসু (মি. প. ৪.১.৩; কথা. অট্ঠ. ৬৫৪-৬৫৭; ইতিৰু. অট্ঠ. ১৮; সারত্থ. টী. চূল়ৰগ্গ ৩.৩৪৩; অ. নি. টী. ৩.৬৬২) ৰুত্তো. ‘‘একো অসঙ্খ্যেয্যকপ্পো’’তি সম্মোহৰিনোদনাদীসু (ৰিভ. অট্ঠ. ৮০৯; ম. নি. অট্ঠ. ৩.১২৮; ৰি. ৰি. টী. ১.৪১০; ৰজির. টী. পারাজিকণ্ড ৪১০) ৰুত্তো. সেট্ঠং পুঞ্ঞন্তি মহন্তং পুঞ্ঞং. ইমিনা ব্রহং পুঞ্ঞন্তি ব্রহসদ্দো মহন্তত্থোতি দস্সেতি. ব্রহ ৰুদ্ধিযন্তি ধাতুপাঠেসু (পাণিনী ৭৩৫; সদ্দনীতিধাতুমালাযং ১৬ হকারন্তধাতু) ৰুত্তত্তা ব্রহসদ্দো মহন্তৰাচকো হোতি. ব্রহধাতুতো অপচ্চযং কত্ৰা ‘‘ব্রহা’’তিপি, মপচ্চযং কত্ৰা ‘‘ব্রহ্মা’’তিপি পাঠো অত্থি. আযুকপ্পমেৰাতি সগ্গেসু আযুকপ্পমেৰ.

সঙ্ঘভেদকথা

৩৪৪. সোতি দেৰদত্তো, গতো কিরাতি সম্বন্ধো. তত্থেৰাতি ৰিহারসীমাযমেৰ. আৰেণিকন্তি ভিক্খুসঙ্ঘতো আৰেণিকং.

৩৪৫. আগিলাযতীতি এত্থ আত্যূপসগ্গো অভিভৰনত্থো, গিলেধাতু বাধনত্থোতি আহ ‘‘ৰেদনাভিভূতা বাধতী’’তি. তন্তি পিট্ঠিং. পরস্স চিত্তং আদিসিত্ৰা দেসযতি এতাযাতি আদেসনা, সা এৰ পাটিহারিযং আদেসনাপাটিহারিযং. অনুসাসতি এতাযাতি অনুসাসনী, ইমমেৰত্থং দস্সেন্তো আহ ‘‘এৰম্পি তে’’তিআদি.

৩৪৬. মমানুক্রুব্বন্তি এত্থ অনুত্যূপসগ্গো অনুকিরিযত্থো করধাতু অন্তপচ্চযো গচ্ছন্তাদিগণোতি দস্সেন্তো আহ ‘‘মমানুকিরিযং কুরুমানো’’তি. ‘‘দুক্খিতো’’তি ইমিনা কপণোতি এত্থ কপধাতু হিংসনত্থোতি দস্সেতি. মহাৰরাহস্সাতি ৰরাহসদ্দস্স সূকরত্থং পটিক্খিপন্তো আহ ‘‘মহানাগস্সা’’তি. ‘‘পথৰি’’ন্তি ইমিনা মহিং ৰিকুব্বতোতি এত্থ মহীসদ্দস্স এৰংনামকং মহানদিং পটিক্খিপতি. ‘‘পদালেন্তস্সা’’তি ইমিনা করধাতুযা ৰিত্যূপসগ্গৰসেন পদালনত্থং দস্সেতি. ভিসং ঘসমানস্সাতি এত্থ মানসদ্দো কত্ৰত্থোতি আহ ‘‘ভিসং ঘসন্তস্সা’’তি. ঘসন্তস্সাতি ভক্খন্তস্স. নদীনামকং তং পোক্খরণিন্তি যোজনা. ইমিনা নদীসু জগ্গতোতি এত্থ নদী নাম পোক্খরণীতি দস্সেতি. জগ্গতোতি হত্থিযূথং পালেন্তস্স.

৩৪৭. ‘‘সুতাতি সোতা’’তি ইমিনা পাল়িযা দ্ৰিধাভাৰং দস্সেতি. ‘‘নিস্সন্দেহো’’তি ইমিনা অসন্দিদ্ধোতি এত্থ দিহধাতুং দস্সেতি, দিসধাতুং নিৰত্তেতি.

৩৫০. বুদ্ধসহস্সেনপীতি পিসদ্দো গরহত্থো, পগেৰ একেন বুদ্ধেনাতি দস্সেতি.

‘‘সত্তো’’তি ইমিনা কোচিসদ্দস্স পধানপদং দস্সেতি. অট্ঠাতি আখ্যাতপদস্স অত্থং দস্সেন্তো আহ ‘‘ঠিতো’’তি. দেৰদত্তোতি মে সুতন্তি এত্থ ‘‘মে’’তি পদং ভগৰন্তং সন্ধায ৰুত্তন্তি আহ ‘‘ভগৰতা’’তি. তদেৰাতি সুতমেৰ. ইদন্তি ‘‘দেৰদত্তোতি মে সুত’’ন্তি ৰচনং. অনুচিনাতীতি অনুৰড্ঢেতি. ‘‘পত্ৰা’’তি ইমিনা আসজ্জনন্তি এত্থ সদধাতুযা গত্যত্থং, কিরিযাৰিসেসনঞ্চ দস্সেতি. অৰীচিনিরযং পত্তোতি এত্থ ইদানি ন দেৰদত্তো অৰীচিনিরযং পত্তো হোতি, আযতিং পন অৰীচিনিরযে অৰস্সম্ভাৰিযত্তা ‘‘অৰীচিনিরযং পত্তো’’তি ৰুত্তন্তি আহ ‘‘আসংসাযং অতীতৰচন’’ন্তি. আসংসাযন্তি অৰস্সম্ভাৰিযত্থে. ভেস্মা হি উদধী মহাতি এত্থ ভেস্মাসদ্দো ভযানকপরিযাযোতি আহ ‘‘ভযানকো’’তি.

উপালিপঞ্হাকথা

৩৫১. একতোতি এত্থ তোপচ্চযস্স সত্তম্যত্থে পৰত্তভাৰং দস্সেন্তো আহ ‘‘ধম্মৰাদীপক্খে’’তি. ‘‘অনুনযন্তো’’তি ইমিনা অনুস্সাৰেতীতি এত্থ অনুসদ্দস্স অত্থং দস্সেতি. অনুনযন্তোতি পুনপ্পুনং নযন্তো. সাৰনাকারং দস্সেন্তো আহ ‘‘ন তুম্হাকংযেৰা’’তিআদি. অযং অধম্মো ৰা অযং অৰিনযো ৰা ইদং অসত্থুসাসনং ৰা যদি ভৰেয্যাতি যোজনা. ‘‘বোধেতী’’তি ইমিনা সাৰেতীতি এত্থ সুধাতুযা অত্থং দস্সেতি. ‘‘অনুস্সাৰেত্ৰা’’তি ইমিনা ‘‘অনুস্সাৰেতি, সলাকং গাহেতী’’তি এত্থ অনুস্সাৰনকিরিযা পুব্বভাগে পৰত্তা, সলাকগ্গাহকিরিযা পচ্ছাভাগেতি দস্সেতি.

এত্তাৰতাতি এত্তকেন অনুস্সাৰনসলাকগ্গাহমত্তেন. ন পন সঙ্ঘো ভিন্নো হোতি, অনুস্সাৰেত্ৰা সলাকং গাহেত্ৰা আৰেণিকং সঙ্ঘকম্মে কতেযেৰ সঙ্ঘো ভিন্নো হোতীতি অধিপ্পাযো.

এত্থ ঠত্ৰা কস্সচি চোদকস্স অনুযোগো সিযাতি যোজনা. কিন্তি সিযাতি আহ ‘‘এৰং দেৰদত্তো’’তিআদি. তত্থ এৰন্তি পকতত্তে সঙ্ঘে ভিন্দে সতীতি অত্থো. কথন্তি কেনাকারেন. পুন কথন্তি কস্মা কারণা. রঞ্ঞোতি অজাতসত্তুরঞ্ঞো, কারিতকম্মং. ‘‘ঘাতাপিতত্তা’’তি বিম্বিসাররাজানং ঘাতাপিতত্তা. তত্থাতি ‘‘ভিক্খু খো উপালী’’তিআদিৰচনে, ঠত্ৰা পরিহারং ৰদামাতি যোজনা. ৰিরদ্ধত্তাতি ৰিরাধিতত্তা. তমত্থং ৰিত্থারেন্তো আহ ‘‘তেন হী’’তিআদি. তত্থ তেন হীতি উয্যোজনত্থে নিপাতো. এৰঞ্হীতি এৰমেৰ. তস্সাতি দেৰদত্তস্স. কুমারো পনাতি অজাতসত্তুকুমারো পন, কতমত্তেযেৰ ন ৰুত্তাতি সম্বন্ধো. তস্সাতি দেৰদত্তস্স. তস্মাতি যস্মা সঙ্ঘভেদতো পুব্বে রুহিতুপ্পাদকম্মং করোন্তস্সাপি পচ্ছা অভব্বভাৰো রোপিতো, তস্মা.

ভেদকরৰত্থূসু এৰং ৰিনিচ্ছযো ৰেদিতব্বোতি যোজনা. ধম্মাধম্মাদীনং সুত্তন্তৰিনযপরিযাযেন ৰিসেসং দস্সেন্তো আহ ‘‘সুত্তন্তপরিযাযেনা’’তিআদি. তত্থ সুত্তন্তপরিযাযেনাতি সুত্তন্তদেসনায, সুত্তন্তদেসনানযতোতি ৰুত্তং হোতি. তথাতি ততো অঞ্ঞথা.

তত্থাতি দ্ৰীসু ধম্মাধম্মেসু. এৰং অম্হাকন্তি এৰং করিযমানে অম্হাকং. এৰং সুত্তন্তপরিযাযেন ধম্মাধম্মানং ৰিসেসং দস্সেত্ৰা ইদানি ৰিনযপরিযাযেন তেসং তং দস্সেন্তো আহ ‘‘ৰিনযপরিযাযেন পনা’’তিআদি. ভূতেন ৰত্থুনা কাতব্বন্তি সম্বন্ধো. এৰং ‘‘অভূতেন ৰত্থুনা’’তি এত্থাপি.

এৰং দ্ৰিন্নং পরিযাযানং ৰসেন ধম্মাধম্মদুকস্স ৰিসেসং দস্সেত্ৰা ইদানি ৰিনযাৰিনযদুকস্স ৰিসেসং দস্সেন্তো আহ ‘‘সুত্তন্তপরিযাযেনা’’তিআদি. তত্থ সুত্তন্তনযেন রাগাদযো ৰিনেতীতি ৰিনযো, ৰিনযনযেন কাযং ৰাচং ৰিনেতীতি ৰিনযোতি ৰচনত্থো কাতব্বো.

এৰং দ্ৰিন্নং পরিযাযানং ৰসেন ৰিনযাৰিনযদুকস্স ৰিসেসং দস্সেত্ৰা ইদানি ভাসিতাভাসিতদুকস্স ৰিসেসং দস্সেন্তো আহ ‘‘সুত্তন্তপরিযাযেন চত্তারো সতিপট্ঠানা’’তিআদি. তত্থ ‘‘অট্ঠঙ্গিকো মগ্গো’’তি ইদং ৰচনং তথাগতেন ভাসিতং লপিতন্তি যোজনা.

এৰং দ্ৰিন্নং পরিযাযানং ৰসেন ভাসিতাভাসিতদুকস্স ৰিসেসং দস্সেত্ৰা ইদানি আচিণ্ণানাচিণ্ণদুকস্স ৰিসেসং দস্সেন্তো আহ ‘‘সুত্তন্তপরিযাযেন দেৰসিক’’ন্তিআদি. তত্থ ‘‘দেৰসিক’’ন্তি পদং ‘‘সমাপজ্জনং, ৰোলোকন’’ন্তি তীসুযেৰ পদেসু যোজেতব্বং. অট্ঠুপ্পত্তিৰসেনাতি কারণুপ্পত্তিৰসেন. কারণঞ্হি অরতি ফলং এতস্মাতি অত্থোতি ৰুচ্চতি, অত্থস্স উপ্পত্তি অত্থুপ্পত্তি, সাযেৰ অট্ঠুপ্পত্তি ত্থকারস্স ট্ঠকারং কত্ৰা, অট্ঠুপ্পত্তিযা ৰসো অট্ঠুপ্পত্তিৰসো, তেন. ইদং পদং ‘‘সুত্তন্তদেসনা জাতককথা’’তি দ্ৰীহিপি পদেহি যোজেতব্বং. ইদন্তি ফলসমাপত্তিসমাপজ্জনাদি. আচিণ্ণন্তি আ বন্ধিতং, পুনপ্পুনং ৰা উপচিতং ৰড্ঢিতং, পগুণং ৰা. চারিযপক্কমনন্তি চারিযত্থং পক্কমনং.

এৰং দ্ৰিন্নং পরিযাযানং ৰসেন আচিণ্ণানাচিণ্ণদুকস্স ৰিসেসং দস্সেত্ৰা ইদানি পঞ্ঞত্তদুকস্স ৰিসেসং দস্সেন্তো আহ ‘‘সুত্তন্তপরিযাযেন চত্তারো সতিপট্ঠানা’’তিআদি. তং ভাসিতাভাসিতদুকসদিসমেৰ. এৰং দ্ৰিন্নং সুত্তন্তৰিনযপরিযাযানং ৰসেন পঞ্চন্নং দুকানং ৰিসেসো দস্সিতো.

আপত্তানাপত্তিদুকে ‘‘ন মোচনাধিপ্পাযস্সা’’তি পাঠস্স অনন্তরে পচ্ছিমৰাক্যে ঠিতো আদিসদ্দো আনেতব্বো. ইতি আদিনা নযেনাতি হি অত্থো. তত্থ তত্থাতি তস্মিং তস্মিং সিক্খাপদে. ইদং পদং পচ্ছিমৰাক্যেপি অনুৰত্তেতব্বং.

লহুকগরুকদুকে পঞ্চাপত্তিক্খন্ধাতি থুল্লচ্চযপাচিত্তিযপাটিদেসনীযদুক্কটদুব্ভাসিতৰসেন পঞ্চ আপত্তিরাসযো. দ্ৰে আপত্তিক্খন্ধাতি পারাজিকসঙ্ঘাদিসেসৰসেন দ্ৰে আপত্তিরাসযো.

সাৰসেসানাৰসেসদুকে ছ আপত্তিক্খন্ধাতি পারাজিকাপত্তিতো অৰসেসা ছ আপত্তিরাসযো.

দুট্ঠুল্লাদুট্ঠুল্লদুকে লহুকগরুকদুকসদিসমেৰ. অযং পন ৰিসেসো – গরুকাপত্তি দুট্ঠুল্লা নাম, লহুকাপত্তি অদুট্ঠুল্লা নামাতি এৰং ৰিনযপরিযাযৰসেনেৰ চতুন্নং দুকানং ৰিসেসো দস্সিতো.

এত্থাতি ‘‘অধম্মং ধম্মোতি দীপেন্তী’’তিআদিৰচনে. চতুন্নং সঙ্ঘকম্মানন্তি অপলোকনাদিৰসেন চতুন্নং সঙ্ঘকম্মানং. করোন্তেহি হেতুভূতেহি, হেত্ৰত্থে চেতং করণৰচনং.

তত্থাতি ‘‘তে ইমেহী’’তিআদিৰচনে. অপকস্সন্তীতি এত্থ কসধাতুস্স গত্যত্থং দস্সেন্তো আহ ‘‘পরিসং আকড্ঢন্তী’’তি. ৰিজটেন্তীতি ৰিজটং করোন্তি, ৰিসুং করোন্তীতি অত্থো. একমন্তং উস্সাদেন্তীতি একস্মিং অন্তে উস্সদং করোন্তি. অৰপকস্সন্তীতি এত্থ দ্ৰিন্নং উপসগ্গানং ৰসেন অতিৰিযত্থো দট্ঠব্বোতি আহ ‘‘অতি ৰিয আকড্ঢন্তী’’তি. অতিৰিযত্থং আৰিকরোন্তো আহ ‘‘যথা ৰিসংসট্ঠাৰ হোন্তি, এৰং করোন্তী’’তি. যথাতি যেনাকারেন করিযমানেতি সম্বন্ধো. ‘‘ৰিসু’’ন্তি ইমিনা আৰেণিসদ্দো ‘‘ৰিসু’’ন্তিঅত্থৰাচকো অনিপ্ফন্নপাটিপদিকোতি দস্সেতি. ৰত্থূসূতি ভেদকরৰত্থূসু. ইমং গণ্হথাতি ইমং ৰাদং গণ্হথ. ৰিসুন্তি আৰেণিং. ইমস্মিং খন্ধকে ৰুত্তৰচনং পরিৰারপাল়িযা সংসন্দেন্তো আহ ‘‘পরিৰারে পনা’’তিআদি. তত্থ পঞ্চহি আকারেহীতি ‘‘কম্মেন উদ্দেসেন ৰোহরন্তো অনুস্সাৰনেন সলাকগ্গাহেনা’’তি (পরি. ৪৫৮) এৰং পঞ্চহি কারণেহি. তস্সাতি পরিৰারে ৰুত্তৰচনস্স. ইধাতি ইমস্মিং সঙ্ঘভেদকক্খন্ধকে, ৰুত্তেন ইমিনা সঙ্ঘভেদলক্খণেনাতি যোজনা. ‘‘অত্থতো নানাকরণং নত্থী’’তি ইমিনা সদ্দতো নানাকরণং অত্থীতি দীপেতি. অস্সাতি সঙ্ঘভেদলক্খণস্স. তং পন নানাকরণাভাৰন্তি যোজনা. তত্থেৰাতি পরিৰারে এৰ. সব্বত্থাতি সব্বস্মিং সঙ্ঘভেদকক্খন্ধকে.

ইতি সঙ্ঘভেদকক্খন্ধকৰণ্ণনায যোজনা সমত্তা.