৪৮. তিত্থিযপক্কন্তককথা

১১০. পক্কমতীতি পক্কন্তো, ‘‘পৰিট্ঠো’’তি ইমিনা কমুধাতুযা পদৰিক্খেপত্থং দস্সেতি, ইচ্ছাকন্তিঅত্থে নিৰত্তেতি. সোতি তিত্থিযপক্কন্তকো. তত্রাতি তিত্থিযপক্কন্তকে. উপসম্পন্নো ভিক্খু গচ্ছতীতি সম্বন্ধো. তেসন্তি তিত্থিযানং. ‘‘তিত্থিযো ভৰিস্সামী’’তি পুব্বেৰ লদ্ধিগহিতত্তা ৰুত্তং ‘‘লিঙ্গে আদিন্নমত্তে’’তি. কুসচীরাদীনীতি এত্থ কুসো ৰুচ্চতি সলাকা. চীরোতি পন্তি, আৰলীতি অত্থো. কুসে রজ্জুনা আৰুনিত্ৰা কতো চীরো কুসচীরো, সো আদি যেসং তানীতি কুসচীরাদীনি. আদিসদ্দেন ফলকচীরাদযো সঙ্গণ্হাতি. কুসতিণেহি কতো চীরো কুসচীরোতিপি ৰদন্তি. নগ্গোতি অচেলকো. আজীৰকোতি অচেলকৰতমাদায জীৰতীতি আজীৰকো. তেসন্তি আজীৰকানং. ওৰদিতো হুত্ৰাতি সম্বন্ধো.

কিন্তি কিং ৰতং. লুঞ্চাপেতীতি অপনযাপেতি. মোরপিঞ্ছাদীনীতি এত্থ পিঞ্ছং ৰুচ্চতি পক্খো. সো হি পিঞ্ছতি আকাসে গচ্ছতি অনেনাতি পিঞ্ছন্তি ৰুচ্চতি. পিছি গতিযন্তি ধাতুপাঠো. মোরস্স পিঞ্ছং মোরপিঞ্ছং, তং আদি যেসং তানীতি মোরপিঞ্ছাদীনি. আদিসদ্দেন উলূকপিঞ্ছাদযো সঙ্গণ্হাতি. যাৰ ন সম্পটিচ্ছতীতি যাৰ লদ্ধিং ন সম্পটিচ্ছতি. নন্তি ৰীমংসমানং ভিক্খুং. লদ্ধীতি তিত্থিযলদ্ধি. রক্খতীতি তিত্থিযপক্কন্তকতো রক্খতি. লদ্ধিযা অভাৰেন তিত্থিযপক্কন্তকো ন হোতীতি অধিপ্পাযো. অচ্ছিদ্দচীৰরোতি এত্থ আকারো কোধত্থো, অড্ডত্থো ৰা হোতি, ছিদ্দসদ্দো দূসনত্থো হোতি. তস্মা আকোধেন অড্ডেন ৰা ছিদ্দো দূসিতোতি অচ্ছিদ্দোতি অত্থো দট্ঠব্বো. ‘‘অচ্ছিন্নো’’তিপি পাঠো. অচ্ছিদ্দং চীৰরমেতস্সাতি অচ্ছিদ্দচীৰরো. তিত্থাযতনন্তি তিত্থীনং নিৰাসট্ঠানং, তিত্থিযানং উপস্সযন্তি অত্থো.