১০. সঙ্গারৰসুত্তৰণ্ণনা

৪৭৩. অভিপ্পসন্নাতি অভিসমেচ্চ পসন্না. তেনাহ – ‘‘অৰেচ্চপ্পসাদৰসেন পসন্না’’তি. ব্রাহ্মণী ৰিগতমলমচ্ছেরতায ‘‘তুয্হং দেয্যধম্মং রুচ্চনকট্ঠানে দেহী’’তি আহ. মগ্গেনেৰ হিস্সা মচ্ছরিযস্স পহীনত্তা বুদ্ধপক্খব্রাহ্মণপক্খৰসেন উভতোপক্খিকা.

কিংসূতি কিন্তি পুচ্ছাৰচনং. ছেত্ৰা অনাদিযিত্ৰা ৰিনাসেত্ৰা. সুখং সেতীতি চিত্তসন্তাপাভাৰেন সুখেন সুপতি. ন সোচতীতি ততো এৰ সোকং নাম ৰিনাসেতি. কোধন্তি কুজ্ঝনলক্খণং কোধং. ছেত্ৰা সমুচ্ছিন্দিত্ৰা. সুখং সেতীতি কোধপরিল়াহেন অপরিডয্হমানত্তা সুখং সুপতি. কোধৰিনাসেন ৰিনট্ঠদোমনস্সত্তা ন সোচতি. ৰিসমূলস্সাতি দুক্খৰিপাকস্স. মধুরগ্গস্সাতি অক্কোসকস্স পচ্চক্কোসনেন, পহারকস্স পটিপ্পহরণেন যং সুখং উপ্পজ্জতি, তং সন্ধাযেৰ ‘‘মধুরগ্গো’’তি ৰুত্তো. ইমস্মিঞ্হি ঠানে পরিযোসানং ‘‘অগ্গ’’ন্তি ৰুত্তং. অরিযাতি বুদ্ধাদযো অরিযা.

পঞ্হং কথেসীতি ব্রাহ্মণো কির চিন্তেসি – ‘‘সমণো গোতমো লোকপূজিতো, ন সক্কা যং ৰা তং ৰা ৰত্ৰা সন্তজ্জেতুং, একং সণ্হপঞ্হং পুচ্ছিস্সামী’’তি. সো একং পুচ্ছাগাথং অভিসঙ্খরিত্ৰা ‘‘সচে অসুকস্স নাম ৰধং রোচেমীতি ৰক্খতি, যে তুয্হং ন রুচ্চন্তি, তে মারেতুকামোসি, লোকৰধায উপ্পন্নো কিং তুয্হং সমণভাৰেনাতি নিগ্গহেস্সামি. সচে ন কস্সচি ৰধং রোচেমীতি ৰক্খতি, অথ নং ত্ৰং রাগাদীনম্পি ৰধং ন ইচ্ছসি, তস্মা সমণো হুত্ৰা আহিণ্ডসীতি নিগ্গণ্হিস্সামীতি ইমং উভতোকোটিকং পঞ্হং পুট্ঠো সমণো গোতমো নেৰ গিলিতুং ন উগ্গিলিতুং সক্খিস্সতী’’তি এৰং চিন্তেত্ৰা ইমং পয্হং পুচ্ছি. তস্স ভগৰা অজ্ঝাসযানুরূপং কথেসি. সো পঞ্হব্যাকরণেন আরাধিতচিত্তো পব্বজ্জং যাচি. সত্থা তং পব্বাজেসি, সো পব্বজ্জাকিচ্চং মত্থকং পাপেসি. তেন ৰুত্তং ‘‘পব্বজিত্ৰা অরহত্তং পত্তো’’তি.

অৰভূতাতি অধোভূতা. অধোভাৰো সত্তানং অৰড্ঢি অৰমঙ্গলন্তি আহ – ‘‘অৰড্ঢিভূতা অৰমঙ্গলভূতাযেৰা’’তি. পরিভূতাতি পরিভৰপ্পত্তা. ৰিজ্জমানানন্তি পাল়িযং অনাদরে সামিৰচনন্তি তদত্থং দস্সেন্তো ‘‘ৰিজ্জমানেসূ’’তিআহ. পকট্ঠং, পৰড্ঢং ৰা ঞাণন্তি পঞ্ঞাণন্তি ভগৰতো ঞাণং ৰিসেসেত্ৰা ৰুত্তং.

৪৭৪. অভিজানিত্ৰাতি অভিৰিসিট্ঠেন ঞাণেন জানিত্ৰা. ৰোসিতৰোসানাতি কতকরণীযতায সব্বসো পরিসোসিতনিট্ঠা. পারমিসঙ্খাতন্তি পরমুক্কংসভাৰতো পারমীতি সঙ্খাতং. তেনাহ ‘‘সব্বধম্মানং পারভূত’’ন্তি. ব্রহ্মচরিযস্সাতি সাসনব্রহ্মচরিযস্স আদিভূতং. তেনাহ ‘‘উপ্পাদকা জনকা’’তি. ‘‘ইদমেৰং ভৰিস্সতি ইদমেৰ’’ন্তি তক্কনং তক্কো, সো এতস্স অত্থীতি তক্কী. যস্মা সো তং তং ৰত্থুং তথা তথা তক্কিত্ৰা গণ্হতি, তস্মা ৰুত্তং ‘‘তক্কগাহী’’তি. ৰীমংসনসীলো ৰীমংসী পচ্চক্খভূতমত্থং ৰীমংসনভূতায পঞ্ঞায কেৰলং ৰীমংসনতো. তেনাহ ‘‘পঞ্ঞাচারং চরাপেত্ৰা এৰংৰাদী’’তি. যথাৰুত্ততক্কীৰীমংসীভাৰেন তক্কপরিযাহতং ৰীমংসানুচরিতং সযংপটিভানং এৰমেতন্তি ৰত্ৰা.

৪৮৫. অট্ঠিতপধানৰতন্তি অঞ্ঞত্থ কিস্মিঞ্চি পুগ্গলে অট্ঠিতপধানৰতং অনঞ্ঞসাধারণং ভোতো গোতমস্স পধানং অহোসি. সপ্পুরিসপধানৰতং অহোসি সপ্পুরিসপধানৰতাধিগতানং এতাদিসানং অরহতং অচ্ছরিযপুগ্গলানংযেৰ আৰেণিকপধানৰতং অহোসি. অজানন্তোৰ পকাসেতীতি অযং পুচ্ছিতমত্থং সযং পচ্চক্খতো অজানন্তো এৰ কেৰলং সদ্দং উপ্পাদেত্ৰাৰ পকাসেসীতি সঞ্ঞায আহ. অজাননভাৰে সন্তেতি ইমে অধিদেৰাতি পচ্চক্খতো জাননে অসতি. পণ্ডিতেন মনুস্সেনাতি লোকৰোহারকুসলেন মনুস্সেন, ত্ৰং পন লোকৰোহারেপি অকুসলো. ৰচনত্থঞ্হি অজানন্তো যং কিঞ্চি ৰদতি. উচ্চেন সম্মতন্তি উচ্চং সুপাকটং সব্বসো তরুণদারকেহিপি সম্মতং. ঞাতমেতং যদিদং অত্থি দেৰাতি. তেনাহ ‘‘সুসুদারকাপী’’তিআদি. দেৰাতি উপপত্তিদেৰা. অধিদেৰা নাম সম্মুতিদেৰেহি অধিকদেৰাতি কত্ৰা, তদঞ্ঞে চ মনুস্সে অধিকভাৰে কিমেৰ ৰত্তব্বং. সেসং সুৰিঞ্ঞেয্যমেৰ.

পপঞ্চসূদনিযা মজ্ঝিমনিকাযট্ঠকথায

সঙ্গারৰসুত্তৰণ্ণনায লীনত্থপ্পকাসনা সমত্তা.

নিট্ঠিতা চ ব্রাহ্মণৰগ্গৰণ্ণনা.

মজ্ঝিমপণ্ণাসটীকা সমত্তা.