৪৯. তিরচ্ছানগতৰত্থু

১১১. দেৰসম্পত্তিসদিসং ইস্সরিযসম্পত্তিং অনুভৰন্তোপি সো নাগো কস্মা নাগযোনিযা অট্টীযতীতি আহ ‘‘কিঞ্চাপী’’তিআদি.

তত্থ কিঞ্চাপি অনুভোতীতি সম্বন্ধো. কিঞ্চাপিসদ্দো হেত্থ সম্ভাৰনাজোতকো, পনসদ্দো গরহত্থজোতকো. কুসলৰিপাকেনাতি অহেতুককুসলৰিপাকেন. তস্সাতি নাগস্স. সজাতিযাতি সমানজাতিযা নাগিযা. উদকসঞ্চারিমণ্ডূকভক্খন্তি উদকে সঞ্চরণসীলং মণ্ডূকসঙ্খাতং ভক্খং পাতুভৰতীতি যোজনা. সোতি নাগো. অট্টীযতীতি অরমণং পীল়িযতি. হরাযতীতি এত্থ হরেধাতু লজ্জনত্থোতি আহ ‘‘লজ্জতী’’তি. একারন্তো ধাতু ভূৰাদিগণিকো (সদ্দনীতিধাতুমালাযং ১৬ রকারন্তধাতু). জিগুচ্ছতীতি এত্থ গুপধাতুযা কম্মং দস্সেন্তো আহ ‘‘অত্তভাৰ’’ন্তি. ‘‘তস্স ভিক্খুনো’’তিপদস্স ‘‘নিক্খন্তে’’তিপদেন যোজিতব্বত্তা ভুম্মত্থে সামিৰচনন্তি আহ ‘‘তস্মিং ভিক্খুস্মি’’ন্তি. অথ ৰা তস্স ভিক্খুনোতি সামিযোগত্তা ‘‘নিক্খন্তে’’তি এত্থ ভাৰত্থে মানপচ্চযোতি আহ ‘‘নিক্খমনে’’তি. ইমিনা নিক্খন্তেতি এত্থ ন অন্তপচ্চযো, মানপচ্চযস্সেৰ অন্তভাৰং কত্ৰা ৰুত্তোতি দস্সেতি. ৰিস্সট্ঠোতি সতিৰিস্সজ্জিতো. তস্মিন্তি ভিক্খুম্হি. কপিমিদ্ধৰসেনেৰাতি কপিনো মিদ্ধৰসেন এৰ. অথ ৰা কপিমিদ্ধৰসেন নিদ্দাযন্তো ইৰ নিদ্দাযন্তোতি যোজনা. পটিনিপজ্জীতি পুন নিপজ্জি. ৰিস্সরমকাসীতি এত্থ ৰিসদ্দো ৰিরূপত্থজোতকো, সরসদ্দো সদ্দৰাচকোতি দস্সেন্তো আহ ‘‘ৰিরূপং মহাসদ্দমকাসী’’তি.

‘‘অকারস্স লোপং কত্ৰা’’তি ইমিনা তুম্হে খোত্থাতি এত্থ ‘‘তুম্হে খো অত্থা’’তি পদৰিভাগং কত্ৰা ওকারতো পরস্স অকারস্স লোপং দস্সেতি. ‘‘অকারস্সালোপ’’ন্তিপি পাঠো. এৰঞ্হি সতি অকারস্স অলোপং কত্ৰাতি অত্থো দট্ঠব্বো. ইমিনা ‘‘তুম্হে খো অত্থা’’তি পদচ্ছেদং কত্ৰা অকারে পরে ওকারস্স ৰকারং কত্ৰা তুম্হে খ্ৰত্থা’’তি পাঠো দস্সিতো. কস্মা ইমস্মিং ধম্মৰিনযে অৰিরূল়্হিধম্মাতি আহ ‘‘ঝান…পে… অভব্বত্তা’’তি. ‘‘ভৰথা’’তি ইমিনা অত্থাতি এত্থ অসধাতু সত্তত্থৰাচকো থৰিভত্তীতি দস্সেতি. সজাতিযাতি এত্থ সমানা জাতি এতিস্সাতি সজাতীতি ৰুত্তে নাগী এৰাতি আহ ‘‘নাগিযা এৰা’’তি. মনুস্সিত্থিআদীতি এত্থ আদিসদ্দেন তিরচ্ছানগতিত্থীপেতিত্থীদেৰিত্থিযো সঙ্গণ্হাতি. ‘‘দ্ৰেমে ভিক্খৰে পচ্চযা’’তি দেসনা সাৰসেসদেসনাতি দস্সেন্তো আহ ‘‘এত্থ চা’’তি. এত্থাতি তিরচ্ছানগতৰত্থুম্হি. অভিণ্হন্তি অভিক্খণং পুনপ্পুনন্তি অত্থো.

তিরচ্ছানগতোতি এত্থ কিং অপাযপরিযাপন্নো দুগ্গতিঅহেতুকপটিসন্ধিকোৰাধিপ্পেতোতি আহ ‘‘নাগো ৰা হোতূ’’তিআদি.