৭. মহাসকুলুদাযিসুত্তৰণ্ণনা

২৩৭. অভিঞ্ঞাতাতি এদিসো এদিসো চাতি অভিলক্খণৰসেন ঞাতা. অপ্পসদ্দস্স ৰিনীতো, অপ্পসদ্দতায মন্দভাণিতায ৰিনীতোতি চ অপ্পসদ্দৰিনীতোতি ৰুচ্চমানে অঞ্ঞেন ৰিনীতভাৰো দীপিতো হোতি, ভগৰা পন সযম্ভুঞাণেন সযমেৰ ৰিনীতো. তস্মা পাল়িযং ‘‘অপ্পসদ্দৰিনীতো’’তি ন ৰুত্তং. তেনাহ ‘‘ন হি ভগৰা অঞ্ঞেন ৰিনীতো’’তি.

২৩৮. হিয্যোদিৰসং উপাদায ততো আসন্নানি কতিপযানি দিৰসানি পুরিমানি নাম হোন্তি, পুরিমানীতি চ পুব্বকানি, অতীতানীতি অত্থো. ততো পরন্তি যথা ৰুত্তঅতীতদিৰসতো অনন্তরং পরং পুরিমতরং অতিসযেন পুরিমত্তা. ইতি ইমেসু দ্ৰীসু পৰত্তিতো যথাক্কমং পুরিমপুরিমতরভাৰো, এৰং সন্তেপি যদেত্থ ‘‘পুরিমতর’’ন্তি ৰুত্তং, ততো পভুতি যং যং ওরং, তং তং পরং, যং যং পরং, তং তং ‘‘পুরিমতর’’ন্তি ৰুত্তং হোতি. কুতূহলযুত্তা সালা কুতূহলসালা যথা ‘‘আজঞ্ঞরথো’’তি. ইমে দস্সনাদযো.

অযথাভূতগুণেহীতি অযথাভূতং মিচ্ছাদীপিতঅত্থমত্তেনেৰ উগ্ঘোসিতগুণেহি সমুগ্গতো ঘোসিতো. তরন্তি অতিক্কমন্তি এতেনাতি তিত্থং, অগ্গমগ্গো. দিট্ঠিগতিকমগ্গো পন অযথাভূতোপি তেসং তথা ৰিতরণং উপাদায তিত্থন্তি ৰোহরীযতীতি তং করোন্তা তিত্থকরা. ওসরতীতি পৰিসতি.

২৩৯. সহিতন্তি পুব্বাপরাৰিরুদ্ধং. ন কিঞ্চি জাতন্তি পটিঞ্ঞাদোসহেতুদোসউদাহরণদোসদুট্ঠদোসতায ন কিঞ্চি জাতং. তেনাহ ‘‘আরোপিতো তে ৰাদো’’তি. ৰদন্তি তেন পরিভাসন্তীতি ৰাদো দোসো. সভাৰক্কোসেনাতি সভাৰতো পৰত্তকোট্ঠাসেন.

২৪০. পীল়েয্যাতি মধুভণ্ডেন সহ ভাজনে পীল়েত্ৰা দদেয্য. সব্রহ্মচারীহি সম্পযোজেত্ৰাতি সহধম্মিকেহি ৰিহেঠনপযোগং কত্ৰা, তেনাহ ‘‘ৰিৰাদং কত্ৰা’’তি.

২৪১. ইতরীতরেনাতি পণীততো ইতরেন. তেনাহ ‘‘লামকলামকেনা’’তি.

২৪২. ভত্তকোসকেনাতি কোসকভত্তেন, খুদ্দকসরাৰভত্তকেনাতি অত্থো. বেলুৰমত্তভত্তাহারাতি বিল্লপমাণভত্তভোজনা. ওট্ঠৰট্টিযাতি মুখৰট্টিযা. সব্বাকারেনেৰাতি সব্বপ্পকারেনেৰ. অনপ্পাহারোতি ন ৰত্তব্বো কদাচি অপ্পাহারোতি কত্ৰা. তত্থ অতিৰিয অঞ্ঞেহি অৰিসয্হং অপ্পাহারতং ভগৰতো দস্সেতুং ‘‘পধানভূমিয’’ন্তিআদি ৰুত্তং. মযাতি নিস্সক্কৰচনং. ৰিসেসতরাতি তেন ধম্মেন ৰিসেসৰন্ততরা.

ৰতসমাদানৰসেনেৰ পংসুকূলং ধারেন্তীতি পংসুকূলিকাতি আহ – ‘‘সমাদিন্নপংসুকূলিকঙ্গা’’তি, সদ্দত্থো পন ‘‘ৰিসুদ্ধিমগ্গে’’ (ৰিসুদ্ধি. ১.২৪) ৰুত্তনযেন ৰেদিতব্বো. পিণ্ডপাতিকা সপদানচারিনোতিআদীসুপি এসেৰ নযো. তত্থ তত্থ সত্থেন ছিন্দিতত্তা সত্থলূখানি. যং যং সপ্পাযং, তস্সেৰ গহণং উচ্চিনন্তি আহ ‘‘উচ্চিনিত্ৰা…পে… থিরট্ঠানমেৰ গহেত্ৰা’’তি. অলাবুলোমসানীতি অলাবুলোমানি ৰিয সুখুমতরানি চীৰরসুত্তংসূনি এতেসং সন্তীতি অলাবুলোমসানি. পাতিতসাণপংসুকূলন্তি কল়েৰরেন সদ্ধিং ছড্ডিতসাণমযং পংসুকূলং, যং তুম্বমত্তে পুল়ৰে ওধুনিত্ৰা সত্থা গণ্হি.

‘‘যথাপি ভমরো পুপ্ফ’’ন্তিআদিনা (ধ. প. ৪৯) ৰুত্তং মধুকরভিক্খাচারৰতং ‘‘পিণ্ডিযালোপভোজনং নিস্সায পব্বজ্জা’’তি (মহাৰ. ৭৩, ১২৮) ৰচনতো ভিক্খূনং পকতিভূতং ৰতন্তি ৰুত্তং ‘‘উঞ্ছাসকে ৰতে রতা’’তি. ৰত-সদ্দো চেত্থ পকতিৰতসঙ্খাতং সকৰতং ৰদতি. তেনাহ ‘‘উঞ্ছাচরিযসঙ্খাতে ভিক্খূনং পকতিৰতে’’তি. উচ্চনীচঘরদ্ৰারট্ঠাযিনোতি মহন্তখুদ্দকগেহানং বহিদ্ৰারকোট্ঠকট্ঠাযিনো. কবরমিস্সকং ভত্তং সংহরিত্ৰাতি কণাজকমিস্সকং ভত্তং সম্পিণ্ডিত্ৰা. উম্মারতো পট্ঠাযাতি ঘরুম্মারতো পট্ঠায.

চীৰরানুগ্গহত্থন্তি চীৰরানুরক্খণত্থং. এত্থ চ যস্মা বুদ্ধা নাম সদেৰকে লোকে অনুত্তরং পুঞ্ঞক্খেত্তং, সা চস্স পুঞ্ঞক্খেত্ততা পরমুক্কংসগতা, তস্মা সত্তানং তাদিসং উপকারং আচিক্খিত্ৰা তে চ অনুগ্গণ্হন্তা গহপতিচীৰরং সাদিযন্তি, চতুপচ্চযসন্তোসে পন নে পরমুক্কংসগতা এৰাতি দট্ঠব্বং.

২৪৪. সপ্পচ্চযন্তি সহেতুকং সকারণং হুত্ৰা ধম্মং দেসেতীতি অযমেত্থ অত্থো. চোদকো পন অধিপ্পাযং অজানন্তো ‘‘কিং পনা’’তিআদিমাহ. ইতরো ‘‘নো ন দেসেতী’’তিআদিনা অধিপ্পাযং ৰিৰরতি. নিদানন্তি চেত্থ ঞাপকং উপ্পত্তিকারণং অধিপ্পেতং, তঞ্চ তস্স তস্স অনুপ্পত্তিযুত্তস্স অত্থস্স পটিপক্খহরণতো ‘‘সপ্পাটিহারিয’’ন্তি ৰুচ্চতীতি আহ ‘‘পুরিমস্সেৰেতং ৰেৰচন’’ন্তি. রাগাদীনং ৰা পটিহরণং পটিহারিযং, তদেৰ পাটিহারিযং, সহ পাটিহারিযেনাতি সপ্পাটিহারিযং. রাগাদিপটিসেধৰসেনেৰ হি সত্থা ধম্মং দেসেতি.

২৪৫. তস্স তস্স পঞ্হস্সাতি যং যং পঞ্হং পরো অভিসঙ্খরিত্ৰা ভগৰন্তং উপসঙ্কমিত্ৰা পুচ্ছতি, তস্স তস্স পঞ্হস্স. উপরি আগমনৰাদপথন্তি ৰিস্সজ্জনে কতে ততো উপরি আগচ্ছনকং ৰাদমগ্গং. ৰিসেসেত্ৰা ৰদন্তোতি ৰত্ততি, ‘‘ভো গোতম, ৰত্তুমরহতী’’তি অত্তনো ৰাদভেদনত্থং আহতং কারণং অত্তনো মারণত্থং আৰুধং নিদস্সেন্তো ৰিয ৰিসেসেত্ৰা ৰদন্তো পহারকেন ৰচনেন. অন্তরন্তরেতি মযা ৰুচ্চমানকথাপবন্ধস্স অন্তরন্তরে. দদেয্য ৰদেয্য. এৰরূপেসু ঠানেসূতি পরৰাদীহি সদ্ধিং ৰাদপটিৰাদট্ঠানেসু. তে নিগ্গহেতুং মযা দেসিতং সুত্তপদং আনেত্ৰা মমযেৰ অনুসাসনিং ওৰাদং পচ্চাসীসন্তি.

২৪৬. সম্পাদেমীতি মনোরথং সম্পাদেমি. পরিপূরেমীতি অজ্ঝাসযং পরিপূরেমি. অধিসীলেতি অধিকে উত্তমসীলে. সাৰকসীলতো চ পচ্চেকবুদ্ধসীলতো চ বুদ্ধানং সীলং অধিকং উক্কট্ঠং পরমুক্কংসতো অনঞ্ঞসাধারণভাৰতো. তেনাহ ‘‘বুদ্ধসীলং নাম কথিত’’ন্তি. ঠানুপ্পত্তিকপঞ্ঞাতি তত্থ তত্থ ঠানসো উপ্পন্নপঞ্ঞা. তেনাহ ‘‘তত্থা’’তিআদি. অৰসেসা পঞ্ঞাতি ইধ পাল়িযং আগতা অনাগতা চ যথাৰুত্তঞাণদ্ৰযৰিনিমুত্তা পঞ্ঞা.

২৪৭. ৰিসেসাধিগমানন্তি সতিপট্ঠানাদীনং অধিগন্ধব্বৰিসেসানং. অভিঞ্ঞা নাম ছ অভিঞ্ঞা, তাসু উক্কট্ঠনিদ্দেসেন ছল়ভিঞ্ঞারহতোৰ অগ্গমগ্গপঞ্ঞা ইধ অভিঞ্ঞাতি অধিপ্পেতা, তস্স ৰোসানং পরিযোসানং পারমী পরমুক্কংসাতি অৰকংসাতি চ অগ্গফলং ৰুচ্চতীতি আহ ‘‘অভিঞ্ঞা…পে… অরহত্তং পত্তা’’তি.

উপাযপধানেতি অরিযফলাধিগমনস্স উপাযভূতে পধানে. ‘‘অনুপ্পন্নপাপকানুপ্পাদাদিঅত্থা’’তি গহিতা তথেৰ হোন্তি, তং অত্থং সাধেন্তিযেৰাতি এতস্স অত্থস্স দীপকো সম্মা-সদ্দোতি যথাঅধিপ্পেতত্থস্স অনুপ্পন্নপাপকানুপ্পাদাদিনো উপাযভূতে, পধানউপাযভূতেতি অত্থো. সম্মা-সদ্দস্স ৰা যোনিসো অত্থদীপকতং সন্ধায ‘‘যোনিসো পধানে’’তি ৰুত্তং. ছন্দং জনেতীতি কত্তুকম্যতাকুসলচ্ছন্দং উপ্পাদেতি পৰত্তেতি ৰা. ৰাযমতীতি পযোগপরক্কমং করোতি. ৰীরিযং আরভতীতি কাযিকচেতসিকৰীরিযং করোতি. চিত্তং উক্খিপতীতি তেনেৰ সহজাতৰীরিযেন কোসজ্জপক্খতো চিত্তং উক্খিপতি. পদহতীতি সম্মপ্পধানভূতং ৰীরিযং পৰত্তেতি. পটিপাটিযা পনেতানি চত্তারি পদানি আসেৰনাভাৰনাবহুলীকম্মসাতচ্চকিরিযাহি যোজেতব্বানি. ‘‘পদহতী’’তি ৰা ইমিনা আসেৰনাদীহি সদ্ধিং সিখাপত্তং উস্সোল়্হিৰীরিযং যোজেতব্বং. ৰড্ঢিযা পরিপূরণত্থন্তি যাৰতা ভাৰনাপারিপূরিযা পরিপূরণত্থং. যা ঠিতীতি যা কুসলানং ধম্মানং পটিপক্খৰিগমেন অৰট্ঠিতি. সো অসম্মোসোতি সো অৰিনাসো. যং ৰেপুল্লন্তি যো সব্বসো ৰিপুলভাৰো মহন্ততা. ভাৰনাপারিপূরীতি ভাৰনায পরিপূরিতা. অত্থোতিপি ৰেদিতব্বং পুরিমপচ্ছিমপদানং সমানত্থভাৰতো.

পুব্বভাগপটিপদা কথিতাতংতংৰিসেসাধিগমস্স পটিপদাৰিভাৰনায আরদ্ধত্তা. অকুসলানং ধম্মানং অনুপ্পজ্জনেন অনত্থাৰহতা নাম নত্থীতি ৰুত্তং – ‘‘উপ্পজ্জমানা’’তি ৰচনং উপ্পন্নানং রাসন্তরভাৰেন গহিতত্তা. তথা কুসলানং ধম্মানং উপ্পজ্জনেনাতি ৰুত্তং – অনুপ্পজ্জমানাতি ৰচনং উপ্পন্নানং রাসন্তরভাৰেন গহিতত্তা. নিরুজ্ঝমানাতি পটিপক্খসমাযোগেন ৰিনস্সমানা, ন খণনিরোধৰসেন নিরুজ্ঝমানা.

লোভাদযো ৰেদিতব্বা, যে আরদ্ধৰিপস্সকানং উপ্পজ্জনারহা. সকিং উপ্পজ্জিত্ৰাতি সভাৰকথনমত্তমেতং. একৰারমেৰ হি মগ্গো উপ্পজ্জতি. নিরুজ্ঝমানোতি সরসেনেৰ নিরুজ্ঝমানো. ন হি তস্স পটিপক্খসমাযোগো নাম অত্থি. ফলস্সাতি অনন্তরকালেৰ উপ্পজ্জনকফলস্স. পচ্চযং দত্ৰাৰ নিরুজ্ঝতীতি ইমিনা মগ্গো সম্পতি আযতিঞ্চ একন্তেনেৰ অত্থাৰহোতি দস্সেতি. পুরিমস্মিম্পীতি ‘‘অনুপ্পন্না মে কুসলা ধম্মা অনুপ্পজ্জমানা অনত্থায সংৰত্তেয্যু’’ন্তি এতস্মিং ততিযৰারেপি. ‘‘সমথৰিপস্সনা গহেতব্বা’’তি ৰুত্তং অট্ঠকথাযং, তং পন মগ্গস্স অনুপ্পন্নতায সব্ভাৰতো, অনুপ্পজ্জমানে চ তস্মিং ৰট্টানত্থসব্ভাৰতোতি মগ্গস্সপি সাধারণভাৰতো ন যুত্তন্তি পটিক্খিপতি. যদি সমথৰিপস্সনানম্পি অনুপ্পত্তি অনত্থাৰহা, মগ্গস্স অনুপ্পত্তিযা ৰত্তব্বং নত্থীতি.

মহন্তং, গারৰং হোতি, তস্মা ‘‘সঙ্ঘগারৰেন যথারুচি ৰন্দিতুং ন লভামী’’তি সঙ্ঘেন সহ ন নিক্খমি. এত্তকং ধাতূনং নিধানং নাম অঞ্ঞত্র নত্থি, মহাধাতুনিধানতো হি নীহরিত্ৰা কতিপযা ধাতুযো তত্থ তত্থ চেতিযে উপনীতা, ইধ পন রামগামথূপে ৰিনট্ঠে নাগভৰনং পৰিট্ঠা দোণমত্তা ধাতুযো উপনীতা. অতিমন্দানি নোতি ননু অতিৰিয মন্দানি.

সংৰিজ্জিত্ৰাতি ‘‘কথঞ্হি নাম মাদিসো ঈদিসং অনত্থং পাপুণিস্সতী’’তি সংৰেগং জনেত্ৰা. ঈদিসং নাম মাদিসং আরব্ভ ৰত্তব্বন্তি কিং ৰদতীতি তং ৰচনং অনাদিযন্তো.

সন্তসমাপত্তিতো অঞ্ঞং সন্থম্ভনকারণং বলৰং নত্থীতি ততো পরিহীনো সম্মাপটিপত্তিযং পতিট্ঠা কথং ভৰিস্সতীতি আহ ‘‘সন্তায…পে… ন সক্কোতী’’তি. ন হি মহারজ্জুযা ছিন্নায সুত্ততন্তূ সন্থম্ভেতুং সক্কোন্তীতি. সমথে দস্সেত্ৰা তেন সমানগতিকা ইমস্মিং ৰিসযে ৰিপস্সনাপীতি ইমিনা অধিপ্পাযেনাহ ‘‘এৰং উপ্পন্না সমথৰিপস্সনা…পে… সংৰত্তন্তী’’তি.

কাসাৰন্তি কাসাৰৰত্থং. কচ্ছং পীল়েত্ৰা নিৰত্থন্তি পচ্ছিমং ওৰট্টিকং পীল়েন্তো ৰিয দল়্হং কত্ৰা নিৰত্থং অদ্দসংসূতি যোজনা.

ৰুত্তনযেনাতি (অ. নি. টী. ১.১.৩৯৪) ‘‘কামা নামেতে অনিচ্চা দুক্খা ৰিপরিণামধম্মা’’তিআদিনা ৰত্থুকামকিলেসকামেসু আদীনৰদস্সনপুব্বকনেক্খম্মপটিপত্তিযা ছন্দরাগং ৰিক্খম্ভযতো সমুচ্ছিন্দন্তস্স চ ‘‘অনুপ্পন্নো চ কামাসৰো ন উপ্পজ্জতী’’তিআদিনা হেট্ঠা সব্বাসৰসুত্তৰণ্ণনাদীসু (ম. নি. ১.১৫ আদযো; ম. নি. অট্ঠ. ১.১৫ আদযো) ৰুত্তনযেন. আরম্মণরসং অনুভৰিত্ৰা নিরুদ্ধৰিপাকোতি তদারম্মণমাহ. অনুভৰিত্ৰা ভৰিত্ৰা চ ৰিগতং ভূতৰিগতং. অনুভূতভূতা হি ভূততাসামঞ্ঞেন ভূত-সদ্দেন ৰুত্তা. সামঞ্ঞমেৰ হি উপসগ্গেন ৰিসেসীযতীতি. অনুভূতসদ্দো চ কম্মৰচনিচ্ছায অভাৰতো অনুভৰকৰাচকো দট্ঠব্বো. ৰিপাকো আরম্মণে উপ্পজ্জিত্ৰা নিরুদ্ধো ভুত্ৰাৰিগতোতি ৰত্তব্বতং অরহতি, ৰিকপ্পগাহৰসেন রাগাদীহি তব্বিপক্খেহি চ অকুসলং কুসলঞ্চ কম্মং আরম্মণরসং অনুভৰিত্ৰা ৰিগতন্তি ৰত্তব্বতং অরহতি. যথাৰুত্তো পন ৰিপাকো কেৰলং আরম্মণরসানুভৰনৰসেনেৰ পৰত্ততীতি অনুভৰিত্ৰা ৰিগতত্তা নিপ্পরিযাযেনেৰ ৰুত্তো, তস্স চ তথা ৰুত্তত্তা কম্মং ভৰিত্ৰা ৰিগতপরিযাযেন, যং ‘‘উপ্পন্নানং অকুসলানং ধম্মানং পহানায, উপ্পন্নানং কুসলানং ধম্মানং ঠিতিযা’’তি এত্থ ‘‘উপ্পন্ন’’ন্তি গহেত্ৰা তংসদিসানং পহানং, ৰুদ্ধি চ ৰুত্তা. ৰিপচ্চিতুং ওকাসকরণৰসেন উপ্পতিতং অতীতকম্মঞ্চ ততো উপ্পজ্জিতুং আরদ্ধো অনাগতো ৰিপাকো চ ‘‘ওকাসকতুপ্পন্নো’’তি ৰুত্তো. যং উপ্পন্নসদ্দেন ৰিনাপি ৰিঞ্ঞাযমানং উপ্পন্নং সন্ধায ‘‘নাহং, ভিক্খৰে, সঞ্চেতনিকান’’ন্তিআদি (অ. নি. ১০.২১৭, ২১৯) ৰুত্তং.

তেসূতি ৰিপস্সনায ভূমিভূতেসু খন্ধেসু. অনুসযিতকিলেসাতি অনুসযৰসেন পৰত্তা অপ্পহীনা মগ্গেন পহাতব্বা কিলেসা অধিপ্পেতা. তেনাহ ‘‘অতীতা…পে… ন ৰত্তব্বা’’তি. তেসঞ্হি অম্বরুক্খোপমায ৰত্তমানাদিতা ন ৰত্তব্বা মগ্গেন পহাতব্বানং তাদিসস্স ৰিভাগস্স অনুপ্পজ্জনতো. অপ্পহীনাৰ হোন্তীতি ইমিনা অপ্পহীনট্ঠেন অনুসযট্ঠোতি দস্সেতি. ইদং ভূমিলদ্ধুপ্পন্নং নামাতি ইদং তেসু খন্ধেসু উপ্পত্তিরহকিলেসজাতং তায এৰ উপ্পত্তিরহতায ভূমিলদ্ধুপ্পন্নং নাম, তেভূমকভূমিলদ্ধা নাম হোতীতি অত্থো. তাসু তাসু ভূমীসূতি মনুস্সদেৰাদিঅত্তভাৰসঙ্খাতেসু উপাদানক্খন্ধেসু. তস্মিং তস্মিং সন্তানে অনুপ্পত্তিঅনাপাদিততায অসমুগ্ঘাতিতা. এত্থ চ লদ্ধভূমিকং ভূমিলদ্ধন্তি ৰুত্তং অগ্গিআহিতো ৰিয.

ওকাসকতুপ্পন্ন-সদ্দেপি চ ওকাসো কতো এতেনাতি ওকাসো কতো এতস্সাতি চ অত্থদ্ৰযেপি কত-সদ্দস্স পরনিপাতো দট্ঠব্বো. আহতখীররুক্খো ৰিয নিমিত্তগ্গাহৰসেন অধিগ্গহিতং আরম্মণং, অনাহতখীররুক্খো ৰিয অৰিক্খম্ভিততায অন্তোগধকিলেসং আরম্মণং. নিমিত্তগ্গাহকাৰিক্খম্ভিতকিলেসা ৰা পুগ্গলা আহতানাহতখীররুক্খসদিসা. পুরিমনযেনেৰাতি অৰিক্খম্ভিতুপ্পন্নে ৰিয ‘‘ইমস্মিং নাম ঠানে নুপ্পজ্জিস্সন্তীতি ন ৰত্তব্বা. কস্মা? অসমুগ্ঘাতিতত্তা’’তি যোজেত্ৰা ৰিত্থারেতব্বং.

ৰুত্তং পটিসম্ভিদামগ্গে. তত্থ চ মগ্গেন পহীনকিলেসানমেৰ তিধা নৰত্তব্বতং অপাকটং সুপাকটং কাতুং অজাতফলরুক্খো উপমাভাৰেন আগতো. অতীতাদীনং অপ্পহীনতা দস্সনত্থম্পি ‘‘জাতফলরুক্খেন দীপেতব্ব’’ন্তি ৰুত্তং. তত্থ যথা অচ্ছিন্নে রুক্খে নিব্বত্তারহানি ফলানি ছিন্নে অনুপ্পজ্জমানানি ন কদাচি সসভাৰানি অহেসুং হোন্তি ভৰিস্সন্তি চাতি তানি অতীতাদিভাৰেন ন ৰত্তব্বানি, এৰং মগ্গেন পহীনকিলেসা চ দট্ঠব্বা. যথা ছেদে অসতি ফলানি উপ্পজ্জিস্সন্তি, সতি চ নুপ্পজ্জিস্সন্তীতি ছেদস্স সাত্থকতা, এৰং মগ্গভাৰনায চ সাত্থকতা যোজেতব্বা.

তেপি পজহতিযেৰ কিলেসপ্পহানেনেৰ তেসম্পি অনুপ্পত্তিধম্মতাপাদনতো. অভিসঙ্খারৰিঞ্ঞাণস্সাতি পটিসন্ধিৰিঞ্ঞাণস্স. উপাদিন্নঅনুপাদিন্নতোতি উপাদিন্নখন্ধতো চেৰ কিলেসতো চ. উপপত্তিৰসেন ৰুট্ঠানং দস্সেতুমাহ – ‘‘ভৰৰসেন পনা’’তিআদি. যে সোতাপন্নস্স সত্ত ভৰা অপ্পহীনা, ততো পঞ্চ ঠপেত্ৰা ইতরে দ্ৰে ‘‘সুগতিভৰেকদেসা’’তি অধিপ্পেতা. সুগতিকামভৰতোতি সুগতিভৰেকদেসভূতকামভৰতো. অরহত্তমগ্গো রূপারূপভৰতো ৰুট্ঠাতি উদ্ধম্ভাগিযসংযোজনসমুগ্ঘাতভাৰতো. যদি অরহত্তমগ্গো এৰ অরিযমগ্গো সিযা, সো এৰ সব্বকিলেসে পজহেয্য, সব্বভৰেহিপি ৰুট্ঠহেয্য. যস্মা পন ওধিসোৰ কিলেসা পহীযন্তি, তস্মা হেট্ঠিমহেট্ঠিমমগ্গেহি পহীনাৰসেসে কিলেসে সো পজহতি, ইতি ইমং সামত্থিযং সন্ধায ‘‘সব্বভৰেহি ৰুট্ঠাতিযেৰাতিপি ৰদন্তী’’তি ৰুত্তং. তথা হি সো এৰ ‘‘ৰজিরূপমো’’তি ৰুত্তো.

হোতু তাৰ ৰুত্তনযেন অনুপ্পন্নানং অকুসলানং অনুপ্পাদায, উপ্পন্নানং উপ্পন্নসদিসানং পহানায অনুপ্পত্তিধম্মতাপাদনায মগ্গভাৰনা, অথ মগ্গক্খণে কথং অনুপ্পন্নানং কুসলানং উপ্পাদায উপ্পন্নানঞ্চ ঠিতিযা ভাৰনা হোতি একচিত্তক্খণিকত্তা তস্সাতি চোদেতি, ইতরো ‘‘মগ্গপ্পৰত্তিযাযেৰা’’তি পরিহারমাহ. মগ্গো হি কামঞ্চেকচিত্তক্খণিকো, তথারূপো পনস্স পৰত্তিৰিসেসো, যং অনুপ্পন্না কুসলা ধম্মা সাতিসযং উপ্পজ্জন্তি, উপ্পন্না চ সৰিসেসং পারিপূরিং পাপুণন্তি. তেনাহ ‘‘মগ্গো হী’’তিআদি. কিঞ্চাপি অরিযমগ্গো ৰত্তমানক্খণে অনুপ্পন্নো নাম ন হোতি, অনুপ্পন্নপুব্বতং উপাদায উপচারৰসেন তথা ৰুচ্চতীতি দস্সেতুং ‘‘অনাগতপুব্বং হী’’তিআদি ৰুত্তং. অযমেৰাতি অযং মগ্গস্স যথাপচ্চযপৰত্তি এৰ ঠিতি নামাতি, মগ্গসমঙ্গী পুগ্গলো মগ্গম্পি ভাৰেন্তো এৰ তস্স ঠিতিযা ভাৰেতীতি ৰত্তুং ৰট্টতি.

উপসমমানং গচ্ছতীতি ৰিক্খম্ভনৰসেন সমুচ্ছেদৰসেন কিলেসে উপসমেন্তং ৰত্ততি. পুব্বভাগিন্দ্রিযানি এৰ ৰা অধিপ্পেতানি. তেনেৰাহ ‘‘কিলেসূপসমত্থং ৰা গচ্ছতী’’তি.

২৪৮. অধিমুচ্চনট্ঠেনাতি (দী. নি. টী. ২.১২৯; অ. নি. টী. ৩.৮.৬৬) অধিকং সৰিসেসং মুচ্চনট্ঠেন, তেনাহ ‘‘সুট্ঠু মুচ্চনট্ঠো’’তি. এতেন সতিপি সব্বস্সপি রূপাৰচরজ্ঝানস্স ৰিক্খম্ভনৰসেন পটিপক্খতো ৰিমুত্তভাৰে যেন ভাৰনাৰিসেসেন তং ঝানং সাতিসযং পটিপক্খতো ৰিমুচ্চিত্ৰা পৰত্ততি, সো ভাৰনাৰিসেসো দীপিতো. ভৰতি হি সমানজাতিযুত্তোপি ভাৰনাৰিসেসেন পৰত্তিআকারৰিসেসো. যথা তং সদ্ধাৰিমুত্ততো দিট্ঠিপ্পত্তস্স, তথা পচ্চনীকধম্মেহি সুট্ঠু ৰিমুত্ততায এৰ অনিগ্গহিতভাৰেন নিরাসঙ্কতায অভিরতিৰসেন সুট্ঠু অধিমুচ্চনট্ঠেনপি ৰিমোক্খো. তেনাহ ‘‘আরম্মণে চা’’তিআদি. অযং পনত্থোতি অযং অধিমুচ্চনত্থো পচ্ছিমৰিমোক্খে নিরোধে নত্থি. কেৰলো ৰিমুত্তত্থো এৰ তত্থ লব্ভতি, তং সযমেৰ পরতো ৰক্খতি.

রূপীতি যেনাযং সসন্ততিপরিযাপন্নেন রূপেন সমন্নাগতো, তং যস্স ঝানস্স হেতুভাৰেন ৰিসিট্ঠং রূপং হোতি. যেন ৰিসিট্ঠেন রূপেন ‘‘রূপী’’তি ৰুচ্চেয্য রূপী-সদ্দস্স অতিসযত্থদীপনতো, তদেৰ সসন্ততিপরিযাপন্নরূপনিমিত্তং ঝানমিৰ পরমত্থতো রূপীভাৰসাধকন্তি দট্ঠব্বং. তেনাহ ‘‘অজ্ঝত্ত’’ন্তিআদি. রূপজ্ঝানং রূপং উত্তরপদলোপেন. রূপানীতি পনেত্থ পুরিমপদলোপো দট্ঠব্বো. তেন ৰুত্তং ‘‘নীলকসিণাদীনি রূপানী’’তি.

অন্তোঅপ্পনাযং সুভন্তি আভোগো নত্থীতি ইমিনা পুব্বাভোগৰসেন অধিমুত্তি সিযাতি দস্সেতি. এৰঞ্হেত্থ তথাৰত্তব্বতাপত্তিচোদনা অনৰকাসা হোতি. যস্মা সুৰিসুদ্ধেসু নীলাদীসু ৰণ্ণকসিণেসু তত্থ কতাধিকারানং অভিরতিৰসেন সুট্ঠু অধিমুত্তি সিযা, তস্মা অট্ঠকথাযং তথা ততিযো ৰিমোক্খো সংৰণ্ণিতো. যস্মা পন মেত্তাদিৰসেন পৰত্তমানা ভাৰনা সত্তে অপ্পটিকূলতো দহতি, তে সুভতো অধিমুচ্চিত্ৰাৰ পৰত্ততি, তস্মা পটিসম্ভিদামগ্গে (পটি. ম. ১.২১২) ব্রহ্মৰিহারভাৰনা ‘‘সুভৰিমোক্খো’’তি ৰুত্তা, তযিদং উভযম্পি তেন তেন পরিযাযেন ৰুত্তত্তা ন ৰিরুজ্ঝতীতি দট্ঠব্বং.

সব্বসোতি অনৰসেসতো. ন হি চতুন্নং অরূপক্খন্ধানং একদেসোপি তত্থ অৰসিট্ঠোতি. ৰিস্সট্ঠত্তাতি যথাপরিচ্ছিন্নে কালে নিরোধিতত্তা. উত্তমো ৰিমোক্খো নাম অরিযেহেৰ সমাপজ্জিতব্বতো, অরিযফলপরিযোসানত্তা দিট্ঠেৰ ধম্মে নিব্বানপ্পত্তিভাৰতো চ.

২৪৯. অভিভৰতীতি অভিভু (দী. নি. টী. ২.১৭৩; অ. নি. টী. ৩.৬.৬১-৬৫) পরিকম্মং, ঞাণং ৰা. অভিভু আযতনং এতস্সাতি অভিভাযতনং, ঝানং. অভিভৰিতব্বং ৰা আরম্মণসঙ্খাতং আযতনং এতস্সাতি অভিভাযতনং, ঝানং. আরম্মণাভিভৰনতো অভিভু চ তং আযতনঞ্চ যোগিনো সুখৰিসেসানং অধিট্ঠানভাৰতো মনাযতনধম্মাযতনভাৰতো চাতিপি সসম্পযুত্তং ঝানং অভিভাযতনং. তেনাহ ‘‘অভিভৰনকারণানী’’তিআদি. তানীতি অভিভাযতনসঞ্ঞিতানি ঝানানি. সমাপত্তিতো ৰুট্ঠিতস্স আভোগো পুব্বভাগভাৰনাৰসেন ঝানক্খণে পৰত্তং অভিভৰনাকারং গহেত্ৰা পৰত্তোতি দট্ঠব্বো. পরিকম্মৰসেন অজ্ঝত্তং রূপসঞ্ঞী, ন অপ্পনাৰসেন. ন হি পটিভাগনিমিত্তারম্মণা অপ্পনা অজ্ঝত্তৰিসযা সম্ভৰতি. তং পন অজ্ঝত্ত পরিকম্মৰসেন লদ্ধং কসিণনিমিত্তং অসুৰিসুদ্ধমেৰ হোতি, ন বহিদ্ধা পরিকম্মৰসেন লদ্ধং ৰিয ৰিসুদ্ধং.

পরিত্তানীতি যথালদ্ধানি সুপ্পসরাৰমত্তানি. তেনাহ ‘‘অৰড্ঢিতানী’’তি. পরিত্তৰসেনেৰাতি ৰণ্ণৰসেন আভোগে ৰিজ্জমানেপি পরিত্তৰসেনেৰ ইদমভিভাযতনং ৰুত্তং. পরিত্ততা হেত্থ অভিভৰনস্স কারণং. ৰণ্ণাভোগে সতিপি অসতিপি অভিভাযতনভাৰনা নাম তিক্খপঞ্ঞস্সেৰ সম্ভৰতি, ন ইতরস্সাতি ‘‘ঞাণুত্তরিকো পুগ্গলো’’তি. অভিভৰিত্ৰা সমাপজ্জতীতি এত্থ অভিভৰনং সমাপজ্জনঞ্চ উপচারজ্ঝানাধিগমসমনন্তরমেৰ অপ্পনাঝানুপ্পাদনন্তি আহ ‘‘সহ নিমিত্তুপ্পাদেনেৰেত্থ অপ্পনং পাপেতী’’তি. সহ নিমিত্তুপ্পাদেনাতি চ অপ্পনাপরিৰাসাভাৰস্স লক্খণৰচনমেতং. যো ‘‘খিপ্পাভিঞ্ঞো’’তি ৰুচ্চতি, ততোপি ঞাণুত্তরস্সেৰ অভিভাযতনভাৰনা. এত্থাতি এতস্মিং নিমিত্তে. অপ্পনং পাপেতীতি ভাৰনা অপ্পনং নেতি.

এত্থ চ কেচি ‘‘উপ্পন্নে উপচারজ্ঝানে তং আরব্ভ যে হেট্ঠিমন্তেন দ্ৰে তযো জৰনৰারা পৰত্তন্তি, তে উপচারজ্ঝান পক্খিকা এৰ, তদনন্তরঞ্চ ভৰঙ্গপরিৰাসেন উপচারাসেৰনায চ ৰিনা অপ্পনা হোতি, সহ নিমিত্তুপ্পাদেনেৰ অপ্পনং পাপেতী’’তি ৰদন্তি, তং তেসং মতিমত্তং. ন হি পারিৰাসিকপরিকম্মেন অপ্পনাৰারো ইচ্ছিতো, নাপি মহগ্গতপ্পমাণজ্ঝানেসু ৰিয উপচারজ্ঝানে একন্ততো পচ্চৰেক্খণা ইচ্ছিতব্বা, তস্মা উপচারজ্ঝানাধিগমতো পরং কতিপযভৰঙ্গচিত্তাৰসানে অপ্পনং পাপুণন্তো ‘‘সহ নিমিত্তুপ্পাদেনেৰেত্থ অপ্পনং পাপেতী’’তি ৰুত্তো. ‘‘সহ নিমিত্তুপ্পাদেনা’’তি চ অধিপ্পাযিকমিদং ৰচনং, ন নীতত্থং, অধিপ্পাযো ৰুত্তনযেনেৰ ৰেদিতব্বো.

ন অন্তোসমাপত্তিযং তদা তথারূপস্স আভোগস্স অসম্ভৰতো, সমাপত্তিতো ৰুট্ঠিতস্স আভোগো পুব্বভাগভাৰনাৰসেন ঝানক্খণে পৰত্তং অভিভৰনাকারং গহেত্ৰা পৰত্তোতি দট্ঠব্বং. অভিধম্মট্ঠকথাযং (ধ. স. অট্ঠ. ২০৪) পন ‘‘ইমিনা পনস্স পুব্বভাগো কথিতো’’তি ৰুত্তং. অন্তোসমাপত্তিযং তথা আভোগাভাৰে কস্মা ‘‘ঝানসঞ্ঞাযপী’’তি ৰুত্তন্তি আহ ‘‘অভিভৰ…পে… অত্থী’’তি.

ৰড্ঢিতপ্পমাণানীতি ৰিপুলপ্পমাণানীতি অত্থো, ন একঙ্গুলদ্ৰঙ্গুলাদিৰসেন ৰড্ঢিতপ্পমাণানীতি তথা ৰড্ঢনস্সেৰেত্থ অসম্ভৰতো. তেনাহ ‘‘মহন্তানী’’তি.

রূপে সঞ্ঞা রূপসঞ্ঞা, সা অস্স অত্থীতি রূপসঞ্ঞী, ন রূপসঞ্ঞী অরূপসঞ্ঞী. সঞ্ঞাসীসেন ঝানং ৰদতি. রূপসঞ্ঞায অনুপ্পাদনমেৰেত্থ অলাভিতা. বহিদ্ধাৰ উপ্পন্নন্তি বহিদ্ধাৰত্থুস্মিংযেৰ উপ্পন্নং. অভিধম্মে পন ‘‘অজ্ঝত্তং অরূপসঞ্ঞী বহিদ্ধা রূপানি পস্সতি পরিত্তানি সুৰণ্ণদুব্বণ্ণানি, অপ্পমাণানি সুৰণ্ণদুব্বণ্ণানী’’তি এৰং চতুন্নং অভিভাযতনানং আগতত্তা অভিধম্মট্ঠকথাযং (ধ. স. অট্ঠ. ২০৪) ‘‘কস্মা পন যথা সুত্তন্তে – ‘অজ্ঝত্তং রূপসঞ্ঞী একো বহিদ্ধা রূপানি পস্সতি পরিত্তানী’তিআদি ৰুত্তং, এৰং অৰত্ৰা ইধ চতূসুপি অভিভাযতনেসু অজ্ঝত্তং অরূপসঞ্ঞিতাৰ ৰুত্তা’’তি চোদনং কত্ৰা ‘‘অজ্ঝত্তরূপানং অনভিভৰনীযতো’’তি কারণং ৰত্ৰা ‘‘তত্থ ৰা হি ইধ ৰা বহিদ্ধারূপানেৰ অভিভৰিতব্বানি, তস্মা তানি নিযমতো ৰত্তব্বানীতি তত্রাপি ইধাপি ৰুত্তানি. ‘অজ্ঝত্তং অরূপসঞ্ঞী’তি ইদং পন সত্থু দেসনাৰিলাসমত্তমেৰা’’তি ৰুত্তং.

এত্থ চ ৰণ্ণাভোগরহিতানি সহিতানি চ সব্বানি ‘‘পরিত্তানি সুৰণ্ণদুব্বণ্ণানী’’তি ৰুত্তানি, তথা ‘‘অপ্পমাণানী’’তি দট্ঠব্বানি. অত্থি হি এসো পরিযাযো ‘‘পরিত্তানি অভিভুয্য তানি চে কদাচি ৰণ্ণৰসেন আভুজিতানি হোন্তি সুৰণ্ণদুব্বণ্ণানি অভিভুয্যা’’তি. পরিযাযকথা হি সুত্তন্তদেসনাতি. অভিধম্মে পন নিপ্পরিযাযদেসনত্তা ৰণ্ণাভোগরহিতানি ৰিসুং ৰুত্তানি, তথা সহিতানি. অত্থি হি উভযত্থ অভিভৰনপরিযাযোতি ‘‘অজ্ঝত্তং রূপসঞ্ঞী’’তিআদিনা পঠমদুতিযঅভিভাযতনেসু পঠমৰিমোক্খো, ততিযচতুত্থাভিভাযতনেসু দুতিযৰিমোক্খো, ৰণ্ণাভিভাযতনেসু ততিযৰিমোক্খো চ অভিভৰনপ্পৰত্তিতো সঙ্গহিতো, অভিধম্মে পন নিপ্পরিযাযদেসনত্তা ৰিমোক্খাভিভাযতনানি অসঙ্করতো দস্সেতুং ৰিমোক্খে ৰজ্জেত্ৰা অভিভাযতনানি কথিতানি, সব্বানি চ ৰিমোক্খকিচ্চানি ঝানানি ৰিমোক্খদেসনাযং ৰুত্তানি. তদেতং ‘‘অজ্ঝত্তং রূপসঞ্ঞী’’তি আগতস্স অভিভাযতনদ্ৰযস্স অভিধম্মে অভিভাযতনেসু অৰচনতো ‘‘রূপী রূপানি পস্সতী’’তিআদীনঞ্চ সব্বৰিমোক্খকিচ্চসাধারণৰচনভাৰতো ৰৰত্থানং কতন্তি ৰিঞ্ঞাযতি.

‘‘অজ্ঝত্তরূপানং অনভিভৰনীযতো’’তি ইদং অভিধম্মে কত্থচিপি ‘‘অজ্ঝত্তং রূপানি পস্সতী’’তি অৰত্ৰা সব্বত্থ যং ৰুত্তং ‘‘বহিদ্ধারূপানি পস্সতী’’তি, তস্স কারণৰচনং. তেন যং অঞ্ঞহেতুকং, তং তেন হেতুনা ৰুত্তং, যং পন দেসনাৰিলাসহেতুকং অজ্ঝত্তং অরূপসঞ্ঞিতায এৰ অভিধম্মে ৰচনং, ন তস্স অঞ্ঞং কারণং মগ্গিতব্বন্তি দস্সেতি. অজ্ঝত্তরূপানং অনভিভৰনীযতা চ তেসং বহিদ্ধারূপানং ৰিয অৰিভূতত্তা, দেসনাৰিলাসো চ যথাৰুত্তৰৰত্থানৰসেন ৰেদিতব্বো, ৰেনেয্যজ্ঝাসযৰসেন ৰিজ্জমানপরিযাযকথনভাৰতো. ‘‘সুৰণ্ণদুব্বণ্ণানী’’তি এতেনেৰ সিদ্ধত্তা নীলাদিঅভিভাযতনানি ন ৰত্তব্বানীতি চে? ন, নীলাদীসু কতাধিকারানং নীলাদিভাৰস্সেৰ অভিভৰনকারণত্তা. ন হি তেসং পরিসুদ্ধাপরিসুদ্ধৰণ্ণানং পরিত্ততা তদপ্পমাণতা ৰা অভিভৰনকারণং, অথ খো নীলাদিভাৰো এৰাতি. এতেসু চ পরিত্তাদিকসিণরূপেসু যং চরিতস্স ইমানি অভিভাযতনানি ইজ্ঝন্তি, তং দস্সেতুং ‘‘ইমেসু পনা’’তিআদি ৰুত্তং.

সব্বসঙ্গাহিকৰসেনাতি সকলনীলৰণ্ণনীলনিদস্সননীলনিভাসানং সাধারণৰসেন. ৰণ্ণৰসেনাতি সভাৰৰণ্ণৰসেন. নিদস্সনৰসেনাতি পস্সিতব্বতাৰসেন. ওভাসৰসেনাতি সপ্পভাসতায অৰভাসনৰসেন. উমাপুপ্ফন্তি অতসিপুপ্ফং. নীলমেৰ হোতি ৰণ্ণসঙ্করাভাৰতো. বারাণসিযং ভৰন্তি বারাণসিযং সমুট্ঠিতং.

তে ধম্মেতি তে সতিপট্ঠানাদিধম্মে চেৰ অট্ঠৰিমোক্খধম্মে চ. চিণ্ণৰসীভাৰাযেৰ তত্থ অভিৰিসিট্ঠায পঞ্ঞায পরিযোসানুত্তরং সতং গতা অভিঞ্ঞাৰোসানপারমিপ্পত্তা.

২৫০. সকলট্ঠেনাতি (দী. নি. টী. ৩.৩৪৬; অ. নি. টী. ৩.১০.২৫) সকলভাৰেন, অসুভনিমিত্তাদীসু ৰিয একদেসে অট্ঠত্ৰা অনৰসেসতো গহেতব্বট্ঠেনাতি অত্থো. যথা খেত্তং সস্সানং উপ্পত্তিট্ঠানং ৰড্ঢিট্ঠানঞ্চ, এৰমেৰ তংতংসম্পযুত্তধম্মানন্তি আহ ‘‘খেত্তট্ঠেনা’’তি. পরিচ্ছিন্দিত্ৰাতি ইদং উদ্ধং অধো তিরিযন্তি যোজেতব্বং. পরিচ্ছিন্দিত্ৰা এৰ হি সব্বত্থ কসিণং ৰড্ঢেতব্বং. তেন তেন কারণেনাতি উপরিআদীসু তেন তেন কসিণেন. যথা কিন্তি আহ – ‘‘আলোকমিৰ রূপদস্সনকামো’’তি, যথা দিব্বচক্খুনা উদ্ধং চে রূপং দট্ঠুকামো, উদ্ধং আলোকং পসারেতি, অধো চে, অধো, সমন্ততো চে রূপং দট্ঠুকামো, সমন্ততো আলোকং পসারেতি, এৰং সব্বকসিণন্তি অত্থো. একস্সাতি পথৰীকসিণাদীসু একেকস্স. অঞ্ঞভাৰানুপগমনত্থন্তি অঞ্ঞকসিণভাৰানুপগমনদীপনত্থং, অঞ্ঞস্স ৰা কসিণভাৰানুপগমনদীপনত্থং. ন হি অঞ্ঞেন পসারিতকসিণং ততো অঞ্ঞেন পসারিতকসিণভাৰং উপগচ্ছতি, এৰম্পি নেসং অঞ্ঞকসিণসম্ভেদাভাৰো ৰেদিতব্বো. ন অঞ্ঞং পথৰীআদি. ন হি উদকেন ঠিতট্ঠানে সসম্ভারপথৰী অত্থি. অঞ্ঞকসিণসম্ভেদোতি আপোকসিণাদিনা সঙ্করো. সব্বত্থাতি সব্বেসু সেসকসিণেসু. একদেসে অট্ঠত্ৰা অনৰসেসফরণং পমাণস্স অগ্গহণতো অপ্পমাণং. তেনেৰ হি নেসং কসিণসমঞ্ঞা. তথা হি ‘‘তঞ্হী’’তিআদিমাহ. তত্থ চেতসা ফরন্তোতি ভাৰনাচিত্তেন আরম্মণং করোন্তো. ভাৰনাচিত্তঞ্হি কসিণং পরিত্তং ৰা ৰিপুলং ৰা সকলমেৰ মনসি করোতি.

কসিণুগ্ঘাটিমাকাসে পৰত্তং ৰিঞ্ঞাণং ফরণঅপ্পমাণৰসেন ‘‘ৰিঞ্ঞাণকসিণ’’ন্তি ৰুত্তং. তথা হি তং ‘‘ৰিঞ্ঞাণ’’ন্তি ৰুচ্চতি. কসিণৰসেনাতি উগ্ঘাটিতকসিণৰসেন কসিণুগ্ঘাটিমাকাসে উদ্ধংঅধোতিরিযতা ৰেদিতব্বা. যত্তকঞ্হি ঠানং কসিণং পসারিতং, তত্তকং আকাসভাৰনাৰসেন আকাসং হোতীতি. এৰং যত্তকং ঠানং আকাসং হুত্ৰা উপট্ঠিতং, তত্তকং আকাসমেৰ হুত্ৰা ৰিঞ্ঞাণস্স পৰত্তনতো আগমনৰসেন ৰিঞ্ঞাণকসিণেপি উদ্ধংঅধোতিরিযতা ৰুত্তাতি ‘‘কসিণুগ্ঘাটিমাকাসৰসেন তত্থ পৰত্তৰিঞ্ঞাণে উদ্ধংঅধোতিরিযতা ৰেদিতব্বা’’তি আহ.

২৫২. ৰুত্তোযেৰ ৰম্মিকসুত্তে. নিস্সিতঞ্চ ছৰত্থুনিস্সিতত্তা ৰিপস্সনাঞাণস্স. পটিবদ্ধঞ্চ তেন ৰিনা অপ্পৰত্তনতো কাযসঞ্ঞিতানং রূপধম্মানং আরম্মণকরণতো চ. সুট্ঠু ভাতি ওভাসতীতি ৰা সুভো. কুরুৰিন্দজাতিআদিজাতিৰিসেসোপি মণি আকরপারিসুদ্ধিমূলকো এৰাতি আহ ‘‘সুপরিসুদ্ধআকরসমুট্ঠিতো’’তি. দোসনীহরণৰসেন পরিকম্মনিপ্ফত্তীতি আহ ‘‘সুট্ঠু কতপরিকম্মো অপনীতপাসাণসক্খরো’’তি. ধোৰনৰেধনাদীহীতি চতূসু পাসাণেসু ধোৰনেন চেৰ কাল়কাদিঅপহরণত্থায সুত্তেন আৰুননত্থায চ ৰিজ্ঝনেন. তাপসণ্হকরণাদীনং সঙ্গহো আদি-সদ্দেন. ৰণ্ণসম্পত্তিন্তি সুত্তস্স ৰণ্ণসম্পত্তিং.

মণি ৰিয করজকাযো পচ্চৰেক্খিতব্বতো. আৰুতসুত্তং ৰিয ৰিপস্সনাঞাণং অনুপৰিসিত্ৰা ঠিতত্তা. চক্খুমা পুরিসো ৰিয ৰিপস্সনালাভী ভিক্খু সম্মদেৰ তস্স দস্সনতো. তদারম্মণানন্তি রূপধম্মারম্মণানং. ফস্সপঞ্চমকচিত্তচেতসিকগ্গহণেন গহিতধম্মাপি ৰিপস্সনাচিত্তুপ্পাদপরিযাপন্না এৰাতি ৰেদিতব্বং. এৰঞ্হি তেসং ৰিপস্সনাঞাণগতিকত্তা ‘‘আৰুতসুত্তং ৰিয ৰিপস্সনাঞাণ’’ন্তি ৰচনং অৰিরোধিতং হোতি.

ঞাণস্সাতি পচ্চৰেক্খণঞাণস্স. যদি এৰং ঞাণস্স ৰসেন ৰত্তব্বং, ন পুগ্গলস্সাতি আহ ‘‘তস্স পনা’’তিআদি. মগ্গস্স অনন্তরং, তস্মা লোকিযাভিঞ্ঞানং পরতো ছট্ঠাভিঞ্ঞায পুরতো ৰত্তব্বং ৰিপস্সনাঞাণং. এৰং সন্তেপীতি যদিপাযং ঞাণানুপুব্বট্ঠিতি, এৰং সন্তেপি এতস্স অন্তরা ৰারো নত্থীতি পঞ্চসু লোকিযাভিঞ্ঞাসু কথিতাসু আকঙ্খেয্যসুত্তাদীসু (ম. নি. ১.৬৪ আদযো) ৰিয ছট্ঠাভিঞ্ঞা কথেতব্বাতি এতস্স অনভিঞ্ঞালক্খণস্স ৰিপস্সনাঞাণস্স তাসং অন্তরা ৰারো ন হোতি, তস্মা তত্থ অৰসরাভাৰতো ইধেৰ রূপাৰচরচতুত্থজ্ঝানানন্তরমেৰ দস্সিতং ৰিপস্সনাঞাণং. যস্মা চাতি চ-সদ্দো সমুচ্চযত্থো. তেন ন কেৰলং তদেৰ, অথ খো ইদম্পি কারণং ৰিপস্সনাঞাণস্স ইধেৰ দস্সনেতি ইমমত্থং দীপেতি. দিব্বেন চক্খুনা ভেরৰরূপং পস্সতোতি এত্থ ইদ্ধিৰিধঞাণেন ভেরৰং রূপং নিম্মিনিত্ৰা চক্খুনা পস্সতোতি ৰত্তব্বং, এৰম্পি অভিঞ্ঞালাভিনো অপরিঞ্ঞাণৰত্থুকস্স ভযসন্তাসো উপ্পজ্জতি উচ্চৰালিকৰাসীমহানাগত্থেরস্স ৰিয. ইধাপীতি ইমস্মিং ৰিপস্সনাঞাণেপি, ন সতিপট্ঠানাদীসু এৰাতি অধিপ্পাযো.

২৫৩. মনোমযিদ্ধিযং চিণ্ণৰসিতায অভিঞ্ঞা ৰোসানপারমিপ্পত্ততা ৰেদিতব্বাতি যোজনা. মনেন নিব্বত্তন্তি অভিঞ্ঞামনেন নিব্বত্তিতং. তং সদিসভাৰদস্সনত্থমেৰাতি সণ্ঠানতোপি ৰণ্ণতোপি অৰযৰৰিসেসতোপি সদিসভাৰদস্সনত্থমেৰ. সজাতিযং ঠিতো, ন নাগিদ্ধিযা অঞ্ঞজাতিরূপো. সুপরিকম্মকতমত্তিকাদযো ৰিয ইদ্ধিৰিধঞাণং ৰিকুব্বনকিরিযায নিস্সযভাৰতো.

২৫৫. অপ্পকসিরেনেৰাতি অকিচ্ছেনেৰ.

২৫৬. মন্দো উত্তানসেয্যকদারকোপি ‘‘দহরো’’তি ৰুচ্চতীতি ততো ৰিসেসনত্থং ‘‘যুৰা’’তি ৰুত্তং. যুৰাপি কোচি অনিচ্ছনতো অমণ্ডনসীলো হোতীতি ততো ৰিসেসনত্থং ‘‘মণ্ডনকজাতিকো’’তি ৰুত্তং. তেন ৰুত্তং ‘‘যুৰাপী’’তিআদি. কাল়তিলপ্পমাণা বিন্দৰো কাল়তিলকানি. নাতিকম্মাসতিলপ্পমাণা বিন্দৰো তিলকানি. ৰঙ্কং নাম পিযঙ্গং. যোব্বনপীল়কাদযো মুখদূসিপীল়কা. মুখগতো দোসো মুখদোসো, লক্খণৰচনঞ্চেতং মুখে অদোসস্সপি পাকটভাৰস্স অধিপ্পেতত্তা. যথা ৰা মুখে দোসো, এৰং মুখে অদোসোপি মুখদোসো সরলোপেন, মুখদোসো চ মুখদোসো চ মুখদোসোতি একসেসনযেনপেত্থ অত্থো দট্ঠব্বো. এৰঞ্হি পরেসং সোল়সৰিধং চিত্তং পাকটং হোতীতি ৰচনং সমত্থিতং হোতি.

২৫৯. পটিপদাৰসেনাতি যথারহং সমথৰিপস্সনামগ্গপটিপদাৰসেন. অট্ঠসু কোট্ঠাসেসূতি সতিপট্ঠানাদীসু বোধিপক্খিযধম্মকোট্ঠাসেসু, ৰিমোক্খকোট্ঠাসেসু ৰাতি ইমেসু অট্ঠসু কোট্ঠাসেসু. সেসেসূতি ৰুত্তাৰসেসেসু অভিভাযতনকোট্ঠাসাদীসু. সেসং সুৰিঞ্ঞেয্যমেৰ.

মহাসকুলুদাযিসুত্তৰণ্ণনায লীনত্থপ্পকাসনা সমত্তা.