৩. ৰস্সূপনাযিকক্খন্ধকং

১০৭. ৰস্সূপনাযিকানুজাননকথা

১৮৪. ৰস্সূপনাযিকক্খন্ধকে ‘‘অননুঞ্ঞাতো’’তি ইমিনা অপঞ্ঞত্তোতি এত্থ ঞাধাতুযা অনুজাননত্থং দস্সেতি, ‘‘অসংৰিহিতো’’তি ইমিনা ঞাধাতুযা ঠপনত্থং. তেধাতি তে ইধ. ইধসদ্দো সাসনঞ্চ লোকঞ্চ দেসঞ্চ পদপূরণঞ্চ উপাদায ৰত্ততি, ইধ পন পদপূরণেতি দস্সেন্তো আহ ‘‘ইধসদ্দো নিপাতমত্তো’’তি. সংহননং সঙ্ঘাতো, ৰিনাসোতি অত্থো. ইতি ইমমত্থং দস্সেতি ‘‘ৰিনাস’’ন্তি ইমিনা. সকুন্তকসদ্দো সকুণপরিযাযোতি আহ ‘‘সকুণা’’তি. সকুণাতি চ ৰিহঙ্গমা. তে হি আকাসে গন্তুং সক্কোন্তীতি সকুণাতি ৰুচ্চন্তি. সংকসাযিস্সন্তীতি এত্থ ‘‘সং কসে অচ্ছনে’’তি ধাতুপাঠেসু (সদ্দনীতিধাতুমালাযং ১৬ সকারন্তধাতু) ৰুত্তত্তা সংপুব্বো কসেধাতু অচ্ছনত্থোতি আহ ‘‘ৰসিস্সন্তী’’তি. একারন্তোযং ধাতু. নিবদ্ধৰাসন্তি নিচ্চৰাসং. ৰস্সাননামকেতি ৰস্সানউতুনামকে. ৰস্সানস্স চতুমাসত্তা ‘‘তেমাসে’’তি ৰুত্তং. ৰস্সূপনাযিকাতি এত্থ নীধাতু গমনত্থোতি আহ ‘‘ৰস্সূপগমনানী’’তি. অপরজ্জূতি পুণ্ণমিতো অপরং অহন্তি অপরজ্জু, অহত্থে জ্জুপচ্চযো, অত্থতো পাটিপদদিৰসো. অযং অপরজ্জুসদ্দো পঠমন্তনিপাতো. অস্সাতি আসল়্হীপুণ্ণমিযা. অসমানাধিকরণৰিসযো বাহিরত্থসমাসোযং, অতিক্কন্তায সতিযাতি যোজনা. অপরস্মিং দিৰসেতি পাটিপদদিৰসে. অস্সাতি সাৰণমাসপুণ্ণমিযা. তস্মাতি যস্মা চ অপরজ্জুগতা, যস্মা চ মাসগতা, তস্মা. ‘‘অনন্তরে পাটিপদদিৰসে’’তি ইমিনা পাল়িযং অপরজ্জুগতায আসল়্হিযা অনন্তরে পাটিপদদিৰসে পুরিমিকা উপগন্তব্বাতি অত্থং দস্সেতি. আসল়্হিযাতি আসল়্হীপুণ্ণমিযা. পচ্ছিমনযেপি মাসগতায আসল়্হিযা অনন্তরে পাটিপদদিৰসে পচ্ছিমিকা উপগন্তব্বাতি অত্থো দট্ঠব্বো. আসল়্হিযাতি আসল়্হীপুণ্ণমিযা সমীপে পৰত্তত্তা আসল়্হীসঙ্খাতায সাৰণপুণ্ণমিযাতি অত্থো. পাটিপদদিৰসেযেৰ ৰস্সং উপগন্তব্বন্তি সম্বন্ধো. সকিং ৰাতিআদীসু ৰাসদ্দো অনিযমৰিকপ্পত্থো. নিচ্ছারেত্ৰাতি নিচ্চারেত্ৰা, উচ্চারেত্ৰাতি অত্থো. অফুট্ঠক্খরসঞ্ঞোগেহি পরো ক্ৰচি ফুট্ঠত্তমাপজ্জতি ‘‘নিক্খমতী’’তিআদীসু ৰিয. তস্মা পরস্স চকারস্স ছকারং কত্ৰা ‘‘নিচ্ছারেত্ৰা’’তি ৰুত্তং.

১০৮. ৰস্সানেচারিকাপটিক্খেপাদিকথা

১৮৫. আপত্তি ৰেদিতব্বাতি অনপেক্খগমনেন উপচারাতিক্কমে সাপেক্খগমনেন অঞ্ঞত্থ অরুণুট্ঠাপনে আপত্তি ৰেদিতব্বা. ৰিহারগণনায আপত্তিযো ৰেদিতব্বাতি এত্থ ৰস্সূপনাযিকদিৰসে ৰস্সং অনুপগন্তুকামতাচিত্তেন ৰিহারং অতিক্কমেয্য, ৰিহারগণনায আপত্তিযো ৰেদিতব্বা. তমেৰত্থং ৰিত্থারেন্তো আহ ‘‘সচে হী’’তিআদি. তং দিৰসন্তি তস্মিং ৰস্সূপগমনদিৰসে. সতং আপত্তিযোতি এত্থ সতন্তি সঙ্খ্যাপধানত্তা একৰচনন্তি সদ্দসত্থেসু ৰুত্তং. একা এৰ আপত্তীতি অত্তনো ৰিহারস্স অতিক্কমনেযেৰ একা এৰ আপত্তি. কেনচি অন্তরাযেন অনুপগতেনাতি সম্বন্ধো.

ৰস্সনামো ইমস্সত্থীতি ৰস্সোতি ৰচনত্থং দস্সেন্তো আহ ‘‘ৰস্সনামক’’ন্তি. ‘‘পঠমং মাস’’ন্তি ইমিনা অঞ্ঞপদস্স সরূপং দস্সেতি. পঠমং মাসন্তি চতূসু ৰস্সমাসেসু পঠমং মাসং. উক্কড্ঢিতুকামোতি উপরি কড্ঢিতুকামো. আসল়্হীমাসমেৰ, ন সাৰণমাসন্তি অত্থো. জুণ্হসদ্দো চন্দপভাযুত্তো মাসোতি আহ ‘‘মাসে’’তি. চন্দপভাযুত্তো মাসোতি আহ ‘‘মাসে’’তি. চন্দপভাযুত্তো হি মাসো জোততি দিপ্পতীতি জুণ্হোতি ৰুচ্চতি. তস্মা ‘‘মাসে’’তি সামঞ্ঞতো ৰুত্তেপি পুণ্ণমিযুত্তো মাসোৰ গহেতব্বো. কাচি পরিহানি নামাতি কিঞ্চি সীলাদীনং হাযনং নাম. অঞ্ঞস্মিম্পীতি ৰস্সূপগমনতো অঞ্ঞস্মিম্পি. ধম্মিকেতি ধম্মেন যুত্তে.

১০৯. সত্তাহকরণীযানুজাননকথা

১৮৭. সত্তাহকরণীযেসু এৰং ৰিনিচ্ছযো ৰেদিতব্বোতি যোজনা. ‘‘সত্তাহকরণীযেনা’’তি পদস্স সত্তমীসমাসঞ্চ অনীযসদ্দস্স কম্মত্থঞ্চ দস্সেন্তো আহ ‘‘সত্তাহব্ভন্তরে যং কত্তব্ব’’ন্তি. তত্থ ‘‘সত্তাহব্ভন্তরে’’তি ইমিনা সত্তমীসমাসং দস্সেতি, ‘‘কত্তব্ব’’ন্তি ইমিনা কম্মত্থং. ‘‘সত্তাহব্ভন্তরে’’তি ইমিনা সত্তাহস্স অব্ভন্তরং সত্তাহন্তি উত্তরপদলোপং দস্সেতি. পহিতে গন্তুন্তি এত্থ পহিতেসদ্দস্স কত্তুকম্মানি দস্সেতুং ৰুত্তং ‘‘ভিক্খুআদীহি দূতে’’তি. তত্থ ‘‘ভিক্খুআদীহী’’তি ইমিনা কত্তারং দস্সেতি, ‘‘দূতে’’তি ইমিনা কম্মং. সত্তাহন্তি এত্থ উত্তরপদলোপঞ্চ ভুম্মত্থে উপযোগৰচনঞ্চ দস্সেন্তো আহ ‘‘অন্তোসত্তাহেযেৰা’’তি. তত্থেৰাতি তস্মিং পহিতট্ঠানেযেৰ. ‘‘ন উট্ঠাপেতব্বো’’তি ইমিনা ‘‘সত্তাহেযেৰা’’তি এত্থ এৰসদ্দস্স ফলং দস্সেতি.

১৮৯. রসো এতস্মিং অত্থীতি রসৰতীতি ৰুত্তে ভত্তগেহং গহেতব্বন্তি আহ ‘‘ভত্তগেহং ৰুচ্চতী’’তি. ভত্তগেহন্তি ভত্তপচনগেহং. পুরাযং সুত্তন্তোতি এত্থ পুরা অযন্তি পদচ্ছেদং কত্ৰা পুরাসদ্দো যাৰপরিযাযোতি আহ ‘‘যাৰ অযং সুত্তন্তো’’তি. ন পলুজ্জতীতি এত্থ লুজধাতু ৰিনাসত্থোতি আহ ‘‘ন ৰিনস্সতী’’তি. পরিসঙ্খতন্তি পরিসঙ্খরিতব্বং. সব্বত্থাতি সব্বেসু পহিতেসু. ইমিনাৰ কপ্পিযৰচনেনাতি ইমিনা এৰ কপ্পিযেন তিৰাক্যসঙ্খাতেন ৰচনেন. এতেসন্তি এতেসং তিণ্ণং ৰাক্যানং. ৰেৰচনেনাতি ‘‘যঞ্ঞঞ্চ যজিতুং, সুত্তঞ্চ উগ্গণ্হিতুং, সমণে চ দস্সিতু’’ন্তি পরিযাযেন. সত্তসূতি উপাসক উপাসিক ভিক্খুভিক্খুনী সিক্খমান সামণের সামণেরী সঙ্খাতাসু সত্তসু.

১১০. পঞ্চন্নং অপ্পহিতেপি অনুজাননকথা

১৯৩. পগেৰ পহিতেতি ইমিনা ‘‘অপহিতেপি গন্তব্ব’’ন্তি এত্থ পিসদ্দস্স সম্ভাৰনত্থং দস্সেতি. পঞ্চন্নং সহধম্মিকানং সন্তিকং গন্তব্বভাৰস্স কারণং ৰিভজিত্ৰা দস্সেন্তো আহ ‘‘ভিক্খু গিলানো হোতী’’তিআদি. দসহীতি ‘‘সঙ্ঘো কম্মং কত্তুকামো হোতি, কতং ৰা সঙ্ঘেন কম্মং হোতী’’তি ইদং অঙ্গং একং কত্ৰা দসহি. নৰহীতি পরিৰাসারহং অপনেত্ৰা নৰহি. চতূহীতি গিলানঅনভিরতিকুক্কুচ্চদিট্ঠিগতউপ্পন্নসঙ্খাতেহি চতূহি. ইতি ইমেহি ছহীতি যোজনা. সামণেরস্সপি ছহীতি এত্থ ছন্নং সরূপং ৰিত্থারেত্ৰা দস্সেন্তো আহ ‘‘আদিতো’’তিআদি. তং সুৰিঞ্ঞেয্যমেৰ. সামণেরিযা সন্তিকং পঞ্চহি গন্তব্বন্তি যোজনা. পরতোতি পরস্মা, পরস্মিং ৰা. অন্ধকট্ঠকথাযং ৰুত্তন্তি সম্বন্ধো. যে ঞাতকা ৰা যে অঞ্ঞাতকা ৰা অত্থি, তেসম্পীতি যোজনা. তন্তি ৰচনং.

১১২. পহিতেযেৰঅনুজাননকথা

১৯৯. ভিক্খুগতিকোতি ভিক্খু এৰ গতি পতিট্ঠা এতস্সাতি ভিক্খুগতিকোতি ৰুত্তে ভিক্খুনিস্সিতকো পুরিসোতি আহ ‘‘ভিক্খূহি সদ্ধিং ৰসনকপুরিসো’’তি. পলুজ্জতীতি ৰিনস্সতি. ভণ্ডং ছেদাপিতন্তি এত্থ ভণ্ডসদ্দো পরিক্খারত্থো এৰ, ন মূলধনত্থোতি আহ ‘‘দব্বসম্ভারভণ্ড’’ন্তি. ছেদাপিতন্তি চুরাদিগণিকধাতুং ‘‘ছিন্দাপিত’’ন্তি রুধাদিগণিকধাতুযা ৰণ্ণেতি. দজ্জাহন্তি একারলোপসন্ধীতি আহ ‘‘দজ্জে অহ’’ন্তি. ‘‘দজ্জেহ’’ন্তিপি পাঠো. এৰঞ্হি সতি অকারলোপসন্ধি. দজ্জেতি দদেয্যং, দদামি ৰা. সঙ্ঘকরণীযেনাতি সঙ্ঘস্স কাতব্বেন কিচ্চেন. তমত্থং দস্সেন্তো আহ ‘‘যংকিঞ্চী’’তিআদি. তত্থ যংকিঞ্চি কাতব্বন্তি যোজনা. চেতিযছত্তৰেদিকাদীসূতি চেতিযস্স ছত্তে চ ৰেদিকায চ. আদিসদ্দেন সুধালিম্পাদযো সঙ্গণ্হাতি. তস্সাতি সঙ্ঘকরণীযস্স. নিপ্ফাদনত্থং গন্তব্বন্তি সম্বন্ধো.

এত্থাতি ৰস্সূপনাযিকক্খন্ধকে. ‘‘অনিমন্তিতেনা’’তি পদং ‘‘গন্তু’’ন্তি পদে ভাৰকত্তা. গন্তুন্তি গমিতুং, গমনং ৰা ‘‘ন ৰট্টতী’’তি পদে কত্তা. পঠমংযেৰাতি ধম্মস্সৰনতো পঠমমেৰ. সন্নিপতিতব্বং ইতি কতিকা কতা হোতীতি যোজনা. ভণ্ডকন্তি চীৰরাদিভণ্ডকং. গন্তুং ন ৰট্টতীতি সযমেৰ গন্তুং ন ৰট্টতীতি অত্থো দট্ঠব্বো. তেন ৰুত্তং ‘‘সচে পনা’’তিআদি. তত্থাতি তং ৰিহারং. ‘‘ৰট্টতী’’তি ইমিনা ৰস্সচ্ছেদো চ আপত্তি চ ন হোতীতি দস্সেতি. অত্থাযপীতি পিসদ্দেন ‘‘ভণ্ডকং ধোৰিস্সামী’’তি অত্থং অপেক্খতি. নন্তি অন্তেৰাসিকং. ৰট্টতীতি আচরিযস্স আণায সত্তাহে অনতিক্কন্তে ৰট্টতি, ৰস্সচ্ছেদো চ আপত্তি চ ন হোতি. সত্তাহে অতিক্কন্তে ৰস্সচ্ছেদোৰ হোতি, ন আপত্তীতি অধিপ্পাযো.

১১৩. অন্তরাযে অনাপত্তিৰস্সচ্ছেদকথা

২০১. অৰিদূরেতি আসন্নে. তত্থাতি গামে. সত্তাহৰারেনাতি সত্তাহে একৰারেন. অরুণো উট্ঠাপেতব্বোতি ৰিহারে অরুণো উট্ঠাপেতব্বো. তত্রেৰাতি গামেযেৰ. মযন্তি ভিক্খূ সন্ধায ৰুত্তং. পুন মযন্তি মনুস্সে সন্ধায ৰুত্তং. তেসংযেৰাতি ৰস্সচ্ছেদভিক্খূনং এৰ. তন্তি সলাকভত্তাদিং. ৰস্সগ্গেনাতি ৰস্সগণনায.

ৰস্সাৰাসিকন্তি ৰস্সাৰাসানং দাতব্বং চীৰরং. তত্থাতি তস্মিং ৰিহারে. যেসং পাপিতন্তি সম্বন্ধো. ৰিহারেতি ৰুট্ঠিতগামৰিহারে. উপনিক্খিত্তকং ভণ্ডন্তি সম্বন্ধো. ইধাতি ভিক্খুনো নিৰাসট্ঠানে. যং চীৰরাদিৰেভঙ্গিযভণ্ডং অত্থি, তন্তি যোজনা. তত্থেৰাতি ৰুট্ঠিতগামৰিহারে এৰ. ইতোতি খেত্তৰত্থুআদিতো. কপ্পিযকারকানং হত্থেতি সম্বন্ধো. তত্রুপ্পাদেপীতি তস্স ৰিহারস্স দিন্নখেত্তৰত্থুআদিতো উপ্পাদে পচ্চযেপি. ‘‘তত্থেৰ গন্ত্ৰা অপলোকেত্ৰা ভাজেতব্ব’’ন্তি ৰচনস্স যুত্তিং দস্সেন্তো আহ ‘‘সঙ্ঘিকঞ্হী’’তিআদি. অন্তোৰিহারে ৰাতি অন্তোসীমায ৰা. উভযত্থাতি অন্তোসীমবহিসীম সঙ্খাতেসু দ্ৰীসু ঠানেসু ঠিতং ৰেভঙ্গিযভণ্ডন্তি সম্বন্ধো.

১১৪. সঙ্ঘভেদে অনাপত্তিৰস্সচ্ছেদকথা

২০২. ভিন্নোতি এত্থ তপচ্চযস্স অতীতত্থে অযুত্তভাৰং দস্সেন্তো আহ ‘‘ভিন্নে সঙ্ঘে করণীযং নত্থী’’তি. যো পনাতি সঙ্ঘো পন. ইদং ‘‘ভিজ্জিস্সতী’’তিপদে কত্তা, ‘‘আসঙ্কিতো’’তিপদে কম্মং. ‘‘ভিজ্জিস্সতী’’তি ইমিনা ভিন্নোতি এত্থ তপচ্চযস্স অনাগতত্থে পৰত্তভাৰং দস্সেতি. ভিক্খুনীহি সঙ্ঘো ভিন্নোতি এত্থ কিং ভিক্খুনীহি সঙ্ঘো ভিন্নোতি দট্ঠব্বোতি আহ ‘‘ন ভিক্খুনীহি সঙ্ঘো ভিন্নোতি দট্ঠব্বো’’তি. এতন্তি ভিক্খুনীহি অভিন্নভাৰং. এতা পনাতি ভিক্খুনিযো পন. তন্তি সঙ্ঘং. এতন্তি ‘‘সম্বহুলাহি ভিক্খুনীহি সঙ্ঘো ভিন্নো’’তি ৰচনং.

১১৫. ৰজাদীসু ৰস্সূপগমনকথা

২০৩. ‘‘গোপালকানং নিৰাসট্ঠান’’ন্তি ইমিনা গোপালকা গাৰো ৰিয ৰজে নিৰসন্তীতি দস্সেতি.

উপকট্ঠসদ্দো আসন্নপরিযাযোতি আহ ‘‘আসন্নাযা’’তি. তত্থাতি কুটিকাযং. ইধাতি ইমিস্সং কুটিকাযং. অৰিহারত্তা ‘‘ইধাতি’’সামঞ্ঞৰসেন ৰুত্তং. তিক্খত্তুন্তি ইদং উক্কট্ঠৰসেন ৰুত্তং. হেট্ঠা হি ‘‘সকিং ৰা দ্ৰিক্খত্তুং ৰা তিক্খত্তুং ৰা’’তি (মহাৰ. অট্ঠ. ১৮৪) ৰুত্তত্তা সকিম্পি ৰট্টতীতি দট্ঠব্বং. তম্পীতি সালাসঙ্খেপেন ঠিতসকটম্পি. ‘‘আলযো’’তি ইমিনা ‘‘ইধ ৰস্সং উপেমী’’তি ৰচীভেদো ন কাতব্বোতি দস্সেতি. আলযোতি চ সত্থে ‘‘ইধ ৰস্সং ৰসিস্সামী’’তি চিত্তস্স অল্লীযনং. মগ্গপটিপন্নেযেৰ সত্থেতি অনাদরে ভুম্মৰচনং. তত্থেৰাতি সত্থেযেৰ. সত্থো অতিক্কমতীতি সম্বন্ধো. তত্থাতি পত্থিতট্ঠানে. ৰিপ্পকিরতীতি ৰিসুং ৰিসুং গচ্ছতি. সচে অগামকে ঠানে ৰিপ্পকিরতি, পুরিমং গামং সন্নিৰত্তিতব্বং. ন অঞ্ঞগামং গন্তব্বং. ততোতি গামতো.

উপগন্তব্বন্তি ‘‘ইধ ৰস্সং উপেমী’’তি তিক্খত্তুং ৰত্ৰা উপগন্তব্বং. তত্থেৰাতি সমুদ্দেযেৰ. কূলন্তি তীরং. তঞ্হি কুলতি উদকং আৰরতীতি কূলন্তি ৰুচ্চতি. অযঞ্চাতি নাৰাযং ৰস্সূপগমনভিক্খু. অনুতীরমেৰাতি অনুক্কমেন, অনুসারেন ৰা তীরমেৰ. অঞ্ঞত্থাতি পঠমলদ্ধগামতো অঞ্ঞস্মিং ঠানে. তত্থেৰাতি পঠমলদ্ধগামেযেৰ.

ইতীতিআদি নিগমনং. পৰারেতুঞ্চ লভতীতি এত্থ চসদ্দো ৰাক্যসম্পিণ্ডনত্থো. পুরিমেসু চ পনাতি এত্থ চসদ্দো ব্যতিরেকত্থো, পনসদ্দো ৰিসেসত্থজোতকো. অনাপত্তি হোতীতি অনাপত্তিমত্তমেৰ হোতি.

১১৬. ৰস্সং অনুপগন্তব্বট্ঠানকথা

২০৪. রুক্খসুসীরেযেৰাতি রুক্খস্স ৰিৰরে এৰ. ৰিৰরঞ্হি সু সং ইরতি গচ্ছতীতি সুসীরোতি ৰুচ্চতি. পদরচ্ছদনন্তি ফলকেহি ছাদিতং. পৰিসনদ্ৰারন্তি পৰিসননিক্খমনদ্ৰারং. পৰিসনঞ্চ নিক্খমনঞ্চ পৰিসনন্তি ৰিরূপেকসেসেন কাতব্বং. খাণুমত্থকেতি খাণুনো উপরি. ৰিটভীতি ৰিটং অঞ্ঞমঞ্ঞৰেধনং অপতি গচ্ছতীতি ৰিটপো, পকারস্স ভকারং, ইত্থিলিঙ্গজোতকঈপচ্চযঞ্চ কত্ৰা ৰিটভীতি ৰুচ্চতি. তত্থাতি অট্টকে. যস্সাতি ভিক্খুনো, নত্থীতি সম্বন্ধো. পঞ্চন্নং ছদনানন্তি তিণপণ্ণইট্ঠকাসিলাসুধাসঙ্খাতানং (চূল়ৰ. ৩০৩) পঞ্চন্নং ছদনানং. ইদঞ্চ যেভুয্যৰসেন ৰুত্তং পদরচ্ছদনাদীনম্পি গহিতত্তা. দ্ৰারবন্ধনন্তি দ্ৰারেন বন্ধিতব্বং. ছৰকুটিকাতি ছৰানং সযনট্ঠানে সুসানে কতা কুটিকা ছৰকুটিকাতি ৰুচ্চতি. টঙ্কিতমঞ্চাদীতিআদিসদ্দেন টঙ্কিতপীঠং সঙ্গণ্হাতি. তত্থাতি ছৰকুটিযং. অঞ্ঞং কুটিকন্তি ছৰকুটিতো অঞ্ঞং কুটিকং. আৰরণন্তি ভিত্তিং. দ্ৰারন্তি পৰিসননিক্খমনদ্ৰারং. ছত্তকুটিকা নামেসাতি এসা ছত্তেন কতা কুটিকা নাম. মহন্তেন কপল্লেন কুটিকং কত্ৰাতি সম্বন্ধো.

১১৭. অধম্মিককতিকাকথা

২০৫. অঞ্ঞাপীতি ‘‘অন্তরাৰস্সং ন পব্বাজেতব্ব’’ন্তি কতিকায অঞ্ঞাপি. কতিকা হোতীতি সম্বন্ধো. তস্সাতি অধম্মিককতিকায. ৰুত্তন্তি চতুত্থপারাজিকৰণ্ণনাযং (পারা. অট্ঠ. ২.২২৬) ৰুত্তং.

১১৮. পটিস্সৰদুক্কটাপত্তিকথা

২০৭. পটিস্সৰে আপত্তি দুক্কটস্সাতি এত্থ কিং ৰস্সাৰাসপটিস্সুতেযেৰ দুক্কটাপত্তি হোতীতি আহ ‘‘ন কেৰল’’ন্তিআদি. এতস্সেৰাতি ৰস্সাৰাসস্সেৰ. এৰমাদিনাপীতি পিসদ্দো ‘‘পটিস্সৰে’’তি এত্থ যোজেতব্বো. ‘‘পটিস্সৰেপী’’তি হি অত্থো. তস্স তস্সাতি কম্মস্স. তঞ্চ খোতি তঞ্চ দুক্কটং ৰিসংৰাদনপচ্চযা হোতীতি যোজনা. পঠমম্পীতি পিসদ্দো ‘‘পচ্ছাপী’’তি পদং সম্পিণ্ডেতি. পঠমম্পি হি পাচিত্তিযং, পচ্ছাপি দুক্কটন্তি অত্থো.

সো তদহেৰ অকরণীযোতিআদীসু এৰং ৰিনিচ্ছযো ৰেদিতব্বোতি যোজনা. পুরিমিকা চ ন পঞ্ঞাযতীতি এত্থ পুরে ভৰা পুরিমা, সা এৰ পুরিমিকা, পাটিপদতিথী. নানাসীমায দ্ৰীসু আৰাসেসু ৰস্সং উপগচ্ছন্তস্স দুতিযে ‘‘ৰসিস্সামী’’তি পঠমাৰাসস্স উপচারতো নিক্খন্তমত্তে পঠমসেনাসনগ্গাহস্স পস্সম্ভনং সন্ধায ৰুত্তং ‘‘পুরিমিকা চ ন পঞ্ঞাযতী’’তি. অরুণং অনুট্ঠাপেত্ৰাতি ৰস্সং উপগমনৰিহারে অরুণং অনুট্ঠাপেত্ৰা. তদহেৰাতি তস্মিং ৰস্সূপগমনঅহনি এৰ, পক্কন্তস্সাপীতি সম্বন্ধো. পিসদ্দস্স গরহত্থং দস্সেন্তো আহ ‘‘কো পন ৰাদো’’তিআদি. আলযোতি চিত্তস্স অল্লীযনং. অসতিযাতি সতিপমুট্ঠেন. ৰস্সং ন উপেতীতি ‘‘ইমস্মিং ৰিহারে ইমং তেমাসং ৰস্সং উপেমী’’তি (মহাৰ. অট্ঠ. ১৮৪) ৰচীভেদং কত্ৰা ৰস্সং ন উপেতি.

সত্তাহন্তি সত্তাহেন, অনাগতাযাতি সম্বন্ধো. নৰমিতোতি পুব্বকত্তিকমাসস্স জুণ্হপক্খনৰমিতো, পচ্ছিমকত্তিকমাসস্স জুণ্হপক্খনৰমিতো ৰা. মা ৰা আগচ্ছতু, অনাপত্তীতি ৰস্সংৰুত্থত্তা মা ৰা আগচ্ছতু, অনাপত্তীতি অত্থো.

ইতি ৰস্সূপনাযিকক্খন্ধকৰণ্ণনায যোজনা সমত্তা.