৪৮. থেয্যসংৰাসকৰত্থুকথা

১১০. পারিজঞ্ঞপত্তস্সাতি পরিহাযতীতি পরিজানি, ইস্সরিযভোগাদি, তস্স ভাৰো পারিজঞ্ঞং, ইস্সরিযভোগাদিক্খযো, তং পত্তোতি পারিজঞ্ঞপত্তো, তস্স. ‘‘পারিজুঞ্ঞপত্তস্সা’’তিপি উকারেন সহ পাঠো অত্থি. খীণকোলঞ্ঞোতি এত্থ কুলে জাতা কোলঞ্ঞা, ণ্যপচ্চযো, নকারাগমো. খীণা কোলঞ্ঞা অস্সাতি খীণকোলঞ্ঞোতি ৰচনত্থং দস্সেন্তো আহ ‘‘মাতিপক্খপিতিপক্খতো’’তিআদি. তত্থ মাতিপক্খপিতিপক্খতোতি মাতুযা পক্খো মাতিপক্খো, পিতুনো পক্খো পিতিপক্খো, মাতিপক্খো চ পিতিপক্খো চ মাতিপক্খপিতিপক্খা. ফাতিং কাতুন্তি এত্থ ফা-ধাতু ৰড্ঢনত্থোতি আহ ‘‘ৰড্ঢেতু’’ন্তি. ‘‘পুচ্ছিযমানো’’তি ইমিনা অনুযুঞ্জিযমানোতি এত্থ অনুত্যূপসগ্গৰসেন যুজসদ্দো পুচ্ছনত্থোতি দস্সেতি.

থেয্যসংৰাসকোতি থেননং থেয্যং নকারস্স যকারং কত্ৰা, থেয্যায সংৰাসকো ইমস্সাতি থেয্যসংৰাসকো. এত্থ চ ন কেৰলং ৰস্সগণনাদিকোযেৰ সংৰাসো নাম হোতি, অথ খো থেয্যায লিঙ্গগহণম্পি সংৰাসোযেৰ নাম. তস্মা তস্স তিৰিধভাৰং দস্সেন্তো আহ ‘‘তযো’’তিআদি. তত্থ লিঙ্গং থেনেতীতি লিঙ্গথেনকো, এসেৰ নযো ইতরেসুপি. তমত্থং ৰিত্থারেন্তো আহ ‘‘তত্থা’’তিআদি. তত্থ যোতি থেয্যসংৰাসকো. লিঙ্গমত্তস্সেৰাতি এত্থ মত্তসদ্দেন সংৰাসাদযো নিৰত্তেতি.

ৰিদেসন্তি অত্তনো দেসতো ৰিযোগং দেসং. ৰিসদ্দো হেত্থ ৰিযোগত্থৰাচকো. অথ ৰা ৰি দূরং দেসং. ৰিসদ্দো হেত্থ দূরত্থৰাচকো. মুসাতি অভূতত্থে দুতিযন্তনিপাতো, অভূতং ৰচনন্তি অত্থো. পটিবাহতীতি অঞ্ঞে নিৰারেতি. সংৰাসথেনকো নামাতি এত্থ কো সংৰাসো নাম, ননু এককম্মাদিকোতি আহ ‘‘ভিক্খুৰস্সগণনাদিকো’’তিআদি. ভিক্খুৰস্সগণনাদিকোতি আদিসদ্দেন যথাৰুড্ঢং ৰন্দনসাদিযনং আসনপটিবাহনং উপোসথপৰারণাদীসু সন্দিস্সনন্তি ইমানি সঙ্গণ্হাতি. ‘‘কিরিযভেদো’’তি ইমিনা সং একতো ৰসিযতি অনেনাতি সংৰাসোতি ৰচনত্থেন কিরিযভেদো সংৰাসো নামাতি দস্সেতি. ইমস্মিং অত্থেতি ইমস্মিং ৰত্থুম্হি, ইমস্মিং ঠানেতি অত্থো. ইমিনা পারাজিকাদিট্ঠানে পন এককম্মাদিকো সংৰাসো নামাতি দস্সেতি.

‘‘লিঙ্গস্স চেৰ সংৰাসস্স চা’’তি ইমিনা উভযথেনকোতি এত্থ উভযসরূপং দস্সেতি.

এত্থাতি থেয্যসংৰাসকট্ঠানে. রাজ…পে… ভযেহি ৰাতি এত্থ ভযসদ্দো পচ্চেকং যোজেতব্বো. রাজভযেন চ দুব্ভিক্খভযেন চ কন্তারভযেন চ রোগভযেন চ ৰেরিভযেন চাতি হি অত্থো. চীৰরগহণত্থন্তি চীৰরাহরণত্থং, অযমেৰ ৰা পাঠো. ৰাসদ্দো হেত্ৰত্থং ৰা সম্পদানত্থং ৰা সম্পিণ্ডেতি. অযং গাথা ৰিভত্তিযা উপ্পটিপাটিত্তা ভগ্গরীতিসঙ্খাতা অলঙ্কারদোসা ন মুত্তা. লিঙ্গন্তি সমণলিঙ্গং. ইধাতি ইমস্মিং সাসনে.

নাধিৰাসেতীতি ন সম্পটিচ্ছতি. যাৰাতি যত্তকং কালং, অযং পনেত্থ যোজনা – ইধ যো রাজ…পে… ভযেন ৰা চীৰরগহণত্থং ৰা লিঙ্গং আদিযতি, সো সুদ্ধমানসো হুত্ৰা যাৰ সংৰাসং নাধিৰাসেতি, তাৰ এসো ‘‘থেয্যসংৰাসকো নামা’’তি ন ৰুচ্চতীতি.

তত্রাতি তাসু গাথাসু. ইধাতি ইমস্মিং সাসনে. এৰন্তি লিঙ্গে গহিযমানে. তস্মিন্তি জনে. অনোসরিত্ৰাৰাতি অনোক্কমিত্ৰাৰ. লিঙ্গং অপনেত্ৰাতি সযং গহিতং সমণলিঙ্গং ৰিনাসেত্ৰা. পব্বজিতালযন্তি পব্বজিতছাযং. পুব্বেতি সংৰাসথেনকে.

সব্বপাসণ্ডিযভত্তানীতি সব্বানি পাসণ্ডং উদ্দিস্স দিন্নানি ভত্তানি.

সত্তে ৰহতীতি সত্তৰাহো. ৰিরমিতব্বন্তি ৰেরং, তং পৰত্তেতীতি ৰেরিকো. কাযেন পরিহরিতব্বানীতি কাযপরিহারিযানি. তন্তি তুৰং. হীনাযাৰত্তভাৰন্তি হীনায গিহিভাৰায আৰত্তভাৰং.

উপ্পব্বজিত্ৰাতি পব্বজৰিযোগং কত্ৰা. তমত্থন্তি উপ্পব্বজিতসঙ্খাতমত্থং. অস্সাতি মহাসামণেরস্স.

মহন্তো ৰাতি এত্থ ৰাসদ্দো গরহত্থো. পগেৰ দহরোতি দস্সেতি. অব্যত্তো হোতীতি যোজনা. সোতি সামণেরো.

ৰচ্ছগোরক্খাদীনীতি এত্থ ৰচ্ছোতি তরুণগোণো. সো হি মাতুসন্তিকে ৰসতীতি ৰচ্ছো. মাতুযা ৰিযোগকালে ৰা ৰস্সতীতি ৰচ্ছোতি ৰুচ্চতি. ইমিনা দম্মগৰজরগ্গৰাপি সামঞ্ঞতো গহিতা. গো ৰুচ্চতি খেত্তভূমি. ৰচ্ছো চ গো চ ৰচ্ছগৰা, তেসং রক্খনং ৰচ্ছগোরক্খো, সো আদি যেসং কসিকম্মাদীনন্তি ৰচ্ছগোরক্খাদীনি. ‘‘সূপসম্পন্নো’’তি ইমিনা গহট্ঠম্পি সচে উপসম্পাদেতি, সূপসম্পন্নোতি দস্সেতি. অনুপসম্পন্নকালেযেৰাতি সামণেরকালেযেৰ. ৰিনযৰিনিচ্ছযেতি ৰিনযে ৰুত্তস্স থেয্যসংৰাসকস্স ৰিনিচ্ছযে. থেয্যসংৰাসকো হোতি লিঙ্গস্স অপনীতত্তা.

থেয্যসংৰাসকো ন হোতি সলিঙ্গে ঠিতত্তা. অযম্পি থেয্যসংৰাসকো ন হোতি কাসাযে সউস্সাহত্তা. থেয্যসংৰাসকো হোতি কাসাযে ধুরস্স নিক্খিত্তত্তা.

থেয্যসংৰাসকো ন হোতি সলিঙ্গে ঠিতত্তা. নেৰ থেয্যসংৰাসকো হোতি কাসাযে সউস্সাহত্তা. মেথুনসেৰনাদীহীতিআদিসদ্দেন পাণাতিপাতাদযো সঙ্গণ্হাতি. থেয্যসংৰাসকো হোতি কাসাযে ধুরস্স নিক্খিত্তত্তা. ওৰট্টিকন্তি অধোৰট্টেন করণং. রক্খতি তাৰাতি তাৰ রক্খতি ৰীমংসনেন নিৰাসিতত্তা. লিঙ্গন্তি সমণলিঙ্গং. থেয্যসংৰাসকো হোতি গিহিলিঙ্গস্স সম্পটিচ্ছিতত্তা.

ৰীমংসতি ৰা সম্পটিচ্ছতি ৰা রক্খতিযেৰ ওদাতৰত্থস্স অন্তোকাসাযভাৰতো. ‘‘ভিক্খুনিযাপি এসেৰ নযো’’তি ৰুত্তমেৰত্থং ৰিভাৰেন্তো আহ ‘‘সাপী’’তিআদি.

ৰুড্ঢপব্বজিতো সামণেরোতি সম্বন্ধো. পাল়িযম্পীতি পন্তিযম্পি. সেনো মংসপেসিং গহেত্ৰা গচ্ছতি ৰিয ভত্তপিণ্ডে পত্তং উপনামেত্ৰা গহেত্ৰা গচ্ছতি. থেয্যসংৰাসকো ন হোতি ৰস্সানং অগণনত্তা.