১৮৮. আদাযসত্তককথা

৩১১. ন পচ্চেস্সন্তি এত্থ পতীত্যূপসগ্গস্স পুনত্থং, ইধাতুযা চ গত্যত্থং দস্সেন্তো আহ ‘‘ন পুন আগমিস্স’’ন্তি. এৰং পক্কমতো ছিজ্জতীতি সম্বন্ধো.

এতঞ্চাতি পক্কমনন্তিকং, কথিনুদ্ধারঞ্চ. তাহন্তি তে অহং. তেতি তুয্হং.

অঞ্ঞন্তি অত্তনো ৰিহারতো অঞ্ঞং. এৰং হোতীতি এসো পরিৰিতক্কো হোতি. সোতি আৰাসপলিবোধো. আদিচ্চবন্ধুনা ৰুত্তোতি যোজনা.

দ্ৰে পলিবোধা একতো ছিজ্জন্তীতি সম্বন্ধো. অপুব্বং অচরিমন্তি একপহারেনেৰ. সো পলিবোধূপচ্ছেদো কস্মা ৰিত্থারতো ন ৰুত্তোতি আহ ‘‘সো পনা’’তিআদি. সো পনাতি পলিবোধূপচ্ছেদো পন. ন ৰুত্তোতি সম্বন্ধো. এত্থাতি ইমস্মিং কথিনুব্ভারে. কস্মা অযং কথিনুদ্ধারো ‘‘নাসনন্তিকো’’তি ৰুত্তোতি আহ ‘‘যস্মা’’তিআদি. তস্সাতি ভিক্খুনো.

আসাৰচ্ছেদিকে ছিজ্জতীতি সম্বন্ধো. অযং পনাতি আসাৰচ্ছেদিকো কথিনুদ্ধারো পন. অনেকপভেদো হোতীতি সম্বন্ধো. তস্সাতি ভিক্খুস্স. ৰুত্তোতি অযং আসাৰচ্ছেদিকো কথিনুদ্ধারো ৰুত্তোতি যোজনা. এত্থ পনাতি ইমস্মিং পন ঠানে. তত্থাতি সীমাতিক্কন্তিকে.

৩১২-৩২৫. এৰন্তিআদি নিগমনং. সত্তকেতি অট্ঠসু মাতিকাসু আসাৰচ্ছেদতো সেসে সত্তপমাণে, সত্তসমূহে ৰা. তেযেৰাতি সত্তকে এৰ. ততোতি ৰারতো. যে যেতি কথিনুদ্ধারা. ইতরেহীতি আসাৰচ্ছেদতো অঞ্ঞেহি. যে পলিবোধা ৰুত্তাতি সম্বন্ধো. আৰাসো চজীযতি অনেনাতি চত্তন্তি ৰচনত্থং দস্সেন্তো আহ ‘‘যেন চিত্তেনা’’তিআদি. তন্তি চিত্তং. ‘‘এসেৰ নযো’’তি ইমিনা আৰাসো ৰমীযতি অনেনাতি ৰন্তং. আৰাসতো মুচ্চতি অনেনাতি মুত্তন্তি ৰচনত্থং অতিদিসতি. সব্বত্থাতি সব্বস্মিং কথিনক্খন্ধকে.

ইতি কথিনক্খন্ধকৰণ্ণনায যোজনা সমত্তা.