১০৯. সত্তাহকরণীযানুজাননকথা

১৮৭. সত্তাহকরণীযেসু এৰং ৰিনিচ্ছযো ৰেদিতব্বোতি যোজনা. ‘‘সত্তাহকরণীযেনা’’তি পদস্স সত্তমীসমাসঞ্চ অনীযসদ্দস্স কম্মত্থঞ্চ দস্সেন্তো আহ ‘‘সত্তাহব্ভন্তরে যং কত্তব্ব’’ন্তি. তত্থ ‘‘সত্তাহব্ভন্তরে’’তি ইমিনা সত্তমীসমাসং দস্সেতি, ‘‘কত্তব্ব’’ন্তি ইমিনা কম্মত্থং. ‘‘সত্তাহব্ভন্তরে’’তি ইমিনা সত্তাহস্স অব্ভন্তরং সত্তাহন্তি উত্তরপদলোপং দস্সেতি. পহিতে গন্তুন্তি এত্থ পহিতেসদ্দস্স কত্তুকম্মানি দস্সেতুং ৰুত্তং ‘‘ভিক্খুআদীহি দূতে’’তি. তত্থ ‘‘ভিক্খুআদীহী’’তি ইমিনা কত্তারং দস্সেতি, ‘‘দূতে’’তি ইমিনা কম্মং. সত্তাহন্তি এত্থ উত্তরপদলোপঞ্চ ভুম্মত্থে উপযোগৰচনঞ্চ দস্সেন্তো আহ ‘‘অন্তোসত্তাহেযেৰা’’তি. তত্থেৰাতি তস্মিং পহিতট্ঠানেযেৰ. ‘‘ন উট্ঠাপেতব্বো’’তি ইমিনা ‘‘সত্তাহেযেৰা’’তি এত্থ এৰসদ্দস্স ফলং দস্সেতি.

১৮৯. রসো এতস্মিং অত্থীতি রসৰতীতি ৰুত্তে ভত্তগেহং গহেতব্বন্তি আহ ‘‘ভত্তগেহং ৰুচ্চতী’’তি. ভত্তগেহন্তি ভত্তপচনগেহং. পুরাযং সুত্তন্তোতি এত্থ পুরা অযন্তি পদচ্ছেদং কত্ৰা পুরাসদ্দো যাৰপরিযাযোতি আহ ‘‘যাৰ অযং সুত্তন্তো’’তি. ন পলুজ্জতীতি এত্থ লুজধাতু ৰিনাসত্থোতি আহ ‘‘ন ৰিনস্সতী’’তি. পরিসঙ্খতন্তি পরিসঙ্খরিতব্বং. সব্বত্থাতি সব্বেসু পহিতেসু. ইমিনাৰ কপ্পিযৰচনেনাতি ইমিনা এৰ কপ্পিযেন তিৰাক্যসঙ্খাতেন ৰচনেন. এতেসন্তি এতেসং তিণ্ণং ৰাক্যানং. ৰেৰচনেনাতি ‘‘যঞ্ঞঞ্চ যজিতুং, সুত্তঞ্চ উগ্গণ্হিতুং, সমণে চ দস্সিতু’’ন্তি পরিযাযেন. সত্তসূতি উপাসক উপাসিক ভিক্খুভিক্খুনী সিক্খমান সামণের সামণেরী সঙ্খাতাসু সত্তসু.