৪. পৰারণাক্খন্ধকং

১২০. অফাসুকৰিহারকথা

২০৯. পৰারণাক্খন্ধকে অল্লাপোতি এত্থ আত্যূপসগ্গস্স আদিকম্মত্থং, লপধাতুযা চ কথনত্থং দস্সেন্তো আহ ‘‘পঠমৰচন’’ন্তি. আদিতো, আদিম্হি ৰা লপনং কথনং, লপতি অনেনাতি ৰা অল্লাপো সংযোগে পরে রস্সো. সং পুন লপনং, লপতি ৰা অনেনাতি সল্লাপো. হত্থৰিলঙ্ঘকেনাতি এত্থ ৰিপুব্বো লঘিধাতু উক্খিপনত্থোতি আহ ‘‘হত্থুক্খেপকেনা’’তি. পসুসংৰাসন্তি এত্থ পসূতি সব্বচতুপ্পদা. তে হি অঞ্ঞমঞ্ঞং পসন্তি বাধন্তি, মনুস্সাদীহি ৰা পসীযন্তি বাধীযন্তীতি পসৰোতি ৰুচ্চন্তি. পসূনং ৰিয সংৰাসন্তি পসূনং সংৰাসো ৰিয সংৰাসোতি পসুসংৰাসো, তং পসুসংৰাসং. তমত্থং ৰিত্থারেন্তো আহ ‘‘পসৰোপি হী’’তিআদি. তথাতি যথা ন করোন্তি, তথাতি অত্থো. এতেপীতি ভিক্খৰোপি. তস্মাতি যস্মা অকংসু, তস্মা. নেসন্তি ভিক্খূনং. সব্বত্থাতি সব্বেসু এল়কসংৰাসসপত্তসংৰাসেসু. মূগব্বতন্তি মূগস্স ৰতং ৰিয ৰতন্তি মূগব্বতং, সুঞ্ঞৰচনৰতন্তি অত্থো. তিত্থিযসমাদানন্তি তিত্থিযেহি সমাদাতব্বং. ৰতসমাদানন্তি সমাদাতব্বং ৰতং. অঞ্ঞমঞ্ঞানুলোমতাতি এত্থ তাসদ্দস্স ভাৰত্থং দস্সেন্তো আহ ‘‘অনুলোমভাৰো’’তি. ইমিনা ‘‘দেৰতা’’তিআদীসু (সং. নি. অট্ঠ. ১.১.১; খু. পা. অট্ঠ. ৫.এৰমিচ্চাদিপাঠৰণ্ণনা; সু. নি. অট্ঠ. ২.অঙ্গলসুত্তৰণ্ণনা) ৰিয তাপচ্চযস্স স্ৰত্থং ‘‘জনতা’’তিআদীসু (পে. ৰ. অট্ঠ. ৪৬০) ৰিয সমূহত্থঞ্চ নিৰত্তেতি. ‘‘অঞ্ঞমঞ্ঞং ৰত্তু’’ন্তি ৰচনস্স যুত্তিং দস্সেন্তো আহ ‘‘ৰদন্তু ম’’ন্তিআদি. ৰদন্তং ভিক্খুং ৰত্তুন্তি যোজনা. ‘‘আপত্তীহি ৰুট্ঠানভাৰো’’তি ইমিনা আপত্তিৰুট্ঠানতাতি পদস্স পঞ্চমীসমাসঞ্চ তাপচ্চযস্স ভাৰত্থঞ্চ দস্সেতি. ‘‘ৰিনয’’ন্তিআদিনা পুরতো কত্ৰা করণং পুরেক্খারো, তস্স ভাৰো পুরেক্খারতা, ৰিনযং পুরেক্খারতা ৰিনযপুরেক্খারতাতি ৰচনত্থং দস্সেতি. এত্থ পুরসদ্দস্স একারত্তং সদ্দসত্থেসু (মোগ্গল্লানব্যাকরণে ৫.১৩৪ সুত্তে) ৰদন্তি. তস্স যুত্তিং দস্সেন্তো আহ ‘‘ৰদন্তুম’’ন্তিআদি (মোগ্গল্লানব্যাকরণে ৫.১৩৪ সুত্তে).

২১০. সব্বসঙ্গাহিকাতি ‘‘সঙ্ঘো পৰারেয্যা’’তি সামঞ্ঞতো ৰুত্তত্তা সব্বেসং তেৰাচিকাদীনং সঙ্গাহকা. ঞত্তীতি ঞাপেতি সঙ্ঘং এতায ৰচনাযাতি ঞত্তি. সব্বসঙ্গাহিকভাৰং ৰিত্থারেন্তো আহ ‘‘এৰঞ্হি ৰুত্তে’’তিআদি. তেৰাচিকন্তি তিস্সো ৰাচা এতস্সাতি তেৰাচিকং, তীহি ৰাচাহি কত্তব্বন্তি ৰা তেৰাচিকং. এসেৰ নযো সেসেসুপি. সমানৰস্সিকন্তি সমানং ৰস্সং এতেসন্তি সমানৰস্সা, তেহি কত্তব্বন্তি সমানৰস্সিকং. অঞ্ঞন্তি দ্ৰেৰাচিকএকৰাচিকং.

২১১. অচ্ছন্তীতি এত্থ আসধাতুযা উপৰেসনত্থং দস্সেন্তো আহ ‘‘নিসিন্নাৰ হোন্তী’’তি. ‘‘ন উট্ঠহন্তী’’তি ইমিনা এৰফলং দস্সেতি. তদমন্তরাতি এত্থ ‘‘তদন্তরা’’তি ৰত্তব্বে ৰাচাসিলিট্ঠৰসেন মকারাগমং কত্ৰা ৰুত্তন্তি আহ ‘‘তদন্তরা’’তি. তস্স অত্তনো পৰারিতকালস্স অন্তরা. ‘‘যাৰ পৰারেন্তী’’তি পদস্স নিযমত্থং দস্সেতুং ৰুত্তং ‘‘তাৰতকং কাল’’ন্তি. যাৰাতি নিপাতস্স পযোগত্তা ‘‘তদমন্তরা’’তি এত্থ অভিৰিধিঅৰধ্যত্থে পঞ্চমীৰিভত্তি হোতীতি দট্ঠব্বং.

১২১. পৰারণাভেদকথা

২১২. চাতুদ্দসিকাযাতি ভণ্ডনকারকেহি উপদ্দুতত্তা পচ্চুক্কড্ঢিতায পুব্বকত্তিকমাসস্স কাল়পক্খচাতুদ্দসিকায. ‘‘অজ্জ পৰারণা পন্নরসী’’তি পুব্বকিচ্চং কাতব্বন্তি যোজনা.

পৰারণাকম্মেসূতি নিদ্ধারণে ভুম্মং, ‘‘অধম্মেন ৰগ্গং পৰারণাকম্ম’’ন্তিআদীসু সম্বন্ধিতব্বং. অধম্মেন ৰগ্গন্তি এত্থ অধম্মং নাম সঙ্ঘো হুত্ৰাপি সঙ্ঘপৰারণমকত্ৰা গণপৰারণায করণং, গণো হুত্ৰাপি গণপৰারণমকত্ৰা সঙ্ঘপৰারণায করণঞ্চ. ৰগ্গং নাম একসীমাযং ৰসন্তানম্পি সব্বেসং একতো অসন্নিপতনং.

অধম্মেন সমগ্গন্তি এত্থ অধম্মং ৰুত্তনযমেৰ. সমগ্গং নাম সব্বেসং একতো সন্নিপতনং.

ধম্মেন ৰগ্গন্তি এত্থ ধম্মং নাম সঙ্ঘো হুত্ৰা সঙ্ঘপৰারণায করণং, গণো হুত্ৰা গণপৰারণায করণঞ্চ. ৰগ্গং ৰুত্তনযমেৰ. ধম্মেন সমগ্গং সুৰিঞ্ঞেয্যমেৰ. ইতিসদ্দো পরিসমাপনত্থো.

২১৩. এৰং দিন্নাযাতি এৰং পাল়িযং ৰুত্তনযেনেৰ দিন্নায. পৰারেতব্বন্তি ৰস্সংৰুত্থপৰারণায পৰারেতব্বং. তিস্সোতি তিস্সনামকো. দিট্ঠেন ৰা ৰদতূতি সম্বন্ধো. তন্তি তিস্সনামকং ভিক্খুং. সঙ্ঘো অনুকম্পং উপাদায ৰদতূতি যোজনা. ৰুড্ঢতরোতি পৰারণাদাযকো তংহারকতো ৰুড্ঢতরো. হীতি লদ্ধগুণো. তেনাতি পৰারণাহারকেন. তস্সাতি পৰারণাদাযকস্স.

ইধাপি চাতি ইমস্মিং পৰারণাক্খন্ধকেপি চ. অপিসদ্দো উপোসথক্খন্ধকং অপেক্খতি. অৰসেসকম্মত্থাযাতি পৰারণাকম্মতো অৰসেসানং কম্মানমত্থায হোতীতি সম্বন্ধো. পৰারণায আহটায সতিযাতি যোজনা. তস্স চাতি পৰারণাদাযকস্স চ. সব্বেসন্তি পৰারণাদাযকস্স চ সঙ্ঘস্স চাতি সব্বেসং. অঞ্ঞং পন কম্মন্তি পৰারণাকম্মতো অঞ্ঞং কম্মং পন. তেন পন ভিক্খুনাতি পৰারণাদাযকেন ভিক্খুনা পন. এত্থ চ তদহুপৰারণায অত্তনো চ সঙ্ঘস্স চ সচে পৰারণাকম্মমেৰ হোতি, পৰারণাযেৰ দাতব্বা. অথ অঞ্ঞমেৰ কম্মং হোতি, ছন্দোযেৰ দাতব্বো. যদি পৰারণাকম্মঞ্চ অঞ্ঞকম্মঞ্চ হোতি, পৰারণা চ ছন্দো চ দাতব্বো. তং সন্ধায ৰুত্তং ‘‘তদহু পৰারণায পৰারণং দেন্তেন ছন্দম্পি দাতু’’ন্তি (মহাৰ. ২১৩). তেনাতি দানহেতুনা.

২১৮. অজ্জ মে পৰারণাতি এত্থ পাল়িনযতো অঞ্ঞং অট্ঠকথানযং দস্সেন্তো আহ ‘‘সচে’’তিআদি.

২১৯. ৰুত্তনযমেৰাতি উপোসথক্খন্ধকে (মহাৰ. অট্ঠ. ১৬৯) ৰুত্তনযমেৰ.

২২২. পুন পৰারেতব্বন্তি এত্থ ন কেৰলং পৰারণাযেৰ পুন কাতব্বা, পুব্বকিচ্চাদীনিপি পুন কাতব্বানীতি দস্সেন্তো আহ ‘‘পুন পুব্বকিচ্চ’’ন্তিআদি.

২২৮. এসেৰ নযোতি ‘‘অজ্জ পৰারণা পন্নরসী’’তি পুব্বকিচ্চং অতিদিসতি. অস্সাতি ৰচনস্স. ঞত্তিন্তি ‘‘সুণাতু মে ভন্তে সঙ্ঘো অজ্জ পৰারণা’’তি ঞত্তিং. পচ্ছিমেহীতি পচ্ছিমৰস্সং উপগতেহি ভিক্খূহি. উপোসথগ্গেতি উপোসথস্স গণ্হনট্ঠানে গেহে. দ্ৰে ঞত্তিযোতি পৰারণাঞত্তি চ উপোসথঞত্তি চাতি দ্ৰে ঞত্তিযো. ইদঞ্চাতি ইদং ৰক্খমানং পন. এত্থাতি পুরিমিকপচ্ছিমিকভিক্খূনং সংসগ্গট্ঠানে. পুরিমিকায উপগতেহীতি ৰিভত্তঅপাদানং অনুমেয্যৰিসযঅপাদানং, থোকতরাতি সম্বন্ধো, সহাদিযোগো ৰা, সমসমাতি সম্বন্ধো. সমসমাতি সমেন, সমতো ৰা সমা সমসমা, অতিরেকসমাতি অত্থো. কিঞ্চি ঊনং ৰা অধিকং ৰা নত্থীতি অধিপ্পাযো. ইতীতি ইদং লক্খণং.

সোতি পচ্ছিমিকো ভিক্খু. ইতরেনাতি পচ্ছিমিকেন. তেসন্তি পুরিমিকানং. একেনাতি পুরিমিকেন. একস্সাতি পচ্ছিমিকস্স. পুন একেনাতি পচ্ছিমিকেন. ‘‘একস্সা’’তি অনুৰত্তেতব্বো, পুরিমিকস্সাতি অত্থো. পুরিমৰস্সূপগতেহি অধিকতরাতি সম্বন্ধো. থোকতরেহীতি পচ্ছিমৰস্সূপগতেহি থোকতরেহি পুরিমৰস্সূপগতেহীতি যোজনা.

কত্তিকাযাতি পচ্ছিমকত্তিকায. চাতুমাসিনিযা পৰারণাযাতি চতুন্নং মাসানং পূরণিযা পৰারণায. পৰারণাঞত্তিং ঠপেত্ৰাতি সমসমা হুত্ৰাপি পৰারণাদিৰসত্তা পৰারণাঞত্তিং ঠপেত্ৰা. তেহীতি পচ্ছিমিকেহি. ইতরেহীতি পুরিমিকেহি. তেসন্তি পচ্ছিমিকানং. থোকতরা ৰাতি একাদিনা থোকতরা ৰা. তেসন্তি পুরিমিকানং. তেহীতি পচ্ছিমিকেহি.

২৩৩. সঙ্ঘসামগ্গিযাতি এত্থ কীদিসী সঙ্ঘসামগ্গী ৰেদিতব্বাতি আহ ‘‘কোসম্বকসামগ্গীসদিসাৰ ৰেদিতব্বা’’তি. এত্থাতি সামগ্গীপৰারণাযং. অপ্পমত্তকেতি পত্তচীৰরাদিং পটিচ্চ উপ্পন্নে অপ্পমত্তকে ৰিৰাদে. পৰারণাযমেৰাতি পৰারণাদিৰসেযেৰ. কস্মিং দিৰসে সামগ্গীপৰারণা কাতব্বাতি আহ ‘‘সামগ্গীপৰারণ’’ন্তিআদি. পঠমপৰারণন্তি পুব্বকত্তিকপুণ্ণমিং. যাৰ কত্তিকচাতুমাসিনী পুণ্ণমাতি অযং অৰধি অনভিৰিধিঅৰধি নাম. কস্মা? কত্তিকচাতুমাসিনিপুণ্ণমিং ঠপেত্ৰা অন্তোযেৰ গহেতব্বত্তা. এত্থন্তরেতি এতস্মিং দ্ৰিন্নং পুণ্ণমিনমন্তরে অট্ঠৰীসতিপমাণে দিৰসে কাতব্বা. ততোতি এত্থন্তরসঙ্খাতা অট্ঠৰীসদিৰসতো.

১৪০. দ্ৰেৰাচিকাদিপৰারণাকথা

২৩৪. ঞত্তিং ঠপেন্তেনাপীতি পিসদ্দো ন কেৰলং পৰারেন্তেন এৰ দ্ৰেৰাচিকং পৰারেতব্বং, অথ খো ঞত্তিং ঠপেন্তেনাপি দ্ৰেৰাচিকঞত্তিযেৰ ঠপেতব্বাতি দস্সেতি. এত্থ চাতি ‘‘সমানৰস্সিকং পৰারেতু’’ন্তি পাঠে চ. সমানৰস্সিকাতি গণনৰসেন সমানং ৰস্সং এতেসন্তি সমানৰস্সিকা, সমানে ৰস্সে উপসম্পাদেন্তীতি ৰা সমানৰস্সিকা. একতোতি একস্মিং খণে, একপহারেন ৰা.

১৪১. পৰারণাট্ঠপনকথা

২৩৬. সব্বং সঙ্গণ্হাতীতি সব্বসঙ্গাহিকং. পুগ্গলস্স ঠপনং পুগ্গলিকং. তত্থাতি দ্ৰীসু পৰারণাট্ঠপনেসু. সব্বসঙ্গাহিকে ঠপিতা হোতীতি সম্বন্ধো. যাৰ রেকারো অত্থি, তাৰাতি যোজনা. ভাসিযিত্থাতি ভাসিতা. লপিযিত্থাতি লপিতা. ন পরিযোসিযিত্থাতি অপরিযোসিতা. এত্থন্তরেতি এতস্মিং সুকাররেকারানং অন্তরে. একপদেপীতি পিসদ্দো একক্খরেপীতি অত্থং সম্পিণ্ডেতি. ঠপিতাতি ‘‘সুণাতু মে ভন্তে সঙ্ঘো, ইত্থন্নামো পুগ্গলো সাপত্তিকো, তস্স পৰারণং ঠপেমী’’তি ঞত্তিযা ঠপিতা. য্যকারেতি ‘‘পৰারেয্যা’’তি এত্থ য্যকারে. ততোতি য্যকারতো. পুগ্গলিকট্ঠপনে পন অট্ঠপিতা হোতীতি সম্বন্ধো. সংকারতোতি ‘‘সঙ্ঘং ভন্তে’’তি এত্থ সংকারতো. সব্বপচ্ছিমোতি তীসু ৰারেসু ততিযৰারে সব্বেসং অক্খরানং পচ্ছিমো টিকারো অত্থীতি যোজনা. এত্থন্তরেতি এতস্মিং সংকারটিকারানং অন্তরে. তস্মাতি যস্মা পরিযোসিতা হোতি, তস্মা. ‘‘এসেৰ নযো’’তি ৰুত্তৰচনং ৰিত্থারেন্তো আহ ‘‘এতাসুপি হী’’তিআদি. তত্থ এতাসুপীতি দ্ৰেৰাচিকএকৰাচিকসমানৰস্সিকাসুপি. পিসদ্দো তেৰাচিকমপেক্খতি. ঠপনখেত্তন্তি ঠপনস্স ভূমি. ইতিসদ্দো পরিসমাপনত্থো.

২৩৭. অনুযুঞ্জিযমানোতি এত্থ অনুযুঞ্জসদ্দো পুচ্ছনত্থোতি আহ ‘‘পুচ্ছিযমানো’’তি. পরতোতি পরস্মিংযেৰ খন্ধকেতি (মহাৰ. ২৩৭) অত্থো. অলং ভিক্খু মা ভণ্ডনন্তিআদীনীতি এত্থ আদিসদ্দেন ‘‘মা কলহং, মা ৰিৰাদ’’ন্তিৰচনানি সঙ্গণ্হাতি, ৰচনানি ৰত্ৰা ওমদ্দিত্ৰাতি যোজনা. ৰচনোমদ্দনাতি ৰচনেনেৰ ওমদ্দনা. হীতি সচ্চং. ইধাতি ইমস্মিং পৰারণাট্ঠপনট্ঠানে. অনুদ্ধংসিতং পটিজানাতীতি এত্থ পটিজাননাকারং দস্সেন্তো আহ ‘‘অমূলকেন পারাজিকেন অনুদ্ধংসিতো অযং মযা’’তি. ‘‘লিঙ্গনাসনাযা’’তি ইমিনা দণ্ডকম্মনাসনসংৰাসনাসনানি নিৰত্তেতি.

২৩৮. এতন্তি ‘‘অসুকা আপত্তী’’তি ৰচনং. কলহস্স মুখন্তি কলহস্স উপাযো.

১৪৩. ৰত্থুট্ঠপনাদিকথা

২৩৯. চোরা অগমংসু কিরাতি সম্বন্ধো. পোক্খরণিতো নীহরিত্ৰাতি সম্বন্ধো. সোতি ভিক্খু, এৰমাহাতি সম্বন্ধো. ৰুত্থেনাতি ৰসন্তেন, যেন কেনচি কতন্তি সম্বন্ধো. তং পুগ্গলন্তি ৰত্থুকতং তং পুগ্গলং. এত্থাতি ‘‘ৰত্থুং ঠপেত্ৰা সঙ্ঘো পৰারেয্যা’’তি পাঠে. ইমিনা ৰত্থুনা অপদিসাহীতি সম্বন্ধো. নন্তি পুগ্গলং. অনুৰিজ্জিত্ৰাতি অনুযুঞ্জিত্ৰা, পুচ্ছিত্ৰাতি অত্থো.

একো ভিক্খু পূজেসি, পিৰীতি সম্বন্ধো. তস্সাতি ভিক্খুস্স. তদনুরূপোতি তেসং পূজনপিৰনানং অনুরূপো. সোতি চোদকো ভিক্খু. তং গন্ধন্তি তং সরীরগন্ধং. যং পুগ্গলন্তি যোজনা. ঠপেসীতি পৰারণায ঠপেসি. অযমস্সাতি অযং দোসো অস্স পুগ্গলস্স.

ইদানেৰ নন্তি এত্থ ‘‘ন’’ন্তি পদং ‘‘পুগ্গল’’ন্তি পদেন যোজেতব্বং. নং পুগ্গলন্তি হি অত্থো. উভযন্তি ৰত্থুঞ্চ পুগ্গলঞ্চাতি উভযং. কল্লং ৰচনাযাতি যুত্তং কথেতুং. কস্মা কল্লং ৰচনাযাতি যোজনা. পৰারণতো পুব্বে, পচ্ছা চাতি সম্বন্ধো. ইতি তস্মা কল্লং ৰচনাযাতি যোজনা. ইদঞ্হি উভযন্তি ৰত্থুপুগ্গলসঙ্খাতং ইদমেৰ উভযং. পৰারণায পুব্বেতি যোজনা. উক্কোটেন্তস্সাতি চালেন্তস্স.

১৪৪. ভণ্ডনকারকৰত্থুকথা

২৪০. চতুত্থপঞ্চমাতি ছসু পক্খেসু পোট্ঠপাদমাসস্স জুণ্হপক্খকাল়পক্খসঙ্খাতা চতুত্থপঞ্চমা. ততিযোতি সাৰণমাসস্স কাল়পক্খো ততিযো. ততিযচতুত্থপঞ্চমা ৰাতি এত্থ ততিযোতি সাৰণমাসস্স কাল়পক্খো. চতুত্থোতি পোট্ঠপাদমাসস্স জুণ্হপক্খো. পঞ্চমোতি তস্সেৰ কাল়পক্খো. ‘‘ততিয…পে… পঞ্চমা ৰা’’তি পদানি ‘‘দ্ৰে ৰা তযো ৰা’’তি পদেহি যথাক্কমং যোজেতব্বানি. চতুত্থে ৰা কতেতি চতুত্থপক্খে ৰা পন্নরসিভাৰেন কতে. দ্ৰে চাতুদ্দসিকাতি ততিযপক্খে চ চাতুদ্দসিযা সদ্ধিং দ্ৰে চাতুদ্দসিকা. ইমেতি ভণ্ডনকারকা. তেতি ভণ্ডনকারকা.

অসংৰিহিতাতি এত্থ অকারস্স ৰিরহত্থং দস্সেন্তো আহ ‘‘সংৰিদহনৰিরহিতা’’তি. তত্থ সংৰিদহনৰিরহিতাতি সংৰিদহনরক্খৰিরহিতা. আগমনজাননত্থাযাতি ভণ্ডনকারকানং আগমনস্স জাননত্থায. কিলন্তত্থাতি তুম্হে কিলন্তা ভৰথ. ‘‘সম্মোহং কত্ৰা’’তি ইমিনা ৰিক্খিত্ৰাতি পদস্স ৰিক্খেপং কত্ৰাতি অত্থং দস্সেতি. নো চে লভেথাতি এত্থ কিমত্থায ন লভেথাতি আহ ‘‘বহিসীমং গন্তু’’ন্তি. ‘‘ভণ্ডনকারকানং…পে… হোন্তী’’তি ইমিনা অলভনস্স কারণং দস্সেতি. যন্তি আগমং জুণ্হং. কোমুদিযা চাতুমাসিনিযাতি পচ্ছিমকত্তিকপুণ্ণমাযং. সা হি কুমুদানমত্থিতায কোমুদী, চতুন্নং ৰস্সিকানং মাসানং পূরণত্তা চাতুমাসিনীতি ৰুচ্চতি. তদা হি কুমুদানি সুপুপ্ফিতানি হোন্তি, তস্মা কুমুদানং সমূহা, কুমুদানি এৰ ৰা কোমুদা, তে এত্থ অত্থীতি কোমুদীতি ৰুচ্চতি, কুমুদৰতীতি ৰুত্তং হোতি. অৰস্সং পৰারেতব্বন্তি ধুৰং পৰারেতব্বং. হীতি সচ্চং, যস্মা ৰা. তন্তি কোমুদিং চাতুমাসিনিং.

১৪৫. পৰারণাসঙ্গহকথা

২৪১. অঞ্ঞতরো ফাসুৰিহারোতি এত্থ ফাসুৰিহারো নাম কোতি আহ ‘‘তরুণসমথো ৰা তরুণৰিপস্সনা ৰা’’তি. ইমিনা তরুণসমথৰিপস্সনা ফাসুং ৰিহরতি অনেনাতি ফাসুৰিহারোতি দস্সেতি. পরিবাহিরা ভৰিস্সামাতি এত্থ কস্মা ইমম্হা ফাসুৰিহারা পরিবাহিরা ভৰিস্সন্তীতি আহ ‘‘অনিবদ্ধরত্তিট্ঠানদিৰাট্ঠানাদিভাৰেনা’’তিআদি. তত্থ অনিবদ্ধরত্তিট্ঠানদিৰাট্ঠানাদিভাৰেনাতি অনিবদ্ধদিৰাট্ঠানাদিভাৰেন হেতুভূতেন, অসক্কোন্তাতি সম্বন্ধো. আদিসদ্দেন অনিবদ্ধচঙ্কমাদযো সঙ্গণ্হাতি. ‘‘ছন্দদানং পটিক্খিপতী’’তি ইমিনা ‘‘সব্বেহেৰ একজ্ঝং সন্নিপতিতব্ব’’ন্তি ৰাক্যস্স অঞ্ঞত্থাপোহনং দস্সেতি. হীতি সচ্চং, যস্মা ৰা. ইমেসু তীসু ছন্দদানং ন ৰট্টতি, তস্মা পটিক্খিপতীতি যোজনা. অযং পৰারণাসঙ্গহো নাম ন দাতব্বোতি যোজনা. তরুণসমথৰিপস্সনালাভী একপুগ্গলো ৰা হোতূতি যোজনা. ‘‘একস্সপি দাতব্বোযেৰা’’তি ইমিনা অযং পৰারণাসঙ্গহো একস্স দিন্নোপি সব্বেসং দিন্নো হোতীতি দস্সেতি. পৰারণাসঙ্গহে দিন্নে সতীতি যোজনা. আগন্তুকাতি সট্ঠিৰস্সাপি আগন্তুকা. তেসন্তি দিন্নপৰারণাসঙ্গহানং. অন্তরাপীতি কোমুদিযা চাতুমাসিনিযা অন্তরাপি.

ইতি পৰারণাক্খন্ধকৰণ্ণনায যোজনা সমত্তা.