২০৯. সমত্তিংসৰিরেচনকথা

৩৩৬. কিংপনাতি এত্থ কিংসদ্দো অনিযমত্থো. লূখো কিং, ন লূখো কিন্তি হি অত্থো. ‘‘সিনেহপানং পন তেমেতী’’তি চ ‘‘করোতী’’তি চ সম্বন্ধো. সব্বত্থাতি সকলকাযে. সিরাতি কণ্ডরা. অযন্তি জীৰকো. ওল়ারিকদোসহরণত্থন্তি ওল়ারিকস্স দোসস্স অপনযনত্থং. পকতত্তেতি পকতিসঙ্খাতে সভাৰে সতীতি সম্বন্ধো. ভগৰা ভন্তেতি যোজনা. কুতোতি কস্স সন্তিকা. ৰট্টতি নু খোতি চিন্তেসীতি যোজনা. ততোতি চিন্তনতো. সোণোতি কোল়িৰীসসোণো, ভুঞ্জতীতি সম্বন্ধো. ততোতি সোণস্স সন্তিকা. তস্সাতি সোণস্স. সোতি সোণো. থেরস্সাতি মোগ্গল্লানত্থেরস্স. ইদং ‘‘পত্ত’’ন্তিপদে সামী, ‘‘অদাসী’’তি পদে সম্পদানং. অঞ্ঞং পিণ্ডপাতন্তি সম্বন্ধো.

রাজাপি খো ভুঞ্জিতুকামো অহোসীতি সম্বন্ধো. যঞ্চ সুজাতা অদাসি, যঞ্চ পরিনিব্বানকালে চুন্দো কম্মারপুত্তো, ভাজনগতেসু দ্ৰীসুযেৰ তেসু পিণ্ডপাতেসু দেৰতা ওজং পক্খিপন্তীতি যোজনা. অঞ্ঞেসূতি দ্ৰীহি পিণ্ডপাতেহি অঞ্ঞেসু. ইচ্ছন্তি রুচিং. সোতি বিম্বিসারো রাজা. তৰেৰাতি তুয্হমেৰ. তন্তি ভগৰতো ৰচনং. রাজা অকাসীতি সম্বন্ধো. তেতি অসীতিকুলপুত্তসহস্সা. এতদত্থমেৰাতি সোণস্স অরহত্তে পতিট্ঠাপনত্থমেৰ, ন রঞ্ঞো অনুগ্গহত্থন্তি অধিপ্পাযো.