১০১. লিঙ্গাদিদস্সনকথা

১৭৯. ‘‘আৰাসিকানং আকার’’ন্তি ইমিনা আৰাসিকাকারন্তি পদস্স ছট্ঠীসমাসং দস্সেতি. সব্বত্থাতি সব্বেসু ‘‘আৰাসিকলিঙ্গ’’ন্তিআদীসু. যেনাতি সুপঞ্ঞত্তমঞ্চপীঠাদিনা, গণ্হতীতি সম্বন্ধো. তেসন্তি আৰাসিকানং. আচারসণ্ঠানন্তি আচারসণ্ঠিতিং. সো সুপঞ্ঞত্তমঞ্চপীঠাদিকো আকারো নামাতি যোজনা. যন্তি সুপঞ্ঞত্তমঞ্চপীঠাদিং, গমযতীতি সম্বন্ধো. তত্থ তত্থাতি তস্মিং তস্মিং ঠানে. লীনে আৰাসিকেতি সম্বন্ধো. তং সুপঞ্ঞত্তমঞ্চপীঠাদি লিঙ্গং নামাতি যোজনা. ‘‘অদিস্সমানে’’তি ইমিনা লীনেতি পদস্স অত্থং দস্সেতি. ‘‘জানাপেতী’’তি ইমিনা গমযতীতি পদস্স ঞাণত্থং দস্সেতি. যন্তি সুপঞ্ঞত্তমঞ্চপীঠাদিং. তেতি আৰাসিকা. তং সুপঞ্ঞত্তমঞ্চপীঠাদি নিমিত্তং নামাতি যোজনা. যেনাতি সুপঞ্ঞত্তমঞ্চপীঠাদিনা. তেতি আৰাসিকা উদ্দিসিযন্তি, সো সুপঞ্ঞত্তমঞ্চপীঠাদিকো উদ্দেসো নামাতি যোজনা. ইমেহি পদেহি আকিরিযন্তি পকাসিযন্তি এতেনাতি আকারো, লীনে গমযতি বোধেতীতি লিঙ্গং. নিমিযন্তি পরিচ্ছিজ্জ ঞাযন্তি এতেনাতি নিমিত্তং, উদ্দিসিযন্তি অপদিসিযন্তি এতেনাতি উদ্দেসোতি ৰচনত্থং দস্সেতি. সব্বমেতন্তি ‘‘আৰাসিকাকার’’ন্তিআদি এতং সব্বং. যথাযোগন্তি পাল়িযং যোগানুরূপং. তত্থাতি আগন্তুকাকারাদীসু. ‘‘অম্হাকং ইদ’’ন্তি ন ঞাতব্বন্তি অঞ্ঞাতং, তদেৰ অঞ্ঞাতকং, নিসীদনাদি. ‘‘অম্হাকং ইদ’’ন্তি অজাননং নাম অত্তনো অসন্তকত্তা, অঞ্ঞেসমেৰ সন্তকত্তা হোতীতি আহ ‘‘অঞ্ঞেসং সন্তক’’ন্তি. উদকনিস্সেকন্তি সিঞ্চনৰিরহিতং উদকং. বহুৰচনস্সাতি ‘‘ধোতান’’ন্তি এত্থ ছট্ঠীবহুৰচনস্স. একৰচনন্তি ‘‘ধোতস্সা’’তি একৰচনং. পচ্ছিমপাঠে মলং ধুনাতি অনেনাতি ধোতং, ধোতঞ্চ তং উদকঞ্চেতি ধোতউদকং, তমেৰ নিস্সেকং ধোতউদকনিস্সেকং.

১৮০. সমানসংৰাসকদিট্ঠিন্তি পদস্স ইতিলোপসমাসং দস্সেন্তো আহ ‘‘সমানসংৰাসকা এতেতি দিট্ঠি’’ন্তি. এতেতি আৰাসিকা ভিক্খূ. ‘‘লদ্ধি’’ন্তি ইমিনা ন পুচ্ছন্তীতি পদস্স কম্মং দস্সেতি. নানাসংৰাসকভাৰন্তি তেসং লদ্ধিনানাসংৰাসকভাৰং. ‘‘মদ্দিতু’’ন্তি ইমিনা নাভিৰিতরন্তীতি এত্থ অভিসদ্দস্সত্থং দস্সেতি. ‘‘অভিভৰিতু’’ন্তি ইমিনা চ তদেৰত্থং দস্সেতি. নানাসংৰাসকভাৰস্স মদ্দনং নাম লদ্ধিনিস্সজ্জাপনন্তি আহ ‘‘তং দিট্ঠিং ন নিস্সজ্জাপেন্তী’’তি.