৮৪. পক্খগণনাদিউগ্গহণানুজাননকথা

১৫৬. কতিনং পূরণীতি কতিনং তিথীনং পূরণী. কো দিৰসোতি কিত্তকো দিৰসো. অয্যাযত্তন্তি অয্যেহি ভিক্খূহি আযত্তং আবদ্ধং. সংহরিত্ৰাতি পুন সলাকং সংহরিত্ৰা. অযং পাঠো কেসুচি অট্ঠকথাপোত্থকেসু নত্থি. কালৰতোতি এত্থ ৰন্তুপচ্চযো স্ৰত্থোতি আহ ‘‘কালস্সেৰা’’তি. এৰসদ্দো পন সম্ভৰতো যুজ্জিযতি. পগেৰাতি পাতোৰ.

১৫৮. সাযম্পীতি সাযন্হেপি. পিসদ্দেন অঞ্ঞম্পি সরণকালং সম্পিণ্ডেতি.

১৫৯. আণাপেতুন্তি এত্থ অনাণাপেতব্বভিক্খূ অপনেত্ৰা আণাপেতব্বভিক্খূ দস্সেতুং ৰুত্তং ‘‘কিঞ্চি কম্ম’’ন্তিআদি. সদাকালমেৰ কিঞ্চি কম্মং করোন্তোতি যোজনা. ধম্মকথিকাদীসূতিআদিসদ্দেন গণৰাচকাদযো সঙ্গণ্হাতি. ৰারেনাতি পরিযাযেন. সম্মুঞ্চনিন্তি যট্ঠিসম্মুঞ্চনিং ৰা মুট্ঠিসম্মুঞ্চনিং ৰা. সমং, সুট্ঠু ৰা মুঞ্চতি সোধেতি ইমাযাতি সম্মুঞ্চনী, তালুজো পঠমো. তম্পীতি সাখাভঙ্গম্পি.

১৬০. ৰুত্তনযেনেৰাতি সম্মজ্জনে ৰুত্তনযেনেৰ. পুন আহরিতব্বানীতি সঙ্ঘিকাৰাসং আসনানি পুন আহরিতব্বানি. তট্টিকাযোপীতি ৰেণুআদিমযা তট্টিকাযোপি.

১৬১. কপল্লিকা ৰাতি কপালেসু পরিযাপন্না পদীপকপালা ৰা. তন্তি তেলাদিং. পরিযেসিতব্বানীতি অনৰজ্জপরিযেসনেন পরিযেসিতব্বানি.