১৪৮. দিগুণাদিউপাহনপটিক্খেপকথা

২৪৫. অঞ্ঞং ব্যাকরোন্তীতি এত্থ অঞ্ঞসদ্দো সব্বনামসুদ্ধনামৰসেন দুৰিধো. তেসু ইধ সুদ্ধনামং, তং পন বালে চ দারকে চ অরহত্তে চ পৰত্ততি, ইধ পন অরহত্তেতি দস্সেন্তো আহ ‘‘অরহত্তং ব্যাকরোন্তী’’তি. যেনাতি সভাৰেন. অরহাতি ঞাযতীতি অরহাইতি অত্থো ঞাযতি. সোতি সভাৰো. সুত্তৰণ্ণনাতোযেৰাতি অঙ্গুত্তরট্ঠকথাতো এৰ. ন উপনীতোতি ন উপরি নীতো. একচ্চে মোঘপুরিসাতি একচ্চেসদ্দো অঞ্ঞেপরিযাযো, মোঘসদ্দো তুচ্ছৰেৰচনোতি আহ ‘‘অঞ্ঞে পন তুচ্ছপুরিসা’’তি. ‘‘হসমানা ৰিযা’’তি ইমিনা হসমানকং মঞ্ঞেতি এত্থ মঞ্ঞেসদ্দো ৰিযত্থোতি দস্সেতি. অসন্তমেৰাতি অৰিজ্জমানংযেৰ. একপলাসিকন্তি এত্থ পলাসসদ্দো পণ্ণৰাচকো. পটলং নাম পণ্ণং ৰিয হোতি, তস্মা ‘‘একপটল’’ন্তি ৰুত্তং. অসীতিসকটৰাহেতি এত্থ অসীতি পদং সকটপদেন সম্বন্ধং কত্ৰা অসীতিসকটেহি ৰহিতব্বেতি অত্থো দট্ঠব্বো. ‘‘দ্ৰে সকটভারা একো ৰাহো’’তি ইমিনা ৰাহানং চত্তালীসভাৰং দস্সেতি. সত্তহত্থিকঞ্চ অনীকন্তি এত্থ অনীকস্স সরূপং দস্সেন্তো আহ ‘‘ছ হত্থিনিযো চা’’তিআদি. সত্তন্নং হত্থীনং সমূহো সত্তহত্থিকং. সত্তঅনীকত্তা একূনপঞ্ঞাসহত্থিনো হোন্তি. তেসু সত্ত হত্থিনো, দ্ৰাচত্তালীস হত্থিনিযো হোন্তি. দ্ৰিগুণাতি এত্থ গুণসদ্দো পটলত্থোতি আহ ‘‘দ্ৰিপটলা’’তি. গুণঙ্গুণূপাহনাতি এত্থ দ্ৰিগুণতিগুণানং ৰিসুং গহিতত্তা পারিসেসতো গুণঙ্গুণভাৰং দস্সেন্তো আহ ‘‘চতুপটলতো পট্ঠায ৰুচ্চতী’’তি. গুণঙ্গুণূপাহনাতি পটলপটলা উপাহনা, বহুপটলা উপাহনাতি অত্থো. উকারেন সহ যোজেত্ৰা গকারো সজ্ঝাযিতব্বো চ লিখিতব্বো চ. ইদানি পোত্থকেসু পন উকারো ন দিস্সতি.