১০. দসমসিক্খাপদং

৮৩৫. দসমে সোণ্ডা ৰাতি সুরাসোণ্ডা ৰা. মোরোতি মযূরো. সুৰোতি সুকো. মক্কটোতি ৰানরো. আদিসদ্দেন সপ্পাদযো সঙ্গণ্হাতি, মক্কটাদযোপি নচ্চন্তূতি সম্বন্ধো. অসংযতভিক্খূনন্তি ৰাচসিককম্মে অসংযতানং ভিক্খূনং, ধম্মভাণকগীতং ৰা হোতূতি যোজনা. তন্তিযা গুণেন বদ্ধা তন্তিবদ্ধা. ‘‘ভি’’ন্তিসঙ্খাতো রাসদ্দো এতিস্সাতি ভেরি. কুটেন কতা ভেরি কুটভেরি, তায ৰাদিতং কুটভেরিৰাদিতং, তং ৰা. উদকভেরীতি উদকেন পক্খিত্তা ভেরি, তায ৰাদিতম্পি হোতূতি সম্বন্ধো.

৮৩৬. তেসংযেৰাতি যেসং নচ্চং পস্সতি, তেসংযেৰ. যদি পন নচ্চগীতৰাদিতে ৰিসুং ৰিসুং পস্সতি সুণাতি, পাটেক্কা আপত্তিযোতি দস্সেন্তো আহ ‘‘সচে পনা’’তিআদি. অঞ্ঞতোতি অঞ্ঞতো দেসতো, পস্সতীতি সম্বন্ধো. ‘‘ওলোকেত্ৰা’’তি পদে অপেক্খিতে উপযোগত্থে তোপচ্চযো হোতি. অঞ্ঞং ওলোকেত্ৰাতি হি অত্থো. অঞ্ঞতো ৰাদেন্তে পস্সতীতি যোজনা. ভিক্খুনী ন লভতীতি সম্বন্ধো. অঞ্ঞে ৰত্তুম্পীতি সম্বন্ধো. উপহারন্তি পূজং. উপট্ঠানন্তি পারিচরিযং. সব্বত্থাতি সব্বেসু সযং নচ্চাদীসু.

৮৩৭. অন্তরারামে ৰাতি আরামস্স অন্তরে ৰা. বহিআরামে ৰাতি আরামস্স বহি ৰা. অঞ্ঞেন ৰাতি সলাকভত্তাদীহি অঞ্ঞেন ৰা. তাদিসেনাতি যাদিসো চোরাদিউপদ্দৰো, তাদিসেনাতি. দসমং.

লসুণৰগ্গো পঠমো.