৪৩. অনাপুচ্ছাৰরণৰত্থুআদিকথা

১০৮. উপজ্ঝাযং অনাপুচ্ছাতি এত্থ উপজ্ঝাযং অনাপুচ্ছিত্ৰা. সব্বথা কিং ন কাতব্বন্তি আহ ‘‘তুম্হাক’’ন্তিআদি. দণ্ডকম্মমস্সাতি দণ্ডকম্মং অস্স. অস্সাতি সামণেরস্স. সদ্ধিং উপজ্ঝাযেন ৰিহরন্তীতি সদ্ধিৰিহারিকা. নিস্সযাচরিযাদীনং অন্তে সমীপে ৰসন্তীতি অন্তেৰাসিকা, উপসম্পন্নাযেৰ.

অপলাল়েন্তীতি এত্থ লল় উপসেৰাযন্তি ধাতুপাঠেসু ৰুত্তত্তা (সদ্দনীতিধাতুমালাযং ১৮ ল়কারন্তধাতু) থেরে লল়তো উপসেৰতো অপগমেন্তীতি অত্থো দট্ঠব্বো. ইধ পন অধিপ্পাযত্থং দস্সেন্তো আহ ‘‘তুম্হাক’’ন্তিআদি. অপলাল়েতব্বাতি অঞ্ঞং লল়তো উপসেৰতো অপগমেতব্বা. পরিসভূতে সামণেরূপসম্পন্নেতি যোজনা. আদীনৰন্তি দুস্সীলং নিস্সায ৰসনস্স দোসং. ন্হাযিতুং আগতেন তযা গূথমক্খনং কতং ৰিয দুস্সীলং নিস্সায ৰিহরন্তেন দুস্সীলং কতন্তি যোজনা. ‘‘দুস্সীল’’ন্তি পদং পুরিমপচ্ছিমপদাপেক্খং, তস্মা দ্ৰিন্নং পদানং মজ্ঝে ৰুত্তং. তত্থ পুরিমপদাপেক্খকালে ৰুত্তকম্মং, পচ্ছিমপদাপেক্খকালে অৰুত্তকম্মং. সোতি সামণেরূপসম্পন্নো. উপজ্ঝাযং ৰাতি সামণেরং সন্ধায ৰুত্তং. নিস্সযং ৰাতি উপসম্পন্নং সন্ধায ৰুত্তং.

তীসু নাসনাসূতি সংৰাসলিঙ্গদণ্ডকম্মনাসনসঙ্খাতাসু তীসু নাসনাসু. যোতি সামণেরো. নানাআপত্তিযোতি পারাজিকথুল্লচ্চয পাচিত্তিযাপত্তিযো. হীতি সচ্চং, যস্মা ৰা. কুন্থকিপিল্লিকম্পীতি এত্থ পাণখাদকেহি সত্তেহি কুথিযতি হিংসিযতীতি কুন্থো, কুং পথৰিং ৰা ধারেতীতি কুন্ধো.

কিমিযেৰ পিল্লিকং পোতকং কিপিল্লিকং মিকারস্স লোপং কত্ৰা. পিল্লিকসদ্দো হি পোতকপরিযাযো. কিমীনং, কিমীসু ৰা পিল্লিকং কিপিল্লিকং. নাসেতব্বতংযেৰাতি লিঙ্গেন নাসেতব্বভাৰমেৰ. তাৰদেৰাতি তস্মিং মারণভিন্দনক্খণেযেৰ. অস্সাতি সামণেরস্স. সেনাসনগ্গাহো চ পটিপ্পস্সম্ভতীতি ৰস্সচ্ছেদো হোতীতি অধিপ্পাযো. আকিণ্ণদোসোৰাতি লিঙ্গনাসনদোসেন চ দণ্ডকম্মনাসনদোসেন চ আকুলদোসোৰ. ৰিরজ্ঝিত্ৰাতি ৰিরাধেত্ৰা. যথানিৰত্থপারুতস্সেৰ সামণেরস্সাতি সম্বন্ধো. তস্মাতি সরণগমনউপসম্পদকম্মৰাচানং সদিসত্তা. ভিক্খুনা সমাদিন্নং ৰিয ইমিনাপি সমাদিন্নানেৰ হোন্তীতি যোজনা. এৰন্তি এৰমিজ্ঝনে, সমাদিন্নে ৰা. দল়্হীকরণত্থন্তি সিক্খাপদানং দল়্হীকরণত্থং. পতিট্ঠাপনত্থন্তি সামণেরস্স পতিট্ঠাপনত্থং. লচ্ছতীতি লভিস্সতি. সঙ্ঘেন দাতব্বোতি সম্বন্ধো. অপলোকেত্ৰাতি সঙ্ঘং আপুচ্ছিত্ৰা. ইমিনা ছিন্নৰস্সকং দস্সেতি.

অদিন্নাদানে তিণসলাকমত্তেনাপি ৰত্থুনা অসমণো হোতীতি যোজনা. ৰিপ্পটিপত্তিযাতি ৰিকারেন পটিপজ্জনতো. ভণিতেতি ভণনে. জানিত্ৰাতি জানিত্ৰা এৰ. এৰকারো হেত্থ অজ্ঝাহরিতব্বো, তেন ৰুত্তং ‘‘ন অজানিত্ৰা’’তি. যানি পঞ্চ সিক্খাপদানীতি যোজনা. অস্সাতি সামণেরস্স. ঠপনত্থাযাতি সিক্খাপদানং ঠপনত্থায. অযন্তি পারাজিকো. ৰিসেসোতি ভিক্খূনং পাচিত্তিযতো ৰিসেসো.

পটিপক্খৰসেনাতি ‘‘অনরহং অসম্মাসম্বুদ্ধো’’তিআদিনা চ ‘‘দ্ৰাক্খাতো’’তিআদিনা চ ‘‘দুপ্পটিপ্পন্নো’’তিআদিনা চ পটিৰিরুদ্ধৰসেন গরহন্তো সামণেরো নিৰারেতব্বোতি সম্বন্ধো. কণ্ডকনাসনাযাতি কণ্ডকনামকস্স সামণেরস্স দণ্ডকম্মনাসনায. তং লদ্ধিন্তি অৰণ্ণভাসনদিট্ঠিং. অচ্চযন্তি অতিক্কমং, দোসং ৰা. দেসাপেতব্বোতি ‘‘অচ্চযো মং ভন্তে অচ্চগমা’’তিআদিনা দেসাপেতব্বা. তং যুত্তন্তি ‘‘লিঙ্গনাসনায নাসেতব্বো’’তি তং ৰচনং পতিরূপং. হীতি সচ্চং, যস্মা ৰা. ইধাতি খন্ধকে, ‘‘সামণেরং নাসেতু’’ন্তিৰচনে ৰা.

‘‘এসেৰ নযো’’তি ৰুত্তৰচনং পাকটং করোন্তো আহ ‘‘সস্সতুচ্ছেদানঞ্হী’’তিআদি. অঞ্ঞতরদিট্ঠিকো সামণেরোতি যোজনা. এত্থাতি দসসু নাসনঙ্গেসু. ‘‘কাম’’ন্তিপদেন পুনরুত্তিনিরত্থকদোসারোপনেন গরহং দস্সেতি. ‘‘পনা’’তিপদেন তেসং দোসানং পহানেন সম্ভাৰনং দস্সেতি. অব্রহ্মচারিং সামণেরন্তি সম্বন্ধো. উপসম্পাদেতুং ৰট্টতীতি উপসম্পাদনং ৰট্টতি. ভিক্খুনিদূসকো সামণেরোতি সম্বন্ধো. পব্বজ্জম্পীতি এত্থ পিসদ্দস্স গরহত্থভাৰং দস্সেতুং ৰুত্তং ‘‘পগেৰ উপসম্পদ’’ন্তি. এতমত্থন্তি এতাদিসমত্থং.