৮৭. পারিসুদ্ধিদানকথা

১৬৪. যেন কেনচি অঙ্গপচ্চঙ্গেন ৰিঞ্ঞাপেতীতি পটিৰচনং নিচ্ছারেতুমসক্কোন্তো যেন কেনচি অঙ্গপচ্চঙ্গেন ৰিঞ্ঞাপেতি. উভযথাতি উভযেহি কাযৰাচাসঙ্খাতেহি আকারেহি. কাযৰাচাহি ৰিঞ্ঞাপেতীতি সম্বন্ধো. সব্বেতি অখিলা গিলানা. হত্থপাসেতি সঙ্ঘস্স হত্থপাসম্হি. সচে দূরে হোন্তীতি সচে বহূ গিলানা অঞ্ঞমঞ্ঞং দূরে হোন্তি. তং দিৰসন্তি তস্মিং সঙ্ঘঅপ্পহোনকদিৰসে.

তত্থেৰ পক্কমতীতি এত্থ নিস্সক্কত্থে থপচ্চযোতি আহ ‘‘ততোৰা’’তি, পারিসুদ্ধিহারট্ঠানতো এৰাতি অত্থো. ‘‘গচ্ছতী’’তি ইমিনা কমুধাতুযা পদৰিক্খেপত্থং দস্সেতি, ‘‘কত্থচী’’তি ইমিনা তস্স কম্মং. সামণেরো পটিজানাতীতিআদীসু পটিজাননাকারত্থস্স ইতিসদ্দস্স লোপভাৰং দস্সেন্তো আহ ‘‘সামণেরো অহ’’ন্তি এৰং পটিজানাতী’’তিআদি. ভূতংযেৰাতি ৰিজ্জমানংযেৰ. সব্বত্থাতি সব্বেসু ‘‘সিক্খং পচ্চক্খাতকো পটিজানাতী’’তিআদীসু.

সব্বন্তিমেন পরিচ্ছেদেন চতুন্নং ভিক্খূনন্তি সম্বন্ধো. সব্বত্থাতি সব্বেসু ‘‘সঙ্ঘপ্পত্তো ৰিব্ভমতী’’তিআদীসু. এত্থাতি পারিসুদ্ধিহরণে. বহূনম্পীতি এত্থ পিসদ্দেন একেন একস্সাপি, বহূহি একস্সাপি, বহূহি বহূনম্পি আহটা পারিসুদ্ধি আহটাৰ হোতীতি দস্সেতি. সোতি পারিসুদ্ধিহারকো ভিক্খু. যেসন্তি ভিক্খূনং. তস্সেৰাতি পারিসুদ্ধিহারকস্সেৰ. ইতরা পনাতি ইতরেসং পারিসুদ্ধি পন. বিল়ালসঙ্খলিকাতি এত্থ বিল়ালোতি আখুভুজো. সো হি বিল়াসযং আখুং গণ্হিতুং অলতি সমত্থেতীতি বিল়ালোতি ৰুচ্চতি. সঙ্খলিকাতি এতং সত্তানং বন্ধনূপকরণৰিসেসস্স নামং. বিল়ালস্স সঙ্খলিকা তেন সম্বন্ধসম্বন্ধিভাৰেন সম্বন্ধত্তাতি বিল়ালসঙ্খলিকা. ইদং উপলক্খণমত্তং যেসং কেসঞ্চি সঙ্খলিকায গহেতব্বত্তা. তায সদিসা বিল়ালসঙ্খলিকা পারিসুদ্ধীতি অত্থো. ইদং পনেত্থ ওপম্মসংসন্দনং – যথা সঙ্খলিকায পঠমং ৰলযং দুতিযংযেৰ ৰলযং পাপুণাতি, ন ততিযং, এৰমেৰ পঠমং দিন্না পারিসুদ্ধি দুতিযমেৰ পাপুণাতি, ন ততিযন্তি.

আগন্ত্ৰাতি সঙ্ঘস্স হত্থপাসং আগন্ত্ৰা. পাল়িযং সুত্তো ন আরোচেতীতিআদীসু হেত্ৰত্থে পচ্চত্তৰচনং. সুত্তেন নারোচেতীতি হি অত্থো. পারিসুদ্ধিহারকস্স অনাপত্তীতি এত্থ আপত্তীতি অন্ৰযত্থং অত্থাপত্তিতো দস্সেন্তো আহ ‘‘সচে…পে… আপজ্জতী’’তি. অস্সাতি ভিক্খুস্স. উভিন্নম্পীতি পারিসুদ্ধিদাযকস্স, তংহারকস্স চাতি উভিন্নম্পি.