৩. পরম্পরভোজনসিক্খাপদং

২২১. ততিযে ‘‘ন খো…পে… করোন্তী’’তিপাঠস্স অত্থসম্বন্ধং দস্সেন্তো আহ ‘‘যেন নিযামেনা’’তিআদি. তত্থ ‘‘যেন নিযামেনা’’তিইমিনা ‘‘যথযিমে মনুস্সা’’তি এত্থ যথাসদ্দস্স যংসদ্দত্থভাৰং দস্সেতি. তেনাতি তেন নিযামেন. ইমিনা যথাসদ্দস্স নিযমনিদ্দিট্ঠভাৰং দস্সেতি. ‘‘ঞাযতী’’তিইমিনা কিরিযাপাঠসেসং দস্সেতি. ‘‘সাসনং ৰা দানং ৰা’’তিপদেহি ইদংসদ্দস্স অত্থং দস্সেতি. বুদ্ধপ্পমুখে সঙ্ঘেতি সম্পদানত্থে চেতানি ভুম্মৰচনানি, বুদ্ধপ্পমুখস্স সঙ্ঘস্স দানং ৰাতি অত্থো. ‘‘পরিত্ত’’ন্তিইমিনা ওরকসদ্দস্স অত্থং দস্সেতি. ‘‘লামক’’ন্তিইমিনা পরিত্তসদ্দস্স পরিৰারত্থং নিৰত্তেতি. কিরো এৰ পতিভাৰে নিযুত্তো কিরপতিকোতি অত্থং দস্সেন্তো আহ ‘‘কিরপতিকোতি এত্থা’’তি আদি. সোতি কিরপতিকো. কম্মং কারেতীতি সম্বন্ধো. উপচারৰসেনাতি ৰোহারৰসেন, উপলক্খণৰসেন, পধানৰসেন ৰাতি অত্থো. ন কেৰলং বদরাযেৰ, অঞ্ঞেপি পন বহূ খাদনীযভোজনীযা পটিযত্তাতি অধিপ্পাযো. বদরেন মিস্সো বদরমিস্সো, বদরসাল়ৰোতি আহ ‘‘বদরসাল়ৰেনা’’তি. বদরচুণ্ণেন মিস্সো মধুসক্খরাদি ‘‘বদরসাল়ৰো’’তি ৰুচ্চতি.

২২২. উদ্ধং সূরো উগ্গতো অস্মিং কালেতি উস্সূরোতি ৰুত্তে অতিদিৰাকালোতি আহ ‘‘অতিদিৰা’’তি.

২২৬. অযং ভত্তৰিকপ্পনা নাম ৰট্টতীতি যোজনা. পঞ্চসু সহধম্মিকেসূতি নিদ্ধারণসমুদাযো, ইত্থন্নামস্সাতি সম্বন্ধো. যদি পন সম্মুখাপি ৰিকপ্পিতুং ৰট্টতি, তদা অত্তনা সহ ঠিতস্স ভগৰতো কস্মা ন ৰিকপ্পেতীতি আহ ‘‘সা চায’’ন্তিআদি. সা অযং ৰিকপ্পনা সঙ্গহিতাতি সম্বন্ধো. কস্মা ভগৰতো ৰিকপ্পেতুং ন ৰট্টতীতি আহ ‘‘ভগৰতি হী’’তিআদি. হীতি সচ্চং, যস্মা ৰা. সঙ্ঘেন কতন্তি সম্বন্ধো.

২২৯. ‘‘দ্ৰে তযো নিমন্তনে’’তিপদানি লিঙ্গৰিপল্লাসানীতি আহ ‘‘দ্ৰে তীণি নিমন্তনানী’’তি. নিমন্তিতব্বো এতেহীতি নিমন্তনানি ভোজনানি ভুঞ্জতীতি সম্বন্ধো. দ্ৰে তীণি কুলানি আকিরন্তীতি যোজনা. সূপব্যঞ্জনন্তি সূপো চ ব্যঞ্জনঞ্চ সূপব্যঞ্জনং. অনাপত্তি একতো মিস্সিতত্তাতি অধিপ্পাযো. মূলনিমন্তনন্তি পঠমনিমন্তনং ভোজনং. অন্তোতি হেট্ঠা. একম্পি কবল়ন্তি একম্পি আলোপং. যথা তথা ৰাতি যেন ৰা তেন ৰা আকারেন. তত্থাতি তস্মিং ভোজনে. রসং ৰাতি খীরতো অঞ্ঞং রসং ৰা. যেন খীররসেন অজ্ঝোত্থতং ভত্তং একরসং হোতি, তং খীরং ৰা তং রসং ৰা আকিরন্তীতি যোজনা. যংসদ্দো হি উত্তরৰাক্যে ঠিতো পুব্বৰাক্যে তংসদ্দং অৰগমযতি. খীরেন সংসট্ঠং ভত্তং খীরভত্তং. এৰং রসভত্তং. অঞ্ঞেপীতি খীরভত্তরসভত্তদাযকতো অঞ্ঞেপি. অনাপত্তি ভত্তেন অমিস্সিতত্তাতি অধিপ্পাযো. ‘‘ভুঞ্জন্তেনা’’তিপদং ‘‘ভুঞ্জিতু’’ন্তিপদে ভাৰকত্তা. সপ্পিপাযাসেপীতি সপ্পিনা চ পাযাসেন চ কতে ভত্তেপি.

তস্সাতি মহাউপাসকস্স. আপত্তীতি চ ৰট্টতীতি চ দ্ৰিন্নং অট্ঠকথাৰাদানং যুত্তভাৰং মহাপচ্চরিৰাদেন দস্সেতুং ৰুত্তং ‘‘মহাপচ্চরিয’’ন্তিআদি. দ্ৰে অট্ঠকথাৰাদা হি সন্ধাযভাসিতমত্তমেৰ ৰিসেসা, অত্থতো পন একা. মহাপচ্চরিযং ৰুত্তন্তি সম্বন্ধো. একোৰাতি কুম্ভিযা একোৰ. পরম্পরভোজনন্তি পরস্স পরস্স ভোজনং. নিমন্তিতম্হাতি অহং নিমন্তিতো অম্হি ননূতি অত্থো. আপুচ্ছিত্ৰাপীতি মহাউপাসকং আপুচ্ছিত্ৰাপি.

সোতি অনুমোদকো ভিক্খু. তন্তি ভিক্খুং. অঞ্ঞোতি অঞ্ঞতরো. কিন্তি কস্মা. নিমন্তিতত্তাতি নিমন্তিতভাৰতো.

সকলেন গামেন নিমন্তিতোপি একতো হুত্ৰাৰ নিমন্তিতস্স কপ্পতি, ন ৰিসুং ৰিসুন্তি আহ ‘‘একতো হুত্ৰা’’তি. পূগেপীতি সমাদপেত্ৰা পুঞ্ঞং করোন্তানং সমূহেপি. ‘‘নিমন্তিযমানো’’তিপদস্স নিমন্তনাকারং দস্সেন্তো আহ ‘‘ভত্তং গণ্হা’’তি. যদগ্গেনাতি যং অগ্গেন যেন কোট্ঠাসেনাতি অত্থো. দ্ৰীসু থেরৰাদেসু মহাসুমত্থেরৰাদোৰ যুত্তোতি সো পচ্ছা ৰুত্তোতি. ততিযং.