৬৪. চত্তারোনিস্সযাদিকথা

১২৮. উপসম্পন্নসমনন্তরমেৰাতি উপসম্পন্নো হুত্ৰা সমনন্তরমেৰ, ন কালন্তরেতি অত্থো. একপোরিসাতি এত্থ পোরিসসদ্দো উপরি ৰিত্থতে ভুজপমাণে চ পোসপমাণে চ ৰত্ততি. পুরিসস্স পমাণা পোরিসা, পমাণত্থে ণপচ্চযো. ছাযাতি আতপাভাৰো. মেতব্বাতি পমেতব্বা. ‘‘ৰস্সানো’’তিআদি ‘‘উতুপমাণং আচিক্খিতব্ব’’ন্তি এত্থ আচিক্খণাকারদস্সনং. উতুনো পমাণন্তি অত্থং নিৰারেন্তো আহ ‘‘এত্থ চা’’তিআদি. অরতি পুনপ্পুনং গচ্ছতীতি উতু, পমিযতি সংৰচ্ছরো পরিচ্ছিজ্জিযতি অনেনাতি পমাণং. যত্তকেহি দিৰসেহি অপরিপুণ্ণোতি সম্বন্ধো. যস্সাতি দিৰসভাগস্স. যো উতু অপরিপুণ্ণো, তস্স উতুনোতি পাঠসেসো যোজেতব্বো. ‘‘উতুপমাণং আচিক্খিতব্বং, দিৰসভাগো আচিক্খিতব্বো’’তি পদানং অপরম্পি অত্থৰিকপ্পং দস্সেন্তো আহ ‘‘অথ ৰা’’তিআদি. তত্থ অযং নাম উতূতি অযং উতু ৰস্সানো নামাতি ৰা হেমন্তো নামাতি ৰা গিম্হো নামাতি ৰা. পুব্বন্হোতি অহস্স পুব্বো পুব্বন্হো. তত্থ পচ্ছিমনযোৰ পাসংসতরো. কস্মা? পুরিমনযে উতুপরিপুণ্ণে দিৰসভাগাচিক্খণস্স অভাৰা, পচ্ছিমনযে পন পরিপুণ্ণং ৰা অপরিপুণ্ণং ৰা উতুপমাণং আচিক্খিতব্বং. উপসম্পন্নদিৰসভাগোৰ ‘‘পুব্বন্হো’’তি ৰা ‘‘সাযন্হো’’তি ৰা আচিক্খিতব্বো. সংগীতীতি এত্থ সং একতো কত্ৰা গাযিতব্বা কথেতব্বাতি সংগীতীতি ৰচনত্থং দস্সেন্তো আহ ‘‘ইদমেৰ সব্বং একতো কত্ৰা’’তিআদি. তত্থ কিন্তি কিং উতুং. ইদং নামাতি ইদং নাম উতুং. ৰদেয্যাসীতি আগন্তুকানং ৰুড্ঢনৰকভাৰাদিঞাপনত্থং কথেয্যাসি.

১২৯. দুতিযন্তি সহাযং ভিক্খুং ৰা সামণেরং ৰা পুরিসং ৰা. অকরণীযানীতি উপসম্পন্নেহি অকত্তব্বানি. পণ্ডুপলাসোতি এত্থ পণ্ডূতি সেতপীতমিস্সো ৰণ্ণো, পলাসসদ্দো পণ্ণৰাচকো, ন হরিতৰাচকো, নাপি কিংসুকদুমৰাচকোতি দস্সেন্তো আহ ‘‘পণ্ডুৰণ্ণো পণ্ণো’’তি. পণ্ডুপলাসোতি সমাসোপি ব্যাসোপি যুত্তোযেৰ. সমাসকালে পণ্ডু যস্সত্থীতি পণ্ডু, সোযেৰ পলাসো পণ্ডুপলাসোতি কাতব্বো. পুপ্ফফলাদিং বন্ধতীতি বন্ধনন্তি ৰচনত্থেন বন্ধনসদ্দো ৰণ্টপরিযাযোতি আহ ‘‘ৰণ্টতো’’তি. পুথুসিলাতি (ম. নি. অট্ঠ. ৩.৬০) এত্থ পুথুসদ্দো মহন্তপরিযাযোতি আহ ‘‘মহাসিলা’’তি.

১৩০. তস্সাতি উক্খেপনীযকম্মারহস্স ভিক্খুনো. সামগ্গীতি সঙ্ঘসামগ্গী. তেনাতি উক্খেপনীযকম্মারহেন ভিক্খুনা. সম্ভোগেতি আমিসেন চ ধম্মেন চ সম্ভোগহেতু. এত্থ সহসেয্যাপি সঙ্গহিতা আপত্তিভাৰতো. অনাপত্তীতি অনুক্খিত্তকভাৰতো পাচিত্তিযাপত্তিযা অনাপত্তি, অলজ্জিলক্খণাভাৰতো দুক্কটেন অনাপত্তীতি দট্ঠব্বং.

ইতি সমন্তপাসাদিকায ৰিনযসংৰণ্ণনায

দ্ৰাসত্ততিঅধিকৰত্থুসতপটিমণ্ডিতস্স মহাখন্ধকস্স

অত্থৰণ্ণনায যোজনা সমত্তা.