১. আৰসথপিণ্ডসিক্খাপদ-অত্থযোজনা

২০৩. ভোজনৰগ্গস্স পঠমে আৰসথে পঞ্ঞত্তো পিণ্ডো আৰসথপিণ্ডোতি দস্সেন্তো আহ ‘‘সমন্তা’’তিআদি. পরিক্খিত্তন্তি পরিৰুতং আৰসথন্তি সম্বন্ধো. অদ্ধং পথং গচ্ছন্তীতি অদ্ধিকা. গিলাযন্তি রুজন্তীতি গিলানা. গব্ভো কুচ্ছিট্ঠসত্তো এতাসন্তি গব্ভিনিযো. মলং পব্বাজেন্তীতি পব্বজিতা, তেসং যথানুরূপন্তি সম্বন্ধো. পঞ্ঞত্তানি মঞ্চপীঠানি এত্থাতি পঞ্ঞত্তমঞ্চপীঠো, তং. অনেকগব্ভপরিচ্ছেদং অনেকপমুখপরিচ্ছেদং আৰসথং কত্ৰাতি যোজনা. তত্থাতি আৰসথে. তেসং তেসন্তি অদ্ধিকাদীনং. হিয্যোসদ্দস্স অতীতানন্তরাহস্স চ অনাগতানন্তরাহস্স চ ৰাচকত্তা ইধ অনাগতানন্তরাহৰাচকোতি আহ ‘‘স্ৰেপী’’তি. কুহিং গতা ইতি ৰুত্তেতি যোজনা. ‘‘কুক্কুচ্চাযন্তো’’তিপদস্স নামধাতুং দস্সেন্তো আহ ‘‘কুক্কুচ্চং করোন্তো’’তি.

২০৬. ‘‘অদ্ধযোজনং ৰা যোজনং ৰা’’তিইমিনা ‘‘পক্কমিতু’’ন্তিপদস্স কম্মং দস্সেতি. ‘‘গন্তু’’ন্তিইমিনা কমুসদ্দস্স পদৰিক্খেপত্থং দস্সেতি. ‘‘অনোদিস্সা’’তিপদস্স ত্ৰাপচ্চযন্তভাৰং দস্সেতুং ‘‘অনুদ্দিসিত্ৰা’’তি ৰুত্তং. পাসং ডেতীতি পাসণ্ডো, সত্তানং চিত্তেসু দিট্ঠিপাসং খিপতীতি অত্থো. অথ ৰা তণ্হাপাসং, দিট্ঠিপাসঞ্চ ডেতি উড্ডেতীতি পাসণ্ডো, তং পাসণ্ডং. যাৰতত্থো পঞ্ঞত্তো হোতীতি যাৰতা অত্থো হোতি, তাৰতা পঞ্ঞত্তো হোতীতি যোজনা. ‘‘যাৰদত্থো’’তিপি পাঠো, অযমেৰত্থো. দকারো পদসন্ধিকরো. সকিং ভুঞ্জিতব্বন্তি একদিৰসং সকিং ভুঞ্জিতব্বন্তি অত্থো. তেনাহ ‘‘একদিৰসং ভুঞ্জিতব্ব’’ন্তি.

এত্থাতি ইমস্মিং সিক্খাপদে. এককুলেন ৰা পঞ্ঞত্তন্তি সম্বন্ধো. ভুঞ্জিতুং ন ৰট্টতি একতো হুত্ৰা পঞ্ঞত্তত্তাতি অধিপ্পাযো. নানাকুলেহি পঞ্ঞত্তং পিণ্ডন্তি যোজনা. ভুঞ্জিতুং ৰট্টতি নানাকুলানি একতো অহুত্ৰা ৰিসুং ৰিসুং পঞ্ঞত্তত্তাতি অধিপ্পাযো. যোপি পিণ্ডো ছিজ্জতীতি সম্বন্ধো. উপচ্ছিন্দিত্ৰাতি অসদ্ধিযাদিপাপচিত্তত্তা উপচ্ছিন্দিত্ৰা.

২০৮. অনুৰসিত্ৰাতি পুনপ্পুনং ৰসিত্ৰা. অন্তরামগ্গে গচ্ছন্তত্তা ‘‘গচ্ছন্তো ভুঞ্জতী’’তি ইদং তাৰ যুত্তং হোতু, গতট্ঠানে পন গমিতত্তা কথং? পচ্চুপ্পন্নসমীপোপি অতীতো তেন সঙ্গহিতত্তা যুত্তং. ‘‘কুতো নু ত্ৰং ভিক্খু আগচ্ছসী’’তিআদীসু (সং. নি. ১.১৩০) ৰিয. তংসমীপোপি হি তাদিসো. নানাট্ঠানেসু নানাকুলানং সন্তকে পকতিযা অনাপত্তিভাৰতো নানাট্ঠানেসু এককুলস্সেৰ সন্তকং সন্ধায ৰুত্তং ‘‘অনাপত্তী’’তি. আরদ্ধস্স ৰিচ্ছেদত্তা ‘‘পুন একদিৰসং ভুঞ্জিতুং লভতী’’তি ৰুত্তং. ‘‘ওদিস্সা’’তি সামঞ্ঞতো ৰুত্তেপি ভিক্খূযেৰ গহেতব্বাতি আহ ‘‘ভিক্খূনংযেৰা’’তি. পঠমং.