ভিক্খুনীৰিভঙ্গো

১. পারাজিককণ্ডঅত্থযোজনা

এৰং ভিক্খুৰিভঙ্গস্স, কত্ৰান যোজনানযং;

ভিক্খুনীনং ৰিভঙ্গস্স, করিস্সং যোজনানযং.

যোতি ৰিভঙ্গো. ৰিভঙ্গস্সাতি ৰিভঙ্গো অস্স. অস্সাতি হোতি. তস্সাতি ভিক্খুনীনং ৰিভঙ্গস্স. যতোতি যস্মা. অযং পনেত্থ যোজনা – ভিক্খূনং ৰিভঙ্গস্স অনন্তরং ভিক্খুনীনং যো ৰিভঙ্গো সঙ্গহিতো অস্স, তস্স ভিক্খুনীনং ৰিভঙ্গস্স সংৰণ্ণনাক্কমো পত্তো যতো, ততো তস্স ভিক্খুনীনং ৰিভঙ্গস্স অপুব্বপদৰণ্ণনং কাতুং তাৰ পারাজিকে অযং সংৰণ্ণনা হোতীতি. অপুব্বানং পদানং ৰণ্ণনা অপুব্বপদৰণ্ণনা, তং.

১. পঠমপারাজিকসিক্খাপদং

৬৫৬. ‘‘তেন…পে… সাল়্হো’’তি এত্থ ‘‘এত্থা’’তি পাঠসেসো যোজেতব্বো. দব্বগুণকিরিযাজাতিনামসঙ্খাতেসু পঞ্চসু সদ্দেসু সাল়্হসদ্দস্স নামসদ্দভাৰং দস্সেতুং ৰুত্তং ‘‘সাল়্হোতি তস্স নাম’’ন্তি. মিগারমাতুযাতি ৰিসাখায. সা হি মিগারসেট্ঠিনা মাতুট্ঠানে ঠপিতত্তা মিগারমাতা নাম. নৰকম্মং অধিট্ঠাতীতি নৰকম্মিকন্তি দস্সেন্তো আহ ‘‘নৰকম্মাধিট্ঠাযিক’’ন্তি. ‘‘পণ্ডিচ্চেন সমন্নাগতা’’তিইমিনা পণ্ডা ৰুচ্চতি পঞ্ঞা, সা সঞ্জাতা ইমিস্সাতি পণ্ডিতাতি ৰচনত্থং দস্সেতি. ৰেয্যত্তিকেনাতি ৰিসেসেন অঞ্জতি পাকটং গচ্ছতীতি ৰিযত্তো, পুগ্গলো, তস্স ইদং ৰেয্যত্তিকং, ঞাণং, তেন. ‘‘পণ্ডা’’তি ৰুত্তপঞ্ঞায ‘‘মেধা’’তি ৰুত্তপঞ্ঞায ৰিসেসভাৰং দস্সেতুং ৰুত্তং ‘‘পাল়িগহণে’’তিআদি. ‘‘মেধা’’তি হি ৰুত্তপঞ্ঞা ‘‘পণ্ডা’’তি ৰুত্তপঞ্ঞায ৰিসেসো হোতি সতিসহাযত্তা. তত্রুপাযাযাতি অলুত্তসমাসো ‘‘তত্রমজ্ঝত্ততা’’তিআদীসু (ধ. স. অট্ঠ. যেৰাপনকৰণ্ণনা) ৰিয. ‘‘কম্মেসূ’’তি ইমিনা তসদ্দস্স ৰিসযং দস্সেতি. কত্তব্বকম্মুপপরিক্খাযাতি কত্তব্বকম্মেসু ৰিচারণায. চসদ্দেন ‘‘কতাকত’’ন্তি পদস্স দ্ৰন্দৰাক্যং দস্সেতি. পরিৰেসনট্ঠানেতি পরিভুঞ্জিতুং ৰিসন্তি পৰিসন্তি এত্থাতি পরিৰেসনং, তমেৰ ঠানং পরিৰেসনট্ঠানং, তস্মিং. নিকূটেতি এত্থ কূটসঙ্খাতসিখরৰিরহিতে ওকাসেতি দস্সেন্তো আহ ‘‘কোণসদিসং কত্ৰা দস্সিতে গম্ভীরে’’তি. ৰিত্যূপসগ্গো ৰিকারৰাচকো, সরসদ্দো সদ্দৰাচকোতি আহ ‘‘ৰিপ্পকারসদ্দো’’তি. চরতি অনেনাতি চরণং পাদো, তস্মিং উট্ঠিতো গিলানো এতিস্সাতি চরণগিলানাতি দস্সেন্তো আহ ‘‘পাদরোগেন সমন্নাগতা’’তি.

৬৫৭. ‘‘তিন্তা’’তি ইমিনা অৰস্সুতসদ্দো ইধ কিলিন্নত্থে এৰ ৰত্ততি, ন অঞ্ঞত্থেতি দস্সেতি. অস্সাতি ‘‘অৰস্সুতা’’তিপদস্স. পদভাজনে ৰুত্তন্তি সম্বন্ধো. তত্থাতি পদভাজনে. ৰত্থং রঙ্গজাতেন রত্তং ৰিয, তথা কাযসংসগ্গরাগেন সুট্ঠু রত্তাতি যোজনা. ‘‘অপেক্খায সমন্নাগতা’’তি ইমিনা অপেক্খা এতিস্সমত্থীতি অপেক্খৰতীতি অত্থং দস্সেতি. পটিবদ্ধং চিত্তং ইমিস্সন্তি পটিবদ্ধচিত্তাতি দস্সেন্তো আহ ‘‘পটিবন্ধিত্ৰা ঠপিতচিত্তা ৰিযা’’তি. দুতিযপদৰিভঙ্গেপীতি ‘‘অৰস্সুতো’’তি দুতিযপদভাজনেপি. পুগ্গলসদ্দস্স সত্তসামঞ্ঞৰাচকত্তা পুরিসসদ্দেন ৰিসেসেতি. অধোউব্ভইতি নিপাতানং ছট্ঠিযা সমসিতব্বভাৰং দস্সেতুং ৰুত্তং ‘‘অক্খকানং অধো’’তিআদি. ননু যথা ইধ ‘‘অক্খকানং অধো’’তি ৰুত্তং, এৰং পদভাজনেপি ৰত্তব্বং, কস্মা ন ৰুত্তন্তি আহ ‘‘পদভাজনে’’তিআদি. পদপটিপাটিযাতি ‘‘অধো’’তি চ ‘‘অক্খক’’ন্তি চ পদানং অনুক্কমেন. এত্থাতি অধক্খকউব্ভজাণুমণ্ডলেসু. সাধারণপারাজিকেহীতি ভিক্খুভিক্খুনীনং সাধারণেহি পারাজিকেহি. নামমত্তন্তি নামমেৰ.

৬৫৯. এৰন্তি ইমায পাল়িযা ৰিভজিত্ৰাতি সম্বন্ধো. তত্থাতি ‘‘উভতোঅৰস্সুতে’’তিআদিৰচনে. ‘‘উভতোঅৰস্সুতে’’তি পাঠো মূলপাঠোযেৰ, নাঞ্ঞোতি দস্সেন্তেন ৰিসেসমকত্ৰা ‘‘উভতোঅৰস্সুতেতি উভতো অৰস্সুতে’’তি ৰুত্তং. উভতোতি এত্থ উভসরূপঞ্চ তোসদ্দস্স ছট্ঠ্যত্থে পৰত্তিঞ্চ দস্সেতুং ৰুত্তং ‘‘ভিক্খুনিযা চেৰ পুরিসস্স চা’’তি. তত্থ ভিক্খুনীপুরিসসদ্দেহি উভসরূপং দস্সেতি. ‘‘যা’’তি চ ‘‘স’’ইতি চ দ্ৰীহি সদ্দেহি তোপচ্চযস্স ছট্ঠ্যত্থং, উভিন্নং অৰস্সুতভাৰে সতীতি অত্থো. ভাৰপচ্চযেন ৰিনা ভাৰত্থো ঞাতব্বোতি আহ ‘‘অৰস্সুতভাৰে’’তি. যথাপরিচ্ছিন্নেনাতি ‘‘অধক্খকং, উব্ভজাণুমণ্ডল’’ন্তি যেন যেন পরিচ্ছিন্নেন. অত্তনোতি ভিক্খুনিযা. তস্স ৰাতি পুরিসস্স ৰা. ইধাপীতি কাযপটিবদ্ধেন কাযামসনেপি.

তত্রাতি তেসু ভিক্খুভিক্খুনীসু. ন কারেতব্বো ‘‘কাযসংসগ্গং সাদিযেয্যা’’তি অৰুত্তত্তাতি অধিপ্পাযো. অচোপযমানাপীতি অচালযমানাপি, পিসদ্দো সম্ভাৰনত্থো, তেন চোপযমানা পগেৰাতি দস্সেতি. এৰং পন সতীতি চিত্তেনেৰ অধিৰাসযমানায সতি পন. কিরিযসমুট্ঠানতাতি ইমস্স সিক্খাপদস্স কিরিযসমুট্ঠানভাৰো. তব্বহুলনযেনাতি ‘‘ৰনচরকো (ম. নি. অট্ঠ. ২.২০১; ৩.১৩৩), সঙ্গামাৰচরো’’তিআদীসু (ম. নি. ২.১০৮) ৰিয তস্সং কিরিযাযং বহুলতো সমুট্ঠাননযেন. সাতি কিরিযসমুট্ঠানতা.

৬৬০. এত্থাতি উব্ভক্খকঅধোজাণুমণ্ডলেসু.

৬৬২. ‘‘একতো অৰস্সুতে’’তি এত্থাপি তোপচ্চযো ছট্ঠ্যত্থে হোতি. সামঞ্ঞৰচনস্সাপি ৰিসেসে অৰট্ঠানতো, ৰিসেসত্থিনা চ ৰিসেসস্স অনুপযোজিতব্বতো আহ ‘‘ভিক্খুনিযা এৰা’’তি. তত্রাতি ‘‘একতো অৰস্সুতে’’তিআদিৰচনে. ‘‘তথেৰা’’তিইমিনা কাযসংসগ্গরাগেন অৰস্সুতোতি অত্থং অতিদিসতি. চতূসূতি মেথুনরাগ কাযসংসগ্গরাগগেহসিতপেম সুদ্ধচিত্তসঙ্খাতেসু চতূসু. যত্থাতি যস্মিং ঠানে.

৬৬৩. অযং পুরিসো ইতি ৰা ইত্থী ইতি ৰা অজানন্তিযা ৰাতি যোজনাতি. পঠমং.

২. দুতিযপারাজিকসিক্খাপদং

৬৬৪. দুতিযে কচ্চি নো সাতি এত্থ নোসদ্দো নুসদ্দত্থোতি আহ ‘‘কচ্চি নু সা’’তি. পরিৰারৰিপত্তীতি পরিজনস্স ৰিনাসনং. ‘‘অকিত্তী’’তি এত্থ সম্মুখা নিন্দং গহেত্ৰা ‘‘অযসো’’তিইমিনা পরম্মুখা নিন্দা গহেতব্বাতি দস্সেতুং ৰুত্তং ‘‘পরম্মুখগরহা ৰা’’তি.

৬৬৬. ‘‘যা পারাজিকং আপন্না’’তিইমিনা ‘‘সা ৰা’’তি এত্থ তসদ্দস্স ৰিসযং দস্সেতি. চতুন্নন্তি নিদ্ধারণত্থে চেতং সামিৰচনং, চতূসূতি অত্থো. পচ্ছাতি সব্বপারাজিকানং পচ্ছা. ইমস্মিং ওকাসেতি পঠমততিযপারাজিকানমন্তরে ঠানে. ঠপিতন্তি সঙ্গীতিকারেহি নিক্খিত্তং. এত্থাতি ইমস্মিং সিক্খাপদে. তত্রাতি দুট্ঠুল্লসিক্খাপদেতি. দুতিযং.

৩. ততিযপারাজিকসিক্খাপদং

৬৬৯. ততিযে অস্সাতি ‘‘ধম্মেন ৰিনযেনা’’তি পদস্স. পদভাজনং ৰুত্তন্তি সম্বন্ধো. ঞত্তিসম্পদা চেৰ অনুসাৰনসম্পদা চ সত্থুসাসনং নামাতি দস্সেন্তো আহ ‘‘ঞত্তি…পে… সম্পদায চা’’তি. সত্থুসাসনেনাতি চ সত্থু আণায. কম্মন্তি উক্খেপনীযকম্মং. তত্থাতি সঙ্ঘে. ‘‘ৰচনং নাদিযতী’’তিআদীসু ৰিয সঙ্ঘং ৰা নাদিযতীতি এত্থ নাদিযনং নাম নানুৰত্তনমেৰাতি আহ ‘‘নানুৰত্ততী’’তি. তত্থাতি সঙ্ঘাদীসু. অযং তাৰ সংৰাসোতি সহ ভিক্খূ ৰসন্তি এত্থাতি সংৰাসোতি অত্থেন অযং এককম্মাদি সংৰাসো নাম. ‘‘সহ অযনভাৰেনা’’তিইমিনা সহ অযন্তি পৰত্তন্তীতি সহাযাতি ৰচনত্থং দস্সেতি. তেতি ভিক্খূ. যেহি চাতি ভিক্খূহি চ. তস্সাতি উক্খিত্তকস্স. তেনাতি উক্খিত্তকেন. অত্তনোতি উক্খিত্তকস্সাতি. ততিযং.

৪. চতুত্থপারাজিকসিক্খাপদং

৬৭৫. চতুত্থে মেথুনরাগেন অৰস্সুতা নাধিপ্পেতা, কাযসংসগ্গরাগেন অৰস্সুতাৰাধিপ্পেতাতি আহ ‘‘কাযসংসগ্গরাগেন অৰস্সুতা’’তি. ‘‘পুরিসপুগ্গলস্সা’’তিপদং ন হত্থসদ্দেন সম্বন্ধিতব্বং, গহণসদ্দেনেৰ সম্বন্ধিতব্বন্তি দস্সেন্তো আহ ‘‘যং পুরিসপুগ্গলেনা’’তিআদি. তন্তি গহণং, ‘‘হত্থগ্গহণ’’ন্তি ৰুত্তৰচনং উপলক্খণমত্তমেৰাতি আহ ‘‘অঞ্ঞম্পী’’তিআদি. তত্থ ‘‘অঞ্ঞম্পী’’তি হত্থগহণতো ইতরম্পি. অপারাজিকক্খেত্তেতি উব্ভক্খকে অধোজাণুমণ্ডলে. অস্সাতি ‘‘হত্থগ্গহণ’’ন্তিপদস্স. এত্থাতি ‘‘অসদ্ধম্মস্স পটিসেৰনত্থাযা’’তিপদে. কাযসংসগ্গোতি কাযসংসগ্গো এৰ. তেন ৰুত্তং ‘‘ন মেথুনধম্মো’’তি. হীতি সচ্চং, যস্মা ৰা. এত্থাতি কাযসংসগ্গগহণে. সাধকন্তি ঞাপকং.

তিস্সিত্থিযোতি ভুম্মত্থে চেতং উপযোগৰচনং. তীসু ইত্থীসূতি হি অত্থো, তিস্সো ইত্থিযো উপগন্ত্ৰাতি ৰা যোজেতব্বো. এসেৰ নযো পরতোপি. যং মেথুনং অত্থি, তং ন সেৰেতি যোজনা. ন সেৰেতি চ ন সেৰতি. তিকারস্স হি একারো. তযো পুরিসেতি তীসু পুরিসেসু, তে ৰা উপগন্ত্ৰা. তযো চ অনরিযপণ্ডকেতি তীসু অনরিযসঙ্খাতেসু উভতোব্যঞ্জনকেসু চ পণ্ডকেসু চ, তে ৰা উপগন্ত্ৰাতি যোজনা. ন চাচরে মেথুনং ব্যঞ্জনস্মিন্তি অত্তনো নিমিত্তস্মিং মেথুনং ন চ আচরতি. ইদং অনুলোমপারাজিকং সন্ধায ৰুত্তং. ছেজ্জং সিযা মেথুনধম্মপচ্চযাতি মেথুনধম্মকারণা ছেজ্জং সিযা, পারাজিকং ভৰেয্যাতি অত্থো. কুসলেহীতি পঞ্হাৰিসজ্জনে ছেকেহি, ছেককামেহি ৰা. অযং পঞ্হো অট্ঠৰত্থুকং সন্ধায ৰুত্তো.

পঞ্হাৰিসজ্জনত্থায চিন্তেন্তানং সেদমোচনকারণত্তা ‘‘সেদমোচনগাথা’’তি ৰুত্তা. ৰিরুজ্ঝতীতি ‘‘ন মেথুনধম্মো’’তি ৰচনেন ‘‘ছেজ্জং সিযা মেথুনধম্মপচ্চযা’’তি ৰচনং ৰিরুজ্ঝতি, ন সমেতীতি অত্থো. ইতি চে ৰদেয্য, ন ৰিরুজ্ঝতি. কস্মা? মেথুনধম্মস্স পুব্বভাগত্তাতি যোজনা. ইমিনা মেথুনধম্মস্স পুব্বভাগভূতো কাযসংসগ্গোৰ উপচারেন তত্থ মেথুনধম্মসদ্দেন ৰুত্তো, ন দ্ৰযংদ্ৰযসমাপত্তীতি দীপেতি. হিসদ্দো ৰিত্থারজোতকো. পরিৰারেযেৰ ৰুত্তানীতি সম্বন্ধো. ৰণ্ণাৰণ্ণোতি সুক্কৰিসট্ঠি. ধনমনুপ্পাদানন্তি সঞ্চরিত্তং. ‘‘ইমিনা পরিযাযেনা’’তি ইমিনা লেসেন সমীপূপচারেনাতি অত্থো. এতেনুপাযেনাতি ‘‘হত্থগ্গহণং সাদিযেয্যা’’তিপদে ৰুত্তউপাযেন. সব্বপদেসূতি সব্বেসু ‘‘সঙ্ঘাটিকণ্ণগ্গহণং সাদিযেয্যা’’তিআদীসু পদেসু. অপি চাতি একংসেন, ৰিসেসং ৰক্খামীতি অধিপ্পাযো. ‘‘এৰংনামকং ঠান’’ন্তি ইমিনা ‘‘ইত্থংনামং ইমস্স ঠানস্সা’’তি ৰচনত্থং দীপেতি.

৬৭৬. একন্তরিকায ৰাতি এত্থ ৰাসদ্দেন দ্ৰন্তরিকাদীনিপি সঙ্গয্হন্তি. যেন তেনাতি যেন ৰা তেন ৰা. দ্ৰিতিচতুপ্পঞ্চছৰত্থূনি পেয্যালৰসেন ৰা ৰাসদ্দেন ৰা গহেতব্বানি. অপি চাতি কিঞ্চ ভিয্যো, ৰত্তব্বৰিসেসং ৰক্খামীতি অধিপ্পাযো. এত্থাতি ‘‘আপত্তিযো দেসেত্ৰা’’তি ৰচনে. হীতি সচ্চং. ৰুত্তন্তি পরিৰারে ৰুত্তং. তত্রাতি পুরিমৰচনাপেক্খং. দেসিতা আপত্তি গণনূপিকাতি যোজনা. একং ৰত্থুং আপন্না যা ভিক্খুনীতি যোজনা. ধুরনিক্খেপং কত্ৰাতি ‘‘ইমঞ্চ ৰত্থুং, অঞ্ঞম্পি চ ৰত্থুং নাপজ্জিস্সামী’’তি ধুরনিক্খেপং কত্ৰা. যা পন সউস্সাহাৰ দেসেতীতি যোজনাতি. চতুত্থং.

সাধারণাতি ভিক্খুনীহি সাধারণা. এত্থাতি ‘‘উদ্দিট্ঠা খো অয্যাযো’’তিআদিৰচনে.

ইতি সমন্তপাসাদিকায ৰিনযসংৰণ্ণনায

ভিক্খুনিৰিভঙ্গে পারাজিককণ্ডৰণ্ণনায যোজনা সমত্তা.

২. সঙ্ঘাদিসেসকণ্ডং

১. পঠমসঙ্ঘাদিসেসসিক্খাপদ-অত্থযোজনা

পারাজিকানন্তরস্সাতি পারাজিকানং অনন্তরে ঠপিতস্স, সঙ্গীতস্স ৰা, সঙ্ঘাদিসেসকণ্ডস্সাতি সম্বন্ধো. অযং ঈদিসা অনুত্তানত্থৰণ্ণনা অনুত্তানানং পদানং অত্থস্স ৰণ্ণনা দানি ইমস্মিংকালে ভৰিস্সতীতি যোজনা.

৬৭৮. পঠমে উদকং ৰসিতং অচ্ছাদনং অনেন কতন্তি উদোসিতোতি ৰচনত্থেন ভণ্ডসালা উদোসিতং নামাতি দস্সেন্তো আহ ‘‘উদোসিতন্তি ভণ্ডসালা’’তি. এত্থ হি উদসদ্দো উদকপরিযাযো. সংযোগো ন যুত্তোযেৰ. ভণ্ডসালাতি যানাদীনং ভণ্ডানং ঠপনসালা. অচ্চাৰদথাতি এত্থ অতীত্যূপসগ্গো অতিক্কমনত্থো, আত্যূপসগ্গো ধাত্ৰত্থানুৰত্তকোতি আহ ‘‘অতিক্কমিত্ৰা ৰদথা’’তি.

৬৭৯. উস্সযৰসেন ৰদনং উস্সযৰাদো, সোযেৰ উস্সযৰাদিকাতি দস্সেন্তো আহ ‘‘উস্সযৰাদিকা’’তিআদি. ‘‘মানুস্সযৰসেন কোধুস্সযৰসেনা’’তি ইমিনা উস্সযভেদং দস্সেতি. সাতি উস্সযৰাদিকা. অত্থতোতি সরূপতো. এত্থাতি পদভাজনে. অড্ডনং অভিযুঞ্জনং অড্ডোতি কত্ৰা দ্ৰিন্নং জনানং অড্ডো ৰোহারিকানং ৰিনিচ্ছযকারণং হোতি, তস্মা ৰুত্তং ‘‘অড্ডোতি ৰোহারিকৰিনিচ্ছযো ৰুচ্চতী’’তি, মুদ্ধজততিযক্খরোযেৰ. যন্তি অড্ডং. যত্থাতি যস্মিং কিস্মিংচি ঠানে. দ্ৰিন্নং অড্ডকারকানং ৰোহারং জানন্তীতি ৰোহারিকা, অক্খদস্সা, তেসং. দ্ৰীসু জনেসূতি অড্ডকারকেসু জনেসু দ্ৰীসু. যো কোচীতি অড্ডকারকো ৰা অঞ্ঞো ৰা যো কোচি.

এত্থাতি ‘‘একস্স আরোচেতী’’তিআদিৰচনে. যত্থ কত্থচীতি যংকিঞ্চি ঠানং আগতেপীতি সম্বন্ধো. অথাতি পচ্ছা. সাতি ভিক্খুনী. সোতি উপাসকো.

‘‘কপ্পিযকারকেনা’’তিপদং ‘‘কথাপেতী’’তিপদে কারিতকম্মং. তত্থাতি কপ্পিযকারকইতরেসু. ৰোহারিকেহি কতেতি সম্বন্ধো. গতিগতন্তি চিরকালপত্তং. সুতপুব্বন্তি পুব্বে সুতং. অথাতি সুতপুব্বত্তা এৰ. তেতি ৰোহারিকা, দেন্তীতি সম্বন্ধো.

পঠমন্তি সমনুভাসনতো পুব্বং. আপত্তীতি আপজ্জনং. এতস্সাতি সঙ্ঘাদিসেসস্স. অযং হীতি অযং এৰ, ৰক্খমানো এৰাতি অত্থো. এত্থাতি পদভাজনে. সহ ৰত্থুজ্ঝাচারাতি ৰত্থুজ্ঝাচারেন সহ, ৰাক্যমেৰ, ন সমাসো. ৰত্থুজ্ঝাচারাতি করণত্থে নিস্সক্কৰচনং দট্ঠব্বং. তেন ৰুত্তং ‘‘সহ ৰত্থুজ্ঝাচারেনা’’তি. ভিক্খুনিন্তি আপত্তিমাপন্নং ভিক্খুনিং. সঙ্ঘতোতি ভিক্খুনিসঙ্ঘম্হা. অনীযসদ্দো হেতুকত্তাভিধাযকোতি আহ ‘‘নিস্সারেতীতি নিস্সারণীযো’’তি. ভিক্খুনিসঙ্ঘতো নিস্সরতি, নিস্সারিযতি ৰা অনেনাতি নিস্সারণীযোতি করণত্থোপি যুত্তোযেৰ. তত্থাতি পদভাজনে. যন্তি সঙ্ঘাদিসেসং. সোতি সঙ্ঘাদিসেসো. পদভাজনস্স অত্থো কারণোপচারেন দট্ঠব্বো. হীতি সচ্চং. কেনচীতি পুগ্গলেন, ন নিস্সারীযতীতি সম্বন্ধো. তেন ধম্মেন করণভূতেন, হেতুভূতেন ৰা. সোতি ধম্মো.

অড্ডকারকমনুস্সেহি ৰুচ্চমানাতি যোজনা. সযন্তি সামং. ততোতি গমনতো, পরন্তি সম্বন্ধো. ভিক্খুনিযা ৰা কতং আরোচেতূতি যোজনা.

ধম্মিকন্তি ধম্মেন সভাৰেন যুত্তং. যথাতি যেনাকারেন. তন্তি আকারং. তত্থাতি ‘‘অনোদিস্স আচিক্খতী’’তি ৰচনে.

ধুত্তাদযোতি আদিসদ্দেন চোরাদযো সঙ্গণ্হাতি. সাতি আচিক্খনা. তন্তি আচিক্খনং. তেসন্তি গামদারকাদীনং. দণ্ডন্তি ধনদণ্ডং. গীৰা হোতীতি ইণং হোতি. অধিপ্পাযে সতিপীতি যোজনা. তস্সাতি অনাচারং চরন্তস্স.

কেৰলং হীতি কেৰলমেৰ. তন্তি রক্খং. কারকেতি অনাচারস্স কারকে. তেস+?ন্তি কারকানং.

তেসন্তি হরন্তানং. ‘‘অনত্থকামতাযা’’তি ইমিনা ভযাদিনা ৰুত্তে নত্থি দোসোতি দস্সেতি. হীতি লদ্ধদোসজোতকো. অত্তনো ৰচনকরং…পে… ৰত্তুং ৰট্টতীতি অত্তনো ৰচনং আদিযিস্সতীতি ৰুত্তে ৰচনং অনাদিযিত্ৰা দণ্ডে গহিতেপি নত্থি দোসো দণ্ডগহণস্স পটিক্খিত্তত্তা. দাসদাসীৰাপিআদীনন্তি আদিসদ্দেন খেত্তাদযো সঙ্গয্হন্তি.

ৰুত্তনযেনেৰাতি অতীতং আরব্ভ আচিক্খনে ৰুত্তনযেন এৰ. ‘‘আযতিং অকরণত্থাযা’’তি ইমিনা অনাগতং আরব্ভ ওদিস্স আচিক্খনং দস্সেতি. ‘‘কেন এৰং কত’’ন্তি পুচ্ছায অতীতে কতপুব্বং পুচ্ছতি. সাপীতি পিসদ্দো ৰুত্তসম্পিণ্ডনত্থো. হীতি সচ্চং, যস্মা ৰা.

ৰোহারিকা দণ্ডেন্তীতি সম্বন্ধো. দণ্ডেন্তীতি ৰধদণ্ডেন চ ধনদণ্ডেন চ আণং করোন্তি.

যো চাযন্তি যো চ অযং. ভিক্খুনীনং যো অযং নযো ৰুত্তো, এসেৰ নযো ভিক্খূনম্পি নযোতি যোজনা. ‘‘এসেৰ নযো’’তি ৰুত্তৰচনমেৰ ৰিত্থারেন্তো আহ ‘‘ভিক্খুনোপি হী’’তিআদি. ‘‘তথা’’তিইমিনা ‘‘ওদিস্সা’’তিপদং অতিদিসতি. তে চাতি তে চ ৰোহারিকা. হীতি সচ্চং, যস্মা ৰাতি. পঠমং.

২. দুতিযসঙ্ঘাদিসেসসিক্খাপদং

৬৮২. দুতিযে ৰরিতব্বং ইচ্ছিতব্বন্তি ৰরং, তমেৰ ভণ্ডন্তি ৰরভণ্ডন্তি দস্সেন্তো আহ ‘‘মহগ্ঘভণ্ড’’ন্তি. ‘‘মুত্তা’’তিআদিনা তস্স সরূপং দস্সেতি.

৬৮৩. আপুব্বো লোকসদ্দো অভিমুখং লোকনত্থো হোতি, উপুব্বো উদ্ধং লোকনত্থো, ওপুব্বো অধো লোকনত্থো, ৰিপুব্বো ইতো চিতো চ ৰীতিহরণলোকনত্থো, অপপুব্বো আপুচ্ছনত্থো. ইধ পন অপপুব্বত্তা আপুচ্ছনত্থোতি আহ ‘‘অনাপুচ্ছিত্ৰা’’তি. মল্লগণ ভটিপুত্ত গণাদিকন্তিআদীসু মল্লগণো নাম নারাযনভত্তিকো গণো. ভটিপুত্তগণো নাম কুমারভত্তিকো গণো. আদিসদ্দেন অঞ্ঞম্পি গামনিগমে অনুসাসিতুং সমত্থং গণং সঙ্গণ্হাতি. অথ ৰা মল্লগণোতি মল্লরাজূনং গণো. তে হি গণং কত্ৰা কুসিনারাযং রজ্জং অনুসাসন্তি, তে সন্ধায ৰুত্তং ‘‘মল্লগণো’’তি. ভটিপুত্তগণোতি লিচ্ছৰিগণো পরিযাযন্তরেন ৰুত্তো. লিচ্ছৰিরাজূনঞ্হি পুব্বরাজানো ভটিনামকস্স জটিলস্স পুত্তা হোন্তি, তেসং ৰংসে পৰত্তা এতরহি লিচ্ছৰিরাজানোপি ভটিপুত্তাতি ৰুচ্চন্তি. জটিলো পন বারাণসিরঞ্ঞো পুত্তে নদিসোতেন ৰুয্হমানে নদিতো উদ্ধরিত্ৰা অত্তনো অস্সমে পুত্তং কত্ৰা ভরণত্তা পোসনত্তা ভটীতি ৰুচ্চতি, তস্স পুত্তত্তা লিচ্ছৰিগণো ভটিপুত্তোতি ৰুচ্চতি. তেপি গণং কত্ৰা ৰেসালিযং রজ্জং অনুসাসন্তি, তং সন্ধায ৰুত্তং ‘‘ভটিপুত্তগণো’’তি. ধম্মগণো নাম সাসনধম্মভত্তিকো গণো. গন্ধিকসেণীতি গন্ধকারানং সমজাতিকানং সিপ্পিকানং গণো. দুস্সিকসেণীতি দুস্সকারানং সমজাতিকানং পেসকারানং গণো. আদিসদ্দেন তচ্ছকসেণিরজকসেণিআদযো সঙ্গয্হন্তি. যত্থ যত্থাতি যস্মিং যস্মিং ঠানে. হীতি সচ্চং. তে এৰাতি গণাদযো এৰ. পুন তেতি গণাদযো. ইদন্তি ‘‘গণং ৰা’’তিআদিৰচনং. এত্থাতি রাজাদীসু. সঙ্ঘাপুচ্ছনমেৰ পধানকারণন্তি আহ ‘‘ভিক্খুনিসঙ্ঘো আপুচ্ছিতব্বোৰা’’তি. কপ্পগতিকন্তি কপ্পং গচ্ছতীতি কপ্পগতা, সা এৰ কপ্পগতিকা, তং.

কেনচি করণীযেন খণ্ডসীমং অগন্ত্ৰা কেনচি করণীযেন ভিক্খুনীসু পক্কন্তাসূতি যোজনা. নিস্সিতকপরিসাযাতি অন্তেৰাসিকপরিসায. ৰুট্ঠাপেন্তিযাতি উপসম্পাদেন্তিযাতি. দুতিযং.

৩. ততিযসঙ্ঘাদিসেসসিক্খাপদং

৬৯২. ততিযে দুতিযেন পাদেন অতিক্কন্তমত্তেতি সম্বন্ধো. পরিক্খেপারহট্ঠানং নাম ঘরূপচারতো পঠমলেড্ডুপাতো. সঙ্খেপতো ৰুত্তমত্থং ৰিত্থারতো দস্সেন্তো আহ ‘‘অপি চেত্থা’’তিআদি. এত্থাতি ইমস্মিং সিক্খাপদে. উপচারে ৰাতি অপরিক্খিত্তস্স গামস্স পরিক্খেপারহট্ঠানে ৰা. ততোতি গামন্তরতো, খণ্ডপাকারেন ৰা ৰতিছিদ্দেন ৰা পৰিসিতুন্তি সম্বন্ধো.

সম্বদ্ধা ৰতি এতেসন্তি সম্বদ্ধৰতিকা, দ্ৰে গামা. ৰিহারন্তি ভিক্খুনিৰিহারং. ততো পন গামতোতি ততো ইতরগামতো পন, নিক্খন্তায ভিক্খুনিযা ঠাতব্বন্তি সম্বন্ধো. উস্সারণা ৰাতি মনুস্সানং উস্সারণা ৰা.

জনাতি গামভোজকা জনা. একং গামন্তি যংকিঞ্চি ইচ্ছিতং একং গামং. ততোতি গামতো. ‘‘কস্মা’’তি ইমায পুচ্ছায ‘‘ৰিহরতো একং গামং গন্তুং ৰট্টতী’’তি ৰচনস্স কারণং পুচ্ছতি. ‘‘ৰিহারস্স চতুগামসাধারণত্তা’’তিইমিনা ৰিসজ্জনেন তং পুচ্ছং ৰিসজ্জেতি.

যত্থাতি যস্সং নদিযং. উত্তরন্তিযা একদ্ৰঙ্গুলমত্তম্পি অন্তরৰাসকো তেমিযতি, সা নদী নামাতি যোজনা. যথা নিৰসিযমানায তিমণ্ডলপটিচ্ছাদনং হোতি, এৰং নিৰত্থাযাতি যোজনা. ভিক্খুনিযা উত্তরন্তিযা অন্তরৰাসকোতি সম্বন্ধো. যত্থ কত্থচীতি যস্মিং কিস্মিংচি ঠানে. ‘‘সেতুনা গচ্ছতি, অনাপত্তী’’তিইমিনা পদসা উত্তরন্তিযা এৰ আপত্তীতি দস্সেতি. উত্তরণকালেতি নদিতো উত্তরণকালে. আকাসগমনন্তি ইদ্ধিযা গমনং. আদিসদ্দেন হত্থিপিট্ঠিআদযো সঙ্গণ্হাতি. অক্কমন্তিযাতি অতিক্কমন্তিযা. এত্থাতি দ্ৰীসু তীসু ভিক্খুনীসু. ওরিমতীরমেৰাতি অপারতীরমেৰ. তমেৰ তীরন্তি ওরিমতীরমেৰ. পচ্চুত্তরতীতি পটিনিৰত্তিত্ৰা উত্তরতি.

কুরুমানা ভিক্খুনী করোতীতি যোজনা. অস্সাতি ভিক্খুনিযা অজানন্তিযা এৰ চাতি সম্বন্ধো, অনাদরে চেতং সামিৰচনং. অথ পনাতি অথসদ্দো যদিপরিযাযো, কিরিযাপদেন যোজেতব্বো. অথ অচ্ছতি, অথ ন ওতরতীতি অত্থো. অচ্ছতীতি ৰসতি. হীতি সচ্চং. ইধাতি ‘‘একা ৰা রত্তিং ৰিপ্পৰসেয্যা’’তিপদে.

এৰং ৰুত্তলক্খণমেৰাতি এৰং অভিধম্মপরিযাযেন ৰুত্তলক্খণমেৰ. তং পনেতন্তি তং পন অরঞ্ঞং. তেনেৰাতি আপন্নহেতুনা এৰ. অট্ঠকথাযন্তি মহাঅট্ঠকথাযং. ভিক্খুনীসু পৰিসন্তীসূতি সম্বন্ধো, নিদ্ধারণত্থে চেতং ভুম্মৰচনং. এত্থাতি দস্সনূপচারসৰনূপচারেসু. যত্থ ওকাসে ঠিতং দুতিযিকা পস্সতি, সো ওকাসো দস্সনূপচারো নামাতি যোজনা. সাণিপাকারন্তরিকাপীতি সাণিপাকারেন ব্যৰহিকাপি. যত্থ ওকাসে ঠিতা…পে… সদ্দং সুণাতি, সো ওকাসো সৰনূপচারো নামাতি যোজনা. মগ্গমূল়্হসদ্দেনাতি মগ্গে মূল়্হানং সদ্দেন. ধম্মস্সৰনারোচনসদ্দেনাতি ধম্মস্সৰনত্থায আরোচনানং সদ্দেন. মগ্গমূল়্হসদ্দেন সদ্দাযন্তিযা সদ্দং সুণাতি ৰিয চ ধম্মস্সৰনারোচনসদ্দেন সদ্দাযন্তিযা সদ্দং সুণাতি ৰিয চ ‘‘অয্যে’’তি সদ্দাযন্তিযা সদ্দং সুণাতীতি যোজনা. সদ্দাযন্তিযাতি সদ্দং করোন্তিযা. নামধাতু হেসা. এৰরূপেতি ‘‘মগ্গমূল়্হসদ্দেন ৰিযা’’তিআদিনা ৰুত্তে এৰরূপে.

তিত্থাযতনং সঙ্কন্তা ৰাতি তিত্থীনং ৰাসট্ঠানং সঙ্কন্তা ৰা. ইমিনা ‘‘পক্খসঙ্কন্তা’’তি এত্থ পক্খসদ্দস্স পটিপক্খৰাচকত্তা তেন সাসনপটিপক্খা তিত্থিযা এৰ গহেতব্বাতি দস্সেতি. তিত্থিযা হি সাসনস্স পটিপক্খা হোন্তীতি. ততিযং.

৪. চতুত্থসঙ্ঘাদিসেসসিক্খাপদং

৬৯৪. চতুত্থে পাদস্স ঠপনকং পীঠং পাদপীঠং. পাদস্স ঠপনকা কথলিকা পাদকথলিকাতি দস্সেন্তো আহ ‘‘পাদপীঠং নামা’’তিআদি. অনঞ্ঞাযাতি এত্থ যকারো ত্ৰাপচ্চযস্স কারিযোতি আহ ‘‘অজানিত্ৰা’’তি. নেত্থারৰত্তেতি উক্খেপনীযকম্মতো নিত্থরণকারণে ৰত্তে. ‘‘ৰত্তমান’’ন্তিইমিনা ‘‘ৰত্তন্তি’’ন্তি এত্থ অন্তপচ্চযং নযেন দস্সেতীতি. চতুত্থং.

৫. পঞ্চমসঙ্ঘাদিসেসসিক্খাপদং

৭০১. পঞ্চমে ‘‘একতো অৰস্সুতে’’তি এত্থ হেট্ঠা ৰুত্তনযেন ‘‘একতো’’তি সামঞ্ঞতো ৰুত্তেপি ভিক্খুনিযা এৰ গহেতব্বভাৰঞ্চ তোপচ্চযস্স ছট্ঠুত্থে পৰত্তভাৰঞ্চ অৰস্সুভপদে ভাৰত্থঞ্চ দস্সেতুং ৰুত্তং ‘‘ভিক্খুনিযা অৰস্সুতভাৰো দট্ঠব্বো’’তি. এতন্তি ‘‘ভিক্খুনিযা অৰস্সুতভাৰো’’তি ৰচনং. তন্তি অৰচনং. পাল়িযাতি ইমায সিক্খাপদপাল়িযাতি. পঞ্চমং.

৬. ছট্ঠসঙ্ঘাদিসেসসিক্খাপদং

৭০৫. ছট্ঠে যতো ত্ৰন্তি এত্থ কারণত্থে তোপচ্চযোতি আহ ‘‘যস্মা’’তি. কস্সা হোন্তীতি উয্যোজিকাউয্যোজিতাসু কস্সা ভিক্খুনিযা হোন্তীতি যোজনা. ন দেতীতি উয্যোজিকা উয্যোজিতায ন দেতি. ন পটিগ্গণ্হাতীতি উয্যোজিতা উয্যোজিকায হত্থতো ন পটিগ্গণ্হাতি. পটিগ্গহো তেন ন ৰিজ্জতীতি তেনেৰ কারণেন উয্যোজিকায হত্থতো উয্যোজিতায পটিগ্গহো ন ৰিজ্জতি. আপজ্জতি গরুকং, ন লহুকন্তি এৰং সন্তেপি উয্যোজিকা গরুকমেৰ সঙ্ঘাদিসেসাপত্তিং আপজ্জতি, ন লহুকং. তঞ্চাতি তং আপজ্জনঞ্চ. পরিভোগপচ্চযাতি উয্যোজিকায পরিভোগসঙ্খাতা কারণাতি অযং গাথাযত্থো.

ইতরিস্সা পনাতি উয্যোজিতায পন ভিক্খুনিযা. পঠমসিক্খাপদেতি পঞ্চমসিক্খাপদে. পঞ্চমসিক্খাপদঞ্হি ইমিনা সিক্খাপদেন যুগল়ভাৰেন সদিসত্তা ইমং উপাদায পঠমন্তি ৰুত্তন্তি. ছট্ঠং.

৭. সত্তমসঙ্ঘাদিসেসসিক্খাপদং

৭০৯. সত্তমে যাৰততিযকপদত্থোতি ‘‘যাৰততিযক’’ন্তি উচ্চারিতস্স পদস্স অত্থো ৰেদিতব্বোতি সম্বন্ধোতি. সত্তমং.

৮. অট্ঠমসঙ্ঘাদিসেসসিক্খাপদং

৭১৫. অট্ঠমে কিস্মিংচিদেৰ অধিকরণেতি নিদ্ধারণীযস্স নিদ্ধারণসমুদাযেন অৰিনাভাৰতো আহ ‘‘চতুন্ন’’ন্তি. কস্মা পন নিদ্ধারণসমুদাযনিদ্ধারণীযভাৰেন ৰুত্তং, ননু পদভাজনে চত্তারিপি অধিকরণানি ৰুত্তানীতি আহ ‘‘পদভাজনে পনা’’তিআদীতি. অট্ঠমং.

৯. নৰমসঙ্ঘাদিসেসসিক্খাপদং

৭২৩. নৰমে সংসট্ঠসদ্দো মিস্সপরিযাযোতি আহ ‘‘মিস্সীভূতা’’তি. ‘‘অননুলোমেনা’’তিইমিনা ‘‘অননুলোমিকেনা’’তি এত্থ ইকসদ্দো স্ৰত্থোতি দস্সেতি. কোট্টনঞ্চ পচনঞ্চ গন্ধপিসনঞ্চ মালাগন্থনঞ্চ. আদিসদ্দেন অঞ্ঞেপি অননুলোমিকে কাযিকে সঙ্গণ্হাতি. সাসনাহরণঞ্চ পটিসাসনহরণঞ্চ সঞ্চরিত্তঞ্চ. আদিসদ্দেন অঞ্ঞেপি অননুলোমিকে ৰাচসিকে সঙ্গণ্হাতি. এতাসন্তি ভিক্খুনীনং. সিলোকোতি যসোতি. নৰমং.

১০. দসমসঙ্ঘাদিসেসসিক্খাপদং

৭২৭. দসমে এৰাচারাতি এত্থ নিগ্গহিতলোপৰসেন সন্ধীতি আহ ‘‘এৰংআচারা’’তি. ‘‘যাদিসো’’তিআদিনা এৰংসদ্দস্স নিদস্সনাদীসু (অভিধানপ্পদীপিকাযং ১১৮৬ গাথাযং) একাদসসু অত্থেসু উপমত্থং দস্সেতি. সব্বত্থাতি ‘‘এৰংসদ্দা এৰংসিলোকা’’তি সব্বেসু পদেসু. উঞ্ঞাযাতি এত্থ ওকারৰিপরীতো উকারোতি আহ ‘‘অৰঞ্ঞাযা’’তি. ‘‘নীচং কত্ৰা জাননাযা’’তি ইমিনা অৰসদ্দো নীচত্থো, ঞাধাতু অৰবোধনত্থোতি দস্সেতি. ‘‘পরিভৰঞ্ঞাযা’’তি ৰত্তব্বে উত্তরপদলোপৰসেন ‘‘পরিভৰেনা’’তি ৰুত্তন্তি আহ ‘‘পরিভৰিত্ৰা জাননেনা’’তি. অক্খন্তিযাতি এত্থ সহনখন্তিযেৰাধিপ্পেতা, নেৰ অনুলোমখন্তি, ন দিট্ঠিনিজ্ঝানক্খন্তীতি দস্সেন্তো আহ ‘‘অসহনতাযা’’তি. ৰেভস্সিযাতি এত্থ ৰিসেসেন ভাসেতি ওভাসেতীতি ৰিভাসো আনুভাৰো, ৰিভাসো ইমস্স সঙ্ঘস্স অত্থীতি ৰিভস্সো সঙ্ঘো, বহ্ৰত্থে চ অতিসযত্থে চ সপচ্চযো হোতি. কস্মা? মন্তুপচ্চযত্থত্তা ‘‘লোমসো’’তিআদীসু (জা. ১.১৪.৫৭) ৰিয, বহুআনুভাৰো অতিসযআনুভাৰো সঙ্ঘোতি ৰুত্তং হোতি, সংযোগপরত্তা আকারস্স রস্সো. ৰিভস্সস্স ভাৰো ৰেভস্সিযং, বহুআনুভাৰো অতিসযআনুভাৰোযেৰ. ইতি ইমমত্থং দস্সেন্তো আহ ‘‘বলৰভস্সভাৰেনা’’তি. তত্থ বলৰইতি পদেন মন্তুঅত্থে পৰত্তস্স সপ্পচ্চযস্স বহ্ৰত্থঞ্চ অতিসযত্থঞ্চ দস্সেতি, ভাৰইতি পদেন ণিযপচ্চযস্স ভাৰত্থং, এনইতি পদেন নিস্সক্কৰচনস্স করণত্থে পৰত্তভাৰং দস্সেতি. তমেৰত্থমাৰিকরোন্তো আহ ‘‘অত্তনো বলৰপ্পকাসনেনা’’তি. তত্থ অত্তনোতি অত্তসঙ্খাতস্স সঙ্ঘস্স. বলৰপ্পকাসনেনাতি বহুআনুভাৰপ্পকাসনেন, অতিসযআনুভাৰপ্পকাসনেন ৰা. বলৰপ্পকাসনং নাম অত্থতো পরেসং সমুত্রাসনমেৰাতি আহ ‘‘সমুত্রাসনেনাতি অত্থো’’তি. দুব্বলভাৰেনাতি এত্থ ভাৰইতিপদেন ণ্যপচ্চযস্স ভাৰত্থং, এনইতিপদেন নিস্সক্কৰচনস্স করণত্থং দস্সেতীতি দট্ঠব্বং. সব্বত্থাতি ‘‘উঞ্ঞাযা’’তিআদীসু সব্বেসু পদেসু. চসদ্দো লুত্তনিদ্দিট্ঠোতি আহ ‘‘এৰং সমুচ্চযত্থো দট্ঠব্বো’’তি. ৰিৰিচ্চথাতি এত্থ ৰীত্যূপসগ্গো ৰিনাসদ্দত্থো, ৰিচধাতু সত্তত্থোতি আহ ‘‘ৰিনা হোথা’’তি. দসমং.

অনন্তরা পক্খিপিত্ৰাতি সম্বন্ধো. মহাৰিভঙ্গতো আহরিতানি ইমানি তীণি সিক্খাপদানীতি যোজনা. নৰ পঠমাপত্তিকা ৰেদিতব্বাতি সম্বন্ধো. সব্বেপি ধম্মাতি যোজনা. এত্থাতি ‘‘উদ্দিট্ঠা খো’’তিআদিপাঠে. তং পনাতি পক্খমানত্তং পনাতি.

ইতি সমন্তপাসাদিকায ৰিনযসংৰণ্ণনায

ভিক্খুনিৰিভঙ্গে

সত্তরসকৰণ্ণনায যোজনা সমত্তা.

৩. নিস্সগ্গিযকণ্ডং

১. পঠমনিস্সগ্গিযপাচিত্তিযসিক্খাপদ-অত্থযোজনা

তিংস নিস্সগ্গিযা যে ধম্মা ভিক্খুনীনং ভগৰতা পকাসিতা, তেসং ধম্মানং দানি ইমস্মিং কালে অযং সংৰণ্ণনাক্কমো ভৰতীতি যোজনা.

৭৩৩. পঠমে আমত্তিকাপণন্তি এত্থ আমত্তসদ্দো ভাজনপরিযাযোতি আহ ‘‘ভাজনানী’’তি. ভাজনানি হি অমন্তি পরিভুঞ্জিতব্বভাৰং গচ্ছন্তীতি ‘‘অমত্তানী’’তি ৰুচ্চন্তি. অমত্তানি ৰিক্কিণন্তীতি ‘‘আমত্তিকা’’তি ৰচনত্থং দস্সেন্তো আহ ‘‘তানী’’তিআদি. তেসন্তি আমত্তিকানং. তং ৰাতি আমত্তিকাপণং ৰা.

৭৩৪. ‘‘সন্নিধি’’ন্তি ইমিনা সংনিপুব্বো চিসদ্দো উচিননত্থোতি দস্সেতি. হিসদ্দো ৰিসেসজোতকো. তত্থাতি মহাৰিভঙ্গে. ইধাতি ভিক্খুনিৰিভঙ্গে.

ইদম্পীতি ইদং সিক্খাপদম্পি. পিসদ্দো মহাৰিভঙ্গসিক্খাপদং অপেক্খতীতি. পঠমং.

২. দুতিযনিস্সগ্গিযপাচিত্তিযসিক্খাপদং

৭৩৮. দুতিযে অহতচোল়ানম্পি সেদমলাদিকিলিন্নে ৰিরূপত্তা ‘‘জিণ্ণচোল়া’’তি ৰুত্তং. ‘‘অপি অয্যাহী’’তিইমিনা ‘‘অপ অয্যাহী’’তিপদৰিভাগং নিৰত্তেতি.

৭৪০. সব্বম্পি এতং চীৰরন্তি যোজনা. এৰং পটিলদ্ধন্তি এৰং নিস্সজ্জিত্ৰা লদ্ধং. যথাদানেযেৰাতি যথা দাযকেহি দিন্নং, তস্মিং দানেযেৰ উপনেতব্বং, অকালচীৰরেযেৰ পক্খিপিতব্বন্তি অত্থোতি. দুতিযং.

৩. ততিযনিস্সগ্গিযপাচিত্তিযসিক্খাপদং

৭৪৩. ততিযে হন্দসদ্দো ৰৰস্সগ্গত্থে নিপাতোতি আহ ‘‘হন্দাতি গণ্হা’’তি. বহূনি নিস্সগ্গিযানীতি সম্বন্ধো. সংহরিত্ৰাতি ৰিসুং ৰিসুং সঙ্ঘরিত্ৰাতি. ততিযং.

৪. চতুত্থনিস্সগ্গিযপাচিত্তিযসিক্খাপদং

৭৪৮. চতুত্থে কিণাতি অনেনাতি কযন্তি ৰচনত্থেন মূলং কযং নামাতি আহ ‘‘মূলেনা’’তি. সাতি থুল্লনন্দা, আহ কিরাতি সম্বন্ধো. ঞাধাতুযা অৰবোধনত্থতো অঞ্ঞম্পি ঞাধাতুযা যাচনত্থং দস্সেন্তো আহ ‘‘যাচিত্ৰা ৰা’’তি.

৭৫২. যন্তি সব্বিতেলাদি. তঞ্ঞেৰাতি সব্বিতেলাদিমেৰ. যমকন্তি সব্বিং সহ তেলেন যুগল়ং কত্ৰা. ৰেজ্জেনাতি ভিসক্কেন. সো হি আযুব্বেদসঙ্খাতং ৰিজ্জং জানাতীতি ৰেজ্জোতি চ রোগঞ্চ তস্স নিদানঞ্চ ভেসজ্জঞ্চ ৰিদতি জানাতীতিপি ৰেজ্জোতি চ ৰুচ্চতি. ততোতি ৰেজ্জেন ৰুত্তকারণা. কহাপণস্সাতি কহাপণেন, আভতন্তি সম্বন্ধোতি. চতুত্থং.

৫. পঞ্চমনিস্সগ্গিযপাচিত্তিযসিক্খাপদং

৭৫৩. পঞ্চমে সাতি সিক্খমানা. অযন্তি সিক্খমানা. অদ্ধাতি একংসেন. ‘‘চেতাপেত্ৰা’’তি এত্থ চিতিসদ্দো জাননত্থোতি আহ ‘‘জানাপেত্ৰা’’তি. পঞ্চমং.

৬. ছট্ঠনিস্সগ্গিযপাচিত্তিযসিক্খাপদং

৭৫৮. ছট্ঠে ছন্দং উপ্পাদেত্ৰা গহিতং ছন্দকন্তি ৰচনত্থং দস্সেন্তো আহ ‘‘ছন্দক’’ন্তিআদি. ধম্মকিচ্চন্তি পুঞ্ঞকরণীযং. ধম্মসদ্দো হেত্থ পুঞ্ঞৰাচকো. যন্তি ৰত্থুং. পরেসন্তি অত্তনা অঞ্ঞেসং. ‘‘এত’’ন্তি ‘‘ছন্দক’’ন্তি এতং নামং. ‘‘অঞ্ঞস্সত্থায দিন্নেনা’’তিইমিনা অঞ্ঞস্স অত্থো অঞ্ঞদত্থো, দকারো পদসন্ধিকরো, তদত্থায দিন্নো অঞ্ঞদত্থিকোতি ৰচনত্থং দস্সেতি. ‘‘অঞ্ঞং উদ্দিসিত্ৰা দিন্নেনা’’তিইমিনা অঞ্ঞং উদ্দিসিত্ৰা দিন্নং অঞ্ঞুদ্দিসিকন্তি ৰচনত্থং দস্সেতি. ‘‘সঙ্ঘস্স পরিচ্চত্তেনা’’তি ইমিনা সঙ্ঘস্স পরিচ্চত্তো সঙ্ঘিকোতি ৰচনত্থং দস্সেতি.

৭৬২. যদত্থাযাতি যেসং চীৰরাদীনং অত্থায. যসদ্দেন সমাসভাৰতো পুব্বে নিগ্গহিতাগমো হোতি. তন্তি চীৰরাদিকং. তুম্হেহীতি দাযকে সন্ধায ৰুত্তং. উপদ্দৰেসূতি দুব্ভিক্খাদিউপসগ্গেসু. যং ৰা তং ৰাতি চীৰরং ৰা অঞ্ঞে ৰা পিণ্ডপাতাদিকেতি যং ৰা তং ৰাতি. ছট্ঠং.

৭. সত্তমনিস্সগ্গিযপাচিত্তিযসিক্খাপদং

৭৬৪. সত্তমে সঞ্ঞাচিকেনাতি এত্থ সংসদ্দস্স সযমত্থে পৰত্তিভাৰং দস্সেতুং ৰুত্তং ‘‘সযং যাচিতকেনা’’তি. এতদেৰাতি ‘‘সঞ্ঞাচিকেনা’’তি পদমেৰ. এত্থাতি ইমস্মিং সিক্খাপদেতি. সত্তমং.

৮. অট্ঠমনিস্সগ্গিযপাচিত্তিযসিক্খাপদং

৭৬৯. অট্ঠমে গণস্সাতি ভিক্খুনিগণস্স. ইমিনা ‘‘মহাজনিকেনা’’তি এত্থ ভিক্খুনিগণোৰ মহাজনোতি অধিপ্পেতোতি দীপেতীতি. অট্ঠমং.

৯. নৰমনিস্সগ্গিযপাচিত্তিযসিক্খাপদং

৭৭৪. নৰমে ইতোতি ইমস্মা অট্ঠমসিক্খাপদতো. অধিকতরন্তি অতিরেকতরন্তি. নৰমং.

১০. দসমনিস্সগ্গিযপাচিত্তিযসিক্খাপদং

৭৭৮. দসমে ‘‘ৰিনস্সতী’’তিইমিনা ‘‘উন্দ্রিযতী’’তি এত্থ উদিধাতুযা নস্সনত্থং দস্সেতি ধাতূনমনেকত্থত্তা. পরিপততীতি পরিগলিত্ৰা পততি. ইমিনা নস্সনাকারং দস্সেতি. এত্তকমেৰাতি এতং পরিমাণং দ্ৰিপদমেৰাতি. দসমং.

১১. একাদসমনিস্সগ্গিযপাচিত্তিযসিক্খাপদং

৭৮৪. একাদসমে গরুপাৰুরণং নাম সীতকালে পাৰুরণৰত্থন্তি দস্সেন্তো আহ ‘‘সীতকালে পাৰুরণ’’ন্তি. সীতকালে হি মনুস্সা থূলপাৰুরণং পারুপন্তি. ‘‘চতুক্কংসপরম’’ন্তি এত্থ কংসসদ্দো ভুঞ্জনপত্তে চ সুৰণ্ণাদিলোহৰিসেসে চ চতুকহাপণে চাতি তীসু অত্থেসু দিস্সতি, ইধ পন চতুকহাপণে ৰত্ততীতি দস্সেন্তো আহ ‘‘কংসো নাম চতুক্কহাপণিকো হোতী’’তি. চতুক্কংসসঙ্খাতং পরমং ইমস্সাতি চতুক্কংসপরমং, সোল়সকহাপণগ্ঘনকং পাৰুরণন্তি অত্থোতি. একাদসমং.

১২. দ্ৰাদসমনিস্সগ্গিযপাচিত্তিযসিক্খাপদং

৭৮৯. দ্ৰাদসমে লহুপাৰুরণং নাম উণ্হকালে পাৰুরণৰত্থন্তি দস্সেন্তো আহ ‘‘উণ্হকালে পাৰুরণ’’ন্তি. উণ্হকালে হি মনুস্সা সুখুমপাৰুরণং পারুপন্তীতি. দ্ৰাদসমং.

নিস্সগ্গিযানং তিংসভাৰং দস্সেন্তো আহ ‘‘মহাৰিভঙ্গে’’তিআদি. চীৰরৰগ্গতো অপনেত্ৰাতি সম্বন্ধো. অঞ্ঞদত্থিকানীতি অঞ্ঞদত্থিকপদেন ৰুত্তানি সিক্খাপদানি. ইতীতি এৰং. একতোপঞ্ঞত্তানীতি একস্সেৰ পঞ্ঞত্তানি, উভতোপঞ্ঞত্তানীতি উভযেসং পঞ্ঞত্তানি. এত্থাতি ‘‘উদ্দিট্ঠা খো’’তিআদিৰচনেতি.

ইতি সমন্তপাসাদিকায ৰিনযসংৰণ্ণনায

ভিক্খুনিৰিভঙ্গে

তিংসকৰণ্ণনায যোজনা সমত্তা.

৪. পাচিত্তিযকণ্ডং

১. লসুণৰগ্গো

১. পঠমসিক্খাপদ-অত্থযোজনা

তিংসকানন্তরং তিংসকানং অনন্তরে কালে ছসট্ঠিসতসঙ্গহা ছউত্তরসট্ঠিঅধিকসতেহি সিক্খাপদেহি সঙ্গহিতা যে ধম্মা সঙ্গীতিকারেহি সঙ্গীতা, দানি ইমস্মিং কালে তেসম্পি ধম্মানং অযং ৰণ্ণনা হোতীতি যোজনা.

৭৯৩. তত্থাতি তেসু ছসট্ঠিসতসঙ্গহেসু সিক্খাপদেসু, পঠমসিক্খাপদেতি সম্বন্ধো. ‘‘দ্ৰে তযো’’তি এত্থ ৰাসদ্দো লুত্তনিদ্দিট্ঠোতি আহ ‘‘দ্ৰে ৰা তযো ৰা’’তি. ফোটলকেতি কন্দে, মিঞ্জে ৰা. এতন্তি ‘‘গণ্ডিকে’’তি এতং নামং. ‘‘পমাণ’’ন্তিইমিনা মত্তসদ্দো পমাণত্থোৰ, ন অপ্পত্থো, নাপি অৰধারণত্থোতি দস্সেতি. লসুণন্তি সেতৰণ্ণমূলং মহাকন্দং. মহাকন্দো হি ব্যঞ্জনসম্পাকাদীসু আমগন্ধানং অভিভৰনত্তা লসীযতি কন্তীযতীতি লসুণন্তি ৰুচ্চতি.

সুৰণ্ণহংসযোনিন্তি সুৰণ্ণমযেন পত্তেন যুত্তং হংসযোনিং. জাতিস্সরোতি জাতিং ভৰং সরতি জানাতীতি জাতিস্সরো. অথাতি জাতিস্সরস্স নিপ্ফন্নত্তা. নিপ্ফন্নত্থো হি অথসদ্দো. পুব্বসিনেহেনাতি পুব্বে মনুস্সভৰে ভাৰিতেন সিনেহেন. তাসন্তি পজাপতিযা চ তিস্সন্নং ধীতরানঞ্চ. তং পনাতি পত্তং পন.

৭৯৫. মগধেসূতি মগধরট্ঠে ঠিতেসু জনপদেসু. হীতি সচ্চং, যস্মা ৰা. ইধাতি ‘‘লসুণং খাদেয্যা’’তিপদে. তম্পীতি মাগধকম্পি. গণ্ডিকলসুণমেৰাতি গণ্ডো ফোটো এতস্সত্থীতি গণ্ডিকং. গণ্ডসদ্দো হি ফোটপরিযাযো, বহুত্থে ইকপচ্চযো. বহুগণ্ডিকলসুণন্তি হি ৰুত্তং হোতি. গণ্ডসদ্দো হি ফোটে চ কপোলে চাতি দ্ৰীসু অত্থেসু ৰত্ততি, ইধ পন ফোটে ৰত্ততীতি দট্ঠব্বং. পোত্থকেসু পন ওট্ঠজেন চতুত্থক্খরেন পাঠো অত্থি, সো ৰীমংসিত্ৰা গহেতব্বো. বহূসু হি পুব্বপোত্থকেসু কণ্ঠজো ততিযক্খরো চ ওট্ঠজো চতুত্থক্খরো চাতি দ্ৰে অক্খরা অঞ্ঞমঞ্ঞং পরিৰত্তিত্ৰা তিট্ঠন্তি. ন একদ্ৰিতিমিঞ্জকন্তি একমিঞ্জো পলণ্ডুকো ন হোতি, দ্ৰিমিঞ্জো ভঞ্জনকো ন হোতি, তিমিঞ্জো হরিতকো ন হোতীতি অত্থো. কুরুন্দিযং পন ৰুত্তন্তি সম্বন্ধো. সঙ্খাদিত্ৰাতি দন্তেহি চুণ্ণৰিচুণ্ণং কত্ৰা.

৭৯৭. পলণ্ডুকোতি সুকন্দকো একো লসুণৰিসেসো. ভঞ্জনকাদীনি লোকসঙ্কেতোপদেসতো দট্ঠব্বানি. হীতি সচ্চং. তস্সাতি চাপলসুণস্স. সভাৰেনেৰাতি সূপসম্পাকাদিং ৰিনা অত্তনো সভাৰতো এৰ. তন্তি মাগধকং, পক্খিপিতুন্তি সম্বন্ধো. হীতি সচ্চং. যত্থ কত্থচীতি যেসু কেসুচীতি. পঠমং.

২. দুতিযসিক্খাপদং

৭৯৯. দুতিযে সংদস্সনং বাধতি নিসেধেতি অস্মিং ঠানেতি সম্বাধন্তি ৰচনত্থেন পটিচ্ছন্নোকাসো সম্বাধো নামাতি দস্সেন্তো আহ ‘‘পটিচ্ছন্নোকাসে’’তি. উভো উপকচ্ছকাতি দ্ৰে বাহুমূলা. তে হি উপরি যংকিঞ্চি ৰত্থুং কচতি বন্ধতি এত্থাতি উপকচ্ছকাতি ৰুচ্চন্তি. মুত্তকরণন্তি পস্সাৰমগ্গো. সো হি মুত্তং করোতি অনেনাতি মুত্তকরণন্তি ৰুচ্চতি. লোমো কত্তীযতি ছিন্দীযতি ইমাযাতি কত্তরি, তায ৰা, সুট্ঠু দল়্হং লোমং ডংসতীতি সণ্ডাসো, সোযেৰ সণ্ডাসকো, তেন ৰা, খুরতি লোমং ছিন্দতীতি খুরো, তেন ৰা সংহরাপেন্তিযাতি সম্বন্ধো. সংহরাপেন্তিযাতি অপনেন্তিযাতি. দুতিযং.

৩. ততিযসিক্খাপদং

৮০৩. ততিযে মুত্তকরণতলঘাতনেতি মুত্তকরণস্স তলং হননং পহরণং মুত্তকরণতলঘাতনং, তস্মিং মুত্তকরণতলঘাতনে নিমিত্তভূতে. তাৰ মহন্তন্তি অতিৰিয মহন্তং. কেসরেনাপীতি কিঞ্জক্খেনাপি. সো হি কে জলে সরতি পৰত্ততীতি কেসরোতি ৰুচ্চতি.

৮০৫. গণ্ডং ৰাতি পীল়কং ৰা. ৰণং ৰাতি অরুং ৰাতি. ততিযং.

৪. চতুত্থসিক্খাপদং

৮০৬. চতুত্থে রঞ্ঞো ওরোধা রাজোরোধা, পুরাণে রাজোরোধা পুরাণরাজোরোধাতি ৰচনত্থং দস্সেন্তো আহ ‘‘পুরাণে’’তিআদি. ‘‘গিহিভাৰে’’তি ইমিনা পুরাণেতি এত্থ ণপচ্চযস্স সরূপং দস্সেতি. চিরাচিরন্তি নিপাতপটিরূপকং. তেন ৰুত্তং ‘‘চিরেন চিরেনা’’তি. ‘‘সক্কোথা’’তি ইমিনা কথং তুম্হে রাগচিত্তং পটিহনিত্ৰা অত্তানং ধারেথ ধারেতুং সক্কোথাতি অত্থং দস্সেতি. অনারোচিতেপীতি ভূততো অনারোচিতেপি.

৮০৭. জতুনাতি লাখায. পট্ঠদণ্ডকেতি পটুভাৰেন ঠাতি পৰত্ততীতি পট্ঠো, সোযেৰ দণ্ডো পট্ঠদণ্ডো, তস্স পৰেসনং পট্ঠদণ্ডকং, তস্মিং নিমিত্তভূতে. এতন্তি ‘‘জতুমট্ঠকে’’তি এতং ৰচনন্তি. চতুত্থং.

৫. পঞ্চমসিক্খাপদং

৮১০. পঞ্চমে ‘‘অতিগম্ভীর’’ন্তিপদং কিরিযাৰিসেসনন্তি আহ ‘‘অতিঅন্তো পৰেসেত্ৰা’’তি. ‘‘উদকেন ধোৰনং কুরুমানা’’তি ইমিনা ‘‘উদকসুদ্ধিক’’ন্তিপদস্স উদকেন সুদ্ধিযা করণন্তি অত্থং দস্সেতি.

৮১২. দ্ৰঙ্গুলপব্বপরমন্তি এত্থ দ্ৰে অঙ্গুলানি চ দ্ৰে পব্বানি চ দ্ৰঙ্গুলপব্বং, উত্তরপদে পুব্বপদলোপো. দ্ৰঙ্গুলপব্বং পরমং পমাণং এতস্স উদকসুদ্ধিকস্সাতি দ্ৰঙ্গুলপব্বপরমং. ৰিত্থারতো দ্ৰঙ্গুলপরমং, গম্ভীরতো দ্ৰিপব্বপরমন্তি ৰুত্তং হোতি. তেনাহ ‘‘ৰিত্থারতো’’তিআদি. অঙ্গুলং পৰেসেন্তিযাতি সম্বন্ধো. হীতি সচ্চং. ‘‘চতুন্নং ৰা’’তি ইদং উক্কট্ঠৰসেন ৰুত্তং, তিণ্ণম্পি পব্বং ন ৰট্টতি, চতুন্নং পন পগেৰাতি অত্থোতি. পঞ্চমং.

৬. ছট্ঠসিক্খাপদং

৮১৫. ছট্ঠে ভত্তস্স ৰিস্সজ্জনং ভত্তৰিস্সগ্গোতি ৰুত্তে ভত্তকিচ্চন্তি দস্সেন্তো আহ ‘‘ভত্তকিচ্চ’’ন্তি. পানীযসদ্দেন পানীযথালকং গহেতব্বং, ৰিধূপনসদ্দেন বীজনী গহেতব্বা, উপসদ্দো সমীপত্থোতি সব্বং দস্সেন্তো আহ ‘‘একেন হত্থেনা’’তিআদি. ‘‘অচ্চাৰদতী’’তিপদস্স অতিক্কমিত্ৰা ৰদনাকারং দস্সেতি ‘‘পুব্বেপী’’তিআদিনা.

৮১৭. ‘‘সুদ্ধউদকং ৰা হোতূ’’তিআদিনা ‘‘পানীযেনা’’তি ৰচনং উপলক্খণং নামাতি দস্সেতি. দধিমত্থূতি দধিমণ্ডং দধিনো সারো, দধিম্হি পসন্নোদকন্তি ৰুত্তং হোতি. রসোতি মচ্ছরসো মংসরসো. ‘‘অন্তমসো চীৰরকণ্ণোপী’’তি ইমিনা ‘‘ৰিধূপনেনা’’তি ৰচনং নিদস্সনং নামাতি দস্সেতি.

৮১৯. দেতীতি সযং দেতি. দাপেতীতি অঞ্ঞেন দাপেতি. উভযম্পীতি পানীযৰিধূপনদ্ৰযম্পীতি. ছট্ঠং.

৭. সত্তমসিক্খাপদং

৮২২. সত্তমে ‘‘পযোগদুক্কটং নামা’’তি ইমিনা হেট্ঠা ৰুত্তেসু অট্ঠসু দুক্কটেসু পুব্বপযোগদুক্কটং দস্সেতি. ন কেৰলং পুব্বপযোগদুক্কটং এত্তকমেৰ, অথ খো অঞ্ঞম্পি বহু হোতীতি দস্সেন্তো আহ ‘‘তস্মা’’তিআদি. সঙ্ঘট্টনেসুপীতি ৰিলোল়নেসুপি. দন্তেহি সঙ্খাদতীতি দন্তেহি চুণ্ণৰিচুণ্ণং করোতি. এত্থাতি ইমস্মিং সিক্খাপদে, অঞ্ঞায ভিক্খুনিযা কারাপেত্ৰাতি সম্বন্ধো. ‘‘অঞ্ঞাযা’’তিপদং ‘‘ৰিঞ্ঞাপেত্ৰা’’তি পদে কারিতকম্মং. মাতরম্পীতি এত্থ পিসদ্দো অঞ্ঞং ৰিঞ্ঞাপেত্ৰা ভুঞ্জন্তিযা পগেৰাতি দস্সেতি. তায ৰাতি ৰিঞ্ঞাপিতভিক্খুনিযা ৰা. তন্তি আমকধঞ্ঞং. তন্তি মহাপচ্চরিযং ৰুত্তৰচনং. পুব্বাপরৰিরুদ্ধন্তি পুব্বাপরতো ৰিরুদ্ধং. ‘‘অঞ্ঞায…পে… দুক্কটমেৰা’’তি পুব্বৰচনে দুক্কটমেৰ ৰুত্তং, পুন ‘‘অঞ্ঞায…পে… দুক্কট’’ন্তি চ পচ্ছিমৰচনে পাচিত্তিযঞ্চ দুক্কটঞ্চ ৰুত্তং, তস্মা পুব্বাপরৰিরুদ্ধন্তি ৰুত্তং হোতি. হীতি সচ্চং, যস্মা ৰা.

৮২৩. লব্ভমানং আমকধঞ্ঞন্তি সম্বন্ধো. অঞ্ঞং ৰা যংকিঞ্চীতি মুগ্গমাসাদীহি ৰা লাবুকুম্ভণ্ডাদীহি ৰা অঞ্ঞং যংকিঞ্চি তিলাদিং ৰাতি. সত্তমং.

৮. অট্ঠমসিক্খাপদং

৮২৪. অট্ঠমে নিব্বিট্ঠরাজভটোতি এত্থ উত্তরপদস্স ছট্ঠীসমাসঞ্চ পুব্বপদেন বাহিরত্থসমাসঞ্চ দস্সেন্তো আহ ‘‘নিব্বিট্ঠো’’তিআদি. তত্থ ‘‘রঞ্ঞো ভতী’’তি ইমিনা রঞ্ঞো ভটো রাজভটোতি ছট্ঠীসমাসং দস্সেতি, ‘‘এতেনা’’তি ইমিনা বাহিরত্থসমাসং. নিব্বিট্ঠোতি নিৰিট্ঠো পতিট্ঠাপিতোতি অত্থো. কেণীতি রঞ্ঞো দাতব্বস্স আযস্সেতমধিৰচনং. এতেনাতি ব্রাহ্মণেন. ততোতি ঠানন্তরতো. ভটসঙ্খাতায কেণিযা পথত্তা কারণত্তা ঠানন্তরং ভটপথন্তি আহ ‘‘তংযেৰ ঠানন্তর’’ন্তি.

৮২৬. চত্তারিপি ৰত্থূনীতি উচ্চারাদীনি. পাটেক্কন্তি পটিৰিসুং একেকমেৰ. উচ্চারং ৰাতিআদীসু ৰাসদ্দেন দন্তকট্ঠাদযোপি গহেতব্বাতি আহ ‘‘দন্তকট্ঠ…পে… পাচিত্তিযমেৰা’’তি. সব্বত্থাতি সব্বেসু উচ্চারাদীসূতি. অট্ঠমং.

৯. নৰমসিক্খাপদং

৮৩০. নৰমে রোপিমহরিতট্ঠানেতি রোপিমট্ঠানে চ হরিতট্ঠানে চ. রোপিযতি অস্মিন্তি রোপিযং, তংযেৰ রোপিমং যকারস্স মকারং কত্ৰা. এতানীতি উচ্চারাদীনি. সব্বেসন্তি ভিক্খুভিক্খুনীনং. যত্থ পনাতি যস্মিং খেত্তেতি. নৰমং.

১০. দসমসিক্খাপদং

৮৩৫. দসমে সোণ্ডা ৰাতি সুরাসোণ্ডা ৰা. মোরোতি মযূরো. সুৰোতি সুকো. মক্কটোতি ৰানরো. আদিসদ্দেন সপ্পাদযো সঙ্গণ্হাতি, মক্কটাদযোপি নচ্চন্তূতি সম্বন্ধো. অসংযতভিক্খূনন্তি ৰাচসিককম্মে অসংযতানং ভিক্খূনং, ধম্মভাণকগীতং ৰা হোতূতি যোজনা. তন্তিযা গুণেন বদ্ধা তন্তিবদ্ধা. ‘‘ভি’’ন্তিসঙ্খাতো রাসদ্দো এতিস্সাতি ভেরি. কুটেন কতা ভেরি কুটভেরি, তায ৰাদিতং কুটভেরিৰাদিতং, তং ৰা. উদকভেরীতি উদকেন পক্খিত্তা ভেরি, তায ৰাদিতম্পি হোতূতি সম্বন্ধো.

৮৩৬. তেসংযেৰাতি যেসং নচ্চং পস্সতি, তেসংযেৰ. যদি পন নচ্চগীতৰাদিতে ৰিসুং ৰিসুং পস্সতি সুণাতি, পাটেক্কা আপত্তিযোতি দস্সেন্তো আহ ‘‘সচে পনা’’তিআদি. অঞ্ঞতোতি অঞ্ঞতো দেসতো, পস্সতীতি সম্বন্ধো. ‘‘ওলোকেত্ৰা’’তি পদে অপেক্খিতে উপযোগত্থে তোপচ্চযো হোতি. অঞ্ঞং ওলোকেত্ৰাতি হি অত্থো. অঞ্ঞতো ৰাদেন্তে পস্সতীতি যোজনা. ভিক্খুনী ন লভতীতি সম্বন্ধো. অঞ্ঞে ৰত্তুম্পীতি সম্বন্ধো. উপহারন্তি পূজং. উপট্ঠানন্তি পারিচরিযং. সব্বত্থাতি সব্বেসু সযং নচ্চাদীসু.

৮৩৭. অন্তরারামে ৰাতি আরামস্স অন্তরে ৰা. বহিআরামে ৰাতি আরামস্স বহি ৰা. অঞ্ঞেন ৰাতি সলাকভত্তাদীহি অঞ্ঞেন ৰা. তাদিসেনাতি যাদিসো চোরাদিউপদ্দৰো, তাদিসেনাতি. দসমং.

লসুণৰগ্গো পঠমো.

২. অন্ধকারৰগ্গো

১. পঠমসিক্খাপদ-অত্থযোজনা

৮৩৯. অন্ধকারৰগ্গস্স পঠমে অপ্পদীপেতি উপলক্খণৰসেন ৰুত্তত্তা অঞ্ঞেপি আলোকা গহেতব্বাতি দস্সেন্তো আহ ‘‘পদীপচন্দসূরিযঅগ্গীসূ’’তিআদি. অস্সাতি ‘‘অপ্পদীপে’’তিপদস্স.

৮৪১. নরহোঅস্সাদাপেক্খা হুত্ৰা চ রস্সাদতো অঞ্ঞৰিহিতাৰ হুত্ৰা চাতি যোজনা. ইমিনা ‘‘সন্তিট্ঠতি ৰা সল্লপতি ৰা’’তি পদে কিরিযাৰিসেসনভাৰং দস্সেতি. দানেন ৰা নিমিত্তভূতেন, পূজায ৰা নিমিত্তভূতায মন্তেতীতি যোজনাতি. পঠমং.

২. দুতিযসিক্খাপদং

৮৪২. দুতিযে ইদমেৰ পদং নানন্তি সম্বন্ধোতি. দুতিযং.